Mensajen badak ne’ebé Sonia haruka ba mane ne’ebé nia gosta, matan fihir hela de’it ba telefone ne’ebé latan iha kama leten, perguntas oioin mosu iha ulun “nia seidauk lee mensajen ne’e ou nia ta’uk atu hatán.”
Dadeer ne’e Sonia bá vizita Ana iha nia uma, Sonia hamnasa bainhira haree hetan Anato. Anato komesa hatudu ta’uk hakbesik Sonia no hatudu momoos bainhira Sonia bá vizita sira. Sonia halimar to’o lokraik maibé Anato deside la’o pasiar ho nia kolega sira.
Hein to’o lokraik Anato la mosu hela de’it mai, Sonia komesa hatudu oin baruk no deside fila bá nia uma. Bainhira atu fila Sonia dehan ba Ana “ita mai halimar ho imi, uma-na’in laiha fali.” Ho oin-naburut Sonia mós bá daudaun.
Kalan tuirmai ho númeru telefone hanesan, Anato simu hikas mensajen badak dehan.
“Doben, tansá ha’u bá ó-nia uma, ó la’o lakon tiha ne’e. Ó la gosta ho ha’u-nia prezensa kah.?”
Anato simu mensajen badak ne’e ho oin-hakfodak “ ema ne’e nu’usá mak haruka hela de’it mensajen mai.” foin mak atu rai telefone iha meza leten mensajen ida tama tan.
Bainhira haree númeru hanesan Anato ho aten-barani hatán ba mensajen badak ne’e.
“Sonia, ó haruka mensajen sala karik.?”
Liu de’it minutu ida Sonia hatán “deskulpa, ha’u manda sala ba ó, Ana toba ona ga.?”
“Sin, nia toba ona. Entaun loos ona ha’u atu konfirma de’it kona-ba mesajen ne’e.”
Dúvida hotu lakon iha minutu balu ho resposta ne’ebé Sonia fó, foin mak taka matan tekiteki mensajen ida tama tan.
“Doben, toba ona ga?”
Ho ibun murmura Anato dehan “rai-na’in ida-ne’ebé mak kalan ema atu toba ona mós nia haruka hela de’it mensajen mai.” Liman lamas ba telefone ne’ebé latan iha meza leten, Anato hakfodak bainhira haree númeru hanesan mak manda mensajen.
“Ha’u hadomi ó, ha’u hatene Ana toba ona ne’ebé ó lalika ta’uk ida.”
“Ó, haruka sah mensajen mak mai ne’e” hatán ho hakfodak.
“Ó, baibain de’it, ha’u hatene ó mós gosta hela ha’u, haree husi fíziku ha’u bonita no isin-di’ak liu Ana.”
Ho hirus Anato hatán “ó bulak ona karik, ka matebian sira mak babeur ó.”
“Sala kah sei ha’u hadomi ó, ha’u mós feto.”
Haree ba Ana ne’ebé toba iha nia sorin Anato deside la hatán mensajen ne’e, oras iha relójiu ne’ebé tara didin-lolon hatudu tuku ida kalan. Anato deside aban nia sei hasoru malu ho Sonia ko’alia kona-ba problema ne’e no deside la dehan ba Ana kona-ba mensajen ne’e.
“Aban lokraik, bainhira oras sai servisu ha’u hakarak ita hasoru malu hodi rezolve problema ne’e,”
Sonia simu ho kontente hodi dehan “di’ak, ba ó saida mak labele, hadomi ó, kalan toba keta haluha mehi ha’u.”
Bainhira lee tiha, Anato deside hamoos hasubar tiha mensajen ne’e tan ta’uk Ana kaer toman no ida ne’ebé bele harahun relasaun sira na’in-tolu nian. Anato kalan ne’e la toba nia fihi beibeik Ana hodi hanoin Sonia nia liafuan “haree husi fíziku ha’u bonita no isin-di’ak liu Ana.”
Hanesan baibain Ana prepara matabixu ba Anato no Sandra sira nia oan-feto ne’ebé foin halo-tinan tolu. Molok atu bá nia kaer Ana nia liman hodi dehan;
“Doben, orasida ha’u fila tarde.”
Iha servisu fatin Anato kontinua simu mensajen husi Sonia, mensajen ne’e halo nia tuur lahakmatek “ema ne’e nia hakarak ne’e saida loos.” Lokraik ne’e Sonia no Anato deside hasoru malu iha Restorante Indonesia nian iha Kolmera.
Sonia bonita loos ho vistidu mean talin ne’ebé to’o iha ain-tuur, ibun pinta mean hanesan ho nia vistidu tuur ona iha kadeira ai kór kafé ne’ebé nia oin sé ba estrada. Bainhira Anato para motór iha lurón ninin Sonia foti liman hodi fó sinál katak nia iha ne’e.
Anato hakat tama ba restorante ho hamnasa mihis, nia hakfodak haree Sonia bonita loos no lahanesan baibain. Bainhira to’o iha Sonia nia oin, Anato dada kadeira hodi tuur ho hamnasa Sonia dehan;
“Doben hakarak han saida?”
“Ha’u la hamlaha ida, sé ó hakarak han ó bele hameno ó-nia de’it.”
Sonia kaer Anato nia liman hodi dehan “ó kalma de’it, Ana sei la hirus sah bainhira ó fila tarde, ohin ha’u bá uma nia dehan ohin ó fila tarde. Ne’ebé Santai de’it.” Ko’alia ho maña.
Anato hahú tuur lahakmatek bainhira Sonia kaer beibeik nia liman, Anato la hatene loos atu hahú husi ne’ebé no oinsá. Sonia nia hahalok hatudu nia rai sentimentu domin ba Anato tempu naruk ona ho oin hirus Anato dehan;
“Sonia, ó-nia hakarak ne’e saida loos?”
“Ha’u hakarak ó, ne’e buat ne’ebé mak simples loos.”
“Ó, keta bulak ona karik?”
“Loos, ha’u bulak duni tanba ó.” ko’alia ne’e habesik daudaun hakuak Anato.
“Ó, husik ó-nia liman husi ha’u-nia kabas.”
“Ó, baibain de’it ó mós hakarak hela boot ne’e.”
Anato hirus ho Sonia nia hahalok dudu tiha Sonia nia lima, hamriik la’o daudaun husik hela Sonia iha restorante ne’e. Sonia hamriik ho oin mean dehan “ohin ó lakohi aban ó sei hakarak.” Dadeer de’it ema nia hakat hahú bá-mai iha uma oin no dere odamatan ho hakfodak Ana fanu Anato.
“Ó, haree tok sé mak mai ne’e.”
Anato hakfodak bainhira loke odamatan haree Sonia ho nia ona Fania hi’it nia pasta hamriik iha uma oin. Ana rona Sonia lian no husi kuartu laran mai dehan;
“Sonia, saida mak akontese ba imi na’in rua.”
Sonia tanis no hakuak Ana no dehan “Ana, sebele ami na’in-rua hela iha ne’e. Ha’u-nia banin duni ami na’in-rua hodi dehan ó-nia la’en mate ona haree fila bá ó-nia família.”
“Ó, bele hela iha ne’e, sei la’ós ha’u mak ajuda ó sé tan.” ko’alia nune’ e no hakuak metin Sonia, bainhira haree Anato, Sonia piska-matan tiha.
Anato iha situasaun dilema nia laran, iha sorin seluk nia ferik oan no iha sorin balu nia ferik oan nia bin. Anato ta’uk atu dehan lia-loos ba Ana kona-ba Sonia nia hahalok ne’ebé hakarak kama rua. Biar nia hatene momoos Ana ne’e nia alin rasik.
Ho tempu Anato monu iha Sonia nia lasu, domin nakfera ba rua entre bin ho alin. Anato no Sonia hahú futu lia ba malu rai metin segredu domin klandestina ne’e. Neon taka metin ho domin, fuan nakfila ba fatuk, Ana sai vítima domin iha nia uma-laran rasik.
Sonia hatene katak ida-ne’e hahalok ne’e ladi'ak maibé hanesan feto nia presiza mane ida nia tulun hodi tau matan ba nia no Fania. Anato ta’uk atu lakon Ana no ta’uk mós atu lakon Sonia. Nafatin hatudu oin-midar maibé rai segredu domin klandestina, saida loos mak sei akontese bainhira Ana deskobre kona-ba relasaun domin klandestina ne’e..”
Dili, loron-2 fulan-Fevereiru tinan-2018
