LALORAN TASI HO RITMU HAKMATEK

Rai-henek tasi bisi-bisu mai ho melodia klasiku, susar atu komprende saida mak nia dehan, hamnasa mihis haree manu-fuik semo bá-mai iha tasi laran, anin hakmatek hamout ha'u hodi haree Ataúro nia furak husi tasi balu.

Bee sanak, sulin husi mota Comoro ulun, hafurak lokraik ne'e, peskadór ho nia bero bidu iha tasi laran tuir ritmu laloran.

Redi ikan naklekar iha tasi laran lori esperansa ba peskadór sira, husi sikun ba sikun labarik ki'ik ho isin molik haklalak hasoru laloran tasi, loron matan ho nia kór osan-mean leno bee lihun iha mota Comoro ain.

Malae mutin, isin boot ain aas haheno nia kamera ho oin mean tan loron nia manas. Feto maluk balu ho kalsa badak no sapatu halai bá-mai. Ha'u nafatin tuur hodi haree labarik mane-ki'ik ne'ebé nani bá-mai hanesan ikan iha bee lihun ho kór xokolate.

Husik dook haree rai-henek mutin nia furak iha estatua Kristu Rei nia hun, ha'u nafatin tuur no liman bidu iha telemovel hakerek saida mak matan haree no fuan sente liman bidu tuir ritmu kakutak haruka.

Lokraik di'ak

Husi Mota Ain Comoro
Dili, loron-12 fulan-Janeiru tinan-2017

DOMIN LOLOS SUSAR ATU SUKAT

Sentimentu domin hanesan abstratu bele sente maibé labele kaer, domin kesi fuan no sai sasin ba domin, iha lokraik ida bainhira tuur iha tasi ibun mane ida dehan "bainhira ita laiha forsa kuandu haree no besik ba ema ne'ebé ita hadomi hanesan fó energia foun no forsa liután"

Domin la haree ba nia fiziku maibé domin liga ho problema fuan. Dala barak domin mós halo ita sai delek no ta'uk atu lakon ema ne'ebé ita hadomi, bainhira liafuan moruk sai husi ema ne'ebé ita hadomi nia ibun forsa ne'e hanesan lakon husi isin-lolon. 

Ida ne'e mak ha'u aprende kona-ba domin no susar atu pinta ho liafuan...
Obrigada domin fó ona fiar hodi hakores moris ne'e.


Didika ba sira ne'ebé hadomi ho laran no servi domin ne'e ho fuan tomak.