FIAR OU MITO

Laloran tasi hasé ha’u tilun ho ritmu hakmatek hanesan múzika Bryan Adams ho titulu I'll Always Be Right There, lokraik ne’e ha’u mout iha sosegadu dook husi barullu karreta no motór, tuur iha rai-henek leten sukit tuir fatuk iha oin hanesan lenuk ne’ebé kee rai-henek hasubar tolun, laloran tasi baku tuituir ain hodi hamoos tuir ain fatin.

Pantai Kelapa furak iha ha’u nia matan bainhira haree loro-matan tun, kalohan azúl nakfila ba kór kinur tuan, taka matan hodi sente nia furak, dada iis.. hafoin husik fali loke matan no sente hakmatek to’o fuan, ida ne’e mak halo ha’u la baruk atu tuur oras ba oras iha fatin ne’e.

Hakat hakbesik ba Ponte Kais (pertamina) haree ponte ne’ebé naruk no falun metin ho rede no arame, haree hetan hali-huun boot ne’ebé nakonu ho plástiku no masa oinoin iha nia lolon, hakbesik ba iis matak no raan ho rai kahur hamutuk ona hasé ha'u inus, saida mak ne’e?.

Matan ikus hateke beibeik ba hali leten, ha’u belun ne’ebé iha ha’u sorin ko’alia mai ho lian neineik.

“Nu'usá mak fihir beibeik ba hali hun ne’e?”

“Ema tara saida mak iha ne’ebá” hatán ba nia mais matan nafatin ba hali hun ne’e.

“Ooohh... ó la hatene kah, ida ne’e mak ema dehan labarik sira nia ka’an (plansenta)” ko’alia mai ho oin-hamnasa.

“Mais tanba saida mak tenke lori mai tara iha fatin públiku”

Ha’u belun ne’e mós nonook la hatán ba ha’u nia perguntas, fila bá uma ho perguntas oioin. Iha han kalan tuur hakbesik ba Mamá hodi husu.

“Mamá tansá mak labarik sira nia ka’an ema ba tara fali iha hali-hun iha tasi ibun ne’e? ko’alia ba Mamá no liman sorin kaer metin hela kanuru.

“Ne’e tanba ema ida-idak iha kultura ka buat ne’ebé sira fiar. Balu tara no balu hakoi, iha ita nia kultura rasik labarik sira nia ka’an ne’e hakoi de’it no ne’e hanesan kostume ne’ebé mak ita-nia beala sira husik hela mai ita. Bainhira atu hakoi mós tenke hakoi ho buat ruma porezemplu hanesan lapis, lapijeira, kadernu. Ba labarik feto, sira tau daun no kabás tan ita nia beala sira katak bainhira labarik ne'e boot nia sei sai ema ne’ebé matenek no sukudór.” Mama hatán mai ho hamnasa mihis, karik Mamá sente komik ho ha’u nia perguntas.

“Entaun ha’u-nia ka’an rasik Mamá sira halo oinsá?”

“Ó nia ne’e hakoi de’it tan ó feto entaun tau hamutuk ho daun no kabás”

“Mama halo hanesan ho fiar ida katak aban bairua ha’u boot sai hanesan ema ne’ebé sukudór mais realidade ha’u la hatene suku i la gosta suku".

Kakutak ne'e nafatin la simu saida mak Mamá esplika mai. Iha meudia ida tuur ha’u ho belun sira iha ai-teka hun hodi buka anin malirin. Teki-teki ha’u belun ida konta istória kona-ba hali-hun tuir lian-anin ne'ebé dehan hali-hun bainhira tuan oan nia iha na’in (pontiana, anau no seluk tan), ne'e tuir beala sira nia hatete. 

Ko'alia kona-ba hali hun fó hanoin fali mai ha’u labarik nia ka’an ne’ebé tara iha hali hun Pertamina Pantai Kelapa nia kotuk.

Ha'u so’e hanoin ne'e ba sira, tan ha'u hakarak atu rona istória lolos kona-ba ka’an ne'e rasik, ha'u belun ida tuur iha baki leten ko’alia mai hanesan ema ne’ebé komprende didi'ak kona-ba kultura.

       “Ema balu hakoi no balu tara iha ai-leten, iha kultura tara ema ne'ebé mak lori ka’an ba tara iha ai-hun sira bolu dehan aman tula. Ida ne'e ita beala sira halo deste uluk i to'o agora mós ita sei nafatin fiar no halo tuir”.

Sai nafatin mak husu iha kakutak tan la iha ema ida mak bele hatán ha'u-nia dúvida, ema dehan ida ne'e hanesan kultura. Buat ne'ebé horik nanis ho ita maibé tuir matenek-na'in sira dehan laiha ligasaun ka’an bainhira hakoi hamutuk ho lapis ka kadernu bele halo ema ida sai matenek maibé depende ba ema ida-idak haka’as-an hodi estuda.  

Kultura mak ita nia identidade, kultura mak halo ita la hanesan ho ema seluk. Hanesan jerasaun foun no feto raan ida ne’ebé mak seidauk hahoris sala kah sei ha'u hakarak buka tuir tansá ida ne'e iha. Ida ne'e hanesan fiar ka mito, sé loos mak sei hatán ba dúvida ne'e.

Dili, loron-28 fulan-Abril tinan-2016

MÚZIKA NATÁL IHA FULAN-ABRIL NIA KLARAN

Tun husi mikrolete kór-kafé ho marka 06, oras iha telefone hatudu tuku 9:35, is rai manas hasé ha'u oin, dada iss horon karreta nia suar halo inus atu metin ho anin-fo’er.

Mikrolete ho kór  oinoin iha matan laran, husi karreta hira ne'e toka múzika ho volume aas ho ritmu oinoin, pop, dangdut, rege. Fatin ne'e la’ós merkadu maibé teriminal.

Hamriik iha lurón foti liman hapara karreta kór-kafé iha nia lolon hakerek ho númeru 05, hakat hakbesik tuur kedas iha kondutór nia kotuk, kantiga Malam Natál hamaluk ha'u, hakfodak bainhira rona múzika ne'e hotu-hotu hateke ba malu hodi hamnasa.

Ha'u tuur nonook sé tilun ba lírika no melodia fuan sente hakmatek ho kantiga ne'e mais matan ikun la hakmatek hateke tuir lurón tan ha'u atu besik tun ona husi karreta ne'e. Kuandu tun husi kareta ne'e mak ha'u foin sente katak fuan ne'e revolta hasoru natál no tinan foun tan, tan idade ne'e mós sei aumenta ba beibeik.. tuir tempu nia la'o.

SÉ HA’U LA HAKIAK Ó MAK FÓ OSAN HA’U GA?

Lidun sidade Dili, Maria moris ho simples iha ema riku nia leet. Hak'nauk osan funan husi folin modo tahan iha lurón, hamnasa midar hasoru sosa nain. Maria la’ós ona ida ne’ebé forte hasa'an karon todan, nia la’ós ida hamriik loos hodi hiit sasán biar hamriik bongko Maria nafatin badinas buka moris.

Oin hahú namkurut, matan komesa haree la moos, fuuk mutin hanahas fuuk metan ho postura ne’ebé ladún aas, kabala kambatik iha kanotak. Baraka ki’ik ne’ebé halo husi ai-rin haat hamahon-an iha kalen baluk lima nia okos Maria hahú hala’o nia servisu. Maria la presiza tuur iha komputadór nia oin, la presiza hatais rapidu hanesan ema ba servisu naton ho bluza no kabatik taka isin no hena rohan hafalun ulun. Haklili bote iha kabaas Maria ho fiar-an hahú hala’o nia knaar, nia bonita iha ha’u nia matan biar malus nakonu iha ibun laran.

Loron matan sunu ha’u isin lalatak mós ta’uk haksubar-an iha ain fatin, isin hanesan tiha ona ayam potong ne’ebé lalar iha anar leten, Maria hateke mai ho oin hamnasa nein hanoin barak ain lori ha’u hakbesik ba nia no tuur kedas iha nia sorin. La hatene saida mak lori ha’u hakbesik ba nia, karik tan isin ne’e la so’i  ona hasoru loron manas nia si'ak ou tanba Maria nia hamnasa midar ne’e ka tanba ai-dak iha masa laran.

“Loron manas ne’e nu’usá la tuur hakmatek” ko’alia mai no liman hamoos daudaun nia kankun tahan kinur.

“Naran la’o buka sorte” hatán ba nia ho dada iis naruk.

“Sorte, buat hotu maromak planu tiha ona. Sei maromak dehan ó nia moris sei hanesan avó simu de'it ona”

“Avó, ema ida-idak ho nia dalan”

“Loos oan ema hotu hakarak moris tuir nia mehi, sé mak hakarak moris hanesan avó laiha ema ida mak hakarak moris hanesan ne’e i avó rasik mós lakohi la’ós avó la agradese ba saida mak maromak fó ona ba avó, sei avó bele hili avó lakohi dalan ida ne’e” latan modo iha hadak leten, hatán mai ho lian neineik.

“Avó ai-daak ne’e midar tiha” liman lamas daudaun ba masa laran.

”Afinál ó mai tuur iha ne’e par liman naruk ba avó nia ai-daak”.

“Iiiss... avó ne’e ha’u koko tiha lai mak hola ga?”

“Han ba sah avó ko’alia halimar de'it, la bele hola ba lia”.

Kalohan nakukun iha foho leten, manas iha rai-tetuk, Maria tuur hamoos tuituir modo tahan kinur, udan bele tarutu hanesan batar sona iha kalen leten, rai-rahun bele suar hanesan abu-abu hafalun foho Cablaki tutun Maria nafatin tuur iha fatin ne’e. Maria moris mesak laiha oan no la’en, Maria liu nia tempu tomak iha baraka ki’ik ne’e. Kalohan azul nakfila ba nakukun iha minutu balu. Ha’u hamriik husi tuur fatin liman sorin hiit hela plástiku metan ne’ebé nakonu ho ai-daak hodi dehan;

“Avó ha’u fila ona udan atu mai ne’e, avó mós haree fila uma sedu”.

Foti liman hodi duni “haree ba loos uma ajuda Ama halo servisu la’ós la oras avó haree ó nia oin ne’e mosu hela de'it iha lurón”.

“Heisa avó bonita”.

Ho hamnasa Maria hatán “haree ba ona, ha’u ferik ona mós ó sei goza”.

Ain ne’e hakat husik hela fatin ne’e. Lokraik ne’e udan boot tebes, kanu kuak nakonu ho fo'er no bee, udan-ween turuk iha ai-tahan leet sulin neineik ba rai. Ida ne’e fó hanoin fali mai ha’u Maria ho nia baraka tan baraka ne’ebé sai fatin ba nia hamahon-an husi udan mós kuak tun sai, bote ne’ebé enxe ho bua, malus no ahu hamaluk nia iha fatin ne’e.

Maria ferik ne’ebé forte tebes iha ha’u matan, nia feto ida ne’ebé lakohi hein atu tani liman ba ema seluk, tan deit etu bikan ida iha dadeer nakukun Maria ho nia bongko la’o mai estrada ibun hodi hein kareta husi Ermera no Liqueça bainhira lori modo mai fa’an iha nia baraka oin.

Liu tiha loron rua Maria la mosu iha nia baraka, sente falta bainhira liu husi fatin ne’e la haree hetan Maria ho nia hamnasa midar. Hakat no husu tuir nia feto maluk ne’ebé fa'an modo iha nia sorin : “Tia, Avó Maria ba tiha ne’ebé mak la mai fa’an nia modo ne’e”

“Nia moras hanoin barak tan ema oho tiha nia fahi aman ne’ebé nia hakiak”. Hatán mai ho oin naburut.

Koko komprende Maria nia situasaun, komprende mós situasaun actual desizaun governu atu kria sidade ne’ebé moos no saudavel, informasaun ne’ebé fó sai iha televizaun, rádiu no haree iha Facebook ho komentariu oioin fó hanoin hikas fali mai ha’u kona-ba Maria, inan ferik ne’ebé hakiak fahi no tau espera ba fahi ne’ebé nia hakiak sei ajuda selu nia oan hakiak nia eskola mós kotu iha dalan klaran tan osan ne’ebé hetan liuhosi fa'an modo mós la to’o atu selu eskola, seidauk tan ho nesidade lor-loron nian.

Fotográfia ne’e hasai husi belun Acacio Pinto

Kalan tuir mai liuhosi nia baraka, haree husi dook naroman ki’ik iha baraka nia okos ne’e. Hakat hakbesik ba buka tuir sé mak iha fatin ne’e. Kontente haree hikas Maria iha fatin ne’e mais la haree hetan nia hamnasa midar, Maria haksubar nia triste iha lamparina nia naroman.

“Avó loron rua ona la mai fa'an modo ne’e?”

“Ha’u iha uma de'it, triste tan ema mai oho tiha ha’u nia fahi no sira lori tiha fahi mate tula iha karreta leten husik de'it fahi tali mai ha’u” Maria ko’alia mai ho oin mean.

Husi baraka sorin inan feto seluk ko’alia ho lian maka’as no hirus :

“Sira mai oho ami nia animal dehan animal sira ne’e lori moras no hafo'er sidade. Nusa la rezolve lai fo'er sira ne’ebé lekar arbiru iha sidade laran, osan povu nian uza ba halo estrada no bee dalan ne’ebé laiha kualidade udan mai bee nalihun iha fatin-fatin fo'er sira nakonu iha valeta, bai-loron fali rai rahun suar ema dada iis mós ladi'ak, ida ne’e lori moras ka lae?”.

Ha’u foin komprende tansá iha loron hirak liubá kuandu husu kona-ba Maria, inan feto ne'e hatán ho oin naburut. Ha'u hamriik nonook laiha lian hodi rona de’it Maria nia halerik, Maria tau daudaun mostrada metan ba plástiku hodi dehan :

“Tinan barak ha’u moris iha kiak nia laran, laiha ema ida mak mosu mai fó netin osan ruma mai ha'u hodi hola foos. Ha’u lori ha’u nia ferik ne’e mak la’o tun sai habae-an iha loro-manas hodi buka osan.

Sei dehan hakarak hakiak animal ne’e di'ak liubá hela iha foho, ne’e loos mais sé mak atu fó osan ha’u. Fa'an modo iha foho la folin tan ema hotu-hotu iha toos. Sei iha foho ha'u nia moris di'ak liu, ha'u la mehi atu mai moris iha Dili.

Duké mai buka moris iha sidade, ema haree ita hanesan rai-rahun” Maria ko’alia ho liman ain nakdedar.

“Avó nia fahi boot loos oan ga?”

“Beoan, avó fó han loron kalan ne’e mós kole, fahi ne’e avó hanoin hela atu oho hodi selu avó nia oan nia eskola agora ema oho tiha hanesan ne’e, aat liután mak sira lori tiha fahi isin no rai hela de'it tali ba ha'u, la buat ida ó lori bá. Mais sei la hakiak, ó mak fó osan ba ha’u ga?, ha’u ko’alia hanesan ne’e ba ema sira ne’e mais sira tula daudaun avó nia fahi ba karreta la rona saida mak avó ko’alia, husik ba maromak ne’e boot”.

Fotográfia ne’e hasai husi belun Acacio Pinto

Kalan ne’e Maria nakonu ho hirus, laiha liafuan atu hatán ba nia halerik, Maria haksubar nia triste iha lamparina nia roman. Ba sé loos mak ha’u sei fó sala, ba desizaun governu ka?. Ou Maria ho nia halerik?. Ida-idak ho nia razaun, ha’u la hatene loos atu fó sala ba sé no defende sé?. Sé governu rasik la rona nia halerik ba sè loos mak ha'u hato'o susar no halerik ne'e.

Dili, loron-14 fulan-Abril tinan-2014

Esteviana Maria Celina Amaral de Fátima

LABEH FIRME HO KORAJEN NO DIDIKASAUN (REFLEKSAUN BA ANIVERSARIU LABEH)

Loron troka bá semana, semana bá fulan no fulan bá tinan la sente tinan sanulu resin rua Lalenok Ba Ema Hotu hamutuk ho ita, naran ne’ebé la foun iha ha’u tilun I laran monu kedas bá nia. La’ós fasil bá LABEH ejiste to’o ohin loron dezafiu oinoin ó hasoru, hanesan labarik ki’ik  ne’ebé aprende la’o iha krikil leten maske monu to’o kanek no ain nakdedar hamriik nafatin hodi la’o.

Matan rihun bá rihun tau matan bá ó, tan ó hakilar maka’as hanesan leoan ne’ebé si’ak, lian ne’e halo ó sai inimigu bá ema ne’ebé la gosta atu rona ó. Ó hanesan alarma iha dadeersan hafanu no hakotu mehi furak iha dadeer ne’e.

Tinan sanulu resin rua liubá, iha loron ruanulu resin lima (25) fulan-Agustus ó moris hanesan bebé oan ida ne’ebé foin loke matan hodi haree mundu nia furak, maske sei bebé ó horon no sente ona korupsaun, kolusaun no nepotizmu, iha ó nia matan no fuan, koko aguenta ho situasaun hotu, bainhira ó aprende dolar no la’o. Ó hatene ona saida mak ó sei halo hodi muda situasaun ne’e, ó hatene katak la’ós fasil maibé nafatin koko.

Kuandu ó hahú hamriik ho forsa ne’ebé ó iha, laloran ne’e hahú boot liután ema hahú duvidas ho ó nia prezensa áte to’o hasai liafuan todan bá ó “panas-panas tai ayam, husi bá sira la’o maibé lakleur sira taka ona”, ohin ó konsege hatudu bá sira katak LABEH sei nafatin hamriik no forte liután maske laloran ne’e boot hanesan Thunami maibé la sobu ó nia fondasi.

Ohin ó konsege utrapasa tan tinan ida, ó forte tan ó iha forsa domin ne’ebé boot, forsa família ne’ebé metin, ó iha aman ida ne’ebé hadomi tebes ó no didika nia an tomak bá ó, nia mak huun forsa domin lolos, aman ne’e mak Christopher Henry Samson, tan nia fiar katak ó mak fatin ne’ebé di'ak liu hakilar hasoru korupsaun, fatin ne’ebé sai lian bá ema ne’ebé laiha lian, fatin ne’ebé uniku ko’alia kona-ba lian-loos maske nia hatene kuandu atu sai lian ó sei hasoru difikuldade oin-oin maibé aman ne’e nafatin firme hodi akonpaña ó.

Tempu barak ó liu iha ai-tarak leten, difikuldade oin-oin ó hasoru maibé ó nafatin la’o tan ó fiar katak maromak sei la taka matan bá ó nia susar no halerik. Iha dadersan ne’ebé hakmatek rona manu-fuik hananu iha ai-leten, loro-matan hahú sai hodi fó naroman bá mundu, mehi foun mós hahú iha loron ne’e. Naroman mosu duni bá ó ho prezente Laptop husi ativista Austrália  Hannah…. Nia habadak netin ó nia ain iha lurón, laptop ne’ebé lori milagre no anin fresku bá LABEH, husi laptop ne’e mak hamosu fali, komputadór no laptop seluk iha LABEH.

Forsa ne’e la’ós hetan de’it husi ó nia família mai mós husi ó nia belun di'ak sira, belun ne’ebé sempre hamutuk ho ó kuandu ema seluk hahú izola, iha tempu ne’ebé ema hamnasa ó hodi dehan “Lalenok rahun ona no Lalenok so bá ema ida de’it”, balun dehan “LABEH O leno hosi kotuk de’it” balun dehan fali “the mirror for the people sai fali the error for the people” mais nia nafatin hamutuk ho tan nia fiar loron ida ó sei hatudu bá sira katak LABEH sei sai duni lalenok ba ema hotu, tan lalenok refleta realidade, lalenok nunka bosok saida mak nia haree.

La sente ohin ó halo tinan sanulu resin rua, ó nia naran morin iha fatin-fatin, susesu ida ema labele haluhan iha istória katak LABEH sai ponte bá prezensa KAK (Komisaun Anti Korupsaun), LABEH mak halo konsultasaun tama sa’e Munisipiu maske kole, hamnlaha, rai- rahun, udan, anin, la prekupa ó nafatin la’o tan ó hatene ona katak sei la’ós ita mak hakilar kona-ba korupsaun sé tan, sei la’ós agora bainhira tan no kaer metin Mr. Jorge Linch nia liafuan “sei korupsaun nia abut metin ona, ema riku sei riku bá beibeik no ema kiak sei kiak bá beibeik no sei lakon dignidade no intregridade iha mundu internasionál”.

Ó mai la’ós atu hakilar deit kon-ba korupsaun maibé loke mós oportunidade kapasitasaun bá joventude liuhosi formasaun Lian Inglés, Jornalizmu no Administrasaun, hahú ho estudante na’in-sia ó konsege kesi estudante rihun tolu ho balu, ó fiar katak joventude mak futuru bá nasaun, jerasaun ne’ebé metin ho prinsipiu luta hasoru korupsaun.

Ó konsege duni lori naroman bá óspital Lospalos, konsege duni lori kadeira bá Eskola pre-sekundária públiku Liqueça, ó konsege doko Ministeriu Edukasaun no Ministeriu Saúde liuhosi  programa CBMS no Press Tour ó konsege muda situasaun balu iha fatin ne’ebé ó vizita bá, doutór no enfermeiru sira iha Lospalos sei la lori tan lilin iha tempu kalan vizita pasiente, estudante sira iha Liqueça sei la tuur tan iha rai tan sira iha ona kadeira no meza, ó konsege doko mós mestre sira iha Eskola Primaria Rai Kala suku Estado, distritu Ermera liuhosi kobransa ne’ebé halo bá estudante hodi suku farda, inan aman ho dezenraska fa’an sira-nia produtu, balu to’o deve hodi hetan netik osan rezolve problema farda.

Ó nafatin firme ho korajen no didikasaun la’o tama sa’e munisipiu hakilar maka’as kona-ba korupsaun iha Timor-Leste, sosializasaun ba esbosu lei Komisaun Anti Korupsaun. Esforsu tomak ó halo hanoin ida luta hasoru korupsaun maibé realidade ó monu iha lafaek nia leet no to’o oras ne’e esbosu lei anti korupsaun sei pendente iha uma fukun Parlamentu Nasionál, LABEH sei nafatin firme luta ba esbosu lei anti korupsaun to’o Parlamentu Nasional aprova no funu seluk ejiji revizaun pensaun vitalize husi Parlamentu Nasionál.

Iha tinan-2012 situasaun kontente iha LABEH lakon iha minutu balu nia laran, aman ne’ebé sai forsa bá LABEH tenke hatán ba justisa relasiona ho kazu falsifikasaun dokumentus agravada, iha loron-22 fulan-Novembru hanesan loron lutu bá LABEH, loron ne’ebé nakonu ho matan-been  bá família boot LABEH, salaun enkontru Dr. Christopher Henry Samson sai sasin bá matan-been  ne’ebé sulin hanesan mota Loes, prezensa Gil Da Silva fó forsa foun bá LABEH hodi kontinua la’o maske aman ne’e la hamutuk ona ho ita, LABEH hahú hamnasa hikas, kuandu aman ne’e komesa hamutuk fali ho LABEH iha loron-22 fulan-Setembru tinan-2014, hamnasa ho oin kontente lasu família ne’ebé kesi entre LABEH no nia staff hahú metin liután no fó forsa foun bá LABEH hakilar hasoru korupsaun.

Aman ne’e hatudu duni nia didikasaun no komitmentu luta hasoru korupsaun, foin mak sente anin fresku liberdade maibé la hamate nia espiritu luta hasoru korupsaun no komitmentu luta forte liután iha nia raan no isin, ran ne’e nakali liután hakilar no lidera kampaña loron mundial  anti korupsaun ne’ebé monu iha loron-9 fulan-Dezembru tinan-2014.

Tinan rua liubá ó selebra ó nia tinan la ho prezensa aman ne’e, tinan ne’e hanesan tinan fortuna bá LABEH, tinan ne’ebé aman ne’e sei hamriik hodi kaer sampaio selebra ó nia tinan ho oin kontente no hamnasa no selebra tinan liberdade.

Viva Lalenok Bá Ema Hotu.
Abaixo korupsaun

Dili, loron-25 fulan-Agustus tinan-2015

Esteviana Maria Celina Amaral de Fàtima

RÁDIU LABEH FIRME HABELAR LIA-LOOS

Lian Transparensia, lian ne’ebé forte no nakonu ho esperansa, lian ne’ebé sai lian bá ema ne’ebé laiha lian, Lian Transparensia hanesan parte ida husi programa Lalenok Ba Ema Hotu liuhosi  Departementu Advokasia no Media Monitorin, nia mak forsa Lalenok Ba Ema Hotu hato’o lia-loos.

La’ós fasil bá LABEH harii antenna iha nia edifisiu oin, la’ós fasil bá LABEH harii nia studio mesak ida maibé nia hikis kosar ween sulin bá rai, hahú ho programa pakote radio hanaran Lian Transparensia. Programa ne’ebé moris hamutuk ho LABEH. Kuandu LABEH ejiste hasoru krize finaseiru ho rekursu ne’ebé iha no suporta morál ne’ebé LABEH hetan husi Dr. Jorge Lich no Agustinho Hernani Soares konsege asina akordu ida ho Rádiu Rakambia, iha ne’e LABEH hahú habelar an bá públiku.

Iha ne’e ema komesa hatene kona-ba vizasaun no misaun LABEH, iha ne’e mak hun bá mehi no hun bá realidade katak iha futuru LABEH sei iha nia rádiu rasik, Lian Transparensia nafatin akopaña LABEH, sé hakarak hatene kona-ba LABEH rona Lian Transparesia, esforsu oinoin   LABEH halo dalaruma sidi mais nafatin la’o ho forsa no espiritu foun, fiar metin katak loron ruma LABEH sei iha nia ekipamentus no sei jere rasik.

Mehi naruk iha ona matan laran, iha meza kabur haleu ho kadeira, iha meza ulun haree hetan fundadór Lalenok Ba Ema Hotu Dr. Christopher Henry Samson ho fiar an dehan “ita tenke hari rádiu ida hodi hato’o misaun no vizasaun LABEH maske ho rekursu ne’ebé limitadu ho fiar an ita sei la’o bá oin”, minute determinate ba LABEH harii nia rádiu rasik ho apoiu Departementu Edukasaun no Hasa’e Kapasidade realiza duni mehi furak ne’e, Departementu ne’ebé sai mákina  produsaun osan bá LABEH, mákina estra-odinariu bá movimentu hotu iha LABEH. Ho tulun departementu ne’e hamate no hakotu duvidas hotu no fiar an dehan Ita Bele.

Mehi furak no laiha rohan, tinan barak LABEH sakrifika an, firme no dedikasaun luta hasoru korupsaun no difikuldade, luta harii estasaun rádiu realiza duni. Mehi furak no sakrefisiu ne’e selu ho parede mean, microfen lima iha meza leten kompleta ho nia fasilidade, kuandu mai LABEH matan ikun baku hetan kedas antenna, mehi naruk no sakrefisiu selu duni ho bensaun husi padre Virgilio Guterres, inaguasaun husi eis-Prezidente da Rapúblika Dr. José Ramos Horta lansa liuhosi entrevista exlusivu.

Lian Transparensia lori LABEH iha nia studio rasik, Lian Transparensia lori mós matan ween ba nia staff sira ho rekursu ne’ebé natoon koko responde ba programa hotu, maske ho matan-ween monu nafatin firme tan lakohi halo LABEH triste no hakotu mehi furak ne’ebé iha, forsa tan rádiu LABEH iha nia fans ne’ebé sempre fó apoiu ba LABEH, forsa tan iha korajen no fiar buat hotu sei la’o ho di'ak no iha lian Indonézia dehan katak semua akan indah pada waktunya. 

 Tempu la’o bá beibeik ho rekursu ne’ebé natoon Radio LABEH koko nafatin sai hanesan rádiu   uniku ko’alia kona-ba korupsaun, ho fasilidade ne’ebé limitadu dala wain kosar habokon isin- lolon, dudu malu iha mikrolet laran hanesan ikan sardina iha kalen laran nafatin firme servi ouvintes sira tan, orbrigado ba fans radio LABEH ne’ebé hanaran an Joventude Anti Korupsaun (JAK) espera katak ita-boot sira bele sai duni mata-dalan no informadór ba lia-loos, sai joventude ne’ebé ho espiritu nasionalizmu, sai joventde ne’ebé nakonu ho espirituluta hasoru korupsaun. 

Parabéns bá Radio LABEH

Parabéns bá Joventude anti Korupsaun no parabéns bá ita hotu.

Dili, loron-25 fulan-Agustu tinan-2016

Esteviana Maria Celina Amaral de Fátima 

FIRME

Udan, anin ó nafatin hamriik metin, ó firme hodi fó mahon emar no animál fuik sira ne’ebé hamrook bá ó nia malirin, ó nia tahan hafresku matan, ó nia isin forte maske ema liman-fuik hahú hakanek ó. Fuan ne’e sente hakmatek kuandu besik ó, tuur iha ó nia mahon halimar rai-henek tasi, tuur iha ó nia mahon haree tasi nia luan no laloran tasi hasé ha'u-nia tilun hakmatek ida to’o ha’u fuan.

Tinan barak ó akonpaña ami, tinan barak liu ona ó nafatin firme iha fatin ne’e. Ó sai sasin bá ami nia hamutuk iha tempu kontente no triste, ó sai sasin bá ami nia amizade, ó sasin bá ami nia relasaun família maske ami la mai husi inan no aman ida, Ó didika no sakfirika an laran maus hodi salva ha’u husi loron manas, ó nia prezensa hafurak no hamatak fatin ne’e.

Tempu sei la filafali  bá kotuk, ema hakenek ó nia isin, sunu ó nia lolon, ó bele forsa haree laloran nia si’ak, ó bele forsa hasoru anin boot maibé ema kateri iha minitu balu de’it estraga tiha ó nia isin-lolon no matak malirin ne’e nakfila bá manas. Ó nia sanak sira hahú namlaek, ó nia matak hafalun ó mós hahú lakon ho anin nia si’ak, karik ha’u bele muda tempu bá kotuk mak ha’u sei dehan bá ema liman kateri sira labele oho ó tan mós iha direitu moris.

Ó didika no sakfirika-an iha tempu barak, ema liman sanak la haree ba ida ne’e, hatene de’it  oinsá  hakotu ó nia iis no hamate ó nia furak, tempu oin sei la haree tan ó nia furak, sei la hamohan-an iha ó nia okos, mais fiar katak tubun foun sei mosu mai no sei lori matak malirin no espera foun.

Ai-horis no animál  fuik sira hahanu ho ksolok simu anin foun iha tinan foun maibé ema liman sanak hakane ó no hakotu ó iis. Labele husi ami nia hamutuk mate hamutuk ho ó, labele hakotu ami nia amizade, ó bele mate no hakoi memoria furak hotu maibé ó nia memoria sei moris iha ha’u ulun no letratu sei sai sasin bá ó nia prezensa, obrigada tan akonpaña ona ami nia hamutuk. Tinan ne’e hanesan tinan didiakasaun no esperasa fiar katak ami mós sei metin no pasensia hanesan ó maske laloran ne’ebé ami hasoru sei boot liután. Saudedes imi hotu ha’u nia belun di'ak família boot LABEH.

                                                                                                 Janeiru 2016

Esteviana Maria Celina Amaral de Fátima

LORO-MATAN LAKON IHA HA'U NIA HAREE

Meiudia ne'e la hanesan loron baibain. Mesak ho ha'u nia komputadór fó roman mai ha'u iha nakukun. Fatin ne'e nakfila ba hakmatek, udan hamaluk ha'u duni baruk husi isin. 

Rai-lakan ho nia lian maka’as hasé ha’u nia tilun ho ritmu hanesan ema tiru paixón simu tinan foun. Ai-funan bidu-an hasoru udan-ween turuk husi kalen leten. Bee nalihun iha uma nia lidun. Lalatak mosu iha vidru leet.

Rai-lakan fó lakan hanesan mákina hasae fotográfia hanoin hetan Elthon nia liafuan  "Maromak foto ita husi lalehan" labarik ki’ik ne’ebé koko fó siknifikadu ba rai-lakan tuir nia hanoin.

Meiudia ne'e sente dook husi ema nia lian, buat hotu metan iha matan la ho ajuda naroman eletrisidade. Tansá naroman eletrisidade mós husik ha'u iha nakukun nia laran.

Fuan sente mesak saudades nia ne’ebé dook iha matan, novidades ohin dadeer mosu derrepente iha hanoin katak "Avo Metan husik ona mundu ne'e no fila hamutuk ho aman maromak".

Nakukun hanesan iha sela Maubutar hata’uk ha'u bainhira hanoin hetan Avo nia oin. Halai buka naroman duni ta’uk iha minitu balu

Udan para ona bá.
Eletrisidade lakan ona bá.

Dili, loron-4 fulan-Abril tinan-2016
Esteviana Maria Celina Amaral de Fátima.

RAI-RAHUN HAFALUN FUTURU NABILAN (PARTE II)

Segundu ba minutu nune’e bá beibeik, tempu la’o lailais hanesan karreta ho velosidade aas. Loron ne’e naruk no laiha rohan, kalohan azul hafalun mundu. Naroman nakfila bá nakukun nune’e bá beibeik. Lurón ne’e nakonu ho ema, pasta no karón tetek malu no emar sira la’o bá mai, labarik  halerik ba manas inan kele nia oan iha lipa laran, haklili pasta no liman sorin kaer hela biberón no bilete ki’ik iha liman.

Lakleur ida ne’ebé hamriik iha portaun bolu mai ho lian maka’as “sé mak kaer bilete bá Oe-cusse hakat mai daudaun, lakleur tan ró sai ona”. Ida-idak hakat hakbesik bá, balu hasaan karón  iha kabaas, nadodon no haklalak hakbesik ró. Hamriik iha tasi ibun hateke ba sorin karuk no loos kontainer forma naruk iha tasi ibun, laloran tasi hasé ha’u nia tilun foti matan hateke kedas ida ne’ebé tetuk no luan iha hau nia matan, fuan ne’e sente nia hamnasa hela mai ha’u, viajen daruak la hanesan tinan hitu liubá  sei la gasta tan oras ualu iha ró leten, ró ahi ki’ik ho kór kinur no mean iha lolon hakerek Dragon habadak oras ualu ba oras tolu bele to’o ona iha Oe-cusse.

Ambiente ne’ebé la hanesan iha ró Nakroman, kadeira forma liña hein hela ha’u, AC nia malirin halo ha’u hakdedar iha fatin sente hanesan hamriik hela iha foho Ramelau tutun, raan sente nahisin, nehan nakreket hasoru malirin. Husi dook haree foho Sakato nia tutun, ema hahú la hakmatek balu tabele iha janela tan hakarak haree nia furak husi tasi laran. La kleur rona odamatan lian ida ne’ebé hatais kamizola kór menan no kinur halai lalais foti tali no hodi kesi iha besi-riin, pasajeiru sira la’o forma tuituir malu hanesan nehek iha didin-lolon husi hela fatin ne’e.

Kuandu ain ne’e hakat tun husi ró memori hotu kona-ba Oe-cusse mosu derrepente.  Hakfodak, ain ne’e la kona tan tasi-been hanesan tinan hitu liubá iha portu Oe-bau, portu Mahata sai sasin bá viajen daruak, tun husi ró, ó bele sente kedas Oe-cusse nia manas karik tanba mudansa klimatika, manas ida habeen tiha raan ne’ebé nahisin no nakali hanesan bee manas Marabo.

Rai rahun mutin hanesan abu-abu hafalun foho Cablaki hasé ha’u matan, iha lurón ninin karreta  ho ibun naruk kro’at hanesan garfu kee hela rai maske loro-matan si’ak, kosar halolon isin no hafalun ulun ho xapeu nafatin firme iha lurón ninin, mudansa ida ne’ebé susar atu halo pintura ho liafuan. Fatuk-britas ne’ebé nakrakat iha ida dalan klaran nakfila bá alkatraun kabeer hanesan iha Palasio Governu nia oin, lurón klaran hafahe ho ai-hun hafresku matan.

Iha dalan bá Palaban sente falta buat boot ida, ai-daak no sukaer-hun hahú mihis iha matan, ain ne’e sente la’o hela iha ahi-klaak leten, anin tasi huu mai hakotu tiha manas ne’e, labarik sira halai ba mai iha tasi ibun hananu ho haksolok no tuur iha ai-katapa okos haree labarik sira halimar no hanoin hikas memoria fuan ne’e fekit maka’as hakarak tebes bá haree filafali Lifau nia furak ba dalarua. Liman bidu iha telemovel haree hetan Lifau nia furak liuhosi Fotográfia fuan ne’e sente bidu maka’as liután.

Biar sidade ne’e hafalun ho rai rahun mais nia nafatin furak iha ha’u nia matan, rai rahun tan dezenvolvimentu hahú daudaun iha rai-ketan ne’e liuhosi programa governu hanaran Zeems, dezenvolvimentu hahú daudaun no nia ema sira ho laran maus no hanoin di'ak servisu hamutuk ho governu partisipa iha dezenvolvimentu no fiar metin katak ai-kesak bainhira kesi hamutuk mak nia sei forsa no silu la bá.

 Kokorek.... kokorek... kokorek... manu-aman hananu iha ai-leten hodi simu loron foun, loron matan sa’e daudaun husi lorosa’e. Naroman ki’ik iha janela leet leno ha’u matan, foti matan hateke ba sorin-sorin ha’u belun sira sei haluut an iha manta laran. Dadeer hakmatek tuur iha uma nia lidun hateke ba natar laran maho-ween habokon rai laiha movimentu bá mai halo sidade hakmatek liután  no ha’u mout iha nia furak.

Iha ai-lele hun haree inan feto ida dasa hela rai, tan ha’u tuur besik besi kanuk hodi hein bee.. husi dook nia bolu mai.

“Noi bee laiha karik mai kuru iha ne’e de’it”

“Di’ak tia, bee iha ne’e sulin hela soke neineik” hatán ho laran ta’uk  tan la koñese nia

“Bee ne’e foin lailais estadu halo luan entrada ne’e mak muda besi  no seidauk hadi’a fali tan ne’e mak iha parte balu bee iha no balu laiha” haktuir ho lian maka’as husi estrada sorin.

Ambeno oan sira mesak laran maus no halibur na’in, bee iha uma lidun ne’e sulin tuir oras, Oe-cusse nia manas halo isin ne’e halerik ba bee hanesan karau hoban-an ita tahu laran, sorte wain hela iha viziñu ne’ebé mesak di’ak no hasé na’in kuandu bee laiha hakat kedas bá viziñu sira ba hariis no kuru bee iha ne’ebá.

Fulan-Novembru (2015) liubá Governu komemora tinan atus lima prezensa ukun koloniál iha ilha Lafaek, atividade oin-oin governu halo hodi hametin kultura no promosaun bá produtul local  liuhosi  espozisaun, produtus oioin ó bele hasaru iha fatin ne’e ho modelu ne’ebé la hanesan, la’o tama sai baraka maske kosar halolon-isin, munisipiu ida-idak mai ho nia identidade rasik. Ambeno mosu  ho nia dansa tradisionais no nia tais ne’ebé uniku iha ha’u matan, momumentu Lifau ne’ebé halo husi marmer halo fuan ne’e tarutu maka’as liután.

Sidade ne’e hahú moris la’ós ona hanesan kota mate ne’ebé ha’u delun dehan iha tinan hitu liubá. Lurón sira hahú hadi’a kompleta ho nia bee dalan, karreta no motór hahú movimenta bá mai, ojek (motór ne’ebé uza hodi tula pasajeiru) nadodon bá mai. Sei ó mai ó Oe-cusse la hakat bá Lifau viajen ne’e sei la kompletu. Tun husi ojek, haree husi dook sukaer-hun no ai-daak nafatin hamatak fatin ne’e, laloran tasi hasé maka’as ha’u tilun hanesan ko’alia hela mai ha’u “ó mai fali ona ga”.

Saudades ne’e seluk duni bainhira ain ne’e hakat sama rai Lifau, momumentu Lifau furak liután   ho momumentu seluk ne’ebé governu harii iha nia sorin ró-ahi no nia estatua sira hafurak liután  fatin ne’e, viajen ne’e sei la kompleitu bainhira la hasa’e fotográfia. Fuan ne’e hamnasa maka’as no ibun tutun so bele dehan ha’u sastifeitu (puas) haree ó nia furak ba dalarua.

Kia-kaha

Esteviana Maria Celina Amaral de Fátima 

UDAN IHA FULAN-MARSU NIA ROHAN

Semana ikus iha fulan-Marsu nia rohan, Kalohan azúl hafalun ho kór metan, kalohan tanis no haturuk udan, iha subiska nia okos ha’u hamriik murón hamaluk ho ha’u-nia telemovel mout iha hakmatek. Fuan ne’e sente falta buat ruma la hatene saida mak ne’e, falta ne’ebé ha’u-an rasik labele si’ik mais matan ikun la hakmatek fihir bá-mai.

Hamahan-an iha ai-teka nia okos, hafuhu tuir kareta azúl ho marka 09, isin fulun hamriik bainhira udan-ween baku kona isin. Ai-tahan sira haklalak hasoru udan maibé nia sai inimigu ba ha’u iha lokraik ne’e “udan para ona ba, ó haterus daudaun ha’u, ó la hatene ga?” laran ne’e tetak hela udan tan nia habokon ha’u iha lokraik ne’e.

Liu tiha minutu balu mikrolet azúl ne’ebé fó esperansa no hakotu malirin ne’e mós to’o. Hamnasa mihis bainhira nia para iha ha’u oin. Dada iis naruk hakat tama karreta ne’e. Ema lubun ida iha ona laran tuur hateke malu oin-suar ba malu, hamnasa hasoru labarik ki’ik iha ha’u oin, nia hasan kabuar mutin, mean ba daudaun hanesan tomate tasak. Malirin nakfila ba manas, isin fulun hamriik haseluk ho kosar metan lotuk iha rentos.

Ema sena malu hanesan ikan sardina iha lata laran, Labarik hahú hakilar ba manas. Inan atrapalla ho múzika kizomba ho bass ne’ebé maka’as halo fuan ne’e atu fekit sa’e de’it  ona, hotu-hotu ibun murmura hanesan ema mama malus.

“Maun hatun tiha bass ne’e bá, labarik nia fuan ne’e la hanesan ho ema-boot, ema-boot de’it sente ba ladi'ak ona oinsá ho labarik ne’e” pasajeirus ida hato’o ba kondotór

“Lakohi barullu nu’usá la sai taxi de’it” kondotór ne’e hatán ho lian sériu.

“Ó lori oan de’it karreta deit mós par halo-an, karreta ne’e de’it mós la’ós tan ó nian, moe laiha” pasajeirus mane ho isin boot, fuuk mutin ko’alia ho oin hirus hasoru kondotór.

Kondótor la prekupa, labarik ne’e tanis to’o de’it nia tuun iha Farol. Karreta ne’e kontinua halai no ema troka malu nune’e ba beibeik hela de’it ha’u ho kadeira naruk no badak tuur fó oin ba malu, tasi nia hakmatek fó forsa foun mai ha’u, udan ne’ebé ohin subiska mós para daudaun. Matan ikun baku hetan ró Nakroman iha tasi-laran, masa mamuk no plástiku nani iha tasi ibun.

Lakleur labarik joven lubun ida para karreta ne’e sira dudu malu, tolok malu no hamnasa maka’as sente hanesan ne’e mundu sira nian mesak, la haree hetan tia ne’ebé tuur iha ha’u sorin no sama tan tia ne’e ain nein sente halo sala, hakat daudaun nein husu deskulpa tuur fihir malu hamnasa ho kontente.

Tia ho oin namkurut ko’alia bis-bisu mai ha’u tilun hodi dehan :

“Labarik sira ikus ne’e respeitu hahú mihis, sira nia inan aman ne’e lori tuituir de’it iha estrada, sira hanoin saida mak sira ko’alia ne’e di'ak” tia ne’e ko’alia ho oin sériu.

“Ne’e mak situasaun agora ita hasoru” hatán ba ho oin hamnasa.

“Ha’u nia oan sira mak hanesan ne’e ha’u rakut kedas iha ema barak nia oin, ha’u mak hahoris ó, fó han ó, fó eskola ó. Fila ó lori ha’u nia naran tolok tuituir dalan” tia ne’e ko’alia mai ho lian nakdedar.

Ha’u tuur nonook la iha liafuan  ida sae husi ha’u nia ibun, tuur hodi hateke de’it labarik sira ne’e nia jeitu. To’o iha Pantai Kelapa tia ne’e mós tun ho plástiku mean ne’ebé nakonu ho modo, tuun ho oin-naburut hasoru labarik sira, tia hatudu nia sentimentu hirus tan hanesan inan ida nia lakohi atu oan sira lori inan aman nia naran goza malu hodi tolok tuituir dalan.

To’o iha Bebonuk ha’u mós tun, lokraik ne’e kalohan mós la habelun ho ha’u lia-tolok fó hanoin fali mai ha’u Tia Fatinha nia liafuan “labarik sira ikus ne’e oin seluk loos, ami uluk iha ai-laran hafoin invasaun militár Indonézia mai Timor durante tinan tolu iha ne’ebé liafuan  tolok ne’e ema la naran ko’alia arbiru sei nia tolok mak nia sei simu justu koretivu sai iha palku leten justifika nia sala liuhosi justisa popular”.

Liafuan respeitu hahú mihis sai perguntas ba ha’u an rasik, tansá tia ne’e dehan hanesan, edukasaun morál iha eskola mak la forte ka!. Ka labarik sira monu iha lasu globalizasaun ou edukasaun família ne’ebé la forte, buat hotu sai perguntas.

“Ha’u nia oan sira mak hanesan ne’e ha’u rakut kedas iha ema barak nia oin” violénsia sei la rezolve problema, violénsia bele hamosu tan problema foun respeitu oan ba inan aman mós bele hahú mihis ho hahalok violénsia. Inan aman sai hanesan bibi atan ne’e tau matan ba oan sira nia bainhira hakat ne’e hahú kle’uk inan aman iha direitu atu haloos hikas.

Matan ho kakutak ne’e sei metin ho novidades iha mídia sosiál hanesan Fecebook ema públika  fotográfia oinoin ne’ebé hatudu ema nia isin-lolon la taka hena (molik), komentariu oinoin hasoru ema ne’ebé iha letratu laran, ko’alia nia tama to’o nia família. Inan aman mak sempre lori todan ba hahalok oan sira nian, sira ne’ebé mak halo komentariu mós julga hanesan nia anju  ne’ebé Maromak haruka mai hodi julga ema nia vida, sei nia tama ona iha dalan ne’ebé kle’uk  dada nia sa’e husi dalan ne’e fó korajen no tempu ba nia hodi muda an, la’ós nia munu ona ba tahu laran, lori rai rahun kari ba nia matan laran no hadelek tan nia.

Ema sala uza mídia  sosiál hodi akuza ema, hafo’er nia naran no nia dignidade, uza mídia sosiál la tuir nia dalan no haluhan tiha katak labarik ho tinan ki’ik barak mós asesu ba informasaun sira, problema ki’ik ka boot iha uma laran lekar hotu iha mídia sosiál no tau-an hanesan figura públika (artis) ne’ebé ema tenke hatene problema hotu kona-ba ó nia-an, laiha ona etika morál  no lekar buat hotu iha mídia sosiál. Buat hirak ne’e hotu hanesan servisu todan ida ba inan aman oinsá atu eduka oan sira fó livredade ba oan bele ransu maibé iha limite.

Família huun ba edukasaun morál oan sira nian, fundasi ba karater oan nian, família baze ne’ebé forte forma ona sira atu la monu iha lasu globalizasaun, família forte nasaun forte i lasu globalizasaun mós sei la doko jerasaun foun.

Dili, loron-31 fulan-Marsu tinan-2016

Esteviana Maria Celina Amaral de Fátima