LAIHA SALA HARAIK AN

Dala wain ita tuur no haree de'it ba ita an. Koko hakat pasu ida ba oin haree mós ba sorin-sorin, saida mak sala iha ne'ebá no presiza hadi'a. Labele haree buat hotu hanesan lixu bainhira ita la hakbesik no haree realidade iha matan laran. 

Dala wain ita mós tau an iha pontu ne'ebé aas liu. Matan delek haree ba kraik, liman naruk kaer ba fitun. Maibé haluha tiha pontu ne'ebé aas risku mós sei boot, anin sei huu maka'as no ida iha kraik ne'e mak sei metin hodi fó forsa. 

Moris hanesan apagadór ohin hakerek aban apaga. Saida loos mak ó sei halo iha loron ne'e. Atu loron aban ema sei rai hanesan lembrasa ne'ebé metin iha fuan no apaga de'it buat aat ne'ebé halo monu ó.

                                            Ai-mutin, 27 fulan-Jullu tinan-2017

HA’U-NIA VOTUS DETERMINA HA’U-NIA FUTURU

Ohin marka istória ida tan ba Timór-Leste, ema hotu ho konxiénsia tuir elisaun parlamentár. Sé mak manán sei kaer ukun. Importante mak tau interese povu aas liu buat hotu. 

Tinan barak ami halerik ba bee moos.
Tinan barak ami halerik ba estrada
Tinan barak ami halerik ba eletrisidade
Tinan barak ami helerik ba fasilidade públiku.

Ohin ami hamriik iha liña naruk hodi deside ami-nia votus.
Ohin ami hamriik hodi ezije ami-nia direitu liuhusi saida mak imi promete liuhusi ami-nia votus.
Promesas barak tebetebes. 

Bainhira hamriik iha liña ida hanoin hahú sanak, fuan mós la hakmatek, liman nakdedar atu hili loos ida ne'ebé. 

Ho fuan boot no mehi ida bainhira haree ba realidade ho lian makhusu, saida mak sira halo ona durante kaer ukun. 

Koko haree buat foun no fó oportunidade ba ida ne'ebé foin mosu, lia makhusu nafatin mosu, nia merese atu kaer ukun ka lae. 

Sé loos mak manán, ukun ho di'ak ba
Ida ne'ebé lakon simu ho fuan boot ba. 

Parabéns ba ita hotu ne'ebé selebra ona festa demokrasia ne'e.

Dili, loron-22 fulan-Jullu tinan-2017

FOHO-LOLON TATOLI "PARTE II"

Iha foho-lolon ha’u hamriik nakonu ho esperansa. Tinan-rua liu daudaun laiha novidade kona-ba Papá. Tilun ne’e sente resik ona ho Ana, Abia no Anato nia lia-mahusuk “Papa iha ne’ebé?”. Ha’u hirus kuandu hanoin hetan Papa-nia oin. Tansá nia tenke la’o husik hela ami na’in-tolu iha tempu ne’ebé ami presiza hela inan ida nia domin.

Dadeer ne’e lahanesan baibain, ha’u hadeer sedu tuur iha laletek Fatuahi hateke ba terminál Becora. Loro-matan ho nia kór osan-mean baku kona foho-lolon. Hafalun an ho lipa riskadu ne’ebé hahú malahuk ha’u tuur ho matan-been.

Lakleur ha’u rona tarutu iha dapur laran. Ha’u nafatin tuur iha fatin maibé matan buka tuir saida mak akontese iha ne’ebá. Ana hamriik iha odamatan hakfodak bainhira haree ha’u tuur ho matan-been nakonu.

“Amaun, iha problema ruma ga!” ko’alia nune’e hakat daudaun mai tuur iha ha’u nia sorin.

“Ha’u saudades Mamá, horikalan nia mai vizita ita liuhusi ha’u-nia mehi.”

“Ha’u mós saudades Mamá karik nia sei iha, ita sei la moris hanesan ne’e.”

“Haree ó bá da’an mantolun ona. Dadeer ne’e ha’u ho Acau sei bá sedu markadu.”

Ko’alia nune’e hakat daudaun hadook an husi Ana. Hanesan mane-boot iha família laran ha’u lakohi tau todan hotu ba alin na’in-tolu. Hakat tama dapur laran foti ai-suak hamoos daudaun batar du’ut.

“Ana, kuandu mantolun tasak ona keta haluha bolu, ha’u iha toos-laran hela.”

Iha ha’u-nia nonook ha’u hanoin hela saida mak ha’u sei halo hodi ajuda avó-feto, osan husi fa’an mantolun da’an la to’o hodi ajuda presiza iha uma-laran. Avó-feto mós ferik ba daudaun, alin sira mós hahú boot ba beibeik. Saida loos mak ha’u sei halo ba sira. Ha’u lakohi sira hasoru situasaun hanesan ho ha’u.

Batar iha toos laran mós hahú boot, loro-matan baku kona nia funan lori espera foun. Karik nia isin ona bele hakmaan tiha naha ne’e. Manu-fuik sira semo bá-mai iha ai-look tutun ho nia hananu kura saudades ne’e, fó hanoin fali mai ha’u Mamá nia liafuan;

 “Bainhira ó sente triste no mesak, rona manu-fuik sira nia lian, karik sira sei rona ó-nia halerik no tatoli ba ema seluk.”

Ha’u hamriik iha laletek no mout iha batar tahan sira nia leet. Ai-farina tahan hahú buras, ulun sei moras ba modo loron hira ba oin. Tekiteki Acau hamriik iha ha’u-nia kotuk hodi halo ha’u hakfodak, nia gosta no badinas tebes halo ema seluk hakfodak.

“Prepara an ona, ó atu bá fa’an mantolun da’an ho oin-fo’er hanesan ne’e ga?”

“Ana, foin da’an, nia seidauk bolu katak seidauk tasak.”

Nia tuur iha ha’u nia sorin hodi dehan “Horisehik ha’u hasoru tiu João iha merkadu nia dehan hasoru ó nia Apá iha ne’ebá.

“Tinan-rua sira dehan mak hanesan ne’e hela de’it. Karik nia hadomi husik nia mak mai buka ami.” Hatán ho oin-buis.

Ha’u hirus tebes bainhira temi nia naran. Maibé labele bosok, fuan ne’e saudades hela nia. Ami tuur hateke ba rai-tetuk ne’ebé nakonu ho uma mesak furak no kór oioin. Acau nia liman latan iha ha’u nia kabaas ho oin-kontente.

“Ambere, semana oin ha’u hahú fali eskola, ha’u-nia Amá ko’alia ona ho Directór eskola.”

“Ne’e di’ak ba ó, haree eskola halo didi’ak.”

“Nu’usá ó la eskola fali, lokraik mak ita fa’an mantolun da’an hamutuk.”

“Ó, hatene liu ha’u nia moris.”

Ko’alia nune’e hamriik daudaun, “ Ana bolu ona.” Ami na’in-rua la’o tuituir malu, ha’u triste bainhira rona novidades ne’e kuandu Acau eskola ona ha’u sei la’o mesak. Ana arruma ona mantolun da’an iha nia fatin, ha’u hakat tama hariis-fatin fase oin no liman -ain ho hamnasa mihis, Acau prontu ona ho nia raga. Ami na’in-rua la’o tuir foho-lolon nakonu ho esperansa ema sei hola ami-nia sasán no sei fila sedu deskansa no prepara tan ba lokraik nian.

Bainhira to’o iha lurón boot ha’u haree mane morena isin lotuk no ladún aas hamriik fila kotuk mai lurón sorin. Ha’u la’o ba lurón sorin maibé matan ne’e nafatin fihir ba nia. Acau husi dook hakilar.

“Ambere mai lailais ona bis foin atu sai.”

Ha’u mós halai lailais hamriik iha Acau nia sorin, bainhira fila kotuk mane morena ne’e lakon ona husi ha’u-nia haree, hanesan lakon buat boot ida ne’ebé ha’u nunka imajina. Dadeer ne’e mantolun-da’an folin loos no hotu sedu.

Bainhira fila ami sempre liuhusi tiu João nia kios, husi dook de’it nia hamnasa hasoru ona ami na’in-rua, hodi dehan

“Ambere, ó-nia Apá ohin rai hela osan balu ba ó no nia alin sira, nia dehan semana oin nia fila ba hamutuk ho imi.”

“Di’ak tiun, tansá tiu labele dehan ba nia hein lai. Ha’u hakarak hasoru mós nia.” Hatán ho matan-been nakonu no hirus.

“Ambere, ó labele hanesan ne’e. Karik ó-nia Apá la’o husik hela imi ho razaun ruma.” Tiu João ko’alia nune’e no liman lolo daudaun ba plástiku metan ne’ebé latan iha armáriu leten.

“Ambere, saida mak ha’u dehan ne’e loos ka lae.”

Acau ajuda hiit plástiku metan ne’ebé todan. Ha’u lahatene saida mak iha laran no lakohi buka hatene. Ha’u mak lakohi simu maibé oinsá ho Ana, Abia no Anato. Bainhira to’o iha uma-oin Anato halai hasoru ho kontente.

“Amaun, lori saida mak ne’e.”

“Loke no haree rasik, ohin tiu João mak fó dehan husi Apá.” Ko’alia nune’e no hakat tama dapur laran ho oin-naburut.

“Ambere, nu’usá ó fila mai hatudu oin-aat hanesan ne’e.” Avó-feto hakfodak bainhira haree ha’u.

“Apá, ohin fó tuir sasán balu ba tiu João, nia fó mós osan balu dehan fó ba avó” ko’alia nune’e liman hasai daudaun husi kalsa bolsu entrega envelope ida ba Avó nia liman.

Husi dapur ha’u rona, Anato, Abia no Ana haklalak ho kontente ho prezente ne’ebé mak sira hetan husi mane morena ne’e, “Amaun, Apá hola mós amaun nia sapatu foun.” Ha’u nonook no tuur metin iha ha’u nia fatin hanesan buat ida la kona. Lakleur Ana hakat mai tuur iha ha’u nia sorin hodi entre surat tahan mutin idan ne’ebé hakerek;

“Deskulpa, tinan hirak nia laran Apá husik imi moris mesak, iha tempu ne’ebé imi foin lakon inan ida.”

Hetok surat ne’e halo ha’u hirus liután. Semana ida liu daudaun ha’u nafatin halo atividade hanesan baibain hodi hein, biar Acau la hamutuk ona ho ha’u. Iha dadeer ida bainhira tuur iha toos laran. Ha’u rona no sente hakat no iis ne’ebé tempu barak lakon ona husi ha’u nia sorin. Hakat ne’e fó hanoin fali mai ha’u kona-ba Papá.

Iha ha’u nia nonook ha’u nafatin reza no tau esperansa ba manu-fuik sira-nia hananu, sekarik saida mak Mamá dehan loos buat ne’ebé ha’u hakarak iha minutu ida ne’e mak Papa nia prezensa. Liu tiha minutu balu ha’u nafatin tuur iha batar tahan sira nia leet.

Hakat ne’e besik tan mai, ha’u fila oin hateke ba kotuk Papá hamriik ona iha ha’u nia kotuk hodi dehan

“Deskulpa amaun, ha’u hatene ó hirus, ó iha direitu duni atu hirus Papá, obrigada  hatudu ó nia resposabilidade nu’udar maun-boot ida iha uma-laran hodi tau matan ba ó-nia alin sira”

Ha’u nonook no hakturuk matan-been iha hasaan. Sentimentu hirus no kontente kahur malu, isin-lolon nafatin hatudu revolta bainhira Papá hakbesik mai hakuak ha’u.

“Papá la’o tempu barak husik hela ami mesak tansá iha tempu hanesan ne’e foin hanoin atu buka tuir ami.”

“Papá iha razaun I razaun ne’ebé susar atu ko’alia sai ho liafuan, bainhira ó-nia inan mate, Papá-nia mundu hanesan para iha momentu ne’e kedas. Papá lakon esperansa ba moris no haluha tiha katak Papá iha oan presiza hela domin husi aman ida.” Ko’alia mai ho matan-been.

Avó-feto, Anato, Abia no Ana halai mai hakuak ha’u hodi dehan “Amaun perdua ba, la’ós Papá de’it mak lakon Mamá maibé ita hotu, bainhira Papá filafali mai ita ne’e hatudu katak nia hadomi mós ita.”  Ha’u nonook no hakuak Papá ho liman rua. Obrigado manu-fuik imi tatoli ona ha’u-nia halerik.

Dili, loron 7 fulan-Jullu tinan-2017