SI’AK HELIK NETIK TA’UK

Obrigada Jornál Independente
públika ona istória badak ne'e.

Dadeer hakmatek, ha'u sei mout iha mehi naruk ho kodisaun isin-rua halo ha’u baruk atu husik toba fali. 

Teki-teki lia bokar hanesan ha’u nia kaben hakilar “hadeer ona Militár Indonézia tama ona Dili” ha'u hakfodak husi mehi naruk ne'e, fuan fekit maka’as ho oin-hakfodak hadeer husi toba fatin. Halai sai husi kuartu laran hodi haree saida mak akontese. 

Ha'u-nia kaben ho nia mane maluk sira ne'ebé involve an iha Forsa Milísia FRETILIN prepara an hotu tiha ona ho sira-nia kilat, ha'u-nia kaben dehan ba ha'u;

     “imi prepara-an ho sasán hodi hein, ha'u sei lori uluk   komandante balu nia família  ba subar pois mak ha’u tun fali mai hodi foti imi”.

Hein maka hein avansa inimigu hahú maka’as, ahi-suar iha fatin- fatin, kilat lian hanesan batar sona, funu mak ida ne'e ona karik, haforsa-an ho orasaun biar matan-been nafatin sulin. 

Ha'u ho ha'u-nia oan mesak, kilat lian hata’uk nia no tanis iha ha'u-nia hakuak. Sidade Baucau hahú la hakmatek militár Indonézia ho karreta boboot halai maka’as iha sidade laran, bandeira mean ho mutin dada iha fatin-fatin. 

Iha ne'e mak ha'u-nia moris hahú la hakmatek fiar ba malu mós hahú mihis, ema kesar malu tun sa’e no ha'u monu iha lasu sira ne'e hotu.

Iha kalan ida depois sinu igreza lian, militár Indonézia mai lori ha'u bá Pouzada, bainhira ha'u to'o iha ne'ebá ema barak iha ona salaun boot ida nia laran, matan-ikun fihi ba malu maibé laiha lian. Só matan-been de’it mak habokon hasan. 

Balu tuur hakru’uk ho oin-namkurut, ha’u hakat ho ain-nakdader tama ba salaun boot ne’e, klamar ne'e sente lakon husi isin-lolon. "Na’i saida mak sei akontese ba ami."

Iha tuku sanulu resin rua kalan, ami hotu tuur ho matan dukur maibé tilun ne’e la dukur, kalan ne’e saida mak sei akontese ba ha’u no ha’u-nia maluk sira, lakleur de’it hakat ho lian tuk.. tak... tuk.. tak... tarutu botas militár hakbesik mai, matan hotu iha fatin ne’e hateke hotu ba odamatan sé mak loos mak hakat mai ne’e.

Matan ikun haree hetan botas metan ho roupa makerek hanesan ai-tahan matak (lore) hakat mai ho oin-buis dehan “ami mai atu lori Ibu Lela”, hotu-hotu hateke lesuk mai ha’u. Ha’u hamriik maibé liman ain-nakdedar “Jesus saida mak sei akontese mai ha’u”.

La’o tuir militár nia kotuk, sira lori ha’u bá kuartu ki’ik ida, iha fatin ne'e iha meza ki’ik ida ho kadeira rua sei oin ba malu. Sira haruka ha’u tuur iha kadeira ne’e, hamate tiha lampu eletrisidade no hela de’it naroman lilin iha meza leten. 

Militár sira tama sai sala ki’ik ne'e. Ema ne'ebé investiga ha’u mós troka hela de’it, buatamak sira ne'e si’ak tebetebes sira tuku meza bainhira enkereitu ha’u la hatán. Iha fiu metan ida latan iha ha'u nia sorin kuandu sira tuku meza lakleur sira uza elétriku hodi xoke ha'u.

Iha kalan dahuluk sira seidauk halo buat ida mai ha’u só xoke de’it ho elétriku isin sira ne’e sente hanesan ema kaer ai mak baku. Ha’u la hatene saida mak sira ko’alia iha mós maluk Timor ajuda tradús ba militár sira ne'e.

Iha kalan daruak sira nafatin husu ha’u;

“Ó nafatin kontaktu ho GPK sira”

“Lae, ha'u laiha kontaktu ho sira tanba ha'u-nia ona mós sei ki'ik no ha'u ho kondisaun isin-rua oinsá mak ha’u halo kontaktu ho maluk sira iha ai-laran” hatán ho lian-si’ak atu nune’e sira labele deskonfia.

Kuandu hatán hanesan ne'e sira haruka lolo ha’u nia ain ba oin mais kilat, pistola latan iha meza leten no nia tutun se hela mai ha’u “lolo ain” militár ho isin-boot ida hakilar mai, ha’u halo tuir, militár ida foti kadeira tau iha ha’u-nia ain fuan boot, nia la’o hadulas ha’u hodi husu

“Ó kontaktu ho sira iha ai-laran”,

“Lae”.

Nia tuur kedas iha kadeira leten ra'an fekit sai husi ain-fuan boot, maibé sira la interese ho ida ne'e. Depois ho oin-buis nia dehan “imi ho GPK sira kuandu imi ba dansa iha Bucoli eletrisidade laiha imi sunu de’it lampuriña ne'ebé halo husi kamí, imi dansa iha nakukun hanesan lo'os ema komunista”.

Iha ne'e sira komesa sunu sigarru ha’u-nia isin-lolon no xoke ho elétriku, ha'u hanoin bainhira sira xoke ona ho elétriku sira sei husik ha’u no lori ha’u ba hamutuk ho ha’u-nia maluk sira seluk iha salau boot ne'e, afinál lae, militár ida hakilar mai hodi dehan;

“Buka baju.”

 “Ha'u mai iha ne'e atu investigasaun la'ós mai atu hasa'e fali roupa, lei ida ne'ebé mak haruka ema hasa'e roupa hodi halo investigasaun” ha'u hatán ho oin-hirus no lian nakdedar.

Sira hakilar ha'u, ne'e la'ós mane ida de’it mak iha sala ki’ik ne'e maibé sira na’in-tolu. “Buka baju” ha’u kaer metin ha’u-nia faru no lakohi atu hasa’e. Sira rakut ha’u nia faru to’o butaun sira ne’e kotu hotu, hafoin sira lori sigarru sunu ha’u-nia susun.

Halo tuir de’it sira haruka hodi salva moris, “berdiri kamu” ha’u hamriik no haruka ha’u hasa’e kalsina, moe no ta’uk kahur malu, ha’u hamriik la ho roupa hanesan tiha labarik ki’ik, nafatin kontra maibé sira-nia forsa liu ha'u.

Sira lolo liman hodi kaer ha’u oin-lulik hodi dehan;

“Imi bá dansa ho GPK sira ne'e halo hanesan ne'e”

“GPK sira la'ós hanesan ne'e, ha'u foin mak haree lolos afinál imi mak komunista” ho oin-mean, ha’u hatán.

Bainhira sira haree ha’u la forsa ona sira dudu monu ha’u ba rai. Ha’u tanis iha nakukun laran isin ne’e sente la'ós ona hanesan ema. Depois sira bolu fali ema seluk mak mai hasai ha'u husi sala ki’ik, hodi ba hamutuk fali ho ha’u nia maluk sira.

Sira dada ha’u sai husi kuartu ki’ik ne'e ho isin molik lahó roupa, ha'u hodi liman mak taka netik ha’u-nia oin-lulik no susun, moe mais atu halo oinsá, moe ne'e só taka de’it ho matan-been, kuandu ha'u to’o iha salaun-boot ne'e ha'u-nia maluk feto sira simu de’it ho matan-been hodi hakuak ha'u hodi bainhira to'o bá sira.

Sira halo aat mai ha’u hodi viola biar ho kondisaun isin-rua. Matan-been sulin hanesan udan-been husu ba maun Jesus salva ha’u-nia oan ne’ebé iha knotak ne'e, labele halo abortus para ha'u bele konta ba nia no sei Timór ukun-an karik ida ne'e mak ha'u nia rikusoin ne’ebé ha'u sei konta ba ha'u-nia oan no jerasaun tuir mai.

Nb: Istória badak ne'e hakerek bazeia ba realidade ne’ebé autór istória konta, no autór istória husu atu la fó sai nia identidade lolos, nia husi hela mensajen ba jerasaun foun katak Timór-Leste hetan nia ukun rasik-an la'ós liuhosi prosesu ida ne'ebé fasil, ami-nia luta mak to'o ona iha ne'e. Agora ukun-an ona tempu ba jerasaun foun nian hodi luta ba dezenvolvimentu nasaun ida ne'e. 

Dili, loron-19 fulan-Maiu tinan-2016

SALVU KONDUTU

Anin kalan hasé ha'u isin bainhira ha'u lolon-liman sai husi janela karreta ninian, fitun sira iha lalehan hanesan bis-bisu hela mai ha'u nia tilun, hamnasa mihis kuandu haree fulan nia roman husi dook. Fuan ne'e sente hakmatek dook husi barullu, dook husi naroman eletrisidade ho de’it  fulan nia naroman akonpaña ha'u nia viajen. Hateke ba ha'u belun ne’ebé tuur iha ha’u sorin hamnasa ba nia hodi dehan ita nia viajen ne'e sei dook hatoman-an uza salvu kondutu.

Kalan ne'e sente naruk no laiha rohan, múzika reque husi Bob Marley hamaluk ha’u, teki-teki rona triikkk... triikk... triik... telemovel nia lian hasé ha'u tilun, liman no matan lais buka tuir telemovel ne'ebé lian iha pasta laran, telemovel nia lakan hasé ha'u nia matan pinta ho letra Mamá. Fuan ne'e haksolok bainhira lee hetan Mamá nia naran, la hein tan hatán ho lian-kontente.

“Kalan di’ak Mamá” ko'alia ba ho hamnasa mihis iha nakukun laran.

“Imi iha ne'ebé ona”

“Ami besik Dili ona, Mama ha’u hamlaha loos” hatán ho lian maña

“Mamá prepara hela bee manas no kulu da’an manas hein hela ó.”

Taka telefone ho kontente bainhira rona Mamá nia lian, ha'u belun ne'ebé tuur iha ha'u nia sorin fihi mai iha nakukun laran hodi dehan “kalma de’it lakleur ona ita to'o ona Dili”. Ha'u sadere-an ba kadeira hodi taka matan oituan, derrepente fuan ne'e sente la hakmatek hakfodak husi ha'u nia dukur badak ne'e, loke matan haree ha'u belun iha ha'u sorin mós toba dukur, la uza ona salvu kondutu. Iis sigaru suar hasé ha'u inus, afinál suar ne'e mai husi kadeira kondutór.

Ha'u mear hodi fó sinál ba kondotór mais nia la prekupa ho ha'u nia mear ne'e, múzika ho lian maka’as halo tilun ne'e sente atu diuk de’it ona, “huuumm.... karik nia fuma no rona múzika hodi duni dukur” ha'u hanoin iha laran. Ha'u hatun vidru lolon liman husi janela udan-been habokon liman, derrepente haree naroman husi nakukun no tarutu maka’as husi lalehan, kondotór hakfodak ho rai-lakan, sigaru iha liman monu kona kelen. Kondotór atrapalha ho sigaru no la haree ba dalan teki-teki karreta halai sa’e husi estrada no baku fila ba rai naruk.

Ha'u hakilar iha nakukun laran hodi dehan “Na’i... Na’i... Na’i... saida mak akontese ne'e, ajuda ha'u” ha'u hakilar ho lian maka’as, karreta duit husi estrada ninin ba rai naruk, fuan ne'e sente naklosu sai husi isin lolon, minutu tolu nia laran ha'u hakilar iha karreta laran mais la rona ha'u belun nia lian ho oin nakukun maibé la lakon sentidu, matan ikun haree hetan suar husi karreta oin, hakilar la ho lian, hakfodak fila oin ba ha'u belun laiha ona fatin, iha udan timis nia laran ho forsa ha'u dudu sees odamatan ne'ebé habit metin ha'u liman, raan sulin neineik husi ha'u nia rentos tan vibru nia kro’at.

Ha'u hakilar hodi bolu ha'u belun mais nia la hatán, ho forsa tomak konsege loke duni odamatan karreta nian mais liman loos la book-an ona tuir ritmu kakutak haruka, ha'u tuur iha nakukun no udan timis nia laran tanis hodi hakuak ha'u liman, ha'u rona ema hakilar husi karreta laran dehan ajuda loke odamatan lae, hakilar nune'e to'o dala tolu. Ha'u obriga-an hamriik husi ha'u nia tuur fatin buka tuir lian ne'e, afinál kondutór mak hakilar, ha'u hakat hakbesik ba hodi loke odamatan mais liman ne'e sente ketak tiha ona husi ha'u nia isin lolon, dada sai kondotór husi karreta laran no nia latan-an iha fatuk nia leten hodi dehan “ò nafatin hakilar hodi husu ajuda ba ema ruma mak liu iha fatin ne'e”.

Ha'u hakilar ho tanis husi minnutu ba minutu, ha'u la'o hadulas karreta hodi buka tuir ha'u belun mais la hetan nia, fulan ne'ebé naroman ne'e mós lakon iha ha’u nia haree tan taka metin ho kalohan, ha'u bolu-bolu Mamá no Papa mós la hatán, nain ha'u nia liman kal tohar duni ona. Udan-been halo ha'u malirin nakdedar iha fatin, lian ne'e hahú la forsa tan moras, hamnlaha no hamrook.

Kondotór ne'ebé latan an iha fatuk leten bolu ha'u hodi dehan “ó haree tok ha'u nia telemovel iha karreta laran, ita tenke telefone ema ruma hodi mai ajuda ita sai husi fatin ne'e.” hakat lailais  ba karreta laran hodi buka tuir ha'u nia telemovel ne'ebé rai iha pasta laran, liman ne'e moras kuandu la'o nia nakdoko bá-mai, ha'u tanis hodi hakuak ha'u nia liman, buka tun sai konsege duni hetan ha'u nia pasta sorte udan been la kona ha'u nia pasta, ema ne’ebé ha'u telefone dahuluk mak Mamá.

“Mamá, Ami hetan dezastre, ajuda ami la’e.”

“Jesus Saida mak akontese ba imi.” Mama hatán ho hakfodak

“Mamá haruka ema ruma ajuda ami la’e.” ha'u ko'alia ho tanis

“Di’ak ha'u telefone ambulánsia no Polísia bá nia fatin akontesementu agora”

Ha'u hakbesik ba kondutór hodi dada nia mai hamahan-an iha karreta laran, hodi hein ajuda ne'ebé sei mai mais ha'u nafatin hakilar hodi bolu ha'u belun, ha'u tuur iha nakukun laran reza no hamulak ba matebian sira hodi tau matan fatin ba nia.

Liu tiha minutu tolu nulu, ambulánsia mós to'o iha fatin ne'e, sira mai tula uluk ha'u ho kondotór bá uluk ospitál, bainhira to'o iha ospitál ha'u toba iha kama laran la ho lian no dukur iha fatin. Liu tiha oras balu ha’u hakfodak husi toba fatin, Mama hakuak ha'u hodi tanis no dehan “ó nia kolega mate tiha ona”. Ha'u tanis iha toba fatin haree ba ha'u liman falun metin ho ligadura.

Na’i, sei ha'u bele muda tempu ne'e ba kotuk mak ha'u sei dehan ba kondotór ne'e atu labele fuma bainhira lori karreta. Sei ha'u bele muda tempu ba kotuk mak ha'u sei dehan ba belun ne'e hodi uza salvu kondutu. Ha'u arrepende mais buat hotu liu ona iha matan laran, tanis mós matan-been la sulin sai, so reza de’it ba Na’i atu fó fatin di'ak ba nia iha renu lalehan amin.

Nb: Istoria fiksaun maibé bazeia ba realidade.

Dili, 05/05/2016

Esteviana Maria Celina Amaral de Fàtima.

MORIS TUIR BELE, LA’ÓS TUIR HAKARAK

Mai iha mundu hanesan bainaka kuandu tempu to’o mak ó sei fila bá ida ne’ebé mak so’i ó. Bainhira iis hahú iha, matan ne’e komesa haree mak ó sei sente mundu ne’e nia furak no nia si’ak, ó tenke forte hasoru realidade moris no fiar anin-boot no laloran tasi sei la doko ó.

Aprende buat ida husi moris katak moris tenke ho prinsipu no labele halo negosiasaun ka fa’an ó nia prinsipiu. Dala barak ema komesa haluhan-an no haluhan tiha nia kondisaun moris, lakoi simu realidade moris hanesan ema kiak ou riku, matan ne’e delek no taka tilun bá nia sorin-sorin, fó valór liubá individualizme, hadook-an husi ó nia família no sosiadade tau interese privadu aas liu buat hotu.

Iha komemorasaun loron Mundial Anti Korupsaun (09/12/2015) ha’u aprende buat ida husi Mana Filomena Reis katak moris tuir ó nia bele no labele moris tuir ó nia hakarak. Dala barak ema lakon sentidu moris tuir nia konxiénsia no kapasidade obriga-an moris hanesan ema seluk no bele mós munu iha lasu korupsaun, sentidu domin lolos mós lakon iha minitu balu tan ema komesa fó valór ba osan katak osan bele sosa buat hotu maibé haluhan tiha katak domin lolos sei la sosa ho osan.

Sentimentu hadomi ho laran no hadomi tan osan buat rua ne’ebé la hanesan, osan mós bele halo hamate sentimentu domin ho laran, osan obriga ema moris tuir nia hakarak la’ós ona tuir nia bele, osan mós bele hakotu relasaun domin entre inan aman ho oan, feen ho la’en no kolega ho kolega sei ida ne’e akontese respeitu bá malu mós hahú mihis.

Prinsipiu hahú nakdoko, ema komesa haree ho matan sorin no tan ó komesa tau ó nia-an aas liu ema seluk mais ó haluhan tiha katak ema seluk tau matan hela bá ó. Moris iha mundu hanesan bainaka tan ne’e tenke iha hanoin ida katak ha’u moris tenke ho folin, kaer metin prinsipiu, moris tuir ó nia bele no labele moris tuir ó nia hakarak, hanesan liafuan murak ida husi Martin Luther King “ó haree loron horseik, hadomi loron ohin no fiar loron aban”. Fiar metin katak moris ne’e sei furak tuir nia tempu, lalika obriga-an sei lae ó sei la aproveita tempu ne’e hotu.

Obrigada

Dili, loron-9 fulan-Dezembru tinan-2015

Esteviana Maria Celina Amaral de Fátima