SIDADE HADELEK MATAN VERSU DARUAK "HATUDU AN RIKU DADA HA'U SAI DEVEDÓR"

                                   

Sidade ho nia atrasaun hadelek ha'u matan no dada ha'u hakarak moris hanesan ho ema seluk, biar osan iha bolsu la mahar hanesan sira. Arrepende buat hotu liu ona ha'u mate ho liafuan   devedór no bosok ten.

Trik… trik… trik…  telemovel nia lian hasé ha'u tilun “Ita-boot liu iha konkursu ne'e segunda bele mai aprezenta-an ona” novidade di'ak ba ha’u no família “obrigada Na’i ita rona duni ha'u nia hamulak”. Ida ne'e bele hakmaan netik naha ne'ebé ha'u nia la’en hasaan durante ne'e. Ha'u hatene momoos katak moris iha sidade la'ós buat ne’ebé fasil buat hotu osan.. so anin de’it mak gratuitu. Vida moris iha sidade toos hanesan fatuk, sei la forsa hasoru laloran moris mak ó sei mout iha laran.

Novidade di'ak ne'e ha'u hakarak hato'o ba família ho supreza ki’ik, kalan ne'e hola netik ayam potong, ikan lalar no modo tahan ruma hakór netik meza leten.

“Ama loro-loron han hanesan ne'e hela de’it karik di’ak.” Goza husi ha’u oan feto boot, nafatin husu

“Ama, Apá ohin simu osan ga?”

“ Ne'ebé hein Apá simu osan mak han di’ak kah” hatán ba nia ho oin hamnasa.

Kalan ne'e ha'u nia oan sira han ho kontente hodi hein nia aman ne’ebé sempre fila kalan, telefone nia atu fila sedu antes labarik sira toba. Nia fila uma ho oin pániku, halai tama lailais mai uma laran hodi dehan :

“Labarik ruma moras ga?” ko’alia mai ho oin ta’uk no dada iis naruk.

“Lae, imi hotu iha ne'e ona ha'u hakarak hato'o novidades di’ak ba imi hotu komesa segunda ha'u hahú servisu ona”

“Sé ama servisu ami sei mesak iha uma ne'e” oan ikun ko'alia mai ho lian mimadu (manja).

“Ama bá servisu ajuda mós apá, simu osan ama sei hola vistidu foun ba imi na’in-rua” koko hamaus nia.

“Parabéns se ó hetan servisu ona” hakat mai hodi hakuak ha'u.

Labarik sira hamnasa bainhira haree situasaun ne'e, kalan ne'e ami han ho haksolok. La sente loron mós la'o lailais, loron dahuluk iha servisu fatin ema hotu simu ha'u ho di’ak mais ha'u moe bainhira haree ha'u-an kompara ho ha'u belun sira, mai hatais roupa ho folin karun maibé ha'u hatais hanesan fali ema ne’ebé fa'an modo iha merkadu, ha'u tama iha ambiente ida oin seluk halo ha'u moe hatudu identidade lolos ba sira.

Semana primeiru sei pasiénsia hasoru situasaun ne'e, semana tuir mai fuan ne'e sente la hakmatek ona “ha'u tenke hanesan sira” hanoin ne'e hahú hanahas ulun. Hahalok komesa muda-an taka metin ha'u nia identidade, dadeer kuandu ha'u nia la'en lori ba servisu fatin ha'u sempre haruka nia para dook husi eskritóriu atu nune'e ha'u nia belun sira la bele haree ha'u nia la'en ho nia farda siguransa sivil ne'e. Atoy sempre husu ha'u:

“Maria nu’usá dadeer-dadeer ó sempre para dook husi ó nia servisu fatin”

“Para iha ne'e par ha'u hola bee ruma lai” halo hanesan ne'e par nia labele deskonfia.

“Imi nia servisu fatin ne'e uma boot hanesan ne'ebá bee hemu de’it mós laiha  ga” Atoy nafatin husu.

“Lae, ha'u baruk hemu hamutuk ho ha'u nia kolega sira” ko'alia nune'e hakat daudaun bá lurón sorin.

Kuandu ha'u to'o iha odamatan husi dook rona barullu iha sala laran, afinál Joana mak hatudu hela pasta foun ne'ebé nia hameno iha liu husi Online Shop iha Facebook ne'e. Bainhira ha'u tama sala ne'e ha'u moe ho ha'u nia pasta la'o lais hodi haksubar iha armáriu sorin.

“Maria, ha'u nia pasta to'o tiha ona, haree troka tiha ó nia pasta ba saida mak loro-loron mak ida ne'e hela de’it” ko'alia nune'e no ha'u belun sira seluk hahú hamnasa.

“Heisa ha'u hameno hela maibé seidauk to'o semana oin hanesan ne'e to'o ona” hatán  ho oin mean.

Ha'u hakat ba tuur fatin ho hamnasa hodi taka ha'u nia moe, dadeer ne'e konsentrasaun mós lakon matan fihir beibeik ba Joana nia pasta “ha'u tenke sosa ida di’ak liu Joana nian, ne'e par haree tok sira nia oin ne'e”. Ida-idak tuur iha nia komputadór nia oin, ha'u hamriik hodi husu ba sira.

“Meiudia ne'e imi ba han iha ne'ebè?” husu ho fiar an ho hanoin ida atu hatudu ba sira katak ha'u mós iha osan. Balu hatán mai dehan fila uma no balu dehan han besik de’it iha ne'e. “nega, sira ne'ebé mak atu fila bá uma bele bá maibé ida ne'ebè la fila ne'e ohin loron ha'u mak selu imi nia han meiudia” sira ne'ebé la fila uma hatán mai ho kontente. Ha'u paga daudaun sira han mais ha'u haluhan tiha katak osan ne'e Atoy fó hodi seluk labarik sira nia eskola.

Liu tiha semana ida Ania ha'u nia oan feto boot tanis ba nia Aman “Apa ha'u nia osan eskola seidauk selu fulan ha'at mestra dehan selu lai mak foin tuir ezame”, “seidauk selu, osan Apá fó ona ba Ama” hatán ho oin hakfodak.

Ha'u tuur iha kuartu laran hanoin ona sé Atoy husu karik ha'u sei hatán saida, teki-teki Atoy mós mosu mai:

“Nu’usá mak labarik nia eskola to'o oras ne'e ó seidauk bá selu” ko'alia mai ho oin hirus.

“Ha'u haluha aban mak ha'u bá selu” iha ha'u nia laran dehan ó beik bá osan ha'u paga tiha ona ha'u nia kolega sira.

“Ha'u la hatene aban ne'e ó tenke bá selu labarik nia eskola ona” Atoy nafatin ko’alia ho lian hirus.

Kuandu Atoy la'o sai tiha, ha'u ba lailais viziñu nia uma hodi empresta osan no promete fulan oin sei fó kuandu sai husi uma ne'e ha'u haree grupu ki’ik tuur halibur malu iha ai-katapa hun hakat hakbesik ba afinál sira joga hela karta, di’ak liu ha'u joga tok karik ha'u manán entaun ha'u bele selu lailais deve ne'e, loron ne'e ha'u sorte aat duni ha'u lakon iha joga ne'e fila ho liman mamuk tusan aumenta.

Liu tiha loron rua ha'u nafatin seidauk bá selu Ania nia eskola, ha'u komesa buka razaun oinoin, lokraik ne'e ha'u fila uma ho triste, Atoy tuur hela iha varanda hemu hela kafé, ha'u tama bá ho oin triste hanesan ema atu tanis.

“Maria nu’usá  fali tan ona?” Atoy husu ho pániku.

“Ohin ha'u atu bá selu Ania nia eskola osan ha'u tau iha pasta bolsu kal iha karreta laran ha'u dada sai osan hodi selu karreta ne'e osan monu tiha iha karreta laran” hatán ba ho oin naburut.

“La buat ida, sei lakon ona ita hirus malu mós osan ne'e sei la mai fali, agora ha'u laiha osan aban mak ha'u empresta tok kolega sira seluk nia karik iha aban ha'u rasik mak sei ba selu Ania nia eskola” Hatán mai ho dada iis maka’as.

Hakat tama uma laran ho hamnasa mihis, Atoy tuur ho triste hanoin hela loron aban mais ha'u kontente tan aban sapatu no pasta ne’ebé hameno sei to'ó mai. Kalan liu daudaun dadeer mós mai, ha'u nafatin hatudu oin triste atu nune'e Atoy labele deskonfia. Atoy lori ha'u ba servisu no nia hatene ona fatin ne’ebé mak nia sei para hodi ha'u bele tun. Iha lurón ha'u simu telefone katak sasán to'o ona hein lori osan ba foti. Ha'u hakat tama ba sala laran ho oin kontente husi dook ha'u dehan ona ba Joana.

“Ha'u nia pasta to'o ona han meiudia agora ha'u atu ba foti ona”

“Nega, ha'u hanoin iha ona ó nia liman” Joana hatán mai hanesan la gosta ho novidades ne'e.

La sente meiudia mós iha loron hanesan ha'u simu saláriu ba dahuluk, ha'u ba duni fatin ne'e hodi foti pasta no sapatu ne'e afinál sasán sira ne'e folin karun liu ha'u nia saláriu fulan ida, tan ha'u ko'alia sai ona ba kolega sira ha'u ba mak la lori sasán sira ne'e ha'u nia oin atu ba tau loos iha ne'ebé, dalan ida mak ha'u tenke ba deve tan, maluk balu konsege duni fó mai ha'u empresta.

Lokraik ne'e ha'u liu iha Timor Plaza ha'u haree ema fa’an telemovel ho marka Iphone ha'u nia laran monu ba telemovel ne'e laran ne'e kaan tebes hakarak iha mós ida hanesan ne'e, kalan ne'e ha'u toba la hakmatek la'o ba mai hanoin telemovel ne'e. Ha'u loke armáriu haree hetan kadeli kazamentu no korrente prenda nian aban ne'e ha'u tenke ba fa’an ida ne'e no ha'u tenke iha duni telemovel ida hanesan ne'e. Dadeer ne'e ha'u bosok ona Atoy atu lalika tula ha'u iha loron ne'e, ha'u ba ho taxi no tun kedas iha loja osan mean fa’an tiha kadeli no korrente mais nafatin osan ne'e la to'o.

Ha'u hanoin hetan Abia, ha'u rona nia baibain fó osan ema empresta ha'u ba buka nia no konsege hetan nian, Abia ha'u nia kolega SMA agora nia moris di’ak loos ona hela iha uma andar no karreta forma iha uma oin hanesan nehek hobur masin midar.

“Abia, ó bele fó osan ruma ha'u empresta kah?”

“ Ó hakarak empresta hira”

“$ 35.500”

“Bele, ó iha karreta  katak sasán ruma ne’ebé sai hanesan jaminan ba ha'u, keta halo ba ó la selu  ha'u bele foti de’it sasán ne'e”

“Ha'u laiha karreta maibé ha'u iha uma sé ha'u labele selu ó bele foti de’it uma ne'e”

Abia fó duni osan ne'e no ohin loron ha'u latama servisu ha'u bá lailais hola telefone no bá fali loja osan mean hodi sosa fali korrente no kadeli modelu foun ne'ebé ha'u haree iha loja osan mean ohin dadeer ne'e. Meiudia de’it ha'u fila ona uma ho oin kontente Atoy la bá servisu nia iha uma halimar ho labarik sira. Ha'u tama lailais bá kuartu laran subar tiha sasán ne'ebé ha'u hola ba iha armáriu laran.

Tuur la hakmatek hakarak aban lailais par ha'u bele hatudu ba Joana ha'u nia telemovel no korrente foun, la sente dadeer ne'e mós to'o Atoy labele lori ha'u ba servisu tan motór aat, ha'u la'o sai husi uma tara korrente mean no telefone la tau tan ona iha pasta maibé kaer de’it ona iha liman hatudu-an hanesan ema riku no laliga ona ha'u nia viziñu sira. Husi ibun ba ibun sira komesa konta ha'u.

“Ania nia ama agora ne'e par foti an”. Abui komesa buka jeitu mai sisi tan nia monu ho lia-anin hirak ne’e.

Dadeer de’it Abui mosu ona iha uma oin, sisi ona osan ne’ebé ha'u deve fulan hirak liubá no joga lakon ne'e, Abui  hirus no hakilar maka’as viziñu sira sai mai haree hotu. Ha'u moe mais lakohi hatudu iha sira nia oin.

“Ó nia osan ne'e hira fali ona mak dadeer de’it ò mai hakilar ona iha ema nia uma oin”

“Ha'u la hatene haree fó ha'u nia osan mai, ó promete dehan atu selu mais to'o oras ne'e la selu hela de’it” Abui ko'alia ho lian maka’as.

Ha'u tama bá uma laran foti osan restu ne'ebé ha'u deve iha Abia tuda ba Abui nia oin no hakilar nia foti ba “ha'u fó liután ba ona,  ò hanoin ha'u osan la iha ga?.” Ania halai sai husi uma laran mai ajuda Abui hili osan ne'ebé monu ba rai no ha'u hakat sama tan osan ne'e nia leten ba dadauk. Ania tanis ho ha'u nia hahalok iha dadeer ne'e. Ha'u ameasa Ania ho nia alin labele dehan ba sira nia aman kona-ba saida mak akontese iha dadeer ne'e. Tempu la'o viziñu sira komesa haree la liga ami.

Liu tiha semana iha kalan Atoy ko'alia ona mai ha'u “Maria nu’usá mak viziñu sira ne'e komesa haree ha'u ho oin-boot”, “nega, tanba saida?” ha'u halo finzi la hatene buat ida. Liu tiha fulan tolu situasuan ne'e la muda viziñu sira nafatin laliga, ha'u la prekupa nafatin loko an iha sira nia oin. Iha Domingo ida Abia ho nia ema sira mai sisi ona tusan, Atoy mós iha hela uma ha'u lahatene loos atu halo oinsá loos iha Atoy nia oin, ha'u nia liman ain nakdedar bainhira Abia dehan iha semana ida ne'e nia laran mak la selu sira sei foti uma ne'e.

Atoy ho oin mean hodi rona de’it saida mak Abia ko'alia no nia la komprende tansá ema mai sisi iha uma ne’e, iha ne'e mak Ania foin hateten sai ba nia aman tanba saida mak viziñu komesa laliga, Atoy hirus no nia bolu ha'u tama iha kuartu laran litik ha'u hodi hateten lia-loos.

“Ó deve osan hira mak ema to'o duni sai ita husi uma ne'e” Atoy ko'alia mai ho lian maka’as no nakdader.

“$35.500” hatán ho tanis.

“Ó osan barak hanesan ne'e, ó halo loos saida?” Atoy ko'alia mai ho matan fuan naklosu.

“Hola telemovel, korrente foun, roupa foun, bápasiar iha Bali, Singapura no Brasil, Atoy ó keta hirus ita nia kadeli kazamentu no korrente prenda nian ha'u fa’an hotu tiha ona”

La iha liafuan  ida mak sai husi nia ibun, hakat sai husi kuartu laran no riba odamatan, ha'u tuur no tanis iha kuarta laran, teki-teki rona motór lian hafuhu tuir husi janela Atoy tula nia oan na’in-rua nein ko'alia liafuan ida husik ha'u mesak iha uma, telefone tuir Atoy maibé nia hatán de’it   katak “rezolve lae ó nia problema pois mak buka ami na’in-tolu, sé uluk ha'u hatene atu sai hanesan ne'e ha'u sei la hatán ó atu bá servisu.”

Durante semana ida nia laran ha'u tanis nune'e deit iha kuartu laran, Atoy la telefone tuir hodi husu ha'u di’ak ka lae, ha'u hanesan tiha ema fuik ba sira na’in-tolu, lakleur Abia mai fali tan ona obriga ha'u sai husi uma ne'e, ha'u sai duni husi uma ne'e tan laiha dalan seluk, ha'u fila bá ha'u nia inan aman mais sira mós la apoiu ha'u maibé ko'alia beibeik hela de’it ha'u. Ha'u sente mesak laiha ema ida mak hamaluk ha'u. Hanoin barak halo ha'u hahú moras, Atoy ho nia oan na’in-rua mai vizita ha'u kuandu ha'u baixa iha ospitál, tuir doutór ha'u nia vida sei naruk tan kankru ne’ebé ataka ha'u grave liu ona no labele kura sedu ka tarde ha'u sei husik mundu ne'e.

Atoy ho nia oan nain rua tanis hodi hakuak ha'u hodi dehan “se deste uluk kedas ha'u hatene ó sei hetan moras ida hanesan ne’e ha'u sei la husik ó mesak”, “imi na’in-tolu mai haree ha'u de’it  ha'u kontente ona, karik ha'u atu mate ohin loron mós ha'u prontu”. Ha'u taka matan no toba iha tempu naruk nia laran no sei la hadeer tan ona, adeus Atoy, Ania, Alau Mama hadomi imi.  

SIDADE HADELEK MATAN

Dili, sidade ne’ebé mo’ok iha ha'u tilun biar matan ne'e seidauk haree rasik, fuan ne'e hahú la hakmatek kuandu imajina nia furak liuhosi saida mak ha'u haree iha televisaun. Sidade garantia moris di'ak iha futuru. Ha'u belun ida sempre dehan mai ha'u “ita iha foho hela de’it atu halo saida, haree de’it Anata nia foin ba Sidade la'o to'o tinan nia haruka ona osan mai nia inan aman hodi hadi’a sira nia uma, foin lailais nia mai ne'e la sa’e ona angguna maibé nia lori rasik nia motór”.

Liafuan ne'e halo ha'u laran monu duni bá Dili, ha’u tenke bá duni sidade ne'e, iha kalan ida ha'u haree Papa ho Mamá tuur iha varanda ho oin sériu ko'alia bá malu. Ha'u hakat haksubar an iha uma nia lidun hakarak hatene saida mak halo sira na’in-rua oin-suar ba malu, afinál Papa ho Mamá deskute malu hela tanba osan.

“Bi-quinta akaba sekundária tinan ida liu ona, ita tenke buka dalan haruka nia ba eskola, aman ó buka osan tinan ida ne'e ita bele haruka nia bá eskola iha universidade” Mamá ko'alia ho lian aas

“Osan laiha ne'e atu bá eskola iha universade halo saida”

“Ne'ebé ema seluk nia oan bá eskola ita nian husik hela de’it hanesan ne'e ga?”

“Ba eskola nia atu troka Prezidente ga, mai nafatin tama dapur”

“Aman hanesan ó mós iha ne'e” Mamá ko'alia ho lian-nakdedar

“Husik ba nia iha uma de’it sé mane ruma mak gosta nia ita fó kaben de’it ona”.

Mamá ho oin mean riba kadeira hakat tama uma laran mur-mura hodi dehan “ema seluk nia oan inan aman haruka bá eskola, ita nian haruka hola mane sah aman mak hanesan ne'e”. Papa tuur murón iha tuur fatin, ha'u komprende tansá Papa ko'alia hanesan, nia hahú moras, natar mós la bá ona hanesan uluk. Se Papa la bá halo natar no to'os nia atu hetan osan husi ne'ebé, ha'u mós labele fó sala ba Papa hanesan saida mak Mamá halo.

Triste bainhira haree Papa tuur murón, Mamá nakonu ho hirus “Na’i saida loos mak ha'u bele halo hodi ajuda sira, sei la'ós hau sé tan alin sira sei ki’ik” hanoin ne'e hahú la hakmatek, laiha  dalan seluk ha'u tenke mai sidade hodi buka servisu ruma hodi ajuda netik Papa no Mamá. Teki-teki iha loron ida ha'u la'o iha lurón haree hetan Anata liu ho nia motór, foti liman no hapara nia, ha'u koko husu tuir kona-ba sidade.

“Anata ha'u hakarak buka servisu iha sidade mais ha'u la hatene atu halo oinsá?”

“Iha sidade servisu barak, konforme ó de’it sah tan ó bonita hanesan ne'e fasil atu hetan servisu”

“Nega, servisu iha loja mós di'ak sah” ha'u ko'alia ho lian neineik no haraik an.

“Ó bá Dili mak kontaktu ha'u” hatán nune'e no hamoris motór aranka ba daudaun.

Dada-lia ne'e fó korajen duni mai ha'u, lokraik ne'e ha'u fila uma ho oin kontente dalan ne'e nakloke ona falta fó hatene de’it ho Mamá no Papa. Hafoin han kalan remata ha’u ko’alia ho Papa no Mamá kona-ba ha’u nia mehi ne’e.

“Di’ak liu ó ba duké iha ne'e ó la aprende buat ruma” Mama ko'alia ho korajen.

“Bá bele bá naran katak ó keta haluha  fiar ne’ebé papa ho Mamá  fó, ba la'ós atu halo tun sa’e iha sidade maibé ba hodi buka matenek no tau-an nu'udar feto.” Papa ko'alia ho lian nakdader, karik Papa la prontu atu husik ha’u moris mesak iha sidade.

Liu tiha loron rua Papa halibur ona osan fó ba ha'u hodi selu karreta, kontaktu mós família sira iha Audian katak ha'u sei bá hela iha ne’ebá, ba dahuluk iha vida halo viajen dook husi família, ba dahuluk mós sama ain iha sidade, dadeer ne'e ha'u la'o ain husi ami nia knua mai iha Postu hodi hein karreta, Mamá prepara hela bukae tau iha plástiku, hasaan pasta iha kabaas liman sorin hi’it bukae la'o tun husi foho lolon duni mehi furak no nakonu ho esperansa. Ha'u to'o iha merkadu meiudia ona, tuur hamahan an iha ai-kakeu okos hodi hein bis lokraik nian tan bis dadeer sai hotu ona, bainhira kabun komesa halerik lolon netik liman ba plástiku dada bukae hodi nata halimar.

Liu oras rua bis lokraik mós to'o foti liman hapara no ha'u tuur kedas iha kotuk besik odamatan ha'u taka matan hodi hasa’e orasaun ba maromak “na’in nafatin akompaña ha’u lori ha’u bá dalan di’ak, tulun ha'u atu mehi ne'e bele sai realidade tuir saida mak ha'u hakarak”. Karreta ne'e halai ho velosidade aas la sente to'o iha Aileu rai mós nakaras husi laletek Balibar haree ba rai-tetuk naroman lakan hanesan fitun iha lalehan, matan bele dukur maibé lakohi lakon minutu ida de’it hodi haree nia furak.

Tuku sia kalan ha'u to'o iha Audian. Família sira hein ona ha'u iha dalan ibun, hateke ba ha'u sori-sorin uma mesak andar naroman eletrisidade lakan halo sidade ne'e sai nabilan iha kalan ne'e, karreta, motór halai ba mai ha'u hanesan tiha bibi rusa tama sidade bainhira hare naroman matan nunka hakmatek.

Kalan dahuluk dook husi família no sente anin no hariis bee sidade ba dahuluk mós, hafoin han kalan ha'u hakat ba toba fatin latan-an iha kama leten no liman tau iha rentos komesa hanoin ona aban ne'e ha'u sei halo loos saida, laiha belun ruma ema ha'u atu kontaktu teki-teki ha'u hanoin hetan Anata karik nia bele ajuda ha'u.

Liu tiha semana ida ha'u seidauk hasoru malu ho Anata tan la nia númeru kontaktu, lokraik ida ha'u hakat ba lurón sorin hodi hola modo, rona ema ida bolu husi kotuk, ha'u fila oin hodi haree afinál Anata mak bolu, nia hakat hodi mai ko'alia ho ha'u.

“Bi-Quinta ó hetan ona servisu ka seidauk”

“Ha'u foin to'o mai semana ida, seidauk hatene tan rai nia naran, la koñese tan ema oinsá  mak ha'u atu hetan servisu” hatán ba nia ho oin triste.

“Ha'u bele buka servisu ba ó mais ó tenke hadi’a an oituan ba, hatais deit mós hanesan ema foho oinsá mak atu hetan servisu”

“ Ó dehan hadi'a an ha'u atu ba lamas osan iha ne'ebé, ha'u mai iha ne'e hodi buka servisu”

“Ha'u bele hola roupa fó ba ó naran katak saida mak ha'u haruka ó halo tuir”

Ha'u mós tama ona iha Anata nia lasu, admira ho Anata ohin loron nia la'ós ona Anata ne'ebé ha'u koñese, nia la uza ona motór maibé  karreta, korrente mean bobar nakonu iha kakorok, iha ha'u nia fuan komesa hanoin “Anata ne'e kal manán osan boot karik nia bele sosa karreta no osan mean”. Ibun bele ko’alia ho nia maibé matan ikus baku beibeik ba karreta metan ne’ebé para iha ha'u sorin.

“Anata, ó nia karreta mak ne'e ga?” husu ho oin hakfodak.

“sei ó hakarak ó mós bele hola karreta hanesan ne'e, naran katak o halo tuir saida mak ha'u hakarak mais ó nia naran ne'e troka tiha, Bi-Quinta ne'e naran foho loos”

“Troka ba naran katak ha'u bele hetan osan hodi haruka ba família iha foho”

“Ó lalika hela ho tiu sira, sai tiha husi uma ne'e mak ha'u sei fó servisu ba ó, servisu ne'e la todan hein hatais halo bonita deit tuur iha fatin osan mak mai buka ó, ne'e ó han toba mós nafatin hetan osan”. Ko'alia ho lian neineik hodi hamaus ha'u.

Hafoin hasoru malu ho Anata ha'u komesa buka jeitu sai husi uma iha kalan ne’e ha’u tuur hahú la hakmatek, ha’u nia tia ne’ebé haree ha’u la’o ba mai komesa husu ona.

“Bi-Quinta, ó nusa, moras ga?” tia husu ho oin ta’uk

“Tia ha'u atu dehan buat ida ba tia mais tia keta hirus, ha'u hakarak muda ba hela hamutuk ho ha’u nia kolega balu ami nia viziñu iha foho” husu ho haraik an

“La buat ida sei ida ne'e mak ó nia hakarak mais telefone fó hateten ba ó nia inan aman par sira mós bele hatene tuir, selae orsida dehan ami mak la haree ó”. Hatán mai ho oin naburut.

Loron tuir mai Anata ba tulan duni ha'u iha uma no nia troka tiha ha'u nia naran ba Sonia, ha'u mós kontente. Ha'u la'ós Bi-Quinta maibé Sonia ne'ebé matan naklosu ba rikusoin. Nia lori ha'u ba salon ema komesa tesi ha'u nia fuuk, pinta liman no ain kuku, ibun hakores ho bibir merah, fó hatais ho roupa di’ak, ha'u hanesan tiha ema seluk iha lalenok nia oin ha'u-an rasik la koñese tiha sé mak ha'u. La kleur de’it Anata tama mai ho katuas isin boot ida hodi dehan ba katuas ne'e.

“Labarik ida ha'u konta ne'e mak ne'e?” Anata ko'alia ho maña ba katuas ne'e.

“Anata la saugate ha'u fó osan ba ó nia bonita loos” ko'alia nune'e no hakat daudaun mai kaer ha'u nia liman.

“Nia sei virjen tanba ne'e mak ha'u husu folin karun oituan”

“La buat ida naran katak nia halo ha'u kontente” hatán nune'e no liman tama daudaun ba bolsu dada sa’e osan entrega ba Anata.

Anata hakat mai hodi bis-bisu mai ha'u dehan “halo tuir de’it saida mak nia hakarak lae ó sei la hetan osan ne'e”. Katuas tula ha'u iha karreta, iha dalan nia komesa kaer halimar ha'u nia liman maibé ha'u sempre dada-an husi nia. Nia lori ha'u ba uma andar ida, ha'u rasik la hatene fatin saida mak ne'e, ha'u tama iha quarto ki’ik ida mais fatin ne'e malirin loos, ha'u tuur iha kama leten kulsaun ne'e mamar loos “ema sidade sira ne'e toba iha kulsaun gaya de’it” ko'alia nune'e ba ha'u-an. Lakleur katuas ne'e sai husi hariis fatin la ho roupa so ho de’it roupa laran. Ho hakfodak ha'u hakilar

“Tiu halo saida mak ne'e” hakilar nune'e hodi halai ba odomatan afinal odomatan ne'e xafe tiha ona.

“Ó lalika halai ba mai, sei ó halo ha'u kontente ha'u bele fó osan liután ba ó” ko'alia nune'e no hakat habesik mai daudaun.

Ha'u nafatin halo reajen hasoru nia, “ó bonita loos ne'e, sei o hakarak osan, telefone, karreta, uma ha'u bele fó naran katak ha'u toba lae ho ó no ó halo ha'u kontente”. Derrepente telefone lian iha ha'u nia liman laran “Sonia, halo tuir de’it nia hakarak osan ohin ne’ebé nia fó ne'e hanesan uang muka, sei ó atende nia halo didi'ak mak nia sei fó tan osan ba ita.” Ha'u nia laran monu kedas ba saida mak Anata ko'alia no tiu ne'e promete. Ha'u hakat ba hakbesik nia no mós hasa’e ha'u nia roupa tahan ida-idak husi isin lolon, ha'u tanis mai pasiénsia halo tuir de’it.

Kalan ne'e ha'u hanesan loos tiha ona animál tanis mós buat hotu liu ona, kuandu nia hasai osan husi kartera matan-been ne’ebé ohin sulin ne'e mós para derrepente ba dahuluk iha vida haree osan ne’ebé barak tebetebes, matan no fuan komesa delek  ho osan.

Kuandu sai husu kuartu laran ne'e isin hanesan loos tiha ona ema lori ai mak baku mais kontente tan la fila ho bolsu manuk, liu tiha semana ida katuas ne'e mai buka tan ha'u dalarua, ha'u hatene ona saida mak ha'u sei halo hodi halo nia kontente, la'ós ba nia de’it, Anata fó hatais ha'u hanesan boneka hodi hein sè loos mak atu tama iha kuartu laran ne'e. Liu tiha fulan ida ha'u komesa haruka osan ba Papa no Mamá mais ha'u la hateten lolos sah servisu mak halo iha sidade.

Loron bá loron ha'u tuur hein de’it iha kuartu laran hodi servi mane sira ne’ebé mai vizita fatin ne'e, loron ida ha'u bele hasoru ema na’in-rua ou tolu dala ida, ha'u moe mais atu halo tan oinsá ida ne'e mós servisu no hetan osan. Liu tiha fulan ha'at ha'u mós isin rua Anata la uza ona ha'u, nia dehan “feto mak isin rua ne'e mane sira haree ne'e la gosta ona, ó bá partus tiha ó nia bebé  mak ó mai fali sei lae ó halo abortus tiha labarik ne'e”.

Ha'u deside sei la halo abortus, kuandu ain ne'e hakat sai husi odamatan mak ha'u nia matan foin nakloke no arrepende katak fatin ne'e la'ós lalehan ne'ebé durante ha'u mehi maibé inferno ba ha'u. Ha'u moe atu fila ba uma, moe haree Papa no Mamá nia oin, ha'u hamriik iha ponte leten no haksoit tun ba kraik ho hanoin ida katak di'ak liu ha'u ho ha'u nia bebé mate dala ida duké ami moris halo moe família. “Na’i perdua sala hotu ne’ebé ha'u kontra ita-boot, halakon mós fiar ne’ebé Papa ho Mamá fó ba ha'u, simu ami iha reinu lalehan amin”.

Nb: Istória fiksaun ne'e bazeia ba realidade ne'ebé ema konta husi ibun ba ibun maibé istória ne'e rasik la indika ba ema.

Dili, loron-9 fulan-Juñu tinan-2016

DEHAN LAE BA MOE

Rona manu-fuik hananu iha ai-leten, isin sente baruk atu husik kama, hafalun-an ho manta hanesan manu-fuik hafalun isin ho nia fulun. Aileu nia malirin ha’u halo ha’u nakdedar iha kama leten. Aileu sidade ne'ebé furak iha ha’u nia matan, sidade ki’ik ne'ebé hakmatek no dook hosi  barullu.

Isin bele baruk maibé fuan ne'e hahú la hakmatek, la’ós ona hafalun-an tan malirin maibé  hafalun-an tan ta’uk. Rona labarik sira haklalak iha estrada “hadeer ona.. hadeer ona ohin ita sei simu kaderneta”. Labarik sira ne’e haklalak ho kontente tan ohin hanesan mós loron ikus bá eskola.

Ain ne’e sente todan husik toba fatin, fuan ne’e sente fekit maka’as tan lia-anin to’o ona ha’u tilun katak ha’u la pasa ba Quarta ano (kelas 4), husi kuartu sorin Mamá bolu mai “haree bá hariis ona, ohin Mamá no Papa sei la bá simu imi nia kaderneta, imi nia maun mak sei ba simu”. Hakat ba hariis mais ain ne’e to’os “Na’i,  ne'e mak ha'u la pasa duni saida mak sei akontese mai ha’u” fuan ne'e hahú la hakmatek hanoin hetan Papa nia oin kuandu hirus.

Maho-been iha ai-tahan mós seidauk maran, bee iha tanke malirin hanesan foin hasa’e husi konjeladór, nehan nakreket bainhira bee kona isin, ain bidu maka’as hasoru bee iha hariis fatin. Farda mean mutin hafalun isin la’o tuir lurón, ha’u belun sira duni malu tuituir dalan, ha'u la’o mais ho oin murón. Ha'u belun ida husi kotuk hakilar mai hodi dehan :

“Ó nusa murón loos ne'e!”

“Rai malirin ha'u baruk atu bá eskola” ho oin baruk ha’u hatán

“Feriadu agora ita ba kaer ikan lele iha mota bá” ko'alia mai no halai daudaun hodi duni tuir ha'u belun sira seluk.

Kuandu to’o iha eskola sinu mós lian, eskola oan sira forma iha kampu basket tuir ida-idak nia classe, ha’u hamriik tuir formatura, ha'u belun sira komesa ko'alia ba mai hodi dehan ita nia turma ema na’in-rua mak sei la pasa, ema hotu fihir mai ha’u. Karik ha’u mak beik liu ona entre sira, ha’u nonook nafatin hatudu ha’u nia nakar hodi taka netik ha’u nia moe.

Dadeer ne'e rai bele malirin mais kosar lotuk hahú ataka rentos “Na’i lia-anin ne'e kal tebes duni ona karik”, inan aman sira bele tama ba sala ida-idak tuir oan sira nia classe, estudante sira hadook-an husi turma  no halo limpeza haleu eskola. Husi dook ha'u haree maun hamnasa ona mai ha’u hodi husu “ó nia turma mak ida ne’ebé ?” foti liman hodi hatudu sala ne'ebé besik kantina eskola nian.

Liu tiha minutu balu inan aman sira tama sala ida-idak, la hatene loos saida mak mestre sira ko’alia ba sira, fuan ne'e hahú bidu maka'as, maun ne'ebé ohin tama ba sala laran ho oin kontente sai mai ho oin naburut, ha’u belun sira halai hasoru sira nia inan aman ho kontente, ho oin ne'ebé hatudu mai ha’u katak lia-anin ne'e loos duni.

Hakat hasoru maun ho oin ta’uk, laiha liafuan ida mak sai husi maun nia ibun so unika liafuan   “bá uma mak ko'alia ho Papa de’it, imi feriadu fulan oin mak tama” ko'alia nune'e no hakat daudaun husik fatin ne'e. La'o tuir de’it maun nia ai-fatin mais ain ne'e sente todan atu hakat.

Kuandu to'o iha uma Mamá no Papa mós seidauk fila husi enkontru, hotu-hotu goza no hata’uk ha'u hodi dehan “ó mate ona papa mai mak fó ó nia masin”. Hamriik iha uma tatis haree ha'u belun sira haklalak ho kontente ho sira nia rezultadu. Ha'u nonook no iha minutu balu de’it ha'u hanesan tiha ema fuik iha uma ne'e, hotu-hotu hamnasa, moe haree ha'u belun sira.

Haksubar-an iha sukaer-hun iha uma lidun, tuur hodi arrepende hahalok hotu mais buat hotu liu ona, karik ha'u la nakar, rona saida mak mestre sira ko'alia ohin ha'u mós bele haklalak hamutuk ho sira mais ha’u hanesan ema fuik iha sira nia leet, Ha'u moe atu sai husi subar fatin no ta’uk sei Papa hatene agora saida mak sei akontese ba ha'u.

Lokraik mós mai daudaun, maho-been habokon rai ema ida-idak fila ba nia uma, laiha ona movimentu, manu-fuik sira hafuik iha ai-leten, ha'u hanesan manu moras iha kama leten, motór  nia lian hasé ha'u tilun hafuhu tuir janela leet afinál Papa no Mamá mak mai, ha'u nia alin sira halai hasoru Papa no Mamá. Ha’u tuur iha kama leten la ho lian.

Kalan ne'e hahán iha meza leten mós prontu ona, papa tuur iha meza ulun hodi husu tuir ami ida-idak nia kaderneta, kalan ne’e ha’u nia oin la mosu ona iha sala han tan ha’u ta’uk haree Papa nia oin.

“Abuy, ó nia alin iha ne'ebé, oras hanesan ne'e nia toba ona kah?”

“Nia ta’uk Papa atu baku nia tan nia la pasa” hatán ho lian ta’uk

“La pasa, tanba saida mak la pasa”. Papa ko’alia ho lian hirus.

“Nia la pasa tan nakar no lee la hatene” 

“Bolu nia mai”

Tuur no nakdedar iha kama leten, lakleur de’it maun hakat mai no loke kurtina hodi dehan “papa bolu” mais nia hateke mai ho oin buis. Ain lori ha'u hamriik iha Papa nia oin ta’uk hafalun de’it   ona ho matan-been ho hanoin ida karik ho tanis bele hamaus Papa nia laran hodi labele si’ak.

“haree ba han ona, pois ba hakneak iha ortoriu oin, ó nia maun ohin konta katak mestra sira hirus tan ó nakar iha sala laran, oras eskola ó nia kolega sira la'o lakon ba badiu iha mota laran ba buka ai-daak, agora ó tenke husu perdua ba ó nia sala hotu iha ortoriu oin”.

Matan-been mós la fó folin Papa nafatin hirus, ha'u hakat no hakneak iha ortoriu oin, laran ne'e sente dodok loos mais ba sé loos mak ha'u sei fó sala, buat hotu liu ona. Agora la'ós tempu atu fó sala malu maibé oinsá mak prepara-an hodi hasoru realidade katak ha'u eskola hamutuk fali ho labarik segundu ano ne’ebé para ba terseiru ano, ha'u sei aprende matéria hanesan ba dalarua iha sala hanesan maibé ho kolega ne'ebé la hanesan. Papa ho lian hirus hodi dehan “komesa agora ba oin laiha ema ida mak ba badiu no halimar tun sa’e”.

Tempu la'o lailais la sente ferias fulan ida mós liu daudaun, moe halo ha'u ta’uk atu bá eskola, ha'u belun sira sei hamnasa, loron primeiru ha'u eskola ha'u nafatin forma iha liña hanesan oin ne'e hanesan lori kalen mak taka netik, hasoru ba dalarua iha materia no mestre hanesan halo moe liután haree ha'u belun sira, sira mós hahú hadook-an husi ha'u.

Loron tuir mai ha'u lakohi ona atu bá eskola, Papa nafatin obriga I ba duni maibé la tama iha sala laran, tuur haksubar-an iha eskola kotuk. Teki-teki mestra la'o ba eskola kotuk ne'e no haree hetan ha'u;

“Ó halo saida iha ne'ebá, aulas komesa ona ó sei halimar iha li’ur?”

“Ha'u la tama sala laran tan ha'u belun sira hamnasa lesuk ha'u tan ha'u la pasa no eskola hamutuk fila fali ho sira”.

“Ó lalika moe tan mestra mós uluk ki’ik la pasa, ne'ebé moe ba halo saida, moe mak ó sei la hakat ba oin, ga ó hakarak repete tan ba dala ida?”

Mestra ne'e kaer ha'u nia liman no lori ba sala laran, husi ne'e fiar-an komesa mosu filafali laiha  ona goza no hamnasa iha sala laran hotu-hotu simu ha'u ho di'ak no ha'u promete ba ha'u nian an no sei hatudu ba sira ne'ebé hamnasa ha'u katak ha'u sei sai fitun iha sala laran ho valór ne'ebé di'ak liu. Hahalok hotu hahú muda baruk ne'e nakfila ba badinas, ai-daak nia midar mós sai moruk ona iha nanál, ikan lele ne'ebé haka’an laran no husi oras bá oras iha mota laran mós hahú lakon iha memória, tan lakohi monu ba dalarua iha sala hanesan.

Lalika moe atu aprende no lalika moe atu husu, laiha liafuan tarde bainhira hakarak aprende, dalan ne'e sei iha bainhira ó koko buka nafatin hodi aprende no aprende tan matenek nunka hotu bainhira ita hakarak aprende. Aileu loke ha'u nia matan haree mundu ne'e furak, Aileu sai sasin ba ha'u nia nakar bainhira sei ki'ik. Aileu sidade ne'ebé nakonu ho memória furak no memória   ne'e sei metin husi tinan bá tinan.

Dili, loron-1 fulan-Juñu tinan-2016