RAI-RAHUN HAFALUN FUTURU NABILAN (PARTE I)

Dook iha matan, rai-ketan ne’ebé hale’u ho baliza Idonézia no tasi nia tetuk. Sidade hakmatek ne’ebé hafalun ho kalohan mutin, bainhira tuur iha ró laran haree nia furak husi tasik klaran. Nakroman múzika ne’ebé koñesidu hamanas tilun sai sasin bá Oe-cusse nia furak, karik ha’u sala ho kántigu ne’e tan ladún komprende lírika ho lian Baikeno maibé nia nafatin furak iha ha’u tilun

Ba dahuluk iha vida sai ró Nakroman halo vizita bá Ambeno, pasa kalan tomak iha ró laran. Fuan la hakmatek duk… dak… duk.. dak… lian ne’e maka’as liután no sentimentu ta’uk hahú forte kuandu hanoin-hetan istória domin romántiku Jack no Rose iha filme Titanic no tasi si’ak  haketak domin ne’e.

Kalan naruk no laiha rohan kalan ida de’it maibé sente hanesan semana tomak, haree fitun nabilan iha lalehan, tasi nia hakmatek no anin-kalan hafresku isin-lolon habeen tiha sentimentu ta’uk iha minutu balu no hakmatek iha tempu naruk.

Viajen ne’ebé dook ho nia belun sira, jeitu oinoin ó bele haree iha kalan ne’e balu ho oin ta’uk, kontente, triste la hatene karik sira mós sente saida mak ha’u sente ou buat seluk, iha biti leten haree ha’u nia belun di'ak hafalun-an ho lensol no matan lakan hasoru telemovel nia naroman, balu tuur konta istória hamnasa, balu kaer viola toka hananu ho lian Baikeno matan no tilun hotu iha fatin ne’e hateke ba sira, maske hananu ho lian-maka’as la halakon mákina ró nia barullu ho ritmu hanesan múzika reque.

Tuur iha ró nia lidun hateke ba tasi nia luan iha nakukun, matan ikun baku ba lalehan haree hetan fitun no fulan nia roman no tasi nia hakmatek lutu metin sentimentu ta’uk, teki-teki rona múzika Celine Dion “my heart will go on", fuan ne’e sente fekit maka’as  liután, kosar lotuk halolon-isin, ibun kulit nakdedar no ibun toos atu ko’alia sa’e. Hateke ba ha’u belun ho oin hamnasa maibé laran ne’e nafatin reza “fiar buat hotu ne’ebé akontese iha mundu ne’e hanesan misteriu no planu maromak nian”.

Husi ró leten haree loro-matan sa’e daudaun husi lorosa’e naroman hafalun mundu no hakotu kalan naruk ne’e. Dadersan hakmatek manu-aman iha rai maran hahú hodi simu loron foun, pasajeirus iha ró laran hahú tuur la metin la’o ba mai, situasaun kalma ne’e nakfila ba barullu sé tilun ba ha’u belun ne’ebé toba iha ha’u sorin hodi dehan “ita to’o ona Oe-cusse, la kleur ita tun ona”. Loke matan ho oin hamnasa mihis nein liafuan ida mak sa’e husi ibun tutun, hakat kedas ba ró ninin matan dukur mós lakon iha minutu balu, nú-huun forma liña iha tasi ibun, ema komesa nadodon mai portu hanesan nehek hobur masin-midar. Portu Oebau sai sasin bá vizita dahuluk iha Ambeno.

Kole no ta’uk selu ho Oe-cusse nia furak maske nia alkaltraun la kabeer hanesan Dili no nia furak la hanesan ai-kasi funan maibé nia furak iha ha’u matan, furak ida ne’ebé ha’u susar atu hato’o liuhosi liafuan , furak tan nia ema sira mesak oin-midar, hasé door no hamnasa na’in, ema dehan Oe-cusse rai maran maibé ai-look no sukear hamatak sidade ne’e.

Iha lurón Palaban komesa horon Lifau nia morin liuhosi istória ukun Koloniál portugés dahuluk iha rai-ketan ne’e, viajen dahuluk iha tempu bailoron tinan hitu liubá, iha lurón Palaban ó bele sente daudaun Oe-cusse nia manas, anin tasi halolon-isin maske manas ami kontinua la’o hodi hein ojek ou mikrolete ruma karik liu iha fatin ne’e, la’o para tuituir dalan hateke malu oin-buis daudaun tan kabun hahú halerik ba hahán, kakorok halerik bá bee.

Ha’u iha belun di'ak ida nia ema Oe-cusse rai nain, ha’u gosta habelun ho nia tan nia ema simples no halibur na’in iha dada lian entre ami iha lurón bá iha nia hela fatin iha Palaban (RSS/rumah sangat sederhana).

“Nu’usá mak deste ohin kedas ita la’o la hetan liu karreta no motór ne’e, ohin ami tun husi ró dehan iha ne’e ojek tansá mak to’o oras hanesan ne’e ita seidauk hetan motór ida mak liu?” ho oin hamlaha ha’u husu bá nian.

“Kalma sah, ita la’o neineik hodi hein. Iha ne’e karreta no motór menus duni tan ema hotu halai ba buka moris iha Dili no fatin ne’e sai tiha henesan kota mati, la iha barullu motór no karreta hanesan iha Dili” nia hatán ho oin midar.

La’o neineik to’o RSS. Kokorek… kokorek… kokorek… lian ne’e hasé tilun rai besik naroman, laiha barullu karreta no motór, hakmatek ida to’o ha’u fuan. Rona manu-fuik hananu iha ai-leten ambiente ne’ebé kuaze la hasoru ona iha sidade Dili, momumentu ne’ebé husik hela iha Lifau sai sasin bá prezensa ukun Koloniál Portugés iha ilha Lafaek. Iha lurón bá Lifau nakonu ho ai-daak no sukar hun boot, teki-teki haree husi dook rai-rahun suar hanesan abu-abu iha Maubisse, karreta ho marka pajero halai mai ho velosidade aas ho vidru metin liu hanesan anin-fuik, ai-horis no ema la’o rai sira hariis rai rahun.

Biar rai rahun hanesan abu-abu nia nafatin furak iha ha’u matan, Oe-cusse ho nia istória no momumentu Lifau sai sasin bá istória, ai-daak no sukar-hun haksubar nia iha tasi ibun. Laloran tasi hasé ha’u nia tilun, anin tasi huu mai no naliki ai-tahan sukaer maran namtater bá rai, dook husi barullu so rona de’it manu-fuik nia hananu no laloran tasi, tuur iha fatuk leten oras bá oras hodi hein de’it  loro-matan tun, rai nakaras no momumentu Lifau sai sasin bá ami nia hamutuk.

Tempu la’o lailais, minitu no oras liubá daudaun ona. Loron horseik hanesan istória, loron ohin hanesan realidade no loron aban hanesan mehi no esperansa, fuan ne’e fiar metin katak loron ruma ain ne’e sei hakat tan bá haree Oe-cusse nia furak maske memoria balu hahú mout daudaun ho tempu.

Dili, loron-14 fulan-Januari tinan-2016

Esteviana Maria Celina Amaral de Fátima

KOSAR-WEEN LA HO FOLIN

“Oan labele soe fo’er arbiru” “Urpi” hatán mai ho oin kontente no la’o daudaun. Liafuan ne’e halo ha’u nia liman ain sente mamar hotu, urpi abreviatura(singkatan) husi liafuan urusan pribadi. Hamriik no hateke tuir de’it nia ain-fatin. Loro-matan sunu ha’u kulit, kosar halolon isin. Biar rai-manas, rai-rahun suar mais ha’u nafatin hamriik iha fatin ne’e, ai-saar iha liman kontinua dasa fo’er tuituir dalan.

Dili kapitál nasaun ne’e. La’ós fasil moris iha Díli, ha’u tenke hadeer sedu antes manu-fuik hananu iha ai-leten. Ajuda ha’u-nia feen sona netik pisang goreng hadi’a ekonomia uma-laran ho saláriu ne’ebé ha’u simu la to’o hodi selu oan sira-nia eskola no han loroloron nian. Servisu oioin ha’u halo nu’udar aman lakohi atu oan sira falta etu bikan ida, sei ema seluk nia oan han paun, sira mós tenke han paun maske naha ne’ebé ha’u lori todan tebes.

Dadeer-san han netik dosi baluk rua no kafé manas kopu ida hodi aguenta to’o meiudia, sei tarde no la konsege matabixu ha’u-nia kaben tau iha plástiku lori atu bele han iha dalan. Ho farda azúl no karón iha plástiku laran lori tuituir karik iha lurón hetan lata xerveza mamuk enxe iha karón nune’e bele hetan netik doit ruma iha loron ne’e.

Biar ema seluk hamnasa haree ha’u hili lata aat iha dalan ninin mais ha’u nafatin la’o. Loron ne’e naruk tebes bainhira ha’u sura loron hodi simu osan fulan nian, osan ne’ebé simu gasta la to’o fulan klaran hotu ona seidauk tan lia-mate no lia-moris. Iha loron ida fila husi servisu ho kabun hamlaha ha’u-nia oan feto ikun halai hasoru ho matan-ween.

 “Apá nia servisu ne’e lolos hanesan saida?” ko’alia mai ho tanis no dada iis maka’as.

 “Nu'usá ó husu ida ne’e!” hatán ba nia ho oin-hakfodak.

 “Ha’u nia kolega sira goza ha’u dehan ó-nia apá bulak karik hili fali kalen iha dalan.”

“Ó moe ga, bainhira sira ko’alia hanesan ne’e”

“Ha’u moe tan sira hotu goza lesuk ha’u”

“Ó lalika moe ho sira tan servisu ne’ebé Apá halo maske ema seluk hamnasa maibé Apá  kontente tan Apá servisu ho kosar-been mak fó han imi, la’ós lori na’ok ne’ebé husik ba sira ko’alia” kaer nia liman no hakat tama ba uma laran. 
“Ó lalika tanis ona, dehan ba ama etu ruma iha karik tau mai Apá han lae”. 
“Di’ak Apá” hatán mai no la’o daudaun bá dapur.

Ha’u tuur iha kadeira dada iis naruk, hanoin hela loron aban. Ohin loron kalen ne’ebé ha’u hili la to’o kilu ida, osan iha kartera mós hahú mamuk ba daudaun. Liu tiha minutu balu ain-fatin tarutu hakbesik mai foti matan haree ha’u-nia kaben lori etu maran bikan ida no ai-manas iha bikan ninin hakór metik mutin ne’e.

“Ohin ha’u la halo modo tan osan laiha, pisang goreng mós tomak hela ema la hola” ha’u nia kaben ko’alia mai ho oin la hamnasa.

“La buat ida, labarik sira ohin han ona ka lae?”

“Sira han ona, ha’u ohin hola superme falun ida halo fahe ba sira han” ko’alia nune’e nia mós hakat daudaun bá kuartu laran.

Han nonook laiha lian, fuan ne’e halerik ba moris, hanoin oan sira nia futuru. Nakukun hahú hafalun mundu, ahi-matan iha dapur la suar tan laiha osan hodi hola modo, ha’u-nia kaben loke kurtida hafuhu husi kuartu laran hodi dehan;

“Kalan ne’e ita han saida, sei iha osan rahun ruma fó lae mai haruka labarik sira ba hola modo”.

 “Haree tok iha kalsa ohin ha’u hatais ne’e, satu dolar ida rai hela iha kalsa bolsu” Liu tiha minutu balu ha’u nia kaben mosu mai hodi dehan : “Satu dolar loos de’it mak iha kalsa bolsu”

“Hela mak ne’e de’it ona” fihir malu no laiha lian.

Hakat tuur iha li'ur, fuan ne’e sente mesak fitun no fulan mós haksubar an husi ha’u-nia matan karik sira ta’uk atu haree no rona ha’u-nia halerik mais nafatin fiar katak sira akompaña hela ha’u husi dook. Ain ne’e sente toos hakat ba uma-laran tan fuan ne’e nakdedar haree labarik sira han etu maran.

Osan ikus ne’ebé fó ba ha’u-nia kaben mós nia la uza hola modo tan nia hanoin hela sei hola tiha modo aban ha’u sei la’o ain hodi ba servisu. 

Matan-ween sulin neineik habokon hasán iha nakukun, la brani hamriik iha naroman haree ha’u-nia oan sira-nia oin. Kalan ne’e ha’u tuur iha uma lidun hamaluk ho kafé kopu ida to’o labarik sira toba. 

Dadeer-san molok musulmanu reza iha dadeer (Solat subuh) no hananu Allahu Akbar lian iha musola Kampur Alor, ha’u hadeer ona ajuda ha’u-nia kaben. Hamoos hudi kulit, ko'a fahe ba rua no ha’u-nia kaben hatuur tasu iha ahi-matan leten sona daudaun. 

Ha’u nunka baruk atu hadeer sedu akompaña nia, nia feto ida ne’ebé bonita iha ha’u-nia matan no simu ha’u ho hamnasa midar bainhira ha’u fila bá uma la prekupa liman tanan ou lori buat ruma.

Dadeer ne’e ha’u bá sedu tebes. La’o neineik hodi bá servisu fatin ho farda azúl ha’u la’o ho fiar an. Iha lurón haree estudante lubun ida la’o iha dalan no hiit ho plástiku metan ne’ebé nakonu ho donat. Sira han tuituir dalan. Han hotu tiha sira so'e plástiku ne’e iha dalan ninin. La helik tan ha’u ba hasé kedas ho hanoin ida atu hanorin sira so'e fo’er iha nia fatin.

 “Estudante sira labele soe fo’er arbiru, fó’er fatin iha tiha ona tansá mak labele bá soe iha ne’ebé” ho oin hamnasa ha’u ko’alia ba sira.

Hatán mai ho oin la sente halo sala “huuum... loos mais nu’usá mak ha’u tenke kaer, plástiku ne’e mamuk ona i mesak mina de’it orsida ha’u nia farda fo’er ona”. 
“Bele nune’e fo’er ne’e ó mak lori mai, sei ó la han donat, plástiku mós iha nia fatin”.

 “Hiiiis... tiu ko’alia barak loos hanesan tiu mak hola hela donat mai ami han”.

“Loos, la’ós ha’u mak hola maibé fó hanoin de’it katak fo’er tenke soe iha nia fatin, tan ami dasa rai ne’e mós kole”

“Governu selu tiu atu dasa no raut fo’er tan ne’e mak tiu sira nia servisu sei hanesan tiu sira simu osan saugate de’it.” Hatán mai ho hamnasa.

“Iha eskola mestre sira hanorin soe fo’er iha fatin ka lae, sei sira la hanorin ha’u mak sei hanorin imi. Sei la’ós ita mak kuidade ita nia sidade sé tan” nein atu rona ha’u nia liafuan sira hakat daudaun.

Fuan ne’e sente metin hasoru jerasaun foun ho hanoin ida hanesan ne’e. Ema la fó folin bá ha’u nia servisu, rai-rahun sidade taka metin sira-nia matan no la haree hetan ha’u ne’ebé hamriik iha lurón. 

Loron ne’e naruk tebes iha loja China nian oin ha’u tuur sadere iha baki lolon, habokon kakorok ho bee. Matan ikun baku ba bee dalan ne’ebé nakonu ho fo’er, fuan ne’e tanis maibé oin nafatin hamnasa. 

Sei ohin loron ha’u la hamoos aban mai nia sei aumenta barak tan, loja na’in salva an iha malirin nia laran no matan delek ba fo’er ne’ebé butuk iha matan laran.

Kosar ne’e turuk maka’as hanesan mota Loes ne’ebé nunka maran maske bailoron naruk. Fuan ne’e hakilar ibun ne’e toos fakar sai. Karreta vidru metan halai liu tuda masa aqua mamuk sai husi karreta laran.

Só doko ulun haree hahalok sira ne’e. Tansá tinan ba tinan fo’er iha fatin ne’e nunka menus ema kontinua soe fo’er tuir nia hakarak. Lokraik ne’e ha’u fila ho oin-hamnasa.

Kuandu tuur iha loja oin ha’u hanoin hela saida mak ha’u sei sosa fó ba ha’u-nia oan na'in-tolu, liuliu ba oan feto ikun nia gosta loos boneka Berbie no husu beibeik atu hola boneka ne’e. Mane boot hakarak Suteras no feto klaran husu pasta foun tan pasta ne’ebé nia uza naklees daudaun. 

Hakat tama loja China hola sira-nia sasán, haree ayam potong fó hanoin mai ha’u hurkalan labarik sira han etu maran, hola netik ida ne’e ba sira iha kalan ne’e.

Hiit plástiku sorin-sorin ha’u hakat tama uma-laran, feto ikun halai hasoru ho dehan

 ”Apá lori saida mak ne’e?”

“Apá lori boneka fó ba ó”

“Apá loke lailais plástiku ne’e ha’u hakarak haree”

Dada sai boneka husi plástiku laran, nia halai kedas bá li’ur hodi hakilar

“Ha’u-nia Apá hola boneka foun”.

Haree nia hamnasa halo fuan ne’e hakmatek. Kalan ne’e ha’u-nia kaben te’in duni ayam potong, labarik sira han ho kontente. Ha’u foti pasta no suteras fó ba ha’u-nia oan na'in-rua, simu ho oin-kontente. 

Iha meza leten ha’u konta ba sira saida mak ha’u hasoru iha dadeer ne’e, nu’udar aman ha’u ho knaar hanesan ema dasa rai husu ba sira atu bele soe fo’er arbiru, hadomi ita-nia ambiente sé la’ós ita mak kuidade sé tan.

Biar dasa de’it fo’er iha lurón no la presiza fera uluk hodi hanoin mais servisu ne’e nafatin todan mai ha’u, to’o tempu udan fo’er ne’e aumenta ba beibeik fo’er iha rai-maran ba butuk hotu iha tasi ibun, Farol nia furak mós lakon tan nakonu ho fo’er iha tasi laran.

Ha’u firme hala’o servisu ne’e tan lakohi rona oan sira halerik ba hamlaha, lakohi oan sira lakon sira-nia futuru, firme tan ema la iha konxiénsia soe fo’er iha fatin, lakohi sidade nakonu ho fo’er  hodi halakon nia furak. Mais ha’u fiar loron ruma Díli ne’e sei sai sidade ne’ebé moos no ema sei so'e fo’er iha nia fatin ne’e mak ha’u-nia mehi.

Dili,../../2016

Esteviana Maria Celina Amaral De Fátima

EDUKASAUN XAFE BA FUTURU NABILAN

Ohin, ó ejiste ba tinan hitu, ó hatudu duni ó nia komitmentu iha área edukasaun. La baruk atu eduka jerasaun foun tan Ó hatene sira mak futuru nasaun ida ne’e. ó konsege fó formasaun ba joventude rihun tolunulu, hahú ó ejiste to’o ohin loron, ó firme ho ó vizaun no misaun. Ó la nakdoko biar hasoru laloran boot. 

Tinan hitu liubá, iha loron hanesan (24/03/2009) ó marka pájina foun iha ó nia istória actual Prezidente Parlamentu Nasionál altura ne’ebá Sr. Fernando Lasama de Araújo (matebian), Prezidente Repúblika Dr. José Ramos Horta no Sekretariu Estado Formasaun Profesionál interinu Alfredo Pires, loke pájina foun ne’e liuhosi inagurasaun ba edifisiu LABEH Vocasional School of languages and Humanities.

Loron ne’e marka mós istória ba ó nia prinsipiu firme kapasita jerasaun foun tan sira mak fini ba nasaun. Ó habelar-an liuhosi formasaun área Jornalizmu, administrasaun no lian inglés meius oioin ó halo hodi duni mehi ne’e servisu hamutuk ho institusaun sira seluk hanesan Press Club iha área formasaun jornalizmu, DIT iha área administrasaun tan ó hatene katak crúz ne’ebé ó lori sei kaman kuandu iha belun haforsa ó hakat maske monu hamriik hakat nafatin.

Anin boot doko ó dala barak mais ó nafatin firme tan ó iha ema sira ne’ebé mak sakrifika duni sira nia an ba ó, ema sira ne’e forte no sai ezemplar jerasaun foun sira. Ema sira ne’ebé la hatene kole, baruk, ó iha aman ne’ebé hadomi ó Dr. Cristopher Henry Samson, ó iha forsa liman ain ne’ebé forte lori ó hamriik to’o ohin loron, ó iha Teacher Alanu, nia ida ne’ebé laran maus no pasensia hasoru labarik ki’ik. Ó iha Directór LABEH VS ne’ebé laran osan mean Sra. Erfina Soares Freitas, ó iha belun sira ne’ebé sempre firme apoiu hanesan Ano Freitas, Carlito.. no seluk tan ne’ebé labele temi ida-idak.

Ó hatudu duni ó nia komitmentu inisiu tinan ó loke hikas pájina foun liuhosi harii eskola infantil ba labarik sira tan ó sira mós iha direitu asesu ba edukasaun tan sira mak fututu aban bainrua nian. Tan ó mak garantia futuru nabilan labarik sira, fatin ne’ebé nakonu ho esperasa tan ó kesi labarik sira hanesan família boot iha uma fukun LABEH.

Parabéns LABEH parabéns ba ita hotu.
 

Dili, loro-24 fulan-Marsu tinan-2016
Esteviana Maria Celina Amaral de Fátima

HA'U HALERIK TAN IMI PROMETE

Anin huu maho-ween belit iha ai-tahan turuk ba rai, rona manu-fuik hananu iha ai-leten loke matan hamriik iha janela. Anin-malirin hasé ha’u oin, dadeer hakmatek no dook husi barullu, dadeer dahuluk iha tinan ne’e haree Maliana nia matak. Batar sira iha to’os laran haklalak kontente hasoru udan-ween. Matak ne’e fó hanoin fali mai ha’u Fleixa nia furak.

Teki-teki rona odamatan lian “hadeer ona prepara tan ita sei bá monitoring iha Cailacu”, lian ne’e mós liu daudaun, ha’u belun sira sei hanahe-an iha kama leten rona sira bis-bisu ba malu “ne’e ha’u nia viajen dahuluk iha Cailacu”, hamnasa mihis hasoru sira hakat daudaun bá hariis fatin. Bee malarin habokon isin sente malirin hanesan ayam potong iha konjeladór laran.

Udan lori matak malirin, bee lihun iha fatin-fatin fatuk kiik sira bidu iha estrada klaran. Karreta roda haat hanesan bero iha tasi laran, fatuk bidu-an laloran ne’e sente maka’as liután. Postu Admistrativu Cailacu parte ida husi Munisipiu Bobonaro, nia rai-tetuk ne’ebé hafahe ho hiban (kabubu) haree husi dook hare nia matak, isin kole lakon iha minutu balu.  

Estrada nia kaber só sente de’it iha Postu Adminitrativu Maliana no kotu iha baliza Postu Administrativu Cailacu, povu ki’ik iha área remotas halerik ba estrada, produtu local la folin iha merkadu sé loos mak rona sira nia halerik, sé loos mak sei hamaran oan sira nia matan been. Tinan-tinan Parlamentu Nasionál aprova osan ba infrastrutura, tansá povu iha baze sei hakilar ba intrastrutura, tansá negosiantes sei hakilar ba kondisaun merkadu.

Asu kutun taka metin matan no tilun-diuk la rona no haree povu nia halerik Community Based Monitoring System (CBMS) ne’ebé hala’o husi organizasaun non govermental Lalenok Ba Ema Hotu (LABEH), loke hikas tilun no matan haree no sente rasik saida mak sira sente. Haree husi dook ida ne’ebé kabala lipa no hakmumuk hela kabaku iha ibun, tuur iha ai-katapa okos hein hela nia kios, hakbesik bá dada lian ho nia.

“imi haree tok merkadu ne’ebá, governu haruka kompañia mai hadia troka mak kalen de’it, lakleur anin boot kalen sira naksobu-an fali. Agora tempu udan hanesan ne’e ami labele fa’an  ami nia sasán iha ne’ebé lai sasán sira ne’e aat hotu, sei modo tahan mak bokon ne’e la duat” ko’alia mai ho oin sériu.

Merkadu fó hanoin fali mai kona-ba polítika governu tinan hirak liubá loke mini merkadu iha teritoriu laran tomak, dalan di'ak hodi fasilita to’os na’in sira fa’an sira nia prontu lokal, kria mós programa Povu kuda Governu Sosa mais tansá sai povu sei hakilar sira nia produtu la folin iha merkadu.

“Ami to’os na’in ami kontente loos bainhira governu lori tratór mai dehan imi tenke hasa’e imi nia kualidade no kuantidade produsaun tan governu iha ona hanoin atu mai sosa imi nia produtu no imi la presiza la’o dook hodi lori ba merkadu, problema mak ne’e ami kuda tiha mais sira la mosu mai, atu lori bá merkadu mós dook, ami iha foho ema ida-idak ho nia to’os sei ó fa’an bá mós sé mak atu sosa, lori bá merkadu iha postu dalaruma la folin, estrada mós aat, la iha transporte oinsá mak ami atu lori ami nia sasán ba fa’an iha Dili.

Inan ferik tuur iha merkadu nia lidun ho lian mamar ko’alia mai, ibun ne’e toos atu hatán bá nia halerik tan la iha kbiit, fuan ne’e sente revolta hakilar mós ema la rona. Timor-Leste restaura nia Independensia tinan sanulu resin lima liubá tansá tilun ne’e sei resin ho ema nia halerik.

Mini merkadu loke iha fatin-fatin maibé la buka tuir povu uza ka lae!, ita bele haree ho matan realidade ne’ebé akontese iha ita nia matan laran, merkadu sira ne’e maioria husik adandona no la uza. Komunidade kestiona katak fatin ne’e dook husi komunidade nia leet, sé ba fa’an iha ne’ebá mós sé loos mak atu bá sosa. Merkadu la’ós ona fatin fa’an sasán maibé sai fali bibi nia luhan. Sei hanesan governu gasta osan saugate de’it no la hatán ba realidade moris povu nian.

Monitorizasaun ne’e loke mós ha’u nia matan, kaer rasik ho liman governu iha polítika di'ak sosa fasilidade saúde haruka ba Sentru Saúde hotu iha Timor-Laran tomak mais tansá iha fasilidade balu hanesan mákina hamoos nehan iha Sentru Saúde Cailaco amostra de’it laiha tekniku hodi halo operasaun ba mákina ne’e.

Kontente tan oras ne’e daudaun iha doutór wain tebes no bele hala’o knaar to’o iha suku, kontente tan ita nia povu iha areas rurais mós bele asesu ba saúde ho di'ak, kontente tan inan isin rua sira sei la la’o dook hodi mai partus iha ospitál, kontente tan Sentru Saúde hotu bele asesu eletrisidade, enfermeiru sira sei la lori tan lilin hodi vizita ba ema moras hanesan saida maka akontese iha Lospalos tinan hirak liubá, ne’ebé deskobre husi programa One district, One Village.

Bainhira liman bidu iha telemovel ó bele haree iha mídia sosiál sira hanesan Facebook Partidus Politikus sira tun ba baze hametin sira nia estrutura. Ukun Nain sira kuandu kampaña halo promesas oin-oin katak sei hadi'a povu nia moris, sei lori dezenvolvimentu maibé hanesan povu ki’ik ne’ebé laiha lian no kbiit só bele dehan “baruk atu rona imi nia promesas, hatudu asaun no realidade ida ne’e mak ami presiza”. Sala kah sei ha’u halerik!

Dili, loron-29 fulan-Janeiru tinan-2016

Esteviana Maria Celina Amaral de Fátima

DOMIN SEES HUSI FUAN

Duk... dak.. duuk... dak... fuan ne’e tarutu maka’as, liman ain nakdader iha mikrolete laran, hateke tun ba ain sapatu ne’ebé baibain hamaluk no salva ha’u ain husi manas no ai-tarak hahú nakles daudaun no mehi hela sapatu foun hodi troka nia. Oras iha relójiu hatudu tuku hitu liu minutu lima nulu resin hela minutu lima sinu eskola lian. Laran ne’e hahú la hakmatek “Nai ha’u kal tarde tan ona”.

Tun husi mikrolete ponteiru relójiu hatudu tuku ualu liu minutu tolu halai lalais duni oras no ta’uk odamatan boot eskola atu taka, hakat ne’e maka’as liután teki-teki ain sidi iha fatuk no sapatu nakloke liután, ibun loke hanesan lafahek ne’ebé hamlaha buka hahán, hateke tun ba ain matan-been nakonu sapatu ne’ebé hamaluk ha’u iha loron barak naklees iha minutu balu. Biar nune’e nafatin halai to’o iha eskola oin mestre foin atu dada portaun husi dook no ta’uk ha’u dehan :

“Bon dia mestre Lalika taka lai?”

“ Ó nusa tarde hela de’it?”

“Ha’u nia uma book Mestre”

Mestre ne’e ho laran di’ak husik ha’u tama, ain foin hakat ba liu odamatan boot mestre bolu husi kotuk dehan “sé mak tarde ne’e forma ketak lai”. Ha’u mak tama ikus liu antes odamatan ne'e taka, estudante sira seluk ne’ebé mai tarde forma ona iha liña ida hodi hein kastigu husi mestre. Matan hotu iha formatura ne’e hateke lesuk mai ha’u, sira kuu malu hodi hamansa balu dehan “Ana, ó nia sapatu hamlaha ne’e nusa la fó han tiha lai”. Hamnasa ne’e forte liután, ha’u nonok no heteke tun ba ain iha ha’u nia laran dehan “sapatu nusa ó aat, ó la hanoin ha’u ga, sé ó aat ha’u atu hatais loos saida ba ó mak ha’u laran metin, biar ó aat mais ó nafatin ha’u nian, sé loos mak atu hola netik sapatu foun hodi troka ó”.

La kleur Mestre mosu mai ho lian ne’ebé si’ak “imi mai tarde tiha ona mós sei hamnasa, saida mak komik, tarde ne’e mak komik ga?”, hotu-hotu nonok, ha’u hakru’uk ho matan-been nakonu hanoin ha’u nia sapatu. “ohin loron ha’u sei la haruka imi hili fo'er maibé ha’u hakarak hatene de’it tamba saida imi tarde, liuliu Ana lor-loron ne’e ó sempre mai tarde hela, ó nia sapatu aat ona ne’e nusa la haruka ó nia inan aman hola foun”.

Hotu-hotu hateke lisuk mai, ha’u hanesan tiha hena aat ne’ebé butuk hamutuk ho roupa foun sira, “Ana tansá mak lor-loron ó mai tarde hela de’it” mestre husu tan ba dalarua. Ha’u nia liman ain nakdader la hatene atu ko’alia loos saida, kosar lotuk hakas iha dadeer ne’e, ha’u nia kolega sira hamnasa maka’as liután bainhira haree ha’u nakdedar. Fuan ne’e atu rebenta de’it ona, ha’u foti ulun hodi dehan ba sira.

“Hamnasa ba tan imi la sente saida mak ha’u sente, komik duni ba imi tan ha’u mai ho sapatu no pasta naklees, sei ha’u nia Papa la mate no Mamá la hola mane seluk, sé Mamá mak hadomi ha’u nia sei la husik ha’u moris terus ho ema seluk. Hamnasa ba tan imi sei iha Papa no Mamá ne’ebé kompletu hodi hadomi imi, sorte ema ne’ebé ha’u hela ba sei laran di'ak haruka ha’u mai eskola lai karik ha’u kal iha uma loron kalan halo servisu ba uma nain.”

Ho lian nakdader no matan-been turuk habokon hasan, bis-bisu ba malu mós para iha minutu ne'e. “Imi la hatete ha’u nia moris, la hatene saida mak ha’u sente fuan hanesan ema fai ho ai-suak loron kalan ho liafuan kroat, han etu bikan ida mós ho matan-been. Sei imi mak iha ha’u nia fatin ha’u la hatene loos saida mak imi sei halo. Ha’u sei nafatin pasiénsia tan inan ida ne’ebé hahoris ha’u deit mós la tau matan ba ha’u, sorte ona sei iha ema seluk ho laran luak simu ha’u. Ha'u reza par imi ne'ebé hamnasa ha'u la hasoru situasuan ne'e”. Kolega hotu nonook la iha lian.

Mestre mós hakfodak ho ha'u nia liafuan “imi hotu bele filafali bá imi nia sala, Ana tuir ha'u lai”. Mestre lori ha'u tama iha sala biblioteka, iha ne'ebé Mestra Carolina tuur no lee ho sériu.

“Mestre Andre nusa lori fali Ana mai ne'e, la'ós sira iha materia” hateten Mestra Carolina

“Tan ha'u hakarak ko'alia ho Ana” Hatán ba Mestre Carolina.

Ha'u  hakru’uk no kunu liman,

“Ana mai tuur tiha mak ita ko'alia” dehan Mestre Andre

“Di’ak Mestre” hatán ho lia nakdader

“Ana nusa ó tanis” mestra Carolina husu ho hakfodak bainhira haree ha'u.

“Agora ó bele konta ó nia problema mai ami nain rua mestra Carolina”.

Mestra Carolina hakat mai kaer ha'u nia liman hodi dehan “Ana ó bele fiar ami nain rua no konta sai ó nia problema” ha'u foti matan hateke ba sira na’in-rua hodi dehan “ha'u moe atu konta ha'u nia terus”, Mestra Carolina hakuak ha'u hodi dehan “konta de’it Ana karik ami bele ajuda buka dalan ba ó nia problema”.

Ha'u fakar sai ha'u nia sentimentu ba sira na’in-rua ho lian kotu-kotu, ha'u nia Papa hetan moras no mate tinan-ha'at liubá, ha'u iha alin na’in-rua. Papa nia mate husik hela todan mai ami. Mamá inan ida ne’ebé hadomi ami, husik ami tan mane seluk Mamá deside kaben ho mane ne'e no ami na’in-tolu Mama entrega ba Papa nia família. Mamá lalori ami tan nia katuas oan ki'ik lakohi ami atu moris hamutuk ho nia. Ha'u nia alin nain rua ne'e hela ho Avo iha foho, ha'u hela ho Papa nia maun alin.

Fou-foun Papa mate Tiu no Tia simu ha'u ho di’ak, hadomi ha'u hanesan sira nia oan rasik

saida de’it mak ha'u hakarak sira halo tuir. Mamá la mosu mai haree ha'u, la husu tuir ha'u di’ak ka lae, ha'u hanesan tiha ema fuik iha Mamá nia matan. Tiu halo tuir saida mak ha'u hakarak Tia la gosta ida ne'e, Tia sempre dehan liafuan pilih kasih. Tia nia jeitu mai ha'u komesa muda bainhira ema foun mai mosu tan iha uma ne'e. Nia komesa si’ak no haree ha'u oin la mamar.

Dadersan molok manu aman hananu iha ai-leten ha'u hanesan tiha niki iha dadeer ne'e hakat ne'e sai husi uma laran hanesan busa hafulu laho, halo servisu la ho lian aruma roupa foer lori bá fase iha bee-matan, biar malirin ha'u hakru’uk hodi dudu roupa foer, manu aman nia hananu hamaluk ha'u iha dadeer ne'e. Ha'u tenke fase lailais  antes Tiu hadeer tan Tia lakohi Tiu kaer toman ha'u halo servisu, sei Tiu kaer toman mak Tia sei baku ha'u. Halo tuir de’it Tia nia hakarak tan lakohi lakon etu bikan ida.

Ha'u nia moris la hanesan ho labarik sira seluk, ha'u tenke prepara mataxibu ba ha'u nia alin sira, hamoos uma laran antes bá eskola, ha'u nian laran hakarak halimar hamutuk ho labarik sira seluk haksoit boresa no tebe ai-tahan ho kontente maibé ha'u hanesan ema fuik iha sira nia leet, hafuhu husi dook ho masa fahi nian iha liman tama sai uma hodi halibur hahán restu.

Loron ne'e naruk no laiha leet hodi deskansa no estuda, ha'u hanesan tiha boneka pila ualu ne’ebé  kontrola husi Tia, biar kole no moras bainhira Tia presiza ha'u tenke nafatin prontu, laiha liafuan baruk no kole iha tia nia livru manual kontrola nian, Sé labarik sira la toba ha'u mós la toba, Tia hanesan matan delek no tilun diuk ba nia oan nian halerik ha'u mak tenke fase no raut sira nia foer. Ha'u kal boneka duni karik.

Loron ida ha'u fila husi eskola ho isin manas maka’as, isin moras hanesan ema kaer ai mak baku, Tia husik hela nia oan ikun ho tinan ida mai ha'u hodi haree, labarik ne'e toba iha kama leten. Ha'u tuur nakdader iha kama ain, oin mean hanesan boek tunu, sadere-an iha didin-lolon no dukur iha minutu balu. Ha'u la rona bainhira labarik ne'e hadeer no monu husi kama leten, nia tanis ho lian maka’as tia tama mai kuartu laran lori kedas ho ai-sar iha liman. Baku ha'u nia kotuk laran nia hakilar ha'u hodi dehan “nusa ó nia apá mate ne'e la lori tiha ó bá hotu hamutuk ho nia, ó nia ama bá estilus tiha ho mane seluk ami mak tau matan no selu ó nia eskola, pois ó la haree ha'u nia oan no husik nia monu, ó hakarak atu oho nia ga?”. Ha'u nein hanoin to'o iha ne'ebá tansá tia ko'alia hanesan ne'e mai ha'u.

Rakut ha'u nia fuuk baku ba parede, ha'u hakilar hodi dehan “moras tia, to'o ona, moras.... moras.... lalika baku ona ha'u Tia.., ha'u mak sala la haree alin tan ne'e mak nia monu”. Ha'u hakneak iha tia oin hodi husu deskulpa. Tia hamriik tebe ha'u monu ba rai, ha'u nia oin taka fuuk no matan-been sulin halolon tuir fuuk lahan. Tia duni ha'u sai husi uma laran no dehan “ó sai husi ne'e ha'u lakohi haree ó nia oin”. Ha'u tuur iha nakukun laran hodi tanis “Papa nusa ó mate ne'e lalori tiha ha'u bá, ó husi ha'u hodi moris terus iha mundu ne'e.

Kalan ne'e la fó ha'u han, nia bandu ha'u labele tama dapur laran. Tio nia servisu hanesan ema ne'ebé halo ronda (sikurity) no nia sempre fila kalan boot maibé kalan ne'e nia sedu la hanesan kalan baibain. Haree ha'u tanis iha nakukun tiu bolu ha'u hodi husu, rona tiu nia lian Tia sai husi uma laran hodi dehan “haree ó nia subriña ne'e agora oin iha dalan de’it, bá badiu no la haree nia alin monu”. Tiu rona de’it saida mak tia ko'alia nein husu tuir ha'u. Tiu ho lian hirus hodi dehan “ó han ona ka lae, sei seidauk han haree bá han tiha lai, deskansa aban mak ita ko'alia”. Tiu halo ida ne'e ida ne'e par tia labele ko'alia tan ona ha'u.

Osan ne’ebé tiu fó ba ha'u hodi hola sapatu foun mós tia prende hotu, Tia nafatin hatudu nia di’ak mai ha'u bainhira Tiu iha uma. Tia hanesan tiha samea troka kulit, ha'u la hirus saida mak Tia halo ba ha'u mais ha'u fiar loron ruma Tia mós sei arrepende ba saida mak nia halo ona mai ha'u, iha nakukun nia laran ha'u promete ba ha'u-an katak ha'u tenke sai feto ne'ebé forte hasoru laloran ne'ebe si’ak, ha'u jura ba ha'u-an aban bairua ha'u sei sai feto ne'ebé di’ak liu Mamá no lakohi haterus ha'u nia oan sira hanesan saida mak Mamá halo mai ami.

Mestra Carolina ho matan been hakuak ha'u hodi dehan “ha'u sei buka jeitu ko'alia ho nia Mamá, iha eskola ó nia kolega sira sei la hamnasa tan ó”, Bainhira ha'u konta mestre Andre hakru’uk no lakohi fihir ha'u nia oin, karik nia mós sente saida mak ha'u sente, nia hamriik husik hela ami nein liafuan ida sai husi nia ibun. Ha'u hatudu kotuk laran metan baku fatin ba Mestra Carolina. Haree tiha ida ne'e nia hakuak ha'u metin hodi dasa ha'u nia kabaas.

Sinu lian fó sinál oras deskansa, ain ne'e sente todan hakat ba sala laran, fuan tariduk ha'u kal sei simu goza husi ha'u nia kolega sira karik, matan hotu iha fatin ne'e hateke lisuk mai ha'u maibé la iha lian, dada kadeira no tuur hanesan buat ida la kona, ha'u sente hanesan lakon buat boot ida. Baibain ha'u tama mai sira simu ho hakilar mais ohin ha'u hanesan ema foun iha sira leet.

Amelia ha'u nia kolega di'ak ne'ebé sempre defende ha'u mós haksee-an husi ha'u karik sira hakribi ou karik sira kasian ha'u sira bis-bisu ba malu, ha'u fila kotuk hateke hamnasa ba sira simu ho oin toos. Ha'u tuur nonook no  hakru’uk  ba meza. Mestra Joana tama mai hotu-hotu hamriik hodi fó bon dia ba nia, ha'u nia isin lolon mak iha sala laran maibé ha'u nia hanoin iha fatin seluk, Mastra Joana ko'alia hakilar iha kuadru oin matan haree maibé tilun ne'e diuk atu rona nia.

Lakleur sinu eskola mós lian hotu-hotu kontente foti kadernu tau iha pasta laran fila bá uma, ida-idak sa’e husik hela fatin ne'e, ha'u nafatin tuur laiha ema ida mak mosu mai hasé ha'u. Amelia mós hanesan la haree hetan ha'u. Ha'u fila laran triste. Eskola hanesan fatin ba ha'u halai husi problema, iha eskola sentimentu hotu haksubar-an iha barullu nia laran. Tansá eskola mós sai ona problema ba ha'u, ba sé loos mak ha'u sei sadere bá.

Loron tuir mai ha'u nafatin bá eskola ho sapatu naklees ne'e, mosu iha sala laran nafatin laiha  reasaun husi kolega sira balu hamnasa hasoru ha'u no balu oin toos mai ha'u. Amelia nafatin laliga ha'u hanesan baibain. Lakleur mastre André  mosu mai ho plastiku mean boot, hotu-hotu kontente ha'u tuur ho oin murón no  hakru’uk  ba meza. Lakleur Mestre ne'e bolu ha'u

“Ana, ó bele mai iha oin ka lae?”

“bele” ha'u hamriik ba ho oin ta’uk.

“ò lalika ta’uk”

Mestre André dada kaixa iha plastiku nia laran, ha'u la tau atensaun saida mak iha kaixa ne'e nia laran ha'u hamriik no lakohi hatene ba oin tan ha'u moe ho ha'u nia kolega sira. “Ana, ó bele foti oin ka lae?”. Ha'u nonook no hiit sai ha'u nia oin hateke ba ha'u belun sira. Mestre André  hiit  kaixa ne'e hodi dehan :

“Ana, ne'e prezente husi ó nia kolega sira, horseik sira tuur hamutuk no halibur osan hodi hola ó nia sapatu, pasta no farda foun”.

Ha'u foti matan hateke ha'u nia kolega sira ho matan-been nakonu, lakleur sira hotu ko'alia no hamnasa mai ha'u hodi dehan “deskulpa Ana”. Amelia hakat mai hodi hakuak ha'u dehan “deskulpa, la'ós ha'u lakohi liga ó maibé ha'u la hatene atu halo loos saida ba ó, ha'u ta’uk sei ha'u ko'alia sala buat ruma ó lakohi habelun ho ha'u tan ona”. Nia hakuak ha'u no ha'u tanis iha nia kabaas. Ida-idak hakat mai hakuan no kaer ha'u nia liman hodi husu deskulpa.

Sira obriga ha'u hasa'e ha'u nia sapatu tuan no troka ho sapatu foun, ha'u troka sapatu ne'e ho matan-been, iha ha'u nia laran dehan “obrigada sapatu tan ó ha'u nia kolega sira bele simu ha'u ho di’ak, ha'u lakon ó maibé ha'u manán ema barak nia fuan. Obrigada tan hamaluk ona ha'u iha tempu naruk, salva ona ha'u husi manas, tahu no ai-tarak” ha'u bele so’e mais ó nia memoria nafatin metin ha'u nia fuan.

Obrigada sapatu.

Kia Kaha.

Obrigada mós ba Jornál Independente públika ona istória badak ne’e iha pájina Hakerek Kreativu (loron-5 fulan-Marsu tinan-2016)

FITAR HASASIN ISTÓRIA

Istória ne’e reflete ba Maria Fátima Kalçona, oras ne’e daudaun hala’o hela knaar  nu’udar  finansa iha Comissão Pesquisa e Elaboração da Hístoria da Luta Mulher Timor. Oan husi Vitorino de Jesus Kalçona no Elisa de Jesus Correia de Lemos iha maun alin sanulu resin ida. Kaben ho João Macario Faria no iha oan na’in-ualu. Oras ne’e daudaun hela iha Becora

“Boa Tarde”

Lian ne’e halo matan hotu iha fatin ne’e hateke lisuk ba nia. Fuuk mutin dolar hanahas fuuk metan, hakat mai ho oin kontente. Ha’u tuur iha liña daruak matan baku kedas ba nia liman kabun sorin loos. Fitar ne’ebé la hafalun ho bluza kór-kafé riskadu sakat iha sorin-sorin. Lian ne’ebé la famíliar iha ha’u tilun mosu mai mosu mai ho sadalhas kór-kafé.

    Ami ba dahuluk hasoru malu ho nia iha salaun konférensia CAVR, iha formasaun nu’udar entrevistadór Comissão Pesquisa e Elaboração da Hístoria da Luta Mulher Timor. Nia hola parte mós iha formasaun ne’e hanesan formadór ida. Maria Fátima Kalçona ne’e mak nia naran kompletu, nia ema ida ne’ebé simples tebes husi nia maneira hatais, gosta hamnasa no gosta ko’alia. Husi dook ha’u haree nia hamnasa mai ami. Nia la mai tanan sempre lori plástiku mean ou metan iha nia liman sorin-sorin, plástiku ne’ebé nakonu ho bee, biskuit no hahán meudia ninian.

    La sente tempu barak ha’u liu ona no lor-loron sempre hamutuk, nia hanesan inan ida iha organizasaun nia laran. Buat ne’ebé ha’u aprende husi nia lalika moe atu dehan no lalika moe atu aprende, liafuan ne’e motiva tebes ha’u.

    Tarde tebes atu hatene kona-ba fitar ne’e, iha uma mahon ho ai-riin ida, kakuluk taka ho tali metan haleu ho ai-hun boot, ai-kakeu no hali tahan maran munu ba rai halo fatin ne’e sai furak liután no lakon iha hakmatek nia laran. Usiberek ne’e mak nia naran revolusionáriu ho sentidu Unidus Seremos Independentes. Ho matan nabilan ne’ebé hafutar ho ókulu oin hahú namkurut, tailalat ki’ik oan iha hasan sorin karuk ho lian-mamar sadere-an ba kadeira, dada iis neineik hahú konta nia istória akonpaña ho anin nia malirin halo ha’u mout iha nia istória.

Usibere haktuir :

Kalan hakmatek, lalehan nakukun la ho naroman fitun. Ami tuur haksubar-an iha du’ut laran boot no ai-hun nia okos iha mota ninin, rona kilat tarutu hakfodak no deside sai kedas husi Mota Suai Oan muda bá to’os tuan iha Beto-Lacu (area Fatuberliu-Webicas nian). Ami la’o forma naruk hanesan nehek. Kalan tomak ami la’o nune’e de’it hodi to’o Beto-Lacu ho hanoin inimigu sé la kaer tanba iha serku dahuluk tuku tolu dadeer-san ami konsege halai sa’e husi inimigu nian liman ho fiar an nafatin la’o.

    Ami la’o iha udan laran, musila ne’ebé halo husi akadiru metin iha ha’u nia kotuk, to’o iha dalan klaran komesa buka ai-hun hodi hamahan-an. Vestidu riskadu mutin no mean, kampaña bobar iha kanotak bokon halo ha’u nakdedar la aguenta ho mailirin.

    La iha minolku dalan ida ne’ebé ha’u ho Agusto hili tenke sa’e ai-dak hodi haree inimigu nia pozisaun ho fulan nia naroman. Agostu nu’udar eskoltu bá ha’u-nia Companhero da Luta Moisés Rafael Tilman hanesan vice Asistente Zona Fatuberliu. Husi dook ami haree naroman petromas husi loma militár Indonézia. Haree tiha ida ne’e ami deside hasees-an husi fatin ne’e, kontinua la’o to’o dadeer.

    Tuku lima dadeer-san rai sei nakukun ami to’o iha to’os tuan ho uma tali ain aas ne’ebé halo ba to’os-na’in sei nafatin iha. Udan nafatin subiska bainhira la’o husik hela ain fatin. Manu-fuik sira sei hafalun an iha ai-leten maibé ami hanesan niki iha kalan ne’e. Situasaun hakmatek ami la haree sinál ruma husi inimigu no hanoin katak dook ona husi inimigu. Malirin halo ha’u sente isin atu manas, hakat ba toba iha hadak leten ne’ebé halo husi au no hafalun-an ho manta metan.

    Iha uma tali ne’ebé halo iha rai-tetuk, haleu ho ai-fukiran no ai-fedenuk besik mota ninin, ida-idak buka fatin hodi deskansa. Balu hahú preokupa ho bee manas, labarik ki’ik ho tinan neen lori au-doran hasaan iha kabaas la’o ba buka bee moos maizumenus metru tolunulu la dook husi fatin ami deskansa. Ha’u foin mak taka matan lakleur ha’u rona labarik ne’e hakilar :

   

    ‘inimigu-inimigu, kamarada inimigu sira mai.’

    Ha’u hakfodak bainhira rona labarik ne’e hakilar. Ha’u haksoit husi hadak leten ne’e mai primeiru tiru ne’ebé ha’u apaña mak iha ha’u nia kelen sorin karuk. Militár Indonézia mosu mai ho farda kompletu kotuk laran nakonu ho ai-tahan, la iha liafuan ida mak sa’e husi sira nia ibun, só lian kilat musan mak razada deit mai. Sira serka ami meia lua modelu hanesan letra U só iha dalan ida de’it bá bee kadalak.

Kilat musan kona ha’u-nia ain no kelen borus liu modelu kilat ne’ebé nunka hasoru iha ai-laran se la sala AR 15. Estelasu dilagrama kona iha liman kabun sorin loos no kabun sorin loos, vistidu riskadu mutin no mean hariis tiha ho kór mean, ha’u monu dahuluk iha serku ne’e. kamarada Luruk monu kedas iha ha’u-nia oin. Kilat musan tama iha nia kanuruk borus ba rentos, nia ulun kulit katik sae tiha no haree nia kakutak mutin momoos loos depois monu neineik ba rai no mate iha fatin kedas.

Mana Domingas Ohcar-Bauc iha hela hadak leten no foin tau lipa hodi kele nia oan. Lakleur estelasu dilagrama no kilat musan kona iha nia kotuk laran no kidan, sorte la kona nia oan no riba neneik deit tun mai rai, lipa ne’ebé kele labarik nakonu ho ran.

Kamarada Moisés, Agusto no Pedro la hetan tiru tanba antes ne’e sira haree hetan inimigu no sira toba hakrabat kedas bá rai leten, hafoin liu tiha minutu balu ininimigu mós la tiru ona. Ha’u nafatin toba latan iha rai leten ho ran iha rai nein sente moras bainhira anin huu foin mak sente kíi no moras. Militár sira obriga Agusto, Moisés no Pedro kee rai uza ai-kroat hodi hakoi mate isin nain rua ne’e.

Ha’u sente ta’uk haree militár nia oin, la komprende saida mak sira ko’alia só kapta deit liafuan balu Fretilin komunis. Hafoin hakoi tiha mate isin mak kamarada sira ne’e foin mai hiit ha’u tau iha hadak leten no militár Indonézia sira mak halo kurativu. Liu tiha ida ne’e sira obriga lori ami bá We-Leet, bebé oan ne’ebé nia inan mate ne’e kamarada Pedro mak kuus. Ha’u hafalun-an iha manta laran vistidu no kanpaña ne’ebé ha’u uza mós naklees tanba kilat musan kona. Akonpaña ho ai obriga ha’u la’o nune’e de’it mesmu raan sulin husi ha’u-nia isin lolon, militár sira la preokupa.

Bainhira liu iha mota, militár ida ko’alia mai ha’u maibé ha’u nein komprende saida mak nia ko’alia. Karik nia atu husu  ‘ó bele hakur mota ne’e ka lae?’

Ha’u só kapta de’it liafuan bisa, iha tetun terik dehan buti, ha’u mós hatán bisa maibé la komprende saida mak nia ko’alia. Ami bá hela iha We-Leet durante loron rua iha pos militár ne’ebé halo husi uma tali. Dadeer-dadeer militár sira ajuda halo kurativu ba ha’u-nia ain kanek, ho roupa ne’ebé nakonu ho raan durante loron rua la hariis tanba ta’uk inimigu. Ami hanesan tiha bibi rusa fuik tama sidade, matan nunka hakmatek sempre hateke bá-mai hafuhu inimigu.

Liu tiha ida ne’e sira lori ha’u ba Debu-Belar, kamarada Moisés, Agusto no Pedro no bebé mane oan (João) ne’e sira lori liubá Fatuberliu. Iha Debu-Belar ha’u hasoru fali Regina de Jesus husi Baucau, liu tiha loron balu sira lori bá Alas ho elikópteru militár. Fuan la hakmatek ida ne’e bá atu moris ka mate mak ne’e ou keta iha dalan klaran mak sira soe tiha ami ho grasa maromak nian ida ne’e la akontese.

Ai-tahan no du’ut sira hahú bidu-an hodi simu ami, muzila akadiru belit iha kotuk laran, ai iha liman loos hodi haforsa ain tun husi elikópteru. Militár Indonézia simu ami ho farda kompletu no kilat. Ami bá pos militár Indonézia hodi halo pasta revista ba sasán ne’ebé ami lori. Baraka ne’ebé didin husi au no kakuluk husi tali tahan nein iha janela hein hela ha’u.

Iha baraka ne’e ha’u hela hamutuk ho Azita Alves, Maria (ema Aileu), Regina de Jesus, Filomena Soares (komandante Setór Sentru Sul, Valente Soares nia feton) no toba iha hadak leten ne’ebé halo husi au.

Liu minitu balu Soimali husu ba komandante Batilaun atus ida resin ida mai hasoru ha’u, nia hanesan Sekretaris Jeral Organizasaun Populasar Mulher Timor ba daruak. Militár sira akonpaña nia mai ho kampaña funan-fuan, ain tanan la’o mai hasoru malu ho ha’u iha ai-daak nian hun no tuur iha fatuk leten. Militár sira ho kilat tuur haleu ami hodi rona de’it saida mak ami ko’alia.

‘ita ko’alia labele neineik, ita tenke ko’alia maka’as  para sira bele rona,’ Soimali hateten. ‘Fatinha, ó hatene saida ha’u-nia oan mate, ha’u-nia la’en mate, ha’u la hatene aban-bairua ita ne’e bá ne’ebé tan. Ita kal mate esperansa ba ita la iha ona mais ita prontu, ita prontu, saida de’it mak atu mosu ba ita mós ita prontu.’

    Ami hasoru malu la to’o minutu sanulu resin lima depois ida ne’e militár sira lori ami ida-idak fila ba nia baraka. Fou-foun ami bá Alas sira mak te’in ba ami han, iha ha’u nia moris foin ba dahuluk han tempe no T2B (hahán feitu bá militár), liu tiha semana rua ami ida-idak buka ami nia hahán rasik. Dalaruma militár sira fó sigaru, masin midar, bikan ba ami hodi troka ai-ferina ho populasaun ne’ebé besik iha ne’ebá.

    Moris terus tebes bainhira iha Alas tratamentu bá kanek laiha ona. Ha’u nia liman ne’e ular boboot hanesan sintina nian mut-mutin mak sae mai tanba lor-loron hamoos de’it ho bee morna. Ha’u-nian feto maluk nain haat ne’ebé hamutuk ho ha’u sempre ajuda ha’u. La’o mós ladi'ak no iha uma metan bee susar tebetebes ami tenke kuru iha mota. Masa mutin litru lima iha liman sorin la’o sa’e foho lolon la aguenta lori todan. Raan sulin neineik halolon ain no tun ba rai, maske nune’e ha’u nafatin la’o no hanoin hetan Soimali nia lia fuan

‘Saida de’it mak atu mosu ba ita tenke prontu’.

Dili, loron-5 fulan-Fevereiru tinan-2015

Esteviana Maria Celina Amaral de Fátima