LA HUSU, LA SIGNIFIKA TENKE BOSOK

‘Noy, eskola iha ne’ebé.?’
‘Iha Díli.’
‘Ha’u mós atu bá Díli, Sé hakarak bele sai tuir ha’u-nia karreta.’

Ania hakbesik ba Karreta ho odamatan rua no kotuk mamuk modelu hanesan karreta Anguna maibé nia ne’e ki’ik oituan. Ania hi’it daudaun ain sai karreta kotuk. Lian ida husi karreta laran bolu mai dehan;

‘Ó, mai tuur iha laran de’it, tesik ba ne’e rai-rahun no rai-manas.’
Ho hamnasa Ania tun husi karreta kotuk ‘ha’u tuur iha oin la buat ida ga.?
‘La buat ida, ema husi Díli telefone mai atu bá tula sasán iha ne’ebá.’
‘Noy hela iha ne’e ga.? Dadeer ha’u liu iha ne’e hetan beibeik ó.’
‘Sin.’
‘Nu’usá la hela iha Díli de’it, duké bá-mai hela de’it hanesan ne’e.’
‘Ha’u-nia inan-aman hela iha ne’e.’

Minutu sanulu iha karreta laran, laiha lian só múzika ho ritmu hakmatek akompaña viajen ne’e. Bainhira to’o iha terminal Becora Ania habrani an hodi ko’alia ba kondutór ne’e.

‘Maun ha’u tuun iha ne’e.’
‘Noy eskola iha ne’ebé? nu’usá ha’u la lori bá tuun iha eskola oin de’it.’
‘Di’ak hela maun, ha’u ho ha’u-nia kolega promete atu hasoru malu iha ne’e. Obrigada maun.’ Dehan nune’e loke daudaun odamatan no tun husi karreta.

Bainhira Ania atu hakat bá estrada sorin, mane morena ne’ebé nia idade boot liu Ania tinan sanulu ne’e bolu tuir husi kotuk dehan;

‘Loron ruma hetan ha’u karik para de’it, ha’u-nia naran Luis.’
‘Di’ak. Ha’u Ania.’

Hahusuk oioin mosu iha hanoin, maun ne’e sé karik. Sé aban mak ha’u hetan tan nia ha’u bele poupa osan oituan husi selu karreta nian duké loroloron husu hela de’it osan bá Papa no Mamá sira atu foti osan iha ne’ebé sah tan oras ne’e anin-boot no Papa la tun ba peska.

Ania hanesan estudante ida husi Universidade ida iha Díli laran. Ania prefere liu hela ho nia inan-aman duké família sira iha Díli, bainhira sai eskola nia sei bele ajuda nia Mamá iha toos no ajuda tau matan mós ba nia alin sira-ne’ebé mak sei ki’ik.

Dadeer molok bá eskola Ania sei ajuda nia Mamá rega modo iha kantereiru no prepara matabixu ba nia alin sira. Bainhira halo hotu servisu iha hirak-ne’e Ania halai lailais bá hariis-fatin. Mane klosan ne’ebé nia hasoru iha loron rua bá mosu derrepente iha nia hanoin ‘orasida hetan tan maun ne’e ka lae.’

Bis no mikrolete liu daudaun maibé Ania la para karreta hirak-ne’e. Tekiteki karreta metan ne’ebé nia hein ne’e  mós liu. Ania foti liman no mane-klosan ne’e ho hamnasa para daudaun karreta ne’e iha nia oin.

‘Bon dia maun.’
‘Atu bá Díli ga.?’
‘Sin’
‘Entaun mai sai ona, horisehik ha’u liu maibé la hetan ó.’
‘Horisehik, ha’u la bá eskola. Ajuda Mamá lori modo bá fa’an iha Taibesi.’
‘Ha’u gosta feto badinas maibé feto bonita hanesan ó la merese fa’an modo iha merkadu.’ Dehan nune’e no fihi metimetin Ania nia oin.
Ho moe no hamnasa mihis Ania hatán ‘So ida ne’e mak ha’u bele halo hodi tulun ha’u-nia inan-aman.’

Fulan-tolu liu daudaun, Ania bá-mai eskola Luis mak tula. Bainhira kalan to’o Luis mós husu tuir Ania novidades ho tempu tubun domin hahú moris iha sira leet. Luis hanesan mane dahuluk ne’ebé halo Ania monu ba lasu domin. Bainhira la hasoru malu no la rona Luis nia lian hanesan falta buat boot.

Ania mós monu ho liafuan domin no promesas hotu husi Luis ‘ha’u-nia idade mós boot daudaun  ona, ha’u presiza feto ida hodi hamaluk ha’u no feto ne’ebé mak ha’u hili mak ó. Se ha’u kaben ho ó, ha’u promete ó sei la falta ba domin no osan, ha’u sei nafatin haruka ó ba eskola no duni ó-nia mehi.’

Liafuan hirak-ne’e halo Ania nia domin ba Luis hetok metin liután no habrania an ko’alia ho nia inan-aman kona-ba mane ne’e. Bainhira kalan to’o Ania ajuda nia Mamá te’in. Bainhira haree hahán barakliu la hanesan baibain nia Papa husu ona ho oin hafodak.

‘Nu’usá mak te’in barak loos ne’e.’
‘Ania dehan nia kolega mane ida atu mai han hamutuk ho ita.’  Ania Mamá hatán ho oin toos no fihir daudaun ba Ania ne’ebé iha hela dapur laran.
‘Ania, sé mak atu mai ne’e.’
‘Orasida, nia mai mak Papa koñese de’it.’
‘Ó, eskola lai, lalika ansi atu kaben.’
‘Nia mai atu fó koñese an de’it ba família.’

La kleur karreta ida para iha uma oin. Ania halai bá haree lailais hodi dehan;

‘Luis mai ona.’

Luis mós tun husi karreta lahó oin ta’uk tan ne’e la’ós foin ba dahuluk nia aprezenta an ba feto nia família. Ania dada Luis nia liman ba tuur iha sala-vizita no bolu daudaun nia inan-aman ne’ebé tuur iha sala han. Ania nia Papa sai husi sala han mai ho oin la hamnasa. Luis hamriik husi nia tuur-fatin hola bensaun Ania nia inan-aman.

‘Tuur tiha.’
‘Tiu ho tia ha’u mak tuir Ania.’
‘Huumm.. sé imi gosta malu ona ami atu bandu mós ladi'ak, Ania mós boot daudaun maibé nia tenke eskola hotu lai.’
‘Di’ak , ha’u prontu hein nia to’o eskola hotu.’

Hasoru malu ne’e halo Ania nia inan-aman fó fiar Luis hodi tau matan lesuk ba Ania. Dadeer-dadeer bá tula Ania iha uma. Komunikasaun entre Luis ho Ania nia inan-aman mós la’o di’ak no laiha problema. Liutiha fulan-lima Ania nia isin hahú tun, oin kamutin no muta beibeik. Ania habrani an dehan ba nia inan-aman kona-ba nia kondisaun.

‘Mamá, ha’u isin-rua ona fulan ida.’
‘Ó, lori mane ne’e mai ko’alia ho ó-nia aman.’ Hatán ho hirus.

Lokraik ne’e Luis mai duni iha uma no prontu resposabiliza ba nia hahalok hotu no rekoñese labarik ne’ebé nia Ania nia isin nia oan. Ania nia inan-aman simu ho liman rua, buat hotu akontese ona inportante mak Luis rekoñese iha família nia oin.

Ania nia inan-aman husu Luis atu lori nia família mai ko’alia lia maibé nia sempre fó razaun oioin. Ania nia bebé tama ba fulan-lima. Feto klosan  ida idade hanesan mós ho Luis mai buka Luis iha Ania nia inan-aman nia uma.

Ania ho nia família hafodak bainhira rona ne’e nia liafuan katak Luis iha feen no iha oan na’in-ida no fulan-haat ona la  fila ba uma. Liafuan ne’e hanesan xoke boot ida ba Ania ho nia família. Iha loron tuirmai Elsa no nia família kontinua mai buka Luis nia Ania nia uma.

Ania nia família hirus tebes ho Luis tan bosok ona sira nia oan-feto. Elsa no Ania família fó sala hotu ba Luis maibé Luis nafatin hatudu nia ibun-boot hodi dehan;

‘Sé mak haruka bainhira ha’u mai foufoun imi la husu ha’u klosan ka kaben-na’in.

Ania tanis bainhira rona Luis dehan hanesan ne’e iha nia família nia oin. Ania nia Papa hirus no duni Luis nia família sai husi uma ne’e. Iha sorin seluk Luis lakohi husi Elsa ho nia oan no prontu husi Ania.

Ania Papa hirus hodi dehan ‘ami la husu la signifika katak ó tenke mai bosok ami-nia nia oan-feto, di’ak liu ó sai husi uma ne’e, ha’u lakohi haree tan ó-nia oin. Ha’u sei forsa hela hodi fó han sira na’in-rua. Ha’u-nia oan mane mós ida de’it ne’ebé nia ha’u foti hanesan ha’u-nia oan mane no nia ha’u sei haruka fali ba eskola.’

Nein liafuan ida mak sai husi Ania nia ibun. So matan-been mak sulin. Ania arrepende tan la rona ona nia inan-aman nia liafuan, no tau fiar ba mane ne’ebé ikus halo nia laran-moras no tenke hasan mesak nahan moris ne’e.

Díli, loron-28 fulan-Maiu tinan-2018

SIDADE

 ‘Díli…Díli… Díli.. alin atu bá Díli ga.?’

 ‘Sin, maun.’
 ‘Entaun sai daudaun karreta ona, minutu sanulu tan ita aranka.’

Ho hamnasa mihis Sonia hiit nia pasta tau bá karreta laran. Hanoin ne’e hahú lahakmatek bainhira ha’u to’o iha Díli tiu Ándre mai hasoru duni ha’u ka lae. Liutiha minutu balu karreta ne’e mós hahú aranka.

 ‘Sonia, ó nu’usá?’
 ‘Ha’u foin dahuluk bá Díli.’
 ‘Ó, bá Díli atu halo saida.?’
 ‘Ha’u atu bá pasa férias.’

 Lalatak sidade mosu iha hanoin hanesan saida mak nia haree iha televizaun no rona husi nia belun sira, Timor Plaza mak fatin ne’ebé furak liu no bele hasoru ema barak iha fatin ne’e. Sonia iha komprimisiu ida bá nia an bainhira to’o iha Díli fatin dahuluk ne’ebé nia sei vizita mak Timor Plaza.

Bainhira to’o iha Fatu Ahi ajudante kondutór hahú halo kobransa ba pasajeirus sira. Sonia hahú atrapalla ho nia telefone no hafuhu beibeik husi janela ba liur.

 ‘Afinál, iha sidade ne’e uma barak hanesan ne’e.’

Foti telefone no hahú hasai fotografia husi laletek Fatu Ahi. Sonia lakohi lakon mementu furak hotu iha nia vizita dahuluk. Bainhira to’o iha triminál Becora. Mane morena ida hamriik ona iha lurón. Liman buti namanas telefone.

Bainhira tun husi karreta Sonia halai hasoru kedas hodi dehan;

 ‘Tiu Ándre.?’
 ‘Sonia, ó mak ne’e ga.?’
 ‘Sin, tiu.’
 ‘Kleur la hasoru, agora ó feto-klosan ona.’

Sonia ho hamnasa mihis re’I daudaun Tiu Ándre nia liman.

 ‘Ó-nia tia no alin sira hein hela ó iha uma.’
 ‘Tiu sira nia hela fatin dook ka besik.’
 ‘Besik, la to’o minutu ruanulu ita to’o ona iha ne’ebá.’

Ida dalan fila bá uma, Sonia nia matan hahú lahakmatek liután kakorok badak naruk hodi hafuhu tuir sidade nia furak ho hafodak nia dehan;

 ‘Iha ne’e uma andár barak loos.’
 ‘Domingo, Agora tiu sei lori ó bá Pasiár iha Cristo Rei no João Paulo II.’
 ‘Tebes mak ne’e, semana oin ami tama fali ona eskola. Tiu bele lori ha’u la’o halimar bá Timor Plaza ga?’
‘Ó, kalma de’it.’ Hatán ho hamnasa.

Bainhira to’o iha uma Ania no Joana kontente tebes bainhira haree Sonia tun hosi karreta. Ania no Joana halai hasoru ho kontente dada Sonia nia liman bá uma laran.

 ‘Abin, orasida kalan toba ho ha’u eehh,...’
‘Imi ne’e labele duni. Husik Sonia bá han no deskansa lai. Nia kole ne’e.’ Dehan tia Elsa
‘Di’ak hela tia, ohin iha karreta laran mós ha’u konsege toba oituan.’ 
‘Haree, lori bin nia Pasta bá tau iha kuartu-laran. Sonia, ó ho ó-nia tiun haree bá han ona, lokraik mai ita bá Timor Plaza hola ó-nia pasta no sapatu foun.’

Sonia hamnasa bainhira rona dehan atu bá Plaza. Matan fihi beibeik ba relójiu ne’ebé tara iha Díli lolon. Lokraik lailais ona bá. Hanoin ne’e mak mosu beibeik iha nia hanoin.

 ‘Duké ha’u tuur bilan iha uma laran di’ak liu sai bá hola anin iha liur.’

Bainhira nia hamriik iha uma oin, hateke ba sorisorin la haten ema ida. Moru mesak aas, hahusuk oioin mosu iha nia hanoin. ‘Tiu Ándre nia uma ne’e mai halo loos iha prizaun nia klaran ne’e?’

 ‘Sonia, ó halo saida iha liur.’ Lian ne’e halo Sonia hafodak.
 ‘Tia, sorin-sorin ne’e prizaun ga.?’
 ‘Prizaun besik fatin ohin ó tun husi bis ne’e.’
 ‘Entaun, sorisorin ne’e.’ hatán ho hafodak.
‘Ne’e ema nia uma. Tanba ema sente la seguru ne’e mak ema halo moru as ne’e.’
‘Tansá mak ema sente la seguru iha nia rai rasik.’
‘Haree bá hariis ona. Ita la’o halimar bá Timor Plaza.’

Moru as la’ós iha de’it tiu Ándre nia uma sorisorin maibé bele hasoru iha fatin-fatin. Bainhira to’o iha Timor Plaza, Sonia hafodak ho saida mak nia haree, afinál fatin ne’e furak loos. Foti nia telefone no hasai daudaun lertaru. Momentu furak tenke hasai fotografia hodi hatudu bá nia belun sira.

Bainhira tama bá Timor Plaza laran Sonia hafodak bainhira sente malirin derrepente. La kleur tiha ida monu iha nia oin, Sonia halai lailais hodi bá ajuda tia ne’e maibé ema seluk hahú atrapalla ho nia telefone hodi hasai tia ne’e nia fotografia. Sonia ajuda lailais tia ne’e hamriik ho oin-buis nia dehan;

‘Imi, ema sidade ne’e oin seluk oituan, ema monu la ajuda maibé imi sibuk mak hasai ema nia fotografia. Tia di’ak hela toh.’
‘Di’ak hela noy, ha’u-nia sinelus mak namdoras. Lalika gasta tempu hirus malu ho ema sira ne’e. Labarik sira ikus ne’e oin seluk oituan, ema hetan dezastre ruma sira la hanoin atu tulun uluk ema ne’e maibé halo uluk video no hasai fotografia hodi tau iha Facebook lai foin mak ajuda ema ne’e.’ hatán mai ho oin triste.
‘Sé tia sente di’ak hela, ha’u bá uluk ona, ha’u-nia alin sira bolu ona ha’u.’

Sonia tama iha loja sapatu, fihir daudaun sapatu sira ne’ebé forma tuituir malu. ‘Sonia, lalika moe bainhira ó gosta sapatu ruma bele foti de’it.’  Dehan tia Elsa. Molok atu fila tia Elsa no Tiu Ándre lori sira bá han Bakso. Fila bá uma rai nakaras ona. Lampu lakan forma tuituir malu sidade nia furak ó bele sente bainhir kalan to’o.

Molok férias remata  tiu Ándre lori Sonia la’o halimar ba momunentu João Paulo II no Cristu Rei. Iha lurón bá Cristu Rei matan ne’e fihir tun sai, tasi nia hakmatek no rai-henek mutin nia furak dada ema pasa férias, haksolok ho família iha fatin ne’e.

Tuun husi karreta la’o neineik tuir eskada no aproveita momentu ne’e hodi hasai fotogtafia.  Momentu furak ne’ebé Sonia labele haluha haree rasik ho matan estatua Cristu Rei maibé nia mós triste bainhira haree Baraka sira ne’e nakonu ho lixu. Fatin ne’e malirin fresku tiha maibé sé mak atu bá tuur iha fo’er sira ne’e nia leten. Ho oin-naburut Sonia dehan;

 ‘Tiu, nu’usá mak fatin ne’e fo’er loos.’
 ‘ Ema hamoos iha.’
 ‘Ema hamoos iha maibé ita mak lori foer ne’e mai tansá la’ós ita mak hamoos no lori fila.’

Bainhira férias remata Sonia mós fila bá nia hela fatin. Iha dalan nia hahú halo komparasaun ema sira ne’ebé moris sira iha sidade no nia hela fatin. Se ema hotu nia moru aas hanesan ne’e na’ok teen tama ka susar ruma kona sira oinsá viziñu sira atu bá ajuda. Ema nia konsiénsia hadomi ambiente hahú mihis buat simples de’it han iha ne’e no soe iha ne’e, so halo servisu bá ema seluk  no lakohi tulun malu.  Sidade… sidade.. ó halo ema matan delek ho ó-nia furak.

Díli, loron-23 fulan-Maiu tinan-2018

           

BELE NONOOK KA LAE.??

Anin kalan huu neineik.
Iha Estatua São Minguel nia oin.
Ha'u tuur hodi hateke ba fulan no fitun ne'ebé hahú mosu ida-ida hafutar no hafurak lalehan iha kalan ne'e.

Ó-nia lian ida bee aat, hananu beibeik iha ha'u-nia tilun karuk no loos. Ó hananu maibé matan malahuk haree ó.

Ha'u hatene ó-nia isin ladún boot.
Ó-nia oin mós la bonita/bonito.
Maibé baibain de'it i bainhira sukat bá-mai ó mak aat liu ona.

Ó-nia lian halo ha'u tensaun.
Liman katar hakarak baku ó.
Ó-sees tiha bá.
La'o lakon tiha de'it mós di'ak.

Ó sees tiha bá...
Ha'u baruk no atu muta rona beibeik ó-nia lian. Ha'u seidauk baku ó, ó halo ha'u koi aan daudaun.

Tansá ó iha.
Ó só par estraga furak hotu iha kalan ne'e
Ó seidauk ha'u kaer kona ó, ha'u deut tiha hanesan ai-manas.

Ó bele nonook ka lae.

Oin aat, ibun naruk.
Metan, krekas maran, lian aat
Gosta provoka ha'u tensun.
Ha'u kaer kona ó, ó kal hela loos de'it ona ho naran ida SUSUK ne'e...

Loron di'ak

BEE-MATAN

Ema dehan anin ne’e kalma maibé ohin ha’u haree ona nia si’ak. Bainhira tuur iha laletek hateke ba rai tetuk. Anin boot tebes halo rai-rahun bidu maka’as no baku kona ha’u-nia oin

 Bee-matan iha laletek ne’e hahú menus, balada sira hahú la’o dook hodi hetan netik bee habokon kakorok.

Fatin ne’e hahú fuik, ai-tahan sira hahú maran, sanak no ai-hun hahú namlaek. Manu-fuik nia lian mós hahú mihis iha tilun. Loro-matan nia manas la habelun ho kulit. Iha ai-bubur hun, ha’u buka mahon no anin fresku.

Taka matan hodi sente netik, lian sira ne’ebé mai husi duut, ai-tahan no fatuk ne’ebé book an bainhira ain baku kona. Tekiteki lian ida hasé ha’u nia tilun;

‘Inalou, halo saida iha ne’e.?’

Ha’u hafodak hodi buka tuir lian ne’e mai husi ne’ebé. Laiha ema ida mak iha ha’u-nia sorin. Taka hikas matan no sadere an iha ai-bubur kai lotuk.

‘Inalou, nu’usá ó tuur hanehan hela de’it ha’u-nia isin-lolon.’

Ha’u nafatin taka matan no fiar ida ne’e mak ema dehan mehi iha loro-manas mean.

‘Inalou, ó la hanoin ha’u ga.?’ Ha’u fó ona mahon bá ó maibé ó sei nafatin hanehan ha’u.’

‘Ha’u la hanehan ema ida. Ha’u mesak de’it mak iha ne’e.’

‘Ó loke matan hodi haree netik ha’u.’

Bainhira loke matan ha’u haree ema wain tuur murón. Balu tanis hakohak malu. Haree hetan ha’u hanesan buat foun ida bá sira no bisbisu ‘sé mak ne’e.?’  Husik dook ha’u haree ema hobur hela buat ruma maibé la hatene saida mak ne’e.

Bainhira hakbesik bá ha’u haree inan-ferik ida haklena an hela iha rai leten lahó isin. Labarik mane ida fihir metimetin ha’u-nia oin ho oin hirus dehan;

‘Nia ho nia maluk sira mak ho ha’u-nia avó.’

Ho lian ta’uk ha’u hatán ‘ha’u la hatene buat ida.

‘Ó, keta bosok, imi mak halo been-matan iha fatin ne’e maran.’

Ema hotu iha fatin ne’e hatene ho jestu la gosta ho ha’u nia prezensa maibé ha’u nafatin la komprende tansá sira hotu fó sala beibeik mai ha’u. Inan ferik ida ho matan-been tuku ha’u-nia hirus matan hodi dehan;

‘Ó, mak silu ha’u-nia oan nia liman.’

‘Tia, ha’u nunka halo aat ema, oinsá mak ha’u silu tia nia oan nia liman.’

‘Ó-nia maluk sira mai oho beibeik ha’u- nia  maun-alin sira, imi mesak liman kro’at, balu mai to’o iha ami nia oin foin mak kadi katana. Liman-ain nakdedar la hatene loos ida ne’ebé mak sei mate uluk. Dehan labarik mane ne’ebé nia avó foin mate daudaun ne’e.

‘Ha’u sei dekor ó-nia oin. Ó mak ohin silu ha’u-nia oan nia liman.’

‘Tia, ha’u la hatene buat ida.’  Hatán ho lian-ta’uk.

‘Ó, lalika hatudu ó-nia oin kasian. Ó mós manu-inan loos bainhira hamutuk ho ó-nia maun-alin.’

Hasesuk malu entre ami kontinua maka’as. Ema hotu kontinua fó sala ba ha’u. Balu dehan tan de’it ha’u-nia hahalok bee-matan iha fatin ne’e maran no sira kaer fatuk tuda lesuk ha’u. lia-halerik husi labarik mane ne’ebé nia avó foin mate ne’e hakalma tiha situasaun.

‘Ha’u-isin laek bainhira laiha ó.Ema liman kro’at ne’e bele mai sah oras de’it. Iha tempu kalan laiha tan ona ema ida mak konta istória mai ha’u.

Bainhira ema oho ha’u-nia inan-aman, ó iha hodi hamaluk ha’u no hamoos netik ha’u-nia matan-been maibé ohin ó laiha ona, se karik ha’u iha kbiit atu halai sai husi fatin ne’e mak ha’u sei halo no sekarik ha’u iha forsa mak hau sei tulun imi.

Sira moe laiha no haluha an. Kakutak tau iha ain-tuur. Sira haluha tiha katak bainhira udan monu rai ita mak sei hamriik firme hodi salva sira husi rai halai.  Ita mak sei salva bee, ita mak sei fó matak malirin.

Se sira kontinua oho ita, di’ak liu ita halo funu hasoru sira. Tan forsa natureza nia boot liu ema ida nian.’

Dehan nune’e no ema hotu iha fatin ne’e kontinua tuda lesuk ha’u. Fatuk baku kona ha’u nia rentos halo ha’u hafodak husi dukur naruk ne’e. Bainhira ha’u hafodak liman kaer kedas ba rentos. Afinál ai-musan mak monu kona. Isin lolon hahú sente manas no kosar, tan ai-sanak ne’ebé hamahon ha’u husi manas tohar tan labele lori isin nia todan.

Husi dook ha’u haree Maunkinta, Ambere kadi daudaun katana no Harekai tesi daudaun ai huun boot no tuan ne’ebé hamriik iha ha’u-nia oin. Ha’u hakilar para maibé sira la rona. Ha’u bele sente matan hotu iha fatin ne’e tau matan lesuk mai ha’u.

Bainhira fila bá uma ha’u halo komprimisiu ida atu la tesi tan ai-horis sira iha fatin ne’e no bandu ema hotu labele oho beibeik ai iha foho-lolon. Tan ha’u ta’uk ho sira nia ameasa.

                       Díli, loron-4 fulan-Maiu tinan-2018