HA'U PRESIZA DOMIN LA’ÓS TUKU TEBE

   “Ama keta mate, ama keta mate” ha'u hakilar ho lian maka'as, ta’uk. Bainhira haree Mamá latan iha simente leten, fuuk belit metin oin, Papa tuur iha kadeira masa matak ho oin mean no liman ain nakdedar hafoin baku Mamá monu tun ba rai no tarutu hanesan has tasak iha nia hun monu kona kalen leten.

Kalan ne'e ha'u ho Asatu tuur iha Mamá nia sorin ho matan-been Papa nafatin tuur no dada iis naruk, hafoin liu tiha minutu lima hakat mai kous Mamá hatoba iha kama leten maibé nafatin la book an.

"Foti freshcare mai see ba Mamá nia inus" Papa ko'alia ho lian nakdedar no ta’uk, ha’u nafatin tanis, doko Mamá nia isin hodi dehan.

“Ama keta mate, ama keta mate”.

Ho lian hirus Papa hakilar “imi bele nonok ka lae?”.

Feshcare nia iis manas halo Mamá hakfodak husi nia dukur, Mamá loke matan no hakuak metin ami na’in-rua hodi tanis.

“Mamá di’ak hela, imi lalika tanis?”. Mamá ko'alia nune'e atu ami labele tanis.
“Mamá labele mate, se Mamá mate ami atu hela ho sé?” 
“Imi mak haree de'it Mamá di'ak hela ne'e, ó lori alin bá han, Mamá toba oituan lae” 

Ha’u ho Asatu hakat sai husi kuarta laran mais matan ikun nafatin hafuhu tuir Mamá, Mamá bele bosok ami na’in-rua dehan nia di’ak hela maibé matan ne’ebé bubu hatudu ba ami katak nia ladi'ak no tahan hela moras, Papa hamriik de’it  iha odamatan hodi haree ami na’in-tolu nein hakat mai atu dehan netik buat ruma mai ami, kalan ne'e buat hotu muda derrepente uma ne’ebé  baibain nakonu ho domin mout ho fulan no fitun nia naroman.

Kalan dahuluk iha moris ha'u ho Asatu haree Papa no Mamá baku malu tan buat laek ida, kalan ne'e sente naruk, hahán ne’ebé Mamá tein no tau iha meza leten tomak hela, laiha ema ida mak hakbesik ba meza, Ida-idak tuur ninian Mamá nafatin toba iha kama leten ho matan-been, Papa tuur iha Varanda dada nia sigaru. Ha’u ho Asatu tuur iha kuartu laran hodi hafuhu tuir de’it sira nia jeitu. Asatu nafatin tanis hodi dehan 

“Bin nu’usá mak Papa ho Mamá baku Malu” 
“Ha’u la hatene, ne’e problema ema boot nian” Hatán ba nia ho matan nabilan hanoin hela Mamá
“Ema boot sira ne’e kuandu iha problema tenke baku malu ga?” 
“Lae, nu’usá mak ó husu ida ne’e”.
“Tansá mak sira tenke baku malu, baibain ita kuandu halimar hamutuk mak baku malu sira hirus ita dehan tenke respeitu malu, labele baku malu lae Maromak hirus. Agora sira baku malu hanesan ne’e Maromak hirus ka lae?” Asatu husu nune’e no liman loke daudaun kortina hodi haree papa ne’ebé tuur murón hela iha uma oin.

Ha’u laiha liafuan hatán ba Asatu nia perguntas, tuur nonook hodi hateke metimetin ba didin-lolon, hamlaha mós lakon derrepente depoizde haree Mamá latan iha simente leten. Iha ha'u nia hanoin komesa mosu lia makhusu oin-oin, tansá sira baku malu, sira la hadomi ona ami karik. Iha ha'u nia fuan hato'o ha'u nia orasaun ba maun Jesus "Na’i tulun nafatin família ki'ik ne'e, hadook ami husi violénsia, loke ami nia inan aman nia neon katak oan ami presiza sira nia domin la'òs tuku tebe hanesan ohin Papa halo ba Mamá ne'e, Nai hamoos liafuan soe malu husi papa no Mamá nia kakutat, fó sira hanoin ne’ebé di'ak de'it ba ami nia futuru tan ha'u lakohi moris hanesan iha filme Ratapan Anak Tiri ne’ebé ha'u haree loron hirak liubá, Amin".

Lakleur ona Mamá bolu husi kuartu sorin:

"Anata ho ó nia alin mai lae", ha'u ho Asatu halai lailais bá kuartu sorin keta halo buat ruma akontese tan ona ba Mamá karik.
"Mamá saida mak moras dehan mai" hatán ba Mamá ho oin ta’uk.
"Mamá di'ak hela só matan mak moras oituan" ko'alia nune'e no liman kaer daudaun matan.
Asatu ho lian maña dehan "ha'u hadomi Mamá" dehan nune'e no hakuak daudaun Mamá.
"Kalan ne'e Mamá hakarak toba hamutuk ho imi na’in-rua"

Ami mós hakat sai ba kama leten toba ho Mamá no liman rua hakuak metin, foti matan hateke ba

odamatan ha'u haree lalatak mosu iha kortina no ain la'o mai kuartu maibé lalatak mak mosu mai

no hanesan fuik tiha husi ami leet. Asatu toba iha Mamá nia liman leten hodi dehan.

“Tansá ema boot sira gosta baku malu?”
Mamá la hatán só hakuak nia no rei nia rentos “ó toba ona, kalan boot loos ona ne'e, ne'e problema ema boot nian”.
“Bin mós dehan ba ha'u ne'e prolema ema boot nian, entaun ha'u sei ki’ik kah?”
“Kuandu ó boot ona mak Mamá sei esplika ba ó” Mamá hatán ba Asatu.

Lalatak ne'e nafatin metin iha kurtina oin no la book an, husi iis ha'u hatene ona katak Papa mak

mai ne'e. Ha'u komesa buka jeitu ona par kalan ne'e kedas Papa ho Mamá bele dame malu fali,

mak ita hanesan tiha ema fuik iha uma laran rasik. 

“Mamá hadomi ami na’in-rua ka lae?” 
“Mamá hadomi imi hotu” 
“Papa, Mamá hadomi ka lae?”
“Hadomi,  nu’usá ida ne'e”.
“Sei Mamá hadomi Papa tansá nia baku fali Mamá, entuan Papa la hadomi ita ida karik”
Satu ho lian hirus hatán ba Mamá

“Ha'u la hadomi Papa ida, tan nia baku Mamá iha ha'u nia oin”.

Mamá hadeer no tuur sadere-an ba kama ulun hodi dehan “Ó labele dehan hanesan ne'e, bele

hanusa mós nia nafatin ó nia aman, Mamá nunka hanorin hanesan ne'e ba imi”. Teki-teki papa

mós hakat tama mai iha kuartu laran ho matan-been hakuak ami na’in-tolu hodi husu deskulpa ba

Mamá.

“Ha'u hatene, ha'u sala ona baku ona ó iha labarik sira nia oin”
“Papa ami nia profesóra dehan labele uza violénsia hodi rezolve problema maibé bele ko'alia ho kakutak malirin”.

Papa nonok hodi doko ulun karik nia sente-an halo sala ona.
“Papa tenke promete mai ami labele baku tan Mamá, sekarik Papa hadomi Mamá bele ko'alia didi'ak de’it  karik iha buat ruma mak lakona Papa nia laran”
“Papa promete sei la baku tan ona Mamá”
“Hanesan ne'e mak di’ak” Asatu hamriik hodi hakuak metin Papa.
“Mamá ha'u hamlaha” ha'u ko'alia ho lian maña.

Ami na’in-haat hakat ba tuur iha meza han ho haksolok, ha'u haree Mamá hamnasa midar ba Papa, karik ema dehan domin mak ne'e, fulan ho fitun obrigada kalan ne'e triste hotu mout ho imi no wainhira loro-matan mosu mai sei lori domin foun ba ita hotu. Hadomi imi laiha rohan.

Istória fiksaun maibé bazeia ba realidade iha ita leet, iha istória ne'e atu dehan katak, violénsia la’ós dalan hodi rezolve problema maibé bele ko'alia no diskute ho ulun malirin. Ba lee nain sira karik iha kritika no sujestaun ba istória ne'e rasik ita-boot sira bele haruka ita-boot sira nia komentariu mai iha email este.amaral8@gmail.com ou bele mòs kontaktu númeru telefone 77370872

Dili, 29 Jullu 2016

SIDADE HADELEK MATAN VERSU DATOLUK "AIDS HAMOUT HA'U NIA MEHI" (PARTE II)

Ha’u tuur iha corridor ospitál hodi loke karta ne’ebé  fò mai, fuan hahù lahakmatek surat-tahan mutin ne’ebé  hakór ho letra metan iha nia laran hakerek pozitivu HIV-AIDS, sadere-an ba kadeira matan-been sulin neineik laiha lian "sei moras ne'e mak tebes saida loos mak ha'u sei hateten ba Mamá , keta halo rezultadu ne'e sala karik". Oras bá oras ha'u iha fatin no kumu metin hela surat-tahan ne'e, sah sala mak ha'u halo hodi hetan moras.

Ha'u nafatin la fiar ho rezultadu, hakat hakbesik ba enfermeira ne’ebé ohin entrega karta ne'e, hodi husu ba nia;

“Mana, Doutór nia fatin besik iha oituan ne’ebé ?” husu ho lian ta'uk no duvidas. 

“Alin tama iha sala dahuluk, Doutór mós hakarak ko'alia ho alin” hatán  nune'e no liman hatudu ba odamatan. 

Ha'u dere odamatan no hakat tuur iha Doutór nia oin no foti sai surat-tahan tau iha meza leten, biar fatin ne'e malirin maibé kosar lotuk nafatin belit iha rentos. Doutórf oti karta ne'e hodi haree no dehan. 

“Triste atu dehan ba ita-boot katak ita hetan moras pozitivu AIDS, virus ne'e HIV kleur ona hela ita nia isin no agora tama ona iha faze ikus mak AIDS. Moras ne'e rasik to'o oras ne'e seidauk iha ai-moruk atu kura” 

“Doutór ha'u la fiar bele hetan moras ida ne'e, ha'u nunka ba mete tun sa’e, oinsá mak ha'u bele hetan moras ne'e”. hatán ba ho lian hirus no oin namkurut. 

“Sim, moras ne'e bele hada’et liuhosi relasaun seksuál, daun uzadu husi ema ne’ebé  hetan ona moras ne'e, bele da'et mós husi inan isin ne'ebé hetan ona moras ne'e ba nia oan iha kabun laran.”

Ha'u nafatin la fiar ho saida mak Doutór ko'alia mai, ha'u hili atu sai husi sala ne'e no lakohi rona Doutór nia esplikasaun. Kuandu hakat hakbesik odamatan Doutór haktuir “alin la’ós fasil hasoru realidade maibé nafatin hakbesik mai ospitál”. 

Liman ain nakdedar no hakat ne'e sente todan, hanoin ne'e komesa laloos, sé loos mak sei rona ha'u nia halerik ne'e, karik Mamá  !!. lae, di’ak liu Mamá keta hatene lae kona-ba moras ne'e, sé ha'u hato'o ba Mamá ha'u rasik mak sei harahun Mamá nia mehi, ha'u la'ós oan ne’ebé Mamá  tau laran hela hodi haree no tulun alin sira no duni Mamá nia mehi.

La'o iha lurón hanoin ne'e laiha ona iha isin lolon, karreta no motór nia barullu lakon iha ha'u nia tilun. Iha cruzamentu karreta atu xoke tan ha'u, tilun ne'e diuk atu rona saida mak kondotór ko'alia. Ha'u nafatin la'o to'o iha tasi ibun Lisedere, sé loos mak sei rona ha'u nia halerik ou karik ha'u mós sei tuir Papa nia ain fatin. Ha'u tuur mesamesak iha ai-katapa nia huun matan-been sulin ba rai, ha'u hakilar hanesan ema bulak. Ha'u tuur iha fatin ne'e hamaluk ho anin no laloran tasi.

Ha'u tuur no sadere iha ai-katapa hun to'o dukur iha fatin, matan ne'e sei taka metin lakleur ha'u rona ema hakat mai hodi dehan

“Abio, ó nu’usá mak toba fali iha ne'e”, Afinál tiu João mak mai, nia koñese ha'u tan baibain   ami fa'an sigaru hamutuk. 

Ha'u loke matan no subar ha'u nia triste ho dehan “ha'u kole ne'e mak ohin la'o mai toba tiha iha ai-hun ne'e”. 

“Ohin kedas ha'u hamriik iha dalan ibun ne'e ha'u haree hela ó nia jeitu, nu’usá iha problema ruma kah?” Tiu João husu ho oin ta’uk. 

“Tiu ha'u atu dehan buat ida ba tiu mais keta dehan ba ema ida sah tan ba Mamá ” ko'alia nune'e no matan-been sulin habokon hasan. 

“Saida mak halo ó triste hanesan ne'e” 

“Ha'u moras AIDS” 

“Jesus ó halo saida mak bele hetan loos moras aat ne'e” 

“Ha'u rasik la hatene, tan ha'u konsidera tiu hanesan aman ida tan ne'e mak ha'u ko'alia sai ba ne'e.” 

Nia hakat mai hodi kaer ha'u nia kabaas hodi dehan “ó tenke forsa nafatin, ha'u hatene momoos ó nia inan, nia sei la forsa simu realidade ne'e, loron hira ne'e ha'u haree nia kontente loos ho ó nia bolsa estudu ne'e, ó hanesan mane boot, ba ó mak nia laran metin, sei hanesan ne'e ona ó ko'alia ho nia”. 

“Tiu hatene didi’ak ha'u nia moris, ha'u nunka ransu no halo buat arbiru tun sa’e iha li’ur, ha'u rasik la fiar bainhira rezultadu husi ospitál ne'e”.

Tiu João nafatin fó korajen mai ha'u hodi ko'alia ba Mamá , liu tiha semana ida mós ha'u seidauk hateten ba Mamá kona-ba moras ne'e, kalan ne'e ha'u tuur iha varada ho oin naburut Mamá  hakat husi uma laran mai haree ha'u tuur mes-mesak hodi dehan.

“Kalan hira ne'e, ó la bá fa'an sigaru?” 

“ Ha'u la bá tan ha'u sente atu moras” 

“Ó tenke kuidadu ó nia saúde, oinsá imi nia rezultadu bolsa estudu ne'e” Mamá  ho oin hakarak hatene. 

“Ha'u la pasa ida” ko'alia nune'e no oin hakruuk ba rai ho matan-been.

 “La buat ida tinan oin mak koko fali” Mamá hatán nune’e hodi fó korajen ba ha'u.

Ha'u la’ós tanis tanba ha'u la pasa maibé ha'u tanis tan ta’uk haree Mamá nia oin no hato'o lia-loos. Liu tiha fulan neen isin ne'e hahú krekas ba beibeik, dalaruma isin manas maka’as no kabun moras ne’ebé  nunka di’ak, kole hanesan ema halo servisu todan, ibun sira ne'e komesa kanek, kuandu ha'u ba sentina ha'u moe haree ha'u nia oin-lulik ne’ebé hahú kanek. Mamá  komesa ta’uk haree ha'u nia-an, dala barak nia obriga ha'u atu ba konsulta hatán ba nia dehan di’ak, mais nunka mosu iha ospitál tan ha'u hatene ona kona-ba moras ne'e.

Iha kalan ida Mamá  tuur iha kama ulun no kaer metin ha'u nia liman hakuak ha'u hodi tanis, ha'u nafatin la hato'o lia-loos ne'e ba Mamá , Ania ha'u nia alin ikun hamriik iha odamatan ho matan-been nia mak la forsa atu ko'alia ba Mamá  kona-ba ha'u nia moras, iha uma laran só Ania de’it   mak hatene kona-ba moras ne'e tan nia lee hetan ha'u nia diáriu. Ha'u komesa hatoman hakerek diáriu wainhira hatene ha'u hetan moras ne'e, saida mak ha'u sente no hakarak ko'alia ha'u hakerek hotu iha kadernu ki’ik ne'e.

Fulan hira ikus ha'u la mosu ona iha tasi ibun, isin ne'e laiha ona forsa hodi hamriik sah tan hodi la’o, atu ba sentina de’it mós Mamá sei ajuda hiit, ha'u hanesan tiha labarik ki’ik ne'ebé aprende la’o, loron kalan Mamá tuur de’it ho matan-been tan de’it ha'u nia hahalok, ha'u la’ós oan ne’ebé  serve atu Mamá tanis ba, ha'u oan ne’ebé só husik hela kanek no matan-been ba Mamá. Ha'u moe ho ha'u nia-an arrepende mós buat hotu liu ona.

Viziñu sira komesa bis-bisu kona-ba ha'u nia moras, Mamá nia modo mós la folin ona tan ema viziñu sira ta’uk ha'u nia moras ne'e atu da'et ba sira, loron ida Mamá hirus Ania no Abui tan modo la folin, Mamá nia lian forte iha ha'u nia tilun “imi baruk ten bá fa'an modo ita atu han saida?, agora ó nia maun moras hanesan ne'e ita presiza osan”. Ha'u tanis la ho lian iha kuartu laran deskulpa Mamá ha'u labele ajuda, só halo todan ba Mamá . “Na’i nu’usá  ita la bolu tiha ha'u bá hodi hamutuk ho Papa”.  

Iha lokraik ida tio João mosu mai iha uma hodi haree ha'u, kuandu loke odamatan kuartu nia hakfodak haree ha'u nia kondisaun, nia obriga Mamá lori ha'u ba ospitál mais ha'u nafatin lakohi tan ha'u hatene ona katak tarde ka mate ha'u sei mate no moras ne'e sei labele kura. Tiu João la tahan no hateten sai ba Mamá  kona-ba ha'u nia moras, lokraik ne'e ha'u sente hanesan buat hotu nakukun tan Mamá nia halerik. Ibun ne'e sente to'o, liman ne'e laiha forsa hodi hamaran Mamá  nia matan-been.

Lokraik ne'e sira lori duni ha'u ba ospitál, doutór ne’ebé uluk ha'u hasoru ne'e mai duni haree ha'u, kuandu haree tatto iha ha'u nia kotuk laran no husu tuir kona-ba tatto ne'e no iha ne'e mak nia foin deskobre afinál ha'u hetan moras aat ne'e husi daun tatto uzadu, ha'u arrepende mais buat hotu liu ona. Loron ida antes ha'u tama iha ospitál ha'u hakerek hotu ha'u nia lia-meno ba Mamá , Ania no Abui tan ha'u sente ona katak loron hira ba oin ha'u nia liman ne'e sei la forsa ona hodi hakerek.  

Lia-fuan ikus ne’ebé ha'u hakerek ba Mamá  “Mamá  deskulpa, ha'u la'ós oan ne’ebé  di’ak ba Mamá , obrigado ba domin hotu ne’ebé  Mamá  fó mai ha'u, deskulpa tan ha'u halo Mamá tanis maibé buat ida ne’ebé ha'u hakarak Mamá hatene mak ha'u hadomi tebes Mamá , ha'u la forsa haree Mamá  tanis, di’ak liu ha'u mate par labele halo Mamá terus hanesan ne'e, obrigada Mamá  fó ona Mamá nia hiti mai ha'u toba, kuidadu ha'u husi ki’ik to'o boot, ha'u laiha forsa hodi selu Mamá  nia favór, ha'u kontente bele moris husi inan ida hanesan Mamá, inan ba hun domin. Ha'u Hadomi Mamá”. 

Ania no Abui “ba maun nia alin doben sira, deskulpa ha'u la'ós maun ne’ebé  di’ak ba imi na’in-rua, ha'u promete buat barak ona ba imi maibé promete sira ne'e ha'u la halo tuir. Abui sé maun laiha ona iha mundu ne'e ó mak sei troka maun nia fatin, ó hanesan feto boot kuidadu Mamá  no Ania, deskulpa maun husik hela naha todan ne'e ba ó tan maun fiar sé sai bin ne’ebé  di’ak hodi troka maun nia fatin, Mamá  mós ferik daudaun, ha'u moe tan la konsege halo Mamá  kontente no duni Mamá nia mehi sai realidade maibé maun fiar ó sei forte liu no sei la tuir maun nia ain-fatin, hadomi imi ha'u nia alin doben”.

Iha ospitál matan ne'e hahú haree la moos, buat hotu malahuk, ha'u kaer metin Mamá nia liman to'o iis ne'e lakon husi isin lolon, deskulpa Mamá ha'u husik hela kanek ba dalarua.   

NB : istória fiksaun maibé bazeia ba realidade ne’ebé hakerek nain hasoru, istória ne’e rasik la refere ba ema ida, iha biban ida ne’e husu mós ba lee nain sira atu fó mós ita-boot sira kritika no sujestaun bele mai iha email este.amaral8@gmail.com ou bele mós kontaktu mai númeru 77370872, obrigada wain.

Dili, loron-14 fulan-Jullu tinan-2016

KAFÉ LOKRAIK

Aaasss..... dada isin naruk hafoin husik filafali,

kakukat hanoin hela sumasu iha meiudia-boot.

Isin lolon hakarak latan iha kama leten.

Matan ne'e hahú kloot bá beibeik hanesan ema Xina,

ulun ne'e todan iha meza leten hanesan ema moras,

Kafé nia morin hasé ha'u nia inus,

Dada iis kleur hodi sente nia morin, hafoin husik filafali.

Morin ne'ebé metin iha neon no nanál hakarak koko nia midar.

Liman belit iha sikra mutin hatuur iha oin hasoru horuk iha ibun laran

Gostu duni, nia gostu hanesan vitamina duni dukur no halo isin kmaan.

Dukur mós naben ho kafé nia morin no sabór.

Colek Kafe-na’in sira hotu..

Lokraik di’ak.

SIDADE HADELEK MATAN VERSU DATOLUK "AIDS HAMOUT HA'U NIA MEHI" (PARTE I)

Sidade fatin ne’ebé hakmatek iha tempu kalan, ha'u tuur iha Palasio Governu nia oin hodi haree ba Ataúro, oras hatudu tuku sanulu resin ida laiha ona barullu karreta no motór, anin kalan halo ha'u isin fulun hamriik. Ha'u la'o bá-mai hodi halakon malirin, kalan ne'e ha'u tuur hodi hateke ba tasi laran hanoin ha'u nia futuru.

Ha'u la’o hakbesik bá hali-hun Casa Europea nia oin ha'u haree mane klosan isin boot na’in-hitu tuur hadulas hela kadeira ne'ebé halo husi simentu, ha'u la haree saida mak sira latan iha baki leten. Hakat ne'e akompaña ho fulan nia naroman liu iha sira nia sorin, teki-teki ema ida iha mane forte ne’e nia klaran hamriik hodi bolu ha'u.

"Abio" nia hakat daudaun mai ha'u.

"Ha'u fila bá uma ona" hatán ba nia no ain hakat daudaun.

"Mai lae koñese tiha ha'u nia kolega sira mak ó fila"

"Loron seluk de’it, agora kalan loos ona orsida sira iha uma buka ha'u" hatán nune'e ba nia no hakat ba lurón sorin.

Iha dalan ha'u komesa hanoin ona ema sira ne'e halo saida iha ne'ebá, sah mak halo sira kontente loos iha kalan ne'e, tansá ohin ha'u ba hamutuk tok ho sira, kalan ne'e mós liu daudaun. Ha'u mai husi família simples, ha'u iha alin na’in-rua no hanesan mane boot iha família ki’ik ne'e.

Ami na’in-tolu moris mesak ho Mamá, iha tinan lima liubá Papa hetan dezastre no mate iha fatin, Papa mane ida ne'ebé hadomi tebes ami ho Papa nia mate husik hela naha todan ida ba Mamá, hanesan mane boot fuan ne'e la hakmatek bainhira haree Mamá loron kalan la'o tuir lurón tutur modo hodi buka osan ba ami na’in-tolu.

Bainhira akaba sekundária ha'u hakarak kontinua ba universidade maibé Mamá laiha forsa hodi haruka ha'u kontinua eskola, saida loos mak ha'u sei halo hodi ajuda Mamá. Ha'u koko buka servisu tun sai sah servisu de’it ha'u prontu atu halo.

Ha'u hirus tan laiha buat ida mak ha'u bele halo hodi ajuda Mamá, triste mais atu halo tan oinsá, Mamá feto ne’ebé forte iha ha'u nia matan biar udan, anin Mamá nafatin firme buka osan, kalan ne'e ha'u rona me’ar iha kuartu sorin, matan ne'e ladukur hanoin hela de’it Mamá I ta’uk atu haree Mamá nia oin. Tuur iha nakukun laran hodi rona de’it Mamá nia lian.

Kalan ne'e Mamá la toba to'o loron, manu aman hananu iha ai-leten hatudu tuku 6, hanesan baibain Mamá hadeer sedu prepara nia karón bá sosa modo iha merkadu.

"Ohin loron Mamá iha uma de’it husi ha'u mak bá hola modo" ko'alia nune'e no hakat daudaun ba foti karón iha Mamá nia liman.

"Bá haree modo tahan nurak no di’ak mak hola"

"Mamá haree deskansa, labele halo servisu todan ruma". Hatán nune'e no ain hakat daudaun sai husi uma laran.

Iha ne'e mak ha'u sente rasik Mamá nia sakrifísiu ba ami na’in-tolu, ha'u tuur iha mikrolet laran ho modo tahan rebo-rebo iha karreta laran no fuan halerik ba moris. Ha'u tenke halo buat ruma hodi ajuda Mamá teki-teki ha'u haree joven ida tabele iha odamatan karreta nia no liman kaer hela sigarru ha'u komesa hanoin kona-ba tasi sei kalan-kalan ha'u bá tuur iha tasi ibun nu’usá  la bá fa'an took sigarru iha ne'ebá.

Loron ne'e ha'u liu kedas iha Audian hola LA slop ida, ha'u fila uma ho oin hamnasa "Na’i karik dalan ne'e mak di'ak liu mai ha'u nafatin akonpaña, tulun ha'u bele sai mane ne'ebé forte hodi ajuda Mamá." Ha'u reza iha ha'u laran bainhira hakat tama uma laran.

Mamá tuur iha varanda hodi hein ha'u no hasai daudaun modo tahan iha karon laran tau iha hadak leten iha uma oin, ha'u tuur no dada iis hodi dehan

"Mamá kalan ne'e ha'u sei ba fa'an sigarru iha tasi-ibun" ko'alia nune'e no halolo daudaun  ain bá oin.

"Ne'e di’ak maibé labele hatoman-an fila kalan, iha tasi ibun dalaruma ema bá hemu tua iha ne'ebá pois halo tan problema, bele bá mais kuidadu-an" hatán mai no liman hamoos daudaun modo tahan kinur iha hadak leten.

La sente kalan mós mai daudaun ha'u hakat bá tasi ibun hodi fa’an sigarru, kalan ne'e slop ida hotu, aban ha'u sei hola no fa’an tan slop rua. Kalan tuir mai ha'u hasoru Asiku, ha'u belun di’ak  ida bainhira sei ki’ik.

"Nu’sá kalan hira liubá ha'u bolu ó atu koñese ha'u nia kolega sira ó fila tiha ne'e." Asiku ko'alia ho seriu.

"Ha'u fila sedu tan Mamá moras"

"Ferik di’ak ona ga?” Asiku husu ho oin sériu hatudu nia simpatia ba Mamá tan uluk ami sei ki’ik nia sempre mai halimar iha uma.

“Sim, di’ak ona, iha ne’ebé de’it mak durante ne’e ha’u nunka hetan ne’e?”

“Iha Dili laran de’it. Loron, kalan sulan iha ha’u nia servisu fatin de’it”

“Servisu ona ne’e entaun di’ak” ha’u hatán ba nia ho oin hakfodak.

“Ha’u loke fatin rental ki’ik oan de’it sah, loke mós fatin hodi halo tattoo, sei ó hakarak halo tattoo ba ha’u nia fatin de’it ba ó gratis sah”, ko’alia nune’e no baku daudaun ha’u nia kabaas.

Kalan ne’e Asiku bolu ha’u ba tuur hamutuk ho nia belun sira seluk, ne’ebé hein hela nia iha fatin hanesan bainhira ha’u hasoru nia semana ida liubá ne’e, mane klosan sira ne’e mesak isin boot no tattoo iha isin lolon, serveja nakonu iha baki leten, tan la hatene hemu serveja ha’u tuur no rona de’it saida mak sira ko’alia, ida-idak hatudu nia jeitu oin-oin balu kanta, hamnasa no sira hanesan tiha ema bulak foun iha kalan ne’e, la hanesan baibain kalan ne’e ha’u fila tarde. Oras iha telemovel hatudu tuku rua dadeer, ami mós fahe malu, Asiku leba de’it nia belun sira hatama iha karreta laran.

Ha’u la’o neineik hodi to’o ba uma, husi dook ha’u haree ahi iha varanda sei lakan afinál Mamá seidauk toba hein hela ha’u, foin hakat tama odamatan Mamá me’ar hasoru kedas.

“Ó bá ne’ebé mak oras hanesan ne’e foin fila.” Ko’alia mai ho oin hirus.

“Ohin ema iha tasi ibun sei barak tan ne’e mak ha’u sei iha ne’ebá foin mak fila ne’e” hatán nune’e ba Mamá no haksees an daudaun husi Mamá atu labele horon iis tua iha ha’u nia isin lolon.

“Haree bá han ona, ha’u hatán ó bá fa’an sigarru hodi ajuda ha’u maibé ha’u la dehan katak ó atu fila kalan boot, ó hanesan mane boot no mane mesak iha família ne’e ó tenke hatudu ezemplu di’ak ba ó nia alin sira”. Mamá ko’alia nune’e ho lian nakdedar no hakat daudaun bá kuartu laran.

Ha’u hakat hakbesik ba meza leten haree hetan modo mutin no ikan sona, latan hela iha meza leten, tuur no han nonook laiha lian. Saida loos mak ha’u bele halo hodi ajuda Mamá, fila kalan demais mós Mamá hirus, di’ak liu rai naroman ha’u liu tok iha Asiku nia fatin karik nia bele ajuda buka servisu fó bá ha’u. Dadeer ne’e molok atu bá Audian ha’u liu husi Asiku nia fatin iha ne’ebá tattoo ho nia dezeñu modelu oinoin, matan ne’e mós monu ba dezeñu sira no isin kaan hakarak hakór hanesan Asiku nian.

“Abio dadeer de’it ó mai ona, ó atu ba ne’ebé?” Asiku hakfodak kuandu haree hetan ha’u.

“Ha’u hakarak mai haree ó nia fatin sah, tattoo sira ne’e modelu kapás de’it ne’e” ko’alia nune’e no liman book daudaun haree dezeñu sira iha meza leten.

“Ó hakarak tattoo dehan de’it, ba ó ne’e gratis, maibé ferik keta hirus karik”

“Lae ida, tattoo iha kotuk laran de’it ferik la hatene ida sah”

Asiku hakór duni isin ne’e ho marka cruz iha kotuk laran, wainhira daun tattoo ne’e kona isin moras sente to’o ha’u ruin, hafoin remata ó bele haree tattoo nia furak iha isin lolon, kuandu fila ba uma isin ne’e falun metin ho roupa atu nune’e Mamá labele haree, liu tiha fulan ida Mamá foin hatene katak iha ha’u nia kotuk laran iha tattoo, Mamá hirus maibé atu halo tan saida buat hotu liu ona.

Mamá hirus no bandu ha’u atu lalika ransu tan ona ho Asiku tan tuir Mamá ema ne’ebé tattoo ne’e ladi'ak só ema nakar de’it mak gosta halo isin makerek tun sai, maibé iha ne’e ha’u hatán ba Mamá katak tattoo ne’e mós hanesan arte ida mais Mamá nafatin la simu ha’u nia razaun no nafatin bandu atu la ransu tan ona ho Asiku.

Ha’u halo tuir de’it saida mak Mamá haruka tan ha’u lakohi atu Mamá hirus beibeik, ha’u sala tan hatene momos katak la gosta haree ema pinta isin lolon ho kór oin-oin. Tinan ida liu daudaun  ha’u hetan bolsa estudu atu ba Austrália Mamá kontente ho novidades tan Mamá tau fiar mai ha’u ho bolsa estudu ne’e bele hadi'a ami nia moris no ha’u bele troka Mamá nia fatin hodi tau matan fali ba alin na’in-rua nia eskola maibé fulan hira ba kotuk ha’u komesa moras ibun laran hahú kanek no isin hahú kerekas ba beibeik.

Ha’u la hatene sah moras mak ne’e, karik tan menus vitamina C mak halo ibun ne’e kanek, ou karik kalan-kalan ha’u fa’an sigarru iha lurón no ladun deskansa ne’e mak halo isin tun, hanoin ida ne’e mak halo ha’u la bá kontrola iha ospitál, husi loron ba loron kanek ne’e hahú boot, bolsa estudu ne’e rasik iha nia kriteria ida katak bolseiru sira tenke hatama karta ates estadu médiku, ha’u bá duni ospitál hodi hetan karta ne’e, ha’u kontente mehi ne’e sei sai duni realidade no dalan ne’e hahú nakloke luan bá ha’u liuhosi bolsa estudu ne’e.

Loron tuir mai ha’u ba duni ospitál foti rezultadu laboratorium, la’o ho fiar-an no kontente, iha janela ki’ik, enfermeira ida entrega envelope mai ha’u hodi dehan doutór hakarak ko’alia ho ha’u, Tansá mak doutór hakarak ko’alia ho ha’u nakonu ho duvidas, ha’u foti envelope no lee karta ne’e ikus liu hateten katak ha’u pozitivu hetan moras HIV-AIDS, sente hanesan moru ospitál monu hanehan ha’u, tanis mós matan-been la sulin, sah liafuan  loos mak ha’u sei hato’o ba Mamá.

kontinuasaun istória semana oin…

NB : istória fiksaun maibé bazeia ba realidade ne’ebé hakerek nain hasoru, istória ne’e rasik la refere ba ema ida, iha biban ida ne’e husu mós ba lee nain sira atu fó mós ita-boot sira kritika no sujestaun atu hariku liu tan kontinuasaun istória ne’e rasik, ita-boot sira bele haruka sujestaun ou kritika direitamente mai iha email este.amaral8@gmail.com ou bele mós kontaktu mai númeru 77370872, obrigada-wain.

Dili, loron-7 fulan-Jullu tinan-2016