Lia mak husu ne’e halo ha’u toba ladukur, tansá Ana husu nune’e mai ha’u. Karik nia iha oan mehi ruma tan ne’e nia husu nune’e mai ha’u. Hanoin kona-ba mehi sei malahuk, koko taka matan hanoin kona-ba saida mak ha’u gosta karik ida-ne’e sei tulun hodi ha’u to’o iha ha’u-nia mehi.
Hanoin mak hanoin maibé laiha buat ida mak mosu. Laiha sinál di’ak husi hanoin ne’e, so gasta enerjia ba buat laek ida. Asu hatenu iha dadeer hakmatek, hafanu husi dukur naruk. Tekiteki lian bisbisu bolu husi janela leet, kose matan dada iis naruk hodi see tilun ba lian ne’e.
“Abio, hadeer ona.?” lian ne’ebé tuan ona iha tilun
“Ó, hein iha ne’ebá ha’u, ha’u sai ba agora.” Ko’alia nune’e book an daudaun husi kama leten la ho lian.
“Ita, bá haree jogus ne’e iha ne’ebé?”
“Bá Acau sira-nia uma de’it, ohin ha’u mai ema barak ona iha sira-nia uma oin.”
“Ó, husi sé Barcaleno ga Real Madrid. Ha’u sai mate ho Barcelona.”
“Orasida ba mak ita haree sé mak forsa liu.”
Aju, ha’u-nia belun di’ak. Ami iha gostu ne’ebé hanesan gosta tebe bola maibé ko’alia kona-ba clubu favoritu ami sempre deskute malu dalaruma to’o hirus malu. Tan televizaun iha uma la asesu ba kanál futeból, dadeersan nakukun ami promete ba malu sei hasoru malu iha Acau nia uma.
Bainhira to’o iha ne’ebé ema wain ona iha uma oin, katuas no joven sira nakonu ona ho komentáriu oioin. Ha’u, Aju no Acau tuur kedas iha liña oin. Jogus dadeer ne’e halo fuan atu semo de’it husi nia fatin. Aju tuku beibeik ha’u-nia liman hodi dehan “ó, haree ha’u dehan saida.?”
“Atoy, haree Abio ka lae?”
“Mana Ana, dadeer nakukun de’it buka ona Abio ne’e.” hatán ho hakfodak bainhira haree Mamá.
“Labarik sai husi uma hanesan na’ok teen, odamatan mós la taka, sai husi uma-laran laiha ema ida mak hatene.”
“Mana, nia iha ne’e hela.”
“Ajuda bolu hela nia.”
Mamá ho oin-buis hateke ha’u ho matan ikun ho lian maka’as dehan “ita fila ona” hatais sinelus la’o tuir Mamá. Matan been nakonu tan labele asiste jogus ne’e to’o rohan. Triste hafalun fuan iha dadeersan hakmatek. Bainhira to’o iha uma Mamá hirus maka’as.
“Ki’ik oan hela aprende la’o dadeersan nakukun buka ema nia televizaun, ó ne’e boot atu sai saida.?” Ko’alia mai ho lian maka’as.
Ha’u nonook hodi see tilun de’it ba Mamá ne’ebé hirus, karik ha’u sala duni. Bola hanesan gostu ida ne’ebé ha’u iha ona no gostu ne’e lori ha’u hanoin atu sai hanesan jogadór futeból iha futuru, Mamá sempre kontra mehi ne’e no dehan “sai jogadór mak lae tiha duni, nu’usá la sai Doutór ou pilotu ne’e sei di’ak liu duké sai jogadór futeból.”
Mehi ho realidade buat rua ne’ebé xoke malu, ha’u lakon vontade atu aprende. Dala wain Mamá sempre obriga atu halo tuir saida mak Mamá ko’alia no taka tilun ba ha’u-nia halerik. Karik ha’u sala sei ha’u kontra Mamá nia hakarak maibé ha’u mós iha mehi hanesan labarik seluk.
Tansá Mamá tenke kesi metin ha’u-nia an ho mehi ne’ebé mak iha, nu’udar inan hakarak nia oan sira moris haksolok no bele foti família nia naran iha komunidade, sala-kah sé oan ida mós deside nia hakat rasik ba destinu moris aban-bainrua nian.
Dili, loron-22 fulan-Janeiru tinan-2018
Tidak ada komentar:
Posting Komentar