HATEKE ROUPA NATÁL

Kalohan azúl hahú nakukun, naroman lakan nabilan husi kalohan nia leet ho ritmu maka’as, lakan hanesan mákina fotografia. Lurón Kolmera nakonu ho baraka ki’ik ne’ebé forma tuituir malu.

Kolmera nia furak enfeita ho roupa ne’ebé tara tuituir malu, ha’u hamriik iha ema lubuk nia klaran ne’ebé tama sai loja, liman hi’it plástiku. La kleur kalohan nakukun ne’e haturuk udan. Halai lailais hamahon an iha loja ninin.

Feto klosan lubuk hamriik iha ha’u-nia sorin, ko’alia kona-ba moda roupa no sapatu foun no halo mós komparasaun ba folin, ha’u nonook no nafatin see tilun ba dadalia ne’e.  “karik ida-ne’e bele ajuda ha’u bele hetan roupa foun ho moda agora ho folin ne’ebé baratu.”

Ha’u hamriik hodi sé tilun ba feto-klosan hirak-ne’e no haree tuir de’it fa’an na’in sira halai bá-mai hodi aruma sasán hodi salva iha fatin mahon, tekiteki telefone mós nakdedar iha pasta laran. Ha’u hi’it no sé ba tilun;

“Sé mak ne’e.?” hatán ho lian baruk.
“ Ana, ó iha ne’ebé.?”
“Ne’e ho sé.”
“Ha’u, Abia.”
“Ó, uza fali sé nia númeru mak telefone mai ne’e, ha’u-nia kolega nia ha’u presiza tebes ó-nia ajuda.”
“Dehan mai saida mak ha’u bele halo hodi ajuda ó.”
“Ó, iha ne’ebé?” hato’o mai ho lian nakdedar.
“Iha Kolmera”
“Hein iha ne’ebá, ha’u tesik bá agora” ko’alia nune’e taka daudaun telefone.

Ha’u nafatin hamriik no hanoin hela de’it feto-klosan lubuk ne’e nia liafuan iha loja oin ne’e vestidu ho moda foun ho folin ne’ebé baratu. Liutiha minutu balu udan mós para, ha’u la’o hakbesik ba lurón ninin nune’e bele hafasil Abia bele hetan lailais ha’u iha ema lubun nia klaran.

Bainhira udan ema ida-idak hahú arruma fali nia sasán, tara iha moru lolon no tali ne’ebé kesi iha ai-riin, karreta ho motór halai bá-mai no apita iha sorin-sorin ema sees malu mós ladi'ak hanesan loloos ikan sardiña iha latan laran.

Natál tinan ne’e ha’u la pasa férias iha Same tan hakarak sente Natál nia furak iha sidade, múzika Natál hahú toka iha loja no uma-kain sira, ai-hun ne’ebé enfeita ho kores oinoin, lampu lakan piska-piska hafutar ain hun ne’ebé halo husi plástiku no bainhira kalan to’o sei hafurak matan ho nia furak ne’ebé falsu.

Abia ha’u-nia belun di’ak, ami hela hamutuk iha kuartu ida husi kuartu liman ne’ebé forma tuituir malu. Ami uluk eskola hamutuk iha Same bainhira pasa sekundária ami na’in-rua deside mai kontinua estudu universidade iha Díli, ami deside hela iha kos no ida-ne’e sei ajuda ami na’in-rua bele aprende moris mesak no maduru hasoru realidade moris bainhira dook husi família.

Liutiha minutu balu Abia mós to’o, husi kotuk Abia bolu ho lian maka’as no halai mai hasoru ha’u ho dada iis boot.

“Ó, nu’usá halai de’it ne’e.?”
“Ana, ha’u presiza tebes ó-nia ajuda, la hatene sé mak bele ajuda ha’u iha situasaun sira hanesan ne’e, ó hatene momoos ha’u laiha família ida mak hela iha ne’e.”
“Abia saida mak ha’u bele halo hodi ajuda ó.”
“Ana, ha’u hatene ó hakarak hola vestidu no sapatu foun maibé agora ha’u mós presiza ó-nia ajuda, Mamá moras iha foho no osan ne’ebé Mamá sira haruka mai ha’u gasta hotu hodi print matéria eskola nia.”
“Iha kos mós dalaruma ita han maran tan laiha osan hodi sosa modo.”

Ha’u dada iis no liman dada ba karteira kór kafé hasai osan tahan ne’ebé hela de’it tahan rua ne’e fó ba Abia, mehi hotu kona roupa foun mós para iha ne’e. Abia presiza liu osan ne’e duké ha’u, kona-ba roupa tempu seluk bele hola fali.

“Ana, bainhira fila husi foho mak ha’u fó fali ó-nia osan.”
“Di’ak hela, importante mak ó ba haree uluk ó-nia Mamá. Lalika prekupa ho osan tan ita ema sempre presiza malu no tulun malu.”
“Obrigada Ana, orasida kalan ó mesak iha kos, lokraik ne’e ha’u aranka ona. haree kuidadu an keta haluha kalan taka odamatan halo metin.” Ko’alia ne’e kaer ha’u-nia liman la’o daudaun.

Bainhira Abia fila kotuk hakat ba lurón sorin, fila kotuk hamnasa mai ho oin kontente, karik osan ne’e tulun duni nia. Hamnasa ne’e ha’u halo ha’u saudades fali Mamá no hakarak rona nia lian. Foti telefone dere ba Mamá hodi rona de’it Mamá nia lian no husu di’ak ka lae.

Bainhira kalan Natál to’o ha’u tuur iha uma nia tatiis hateke fitun iha lalehan ho laran triste labele sente  sabór hahán ne’ebé Mamá te’in. Naroman fitun no fulan hamaluk ha’u ho hahán simples ne’ebé prepara iha kalan Natál ne’e.

Fitun tatoli hela ba Mamá no Papa, ha’u saudades sira iha kalan Natál ne’e, I ha’u reza mós ba Abia nia Mamá bele di’ak lailais husi moras ne’e. Lakleur SMS badak ida tama hodi dehan  “Boas Festa Natál Ana, obrigada Ana ho ó-nia tulun ha’u bele hamutuk ho Mamá kalan ne’e, komprentus husi Mamá ba ó, deskulpa tan ha’u ó labele hola roupa Natál.”

Ksolok Natál ba ita hotu, labele hateke roupa foun hanesan símbolu ba Natál maibé oinsá mak ita prepara ita-nia fuan ne’ebé moos hodi simu loron ne’e ho hakmatek no dame.

Díli, loron-23 fulan Dezembru tinan-2017

SIDADE HADELEK MATAN =VERSU DANEEN= MORAS, KETA HASAI OBRIGA HA'U

“Halo saida de’it atubele sente kontente maibé keta haluhan katak kontente ne’e nu’udar sentimentu simples ida, Ita-Boot bele hetan no husik filafali sentimentu ne’e maske la hatene loloos nia simplisidade sentimentu ne’e, fó sai de’it pás maibé la’ós sentimentu sira-ne’ebé forte. =Martha Medeiros=

Tuur iha laletek João Paulo II, hateke rai-tetuk ne’ebé hakores ho naroman eletrisidade, fitun ne’ebé lakan piska-piska husi dook Agio no Sonia futu domin ba malu no promete sei la husik malu to’o Sonia remata nia estudu iha ema nia rai.

Agio, mai husi família simples no inan-aman laiha kbiit hodi haruka nia bá eskola iha rai-li’ur.  Agio kontente tebes tempu naruk sira dook malu, tinan ne’e Sonia mai pasa nia férias ho nia.  Atu hametin liután domin ne’e sira mós halo juramentu; “Ha’u Agio, jura iha estátua João Paulo II nia oin katak ha’u Agio nafatin hein to’o ó fila no ó mak unika feto iha ha’u-nia fuan.”  juramentu hanesan halo husi Sonia ba Agio.

Kalan ne’e Agio no Sonia pasa sira nia tempu ikus tan Sonia nia tempu férias mós remata daudaun. Buat hotu akontese laiha ema ida teri netik iha nakukun laran Agio no Sonia kesi domin hanesan ema kaben na’in.

Bainhira naroman kona Sonia nia matan buat hotu akontese ona, Sonia kaer nia faru taka nia hirus-matan ho matan-been no fuuk ne’ebé namkore belit ho ai-tahan dehan;

“Tuir loloos ida-ne’e labele akontese lai.”
Agio Hakuak metin Sonia hodi dehan “deskulpa karik ha’u halo ó tanis maibé ida-ne’e la’ós ha’u-nia hakarak de’it maibé ita-nian rua nia hakarak, karik ohin ó dehan labele, ida-ne’e sei la akontese to’o bainhira sinu igreja lian.”
“Aban ha’u filafali ona, sé buat ruma mak akontese karik oinsá.”
“Ó, lalika tau sei laiha buat ida mak akontese ba ó, ó fiar ha’u. Ha’u sei la husik ó mesak.”
Ko’alia nune’e no hakuak daudaun Sonia.

Kalan ne’e Sonia fila uma ho oin hamnasa maibé fuan ne’e tuku-tuku hela. Sonia no Agio rai segredu ne’e metin to’o Sonia fila. Iha ema nia rai Sonia hanesan feto raan ida ne’ebé laran-di’ak no iha ligasaun di’ak ho ema hotu.

Sonia nia domin ba Agio boot tebes. Facebook, WhatsApp halo relasaun domin ne’e metin no laiha segredu entre sira. Kalan despedida ne’e hanesan kalan ida ne’ebé furak no metin iha memória fitun no fulan sai sasin domin iha foho-lolon João Paulo II.

Fulan ida liu daudaun maibé Sonia nia fulan (menstruasaun) seidauk mai, tan sibuk ho nia estudu Sonia la preokupa kona-ba ida-ne’e, oin hahú kamutis, dalaruma ulun moras no muta. Bainhira nia kolega sira husu nia kona-ba nia kondisaun isin ne’ebé husi loron ba loron tun ba beibeik Sonia hatán badak de’it “heisa, kalan-kalan ha’u deskansa tarde tan prepera hela ha’u-nia skripsi.”

Tama ba fulan daruak menstruasaun kontinua la mai, fuan hahú duvidas no nakonu deskonfia tansá mak fulan kotuk la fase no fulan ne’e kontinua nafatin. Sonia hahú ta’uk no buka informasaun iha internét no hakbesik an ba farmasia hola test pack bainhira fila Sonia halai lailais ba hariis-fatin hodi koko. Bainhira sai husi hariis-fatin Sonia hakilar hanesan ema bulak tan risku rua mosu iha test pack hatudu katak Sonia pozitivu isin-rua.

Sonia nia liman ain nakdedar telefone Agio ne’e hodi hato’o novidades ne’e, telefone dahuluk Agio la hi’it hetok ida-ne’e halo Sonia nervozu liután, telefone daruak Agio foin simu, retak kedas ho lian-fuan tolok halo sira na’in-rua diskute malu naruk to’o lori mós inan-aman nia naran ba sala ne’ebé mak sira halo.

“Loos ona Sonia, sé ó ta’uk ó-nia inan-aman, dalan ne’ebé di’ak liubá ita na’in-rua, labarik ne’e tenke mate antes nia moris.”
“Agio, ha’u seidauk prontu atu iha oan, ha’u sei hakarak servisu no iha osan rasik hanesan ho ha’u-nia bin sira seluk.”
“Ó hanoin ó mesak, ha’u mós seidauk prontu ó mak hatene liu ha’u-nia kondisaun, sei ha’u iha ona agora ha’u-nia inan-aman bele oho kedas ha’u, dalan di’ak liu mak tenke halo abortu” Agio ko’alia ba Sonia ho lian nakdedar tan ta’uk ema ruma rona sira nia dadalia ne’e.

Sonia komesa hakbesik ba nia kolega di’ak ne’ebé uluk nia ajuda lori ba fatin prátika abortu, toba iha kama leten no prátika abortu mós kontinua no la’o ho susesu, Sonia tanis tan moras maibé hamnasa tan laiha ona buat ida indepe nia futuru.

Sonia bele hamnasa kontente maibé besi kro’at hadau daudaun iis esperansa moris kosok-oan ne’e. “Mamá moras loos bainhira besi ne’ebé hatama mai hodi dada sai obriga ha’u. Mamá deskulpa iha fulan dahuluk ha’u iha Mamá nia kabun halo Mamá nia ulun moras, isin-tun, muta no oin-kamutis. Iha fulan daruak bainhira haree Mamá kontente ha’u mós kontente, bainhira haree Mamá triste ha’u mós tanis, iha loron ida antes ema hatama besi mai dada sai ha’u. Ha’u sei rona Mamá ho Papa deskute malu no tolok malu uza Avo Pai ho Avo Mae nia naran. Ha’u-nia deskulpa mós ba Avo Pai ho Avo Mae tan ha’u sira temi imi nia naran halimar iha sira nia ibun tuun.

Mamá sekarik ha’u iha lian iha minutu ne’ebé sira hasai obriga ha’u, ha’u hakarak dehan de’it obrigada fó ona tempu mai hau halimar iha Mamá nia kabun. Mais tansá imi tenke hakotu ha’u-nia isin, ha’u promete sé karik imi  husik iis ne’e mak ha’u sei la halo susar imi no sei halo tuir de’it saida mak Mamá ho Papa dehan, ha’u sei la nakar no halo imi nia ulun moras.

Obrigada fó ona tempu fulan rua mai ha’u, buat ne’ebé ha’u hakarak imi hatene katak ha’u hadomi imi, ha’u lakohi atu labarik sira seluk mós sente moras ne’ebé ha’u sente, ha’u ta’uk liu mak besi ne’ebé sira hatama mai mai hodi obrigada dada sai ha’u, Mamá la haree besi ne’e ha’u-nia isin kanek no raan, ha’u ta’uk  tebes Mamá.”

Bainhira tun husi kama leten Sonia SMS kedas Agio katak Agio “prosesu abortu ohin la’o ho susesu.” Agio hatán badak de’it “informasaun ida-ne’e mak ha’u hein, ha’u espera ó mós iha kondisaun ne’ebé di’ak.”

Relasaun domin ne’e  kontinua la’o no metin liután, Sonia no Agio rai metin segredu, maibé iha loron hanesan ho loron abortu Sonia mehi beibeik labarik ki’ik ida hakilar ho lian maka’as dehan “Mamá moras loos, besi kro’at ne’e koko dada sai ha’u ho obriga.”

Díli, loron-30 fulan-Novembru Tinan-2017

MEHI AAT, HAKTOLAN PAPA

Kalohan nakukun, rai-lakan hanesan mákina fotografia. Ha’u tuur iha uma nia tatiis ho oin murón, loron hira ona Papa la telefone mai. Loron hira ona  bainhira kalan to’o ha’u hahú lahakmatek mehi ne’e mai beibeik no halo ha’u ta’uk taka matan, sah sinál mak ne’e?.

Bainhira hadeer husi ha’u-nia toba-fatin ha’u sempre halai uluk-bá Mamá nia kuartu karik iha novidades foun husi Papa. Ha’u saudades tebes Papa fulan ida ona nia la mai uma. Papa nia servisu mak hanesan badain halo uma, fulan ida liubá Papa hetan servisu iha Sidade.

Iha dadeer ida bainhira ha’u hadeer haree Papa tuur iha varanda ho hamnasa dehan ba Mamá “ó, haree ho labarik sira. Ha’u sei ba sidade karik kleur oituan, ami na’in haat hetan fiar hodi  hadi'a ema nia uma, ami deside hadi’a hotu dala ida mak ami foin fila, tarde liu mak fulan rua remata ona, kona-ba kontratu bainhrira ami hare tiha kondisaun uma foin mak deside.”

Ko’alia nune’e bainhira haree ha’u Papa dehan “Acau haree ó-nia alin sira, keta haluha  fó han animál sira, la’ós Papa laiha uma ó mós la’o bá badiu de’it.” Ko’alia nune’e liman kaer daudaun ha’u-nia ulun.

Ha’u-nia loron sira sente falta bainhira Papa laiha ha’u-nia sorin, ha’u kontinua tau matan ba servisu sira ne’ebé mak Papa husik hela, ajuda Mamá iha toos sah tan oras ne’e udan hahú monu rai, ajuda lere du’ut no prepara batar fini hodi kuda, tau matan ba animál sira-ne’ebé Papa hakiak.

Semana rua liu daudaun Papa la fó hikas novidades, tama ba semana tolu Papa telefone mai Mamá husi kona-ba ami na’in-rua Anata nia kondisaun. Ha’u ho Anata hadau malu telefone hakarak ko’alia ho Papa;

“Acau, ó keta haluha ajuda ó-nia Mamá, keta falta eskola. Papa fila mak hola ó-nia pasta foun no xuteira. Anata nia Papa sei hola boneka no vestidu. Haree imi na’in-rua keta baku-malu, rona ga lae.”  Ko’alia mai ho lian si’ak.

Papa bele si’ak-teen maibé nia istima tebes ami na’in-rua. Iha meiudia ida bainhira ami na’in-rua Anata tuur iha toos ibun haree Mamá kuda hela batar, Anata dehan ona mai ha’u;

“Papa mak iha karik, oras hanesan ne’e nia lalin ona ai hodi hadi’a lutu ne’ebé hahú naksobu.”
“Bainhira Papa laiha ha’u bele troka Papa nia fatin ajuda Mamá, ne’ebé ó kalma de’it.”
“Hiiiss…. Ó ne’e sah orasida ó-nia kolega sira bolu ó lakon ona.” Anata ko’alia mai ho oin hamnasa.

Meiudia ne’e loron manas tebes, Mamá hafalun ulun ho hena liman, kaer daudaun ai-kro’at, fai ba rai no liman sorin hatama daudaun batar musan ba rai-kuak. Husi dook Mamá  bolu hodi dehan;

“Imi na’in-rua halimar iha mahon de’it, Acau ó lori bee mai lai, ha’u hamrook  loos ona”

Ha’u halai lailais bá Mamá lori bee ne’ebé enxe iha masa mutin, kosar sulin husi Mamá nia reitos, ha’u foti kaneka fu’i daudaun bee ba Mamá, liman sorin simu daudaun kaneka ne’ebé ha’u fó ba ne’e no sorin hamoos daudaun kosar iha reitos.

Bainhira hemu hotu tiha bee Mamá kontinua kuda batar, tan ami-nia toos dook husi ami-nia hela-fatin bainhira sai husi uma Mamá te’in kedas nune’e meiudia ami bele han de’it iha toos no lokraik foin fila dala ida ba uma.

“Imi na’in-rua hamlaha haree han ona.”
“Di’ak, sé di’ak liu bainhira ita na’in-tolu han dala ida.”

Ha’u lori filafali masa bee ne’e ba hatuur iha Anata nia sorin, husi nia espresaun ha’u hatene katak Anata hamlaha ona, ha’u foti katana ne’ebé Mamá tara iha lutu, taa daudaun hudi tahan nahe iha rai no hasai terina etu iha sakola laran hatuur iha hudi tahan leten.

“Mamá, mai ita han lai.”

Mamá mós hakat hakbesik mai no hatún bote ne’ebé haklili hodi dehan “rai-manas loos” Anata fahe bikan ba ha’u no Mamá. Bainhira iha situasaun hamutuk hanesan ha’u saudades Papa nia prezensa maibé ha’u la konta ba Mamá kona-ba mehi aat ne’ebé mai beibeik ne’e.

Bainhira han hotu Mamá kontinua kuda batar, ha’u ho Anata ajuda hamoos du’ut sira iha toos laran halibur iha fatin ida no lalin ain tau iha lutu hun bainhira Mamá kuda batar hotu bele hadi’a daudaun lutu ne’ebé aat.

Ida-idak halo nia servisu no laiha tempu ko’alia ba malu, karik Papa iha ami-nia servisu sei la todan hanesan ne’e, biar ha’u sente kole maibé Papa nia servisu iha sidade karik todan liu saida mak ha’u halo ohin loron.

Lokraik ne’e ami fila sedu tan udan atu mai, liuhusi sinál kalohan nakukun no rai lakan. Anata arruma daudaun bikan sira tau iha sakola laran hodi bolu ba Mamá; “Mamá, ita fila ona lokraik loos ona ne’e.”

Ida-idak hi’it nia sasán, Mamá tutur mós ai maran balu. Ha’u hasan bote no sakola, Anata hi’it masa bee. Bainhira to’o iha dalan klaran udan mós mai daudaun Mamá, taa hudi tahan fó ami na’in-rua Anata taka, ami la’o neineik tuir foho-lolon.

Bainhira to’o iha uma Mamá nono bee manas fó ami na’in-rua Anata hariis no hatuur daudaun sasoro ba han-kalan nian. Husi hariis-fatin ha’u hakilar ho lian maka’as bolu Mamá iha dapur  “Mamá telefone lian.” Ha’u la hatene sé mak telefone mai ne’e maibé ha’u sente ne’e Papa.

Hafoin hariis hotu Mamá bolu ami na’in-rua Anata ho oin hamnasa Mamá dehan “ohin Papa telefone mai dehan aban lae bairua, ema ruma mai Papa sei haruka tuir osan no imi na’in-rua nia sasán ne’ebé Papa promete ona ne’e.”  ha’u ho Anata simu novidades ne’e ho oin kontente.

Ha’u-nia fuan hetok lahakmatek liután, ta’uk taka matan tan ta’uk mehi aat ne’e mai beibeik. Kalan ne’e ha’u lakohi toba mesak halai bá kuartu sorin toba hamutuk ho Mamá no Anata. Ha’u taka matan ho obriga an no kaer metin Mamá nia liman no reza iha ha’u-nia fuan “Na’I ba ita-boot mak ha’u fiar hodi tulun Papa no hadook nia husi susar oioin” ho lian neineik Mamá dehan; “haree toba ona aban loron Segunda, imi tama fali ona eskola.”

Dadeer ne’e Mamá hadeer sedu fanu ami, fuan  kontinua lahakmatek, biar nune’e ibun toos atu dehan ba Mamá. Ha’u ho Anata mós prepara an ba eskola, bainhira to’o eskola foin mak liu oras ida tiu Abio tuir kedas ba eskola hodi husu lisensa ba profesora sira.

“Acau ho Anata tenke fila ona bá uma.”

Tiu Abio mai hasoru ami maibé nia la dehan fila bá uma atu halo saida, kuandu ami husu nia só hatán de’it  “to’o iha uma mak hatene.”  Bainhira to’o iha uma ema barak ona iha ne’ebá lian tanis husi kintu kantu, Mamá halai hasoru no hakuak ami na’in-rua hodi dehan “ó-nia Papa iis laiha ona.”

Ibun ne’e toos só matan-been de’it mak turuk habokon hasaan, tansá mehi aat ne’e tenke sai realidade. Anata husu beibeik;
“Tanba sah, horisehik Papa sei telefone mai dehan atu  haruka ami sasán, tansá ohin ami tenke rona fali ida-ne’e”
“ohin dadeer listrik xoke ó-nia aman no monu tun husi moru leten, bainhira nia kolega sira atu bá ajuda nia iis laiha ona. Ita hein de’it meiudia ne’e imi-nia aman nia isin to’o mai ona.” ko’alia mai ho tanis no lian nakdedar.

Ema ida hahú book an dada lona, animál sira iha luhan hahú hakilar, lian halerik husi Mamá no Papa nia feto sira hetok maka’as liután bainhira ambulánsia para iha uma oin, isin ne’e sente toos hakat hakbesik ba papa nia kaixaun, Anata nia tanis no halerik halo fuan ne’e sente moras liután

“Bainhira papa laiha ba sé loos mak ami sei bolu papa, ami sei ki’ik tansá Papa bá husik hela ami, ha’u la presiza boneka no vestidu foun, ha’u presiza mak Papa nia prezensa iha ami-nia leet.”

Sala ne’e iha ha’u, sé karik ha’u konta sai saida mak ha’u mehi loron hira liubá kona-ba Papa nia mate, buat hotu hanesan ha’u haree ona antes haree Papa nia mate isin, sé karik ha’u bele muda tempu ba kotuk ha’u hakarak atu konta sai hotu mehi aat ne'e, nune’e Papa bele kuidadu an ho di’ak.

Loron tuirmai Papa nia mate isin mós haloot ona só orasaun mak akompaña Papa “Papa fuan ne’e sente todan bainhira lakon Papa husi ami-nia sorin, nafatin tau matan ba ami na’in tolu tan ami -nia hakat iha loron tuir mai sei todan liután, buat ne’ebé ha’u hakarak Papa hatene katak biar Papa si’ak-teen ida-ne’e la hamenus ha’u-nia domin ba Papa. Deskansa ho hakmatek amin.”

Poezia ida ne’e didika ba ó Papa.

Iha ha’u-nia mesak ha’u saudades ó.
Ó mak ai-hun ne’ebé hamahon ha’u.
Fó ó-nia kabaas mai ha’u sadere bainhira hakat ne’e hahú todan.
Ho ó-nia hamnasa kura moras hotu.
Ho ó-nia hamnasa hakmaan todan hotu.

Bainhira laiha ó, ha’u-nia haksolok mós hakoi hamutuk ho ó.
Tansá ó la’o husik hela ha’u, iha minutu sira-ne’ebé ha’u presiza ó.
Sé tempu bele muda ba kotuk, ha’u lakohi lakon minutu ida.

Ó mak hun ba domin
Ó mak ha’u-nia forsa.
Ó mak ha’u-nia esperansa.
Ó mak ha’u-nia mestre.

Obrigada ba domin hotu, domin ne’ebé ha’u labele selu to’o iis ne’e lakon husi isin-lolon.
Hadomi ó laiha rohan Papa.

Díli, loron-25 fulan-Novembru tinan-2017

HALERIK RAI-HENEK TASI

Fotografia kredit belun Acacio Pinto

Ha'u komprende ai-tahan sira saudades udan been.
Ha'u komprende tempu udan to'o daudaun ona.
Ha'u komprende animál fuik sira la'o dook ona buka bee matan.

Ha'u komprende toos na'in sira laran metin ba udan been.
Ha'u komprende bee moos komesa menus iha fatin-fatin.

Buat ne'ebé ha'u la komprende tansá bainhiran udan monu rai, ha'u-nia furak hahú lakon.
Tansá iha loron ne'ebé ai-tahan sira kontente simu udan maibé ha'u taridu no tauk lakon ha'u-nia furak.

Tansá bainhira udan monu rai, fo'er sira iha rai maran mai butuk hotu iha ha'u-nia leten. Laloran tasi ne'ebé baibain baku kona ha'u ho koor mutin nakfila ba kór kafé.

Dalaruma ha'u hirus maibé laiha lian, loroloron ema sama ha'u-nia isin maibé ha'u nafatin nonook. Bainhira udan lori fo'er husi rai maran mai butuk iha ha'u-nia leten, ha'u nafatin nonook.

Karik ha'u iha lian, ha'u hakarak dehan de'it "ha'u mós hakarak sente udan nia furak maibé la'ós selebra hamutuk ho fo'er ne'ebé lori mai iha tasi-ibun".

Sekarik ha'u iha lian ha'u hakarak dehan para ona soe fo'er arbiru, labele soe iha bee dalan no mota laran. Sé imi kontinua hahalok ida ne'e imi rasik mak estraga ha'u-nia Furak.

Ha'u hirus mós imi la rona ha'u-nia lian maibé ha'u nafatin tau matan ba imi, halo buat simples de'it hodi respeita ha'u soe fo'er iha nia fatin.

Halerik rai-hanek tasi......

Díli, loron-18 fulan-Novembru tinan-2017

NE'E MAK MORIS

Moris dala ida de'it.
Lalika gasta enerjia ba buat laek ida
ne'ebé laiha valór ba ó-nia moris.

Ema ida-idak iha maneira rasik hodi hala'o moris ne'e.

Lalika lakon tempu demais hodi haree de'it ema nia maneira moris.

Bainhira hakfodak ó iha kotuk loos ona.
Hanesan lia-murak ida dehan "bainhira ó kuidadu fini ne'ebé di'ak mak ó sei ku'u mós rezultadu ne'ebé di'ak."

Moris maK ne'e nafatin koko atu kuidadu fini ne'ebé kuda ona.

Lalika gasta tempu matan mihis de'it ba ema seluk nia fini tan nia iha na'in hodi kuidadu tuir nia kbiit.

Lalika laran moras bainhira ó nia fini la fó fuan ne'ebé di'ak tan ó rasik mak la kuidadu maibé lakon tempu barak liu hodi hafuhu tuir ema seluk nia fini.

Ne'e mak moris tuir ha'u-nia matan.
Rahun di'ak ba sira ne'ebé laran luak.

Dili, loron-12 fulan-Novembru tinan-2017

SÉ MAK HASÉ ULUK

Loron-manas amaun kal han la bosu.
M: hai, di'ak ka lae.?
F : di'ak, obrigada
M: halo saida agora.?
F : presiza ga ha'u dehan ba ita halo saida.?
M: Hakarak hatene de'it manis.
F : obrigada dehan ona ha'u manis.
M : Heisa kleur ona ha'u tau laran ba ó.
F: Koñese ha'u, perasaan ha'u la koñese ita.
M : Ó baibain de'it ha'u mak gosta like no komentariu hela de'it ó nia foto no status ne'e.
F: nega, obrigada akompaña ona.
M : hiis, ó baibain de'it. Doben iha ona ka lae, selai ha'u hatama CV ona.
F : ha'u la loke kompañia ida ne'ebé la fó servisu ba ema ida.
M: ha'u gosta ó sah.? ó sai ha'u nia doben de'it ona.

Liu tiha minutu balu feto nonook i troka kedas foto profile ho nia namorado.
M: 😢😢😢😢😢
F : nu'usá ó tanis.
M: lae, ha'u koñese maun ne'e keta dehan ba maun lae nia ne'e 👊👊👊👊👊 kedas.
F : pois CV ne'e hanu'usá.?
M: ha'u ta'uk  ema pinta ha'u-nia matan, Deskulpa mana ha'u tenke apaga ita husi lista kolega.

Sé mak hasee uluk.
Kebit Alito Rosa ó kal tukang pukul karik.
Hahahahaha...

Dili, loron-8 fulan-novembru tinan-2017

SALAH SAMBUNG

“Sonia, ó-nia telefone ohin kedas lian, sé mak kalan-boot ema deskansa ona mós sei telefone mai ne’e, Soniaaaa….. hadeer ona ga” liman doko daudaun ha’u kabaas ho lian baruk nian.

Kose matan, liman lamas daudaun ba telefone ne’ebé latan iha sumasu okos. Númeru foun no la marka naran ruma, mane mistériu ne’e lian furak hanesan kantadór Zeze Carmago. Lian ne’e halo ha’u hakfodak husi ha’u-nia dukur naruk. 

“Ne’e ho Ana ga.?”

“Lae,ne’e ho Sonia, ita salah sambung karik?”

“Karik nune’e, deskulpa ha’u interrompe ita kalan-boot.”

“Diak hela, ha’u sei hadeer.”  La hatene tansá ha’u dehan hanesan ne’e. Karik tan lian ne’e ou karik tan buat seluk.

“Deskulpa, dala ida tan” ko’alia mai ho hakraik an.

“Bele hatene ne’e ho sé?” 

“Ason , deskulpa ha’u taka telefone lai.” 

Taka telefone no latan hikas telefone iha sumasu okos. Bainhira kalan to’o hanoin ne’e ba hela de’it nia. “Orasida Ason telefone ka lae.?” Toba ladukur saudades lian ne’e, husi nia maneira ko’alia buat ne’ebé ha’u nota katak nia ema di’ak ida. 

Halatan an iha kama leten, liman hateke hela de’it ba telefone, fitun dehan hela ba nia “ha’u hakarak rona nia lian dada ida tan, karik liuhusi mehi mós di’ak ona.” nia lian sei nafatin metin iha tilun no rai metin iha fuan. 

Taka matan maibé fuan nafatin lahakmatek, ha’u bulak ona karik hein telefone husi ema ne’ebé ha’u la koñese. Loron tolu liu daudaun nia la telefone hikas mai hanoin, hanoin ne’e hahú mai “sé nia la telefone mai, ha’u mak sei telefone ba.”

Ha’u foin lolon liman ba sumasu vidra husi telefone simu kedas iha liman, kontente Ason nia naran mosu iha telefone, simu ho oin hamnasa;

”Kalan di’ak, ne’e ho Sonia ga.?”

“Sin, ne’e ho sé” halo finje la hatene sé mak ne’e.

“Ha’u mak kalan hira liubá  telefone ita, deskulpa ha’u interrompe ita kalan-boot.”

“Di’ak hela.” Hatán ho oin hamnasa

“Loron hirak ona ha’u hanoin hela atu telefone fali ita hodi husu deskulpa maibé ha’u haluha hela de’it.”

“Di’ak hela, ita-nia lian mós furak tiha.”

Hatán ho hamnasa Ason dehan “orasida ha’u la han ona.”

“Tebes, ha’u la bosok ita-nia lian furak loos.”

“Entaun loos ona aban kalan ha’u bele telefone tan ga.?”

Ho espontania hatán “bele”

Ha’u taka telefone ho oin hamnasa, Abia ne’ebé toba iha ha’u-nia hateke mai ha’u ho oin baruk dehan “bele nonook ka lae, kalan ema seluk atu deskansa imi mak telefone hela de’it.” Laiha liafuan ida hatán ba Abia. 

Rai hikas telefone iha sumasu okos ho fuan funan-funan. Kalan ne’e sente naruk loos, sé karik ha’u bele muda tempu ba oin ha’u hakarak aban lailais. Hanoin ne’e hahú lahakmatek hanoin hela de’it loron aban. 

Rai hahú nakaras manu-fuik haksubar an iha ai matan-dukur leten, fitun iha lalehan hahú mosu, hafoin han-kalan ha’u tama lailais ba kuartu laran. Ha’u komesa iha ha’u-nia mundu mesak bainhira kalan to’o. Husi kalan ba kalan Ason telefone hela de’it mai no liuhusi dada lia hau laran monu ba nia.

Tinan ida ona ha’u ho mundu ida ketak, loron ida de’it la rona Ason nia lian fuan ne’e sente falta buat boot ida, husik ha’u hasé o liuhusi iis ne’ebá ha’u dada hodi sente ó besik iha ha’u-nia sorin, múzika furak husi banda Rai Nain ho títulu Hakarak Ó Hatene, mak bele pinta ha’u-nia sentimentu saudades ne’e.

Tinan ida ona maibé Ason nunka haruka nia letratu mai, ha’u hahú dúvida ho Ason karik nia la sériu ho relasaun domin ne’e. Bainhira ha’u husu atu hasoru malu, nia so hatán de’it katak “iha tempu ruma ita sei hasoru malu, kuandu tempu ne’e to’o ó sei hatene sé mak ha’u. Ne’ebé lalika ansi, sé ó hadomi ha’u fiar iha domin ne’e.”

Biar nune’e fuan hahú lahakmatek no mosu lia mak husu oioin, tansá tenke hein, saida mak Ason subar husi ha’u, fuan ne’ebé fuan hahú namlaek no lakohi tau esperansa ba buat ne’ebé mak labele kaer ho liman, biar liafuan kesi ona fuan rua ne’e biar nune’e ha’u labele bosok ha’u-nia fuan katak ha’u hadomi nia.

Abia sempre dehan ba ha’u “Sonia, ó hasoru ona mane ka lae, keta halo nia bosok de’it. Ó nein hasoru nia oinsá mak ó bele hatene kona-ba nia I nia prontu simu ó ka lae?” 

Fitun ba ó mak ha’u laran-metin, nafatin hatudu ó-nia naroman biar husi dook. Nune’e bele lori nafatin esperansa mai ha’u hodi hein nia biar liuhusi Anin de’it. Iha kalan ida Ason telefone ha’u no nia dehan hakarak tebes atu hasoru ha’u. Ha’u kontente ho novidades ne’e no ami mós marka ona fatin hodi hasoru malu.

Tasi ibun Palasio Governu nia oin fatin ne’ebé ami determina ona hodi hasoru malu. Tuku haat lokraik, loron ne’e ha’u lakohi bá eskola tan atrapalla hela ho hasoru malu ne’e, roupa sira iha armáriu laran hasai hotu, ha’u la hatene loos atu hatais loos roupa ida ne’ebé iha hasoru malu dahuluk ne’e. 

Bainhira tun husi mikrolet, ha’u haree karreta Avanza mutin ida para kedas iha fatin ne’ebé mak ami deside ona ne’e. La hetan mane ida ho kalsa naruk metan no faru mutin no taka xapeu metan mak tuur iha ne’ebá. 

Ho ha’u-nia tonka la’o nafatin biar ain ne’e sente moras. Lakleur Ason telefone mai, ha’u hamnasa bainhira haree Ason nia naran; 

“Deskulpa, Sonia ó la’ós feto ne’ebé mak hein durante ne’e, hahú ohin ó la’ós ona ha’u-nia doben. Ó dook loos husi saida mak ha’u mehi durante ne’e.”

“Ason, ó labele hanesan ne’e, tanba de’it ha’u ain-aat.”  Hatán ho lian nakdedar.

“ Deskulpa, durante ne’e ita laiha relasaun ida, sé karik ha’u telefone Ita-Boot ne’e tanba salah sambung. Sei ita dehan hadomi “domin ne’e mós sala orang.” 

Ha’u taka telefone sei oin ba tasi ho matan-been nakonu, iha ha’u-nia kotuk karreta Avanza ne’ebé ohin para ne’e mós hasé an ona husi fatin ne’e. Tansá tenke salah sambung no tansá domin ne’e tenke salah orang. Tempu naruk ha’u hein la’ós atu rona de’it liafuan salah sambung no salah orang.  Obrigada ó halo ona ha’u sente ona saida mak domin biar salah sambung no salah orang. 

Díli, loron-11 fulan-Novembru tinan-2017

HAMALUK NETIK HA'U

“Bainhira loos mak sira mai, ha’u lakohi bainhira taka matan sira laiha ha’u-nia sorin.”

Kalohan mutin hakuak foho-lolon no haturuk maho been habokon ai-tahan, uma du’ut iha laletek se oin ba foho Matebian, ne’e mak ha’u rai moris fatin. Dook husi barullu karreta no motór. Tinan sanulu ona, ha’u-nia kaben mane la’o husik hela.

Ha’u iha oan na’in-rua Aleixo no Justino finadu tinan rua tuituir malu sira la mai vizita. Biar nune’e ha’u nafatin hein, semana rua liubá Aleixo telefone mai subriña Alda dehan “ha’u atu bá halimar ho sira iha Díli.”

Kalan hira tuituir malu me’ar hela de’it, ain la forsa ona la’o bá hariis-fatin. Uma ho kakuluk halo husi du’ut ho kuartu rua kompletu ho sala bainaka no han-fatin ne’e mak hamaluk ha’u laiha oan no beioan ida iha sorin. Biar nune’e ha’u nunka sente mesak Aziu nia lalatak nafatin hamutuk ho ha’u liuhusi nia letratu.

Tempu naruk liu daudaun, Aziu nia isin mós oras ne’e nakfila ona ba rai maibé nia lalatak no memória nafatin metin iha hanoin. Bainhira ha’u sente mesak haree netik nia letratu ida-ne’e  kura netik saudades ba nia.

Udan mós hahú monu habokon rai, udan lori esperansa ba toos na’in sira. Luta mós hahú aat, ha’u laiha forsa hodi lalin ai hodi halo lutu, mais ha’u nafatin obriga an hamoos toos no kuda netik batar no ai-han seluk.

Lian bisbisu barak mai husi sorin-sorin “ferik ona nu’usá mak la bá hela de’it ho oan sira, halo toos mós atu halo saida?.” Bainhira kole saida mak sira dehan ne’e ha’u sente loos, halo toos ba halo saida no atu fó han sé? Lia-makhusu ne’e nafatin mosu iha kakutak.

Ha’u lakohi lori todan ba sira ho ha’u-nia prezensa, biar ha’u ferik tenke halo buat ruma hodi ajuda sira. Dalan ne’ebé di’ak liu mak hela dook husi sira,  nafatin hela iha uma ne’e, tau matan ba toos liman-fatin Aziu nian no se ha’u ba tiha hela iha sidade oinsá ho Aziu sé mak sei hamoos no sunu lilin iha Aziu nia rate.

Bainhira manu kokorek no loro-matan mosu iha foho Matebian nia tutun ha’u hadeer halakan ha’u-nia ahi-matan no nono bee no da’an fehuk ba matabixu. Kuandu tuir mesak iha ahi-matan, lian bisbisu barak mosu iha tilun, matan haree ami-nia hamutuk liuhusi hanoin, Aziu nia lalatak sempre hamaluk ha’u iha ha’u-nia mesak.

Arruma ha’u-nia bukai tau iha bote, la’o daudaun ba toos. Udan monu rai ona, ema ida-idak sei ba nia toos hamoos no hadi’a lutu.

Ha’u mós sei halo ida-ne’e, lutu balu ai lahuk ona no hahú naksobu sei la hadi’a hikas ema nia animál bele han hotu ai-horis ne’ebé mak moris iha toos laran.

Fuan ne’e saudades hela sira, bainhira kalan to’o tuur iha ai-matan hanoin ho matan-been karik ha’u bele muda tempu ba kotuk ha’u hakarak pasa kalan sé matebian ho ha’u-nia oan na’in-rua.

Hela loron rua de’it ona tama ona ba finadu laiha novidades, bainhira ba hamoos Aziu nia rate buat ne’ebé ha’u husu ba nia mak hakarak pasa finado hamutuk ho oan no beioan sira hotu.

Han katupa hamutuk, rona sira nia istória fahe hamnasa ba malu. Karik ida-ne’e bele kura duni ha’u-nia saudades iha minutu balu.

Bainhira tuur iha baranda ha’u sempre heree beibeik ba manu-aman ne’ebé kesi iha uma nia tatiis. Manu ne’e ha’u prepara ba loron matebia maibé laiha ema ida entre sira mak hamaluk ha’u iha kalan se matebian tan ne’e ha’u deside la oho manu ne’e tan viziñu sira nia laran-luak oferese ona modo no katupa ba ha’u.

Tuir fila kotuk ho hanoin barak tekiteki ha’u rona barullu iha uma oin, ha’u halai lailais ba uma oin, ha’u haree Aleixo, Justino ho nia oan sira kompletu hotu. So matan-been de’it mak simu sira nia prezensa.

Obrigada Aziu, ó loke duni sira-nia neon hamaluk ha’u iha kalan se matebian.

Díli, loron-4 fulan-Novembru tinan-2017 

MARIA TAPO

Maria…. Maria… Maria
Buibere ho aten brani
See kilat tutun ba inimigu.

Gen Got sasin ó raan turuk ikus.
Maria, feto forte ne’ebé hamriik ho aten brani
La ta’uk see kilat tutun biar selu ho isin-lolon

3 Novembru, ó marka istória foun ba feto Timor
Maria, ó hatudu duni ó domin ba rai ne’e.
Ó hamriik iha liña oin metin hanesan Foho Ramelau no Matebian.

Ó metin hasoru bala inimigu.
Ho aten brani see duni kilat tutun ba inimigu.
Maria ó feto forte no forte duni.

///
Parabéns loron Feto Nasionál
Obrigada ba heroina hotu ne’ebé fó ona an ba rai ne’e ho imi nia luta ohin loron ami bele sente duni anin liberdade. Ha’u-nia hakru’uk ba heroi deskoñesidu sira, imi-nia luta no sakrifísiu ami bele sente no goza ukun an ida-ne’e. Obrigada ba imi nia luta no sakrifísiu.

Díli, loron-3 fulan-Novembru Tinan-2017

LORIKO HAKILAR

Viva Kay Rala Xanana Gusmão
Viva FRETILIN
Viva Timor-Leste

Ibun tutun mamar hakilar ho lian makaas.
Ibun tutun mamar hakilar ho fuan
Ibun tutun mamar hakilar la ho ta'uk.

Udan Bala Musan iha fulan-Novembru
Santa Cruz sai sasin
Raan sulin hanesan wee kadoras
Mate isin namtate hanesan haas tasak.

Ooohhh.... Loriko Joventude Asuwain.
Hakilar ba ho lian makaas
Hakilar ba bala nia lian
Hakilar ba liberdade
Hakilar ba ukun rasik an.
Loriko hakilar no tuba rai metin.

Santa Cruz sasin ba Vitória.
Santa Cruz sasin istória
Santa Cruz sasin ba ukun rasik an.

Ai-mutin, loron-31 fulan-Outubru tinan-2017

MARI ALKATIRI

Obrigada Jornál Independente ne'ebé
públika ona poezia ne'e.
Edisaun Sábadu, 21 fulan-Outubru tinan-2017

Katuas fuuk mutin ho nia hamnasa midar,
hamnasa ne'ebé mai husi fuan.

Katuas fuuk mutin husi jerasaun tuan,
koko hamriik iha jerasaun foun nia klaran
ho fuan boot rona no hakuak nafatin demokrasia.

Katuas fuuk mutin ne'ebé ho fuan
fakar nia matan-been ba povu nia interese.

Katuas fuuk mutin hatudu duni nia didikasaun, vontade no esforsu biar ema haree ho matan sorin.

Natoon ho matan-ween ne'e.
Tan ween fase ona ha'u matan hodi haree no koñese didi'ak, sé loos mak iha interese ba povu nia moris.

Viva Kamarada Mari Alkatiri.
Viva FRETILIN.
Viva povu maubere.

Dili, loron-20 fulan-Outubru tinan-2017.

KORUPTÓR-Parte II

“Parabéns Mamá nia oan mane boot. Ó troka ona ó-nia aman nia fatin iha tempu sira ne’ebé nia la hamutuk ho ita.”

La sente tinan liman liu daudaun. Iha loron sira hanesan ne’e ha’u presiza tebes aman ida nia domin. Ha’u labele bosok ha’u-nia an katak ha’u saudades nian biar ema barak hamnasa ha’u bainhira temi Papa nia naran.

Ha’u boot daudaun presaun ne’ebé ha’u hetan husi viziñu mós hetok maka’as liután sah tan ho Mamá nia negósiu ne’ebé husi loron ba loron komesa la’o ho di’ak. Lian bisbisu mós husi sorin-sorin.

“La’en tama tiha komarka feen ho oan mak goza osan husi hahalok korrupsaun nia.”

Liafuan ne’e dalaruma halo ha’u la fiar an bainhira la’o iha lurón, Ania tanis beibeik maibé ha’u labele halo buat ida hodi tulun nia. Realidade hatudu daudaun oras ne’e Papa iha komarka tan hahalok korrupsaun.

Ema la haree ba Mamá nia esforsu hodi hadi’a ami-nia moris bainhira Papa laiha ami-nia sorin. Sira la haree ba Mamá nia sakrifísiu, julga tuir sira-nia hakarak. Tinan lima liu daudaun maibé ha’u seidauk hetan resposta ne’ebé di’ak husi Mamá kona-ba Papa nia kazu, Mamá só dehan de’it tinan oin Papa livre ona husi nia kastigu.

Ha’u lahatene ne’e novidades di’ak ka lae. Tan loron sira-ne’ebé ha’u liu ona nakonu ho insulta. Ha’u koko hadook an ema hirak-ne’e, ha’u hatene la’ós ema hotu ko’alia aat ha’u.

Ha’u koñese kolega foun iha Sekundária. Ami forma grupu ida hanaran “Maun-Alin Metin.”
Ami na’in-neen mak harii grupu ne’e, Asatu nu’udar maun boot, Acau, Abel, Anito, Ambere no ha’u. Ami sólidu tebes, entre ami haree malu di’ak loos. Sira komprende liu ha’u no ha’u-nia problema biar sira hatene katak Papa oras ne’e iha hela komarka.

Mamá feto ne’ebé forte tebes, ha’u hatene presaun ne’ebé ha’u hetan la boot hanesan ho Mamá. Mamá troka Papa nia fatin buka osan ba ami na’in-tolu nia moris, família sira mós barak mak dada an husi ami-nia sorin, karik sira moe. Bainhira ha’u ho Ania ba vizita, sira sempre dehan;

“Imi mai halo halo saida?,lalika mai beibeik iha ne’ebá. Orasida ema dehan fali ami.”

Ha’u nonook no dada Ania nia liman no sai husi uma ne’e nein liafuan ida mak sai husi ha’u-nia ibun. Ania mós nonook kaer ha’u-nia liman la’o daudaun. Tempu barak ami na’in-rua gasta iha televizaun nia oin no ajuda Mamá fa’an sasán iha merkadu.

Maun Alin Metin mós dalaruma ba ajuda ha’u iha merkadu, iha loron domingu ami halibur hamutuk iha Asatu nia uma hodi diskute matéria eskola nian. Iha loron ne’e Acau la mosu mai, lakleur karreta ida para iha uma oin afinál Acau mak mai.

“Kolega sira ita la’o halimar tiha, imi la baruk kah. Loron kalan mak kaer hela de’it kadernu.”

Entre ami na’in neen Acau mak ulun-toos, nia sempre hetan valór mean. Ha’u hamnasa de’it bainhira nia dehan hanesan ne’e, sé ami estuda hamutuk mós nia servisu mak buti telefone no só halo barullu de’it. Ami hotu ba hakonu an iha karreta laran. Acau husu ona imi hakarak bá ne’ebé.
Asatu ho oin-hamnasa dehan “ita bá hariis tasi iha Kristu Rei de’it.”
“Anak mami, telefone fó hatene ó-nia Amá lai, orasida ferik hirus ona bainhira ó fila tarde” Acau ho hamnasa dehan mai ha’u.

Bainhira to’o iha Kristu Rei ami hotu kontente halai ba tasi-ibun, ami halai bá-mai duni malu hanesan ema bulak. La kleur Acau hakiduk karreta mai hodi dehan “loke odamatan karreta kotuk nia lae, saida mak ita mai tiha tasi tuur maran de’it hanesan ne’e.” Ha’u haree serveza no hahán barak loos iha karreta laran.

Acau hakilar husi karreta laran hodi dehan “hatún tiha sasán sira iha karreta laran ne’e, ohin loron ita festa, imi haluha ona ga? Ohin tama ona ba tinan ida grupu Maun-Alin Metin forma.” Hotu-hotu hamnasa no hakuak malu ho kontente.

Loron ne’e ami kal festa duni, Asatu loke tua iha kaixa laran fahe ba ami ida-idak no  hamriik hadulas kaixa ne’e hodi dehan “Ami sei la husik malu, kompleta malu no suporta malu nafatin to’o ami katuas, Maun Alin Metin par sempre.”

Foin hemu de’it lata rua oin hahú la moos, ko’alia mangame hanesan ema bulak. Iha ne’e ha’u fakar ha’u-nia sentimentu kona-ba ha’u-nia moris ne’ebé nunka fahe ba sira na’in-lima ho matan-been dehan;

“Ha’u hatene imi sempre iha mai ha’u, imi hatene ema ne’ebé mak ha’u ódiu no hirus liu iha ha’u-nia moris mak Papa tan nia halo ha’u ho Ania hanesan tiha ema fuik iha família no viziñu sira, ha’u sempre haree Mamá tanis iha tempu kalan. Ema hasai liafuan ne’ebé la merese ba Mamá kona-ba Papa. Mais ha’u labele bosok katak ha’u saudades hela no hakarak iha minutu balu hakuak netik nia iha loron-boot Natál no tinan foun. Ha’u la hatene tansá Papa lakohi simu ami-nia vizita iha loron-boot sira ne’e.”

Asatu, Acau, Abel, Anito no Ambere hakuak ha’u ho dehan “maun-alin ó la mesak ida, sura ho ami iha ó-nia moris, husik ba sira ko’alia tan ne’e sira nia ibun.”  Rai hahú nakaras ona bainhira ha’u to’o iha uma Mamá seidauk fila husi merkadu tan ta’uk Mamá atu hirus ha’u, hariis no toba uluk antes Mamá fila.

Ania komesa boot ona no komprende kona-ba situasaun ne’ebé mak ami na’in tolu hasoru, Ania mós la tanis ona bainhira ema dehan aat nia. Iha dadeer ne’e lahanesan baibain Mamá hamoos uma-laran, troka hena kama, janela ho oin-kontente loos.

Ha’u hakfodak bainhira haree Mamá badinas iha dadeer ne’e;
“Amá orasida Maromak tama uma ga?”
“Ó, nonook tiha haree ajuda Mamá ita hamoos no arruma uma-laran ho di’ak”
“Di’ak maibé ohin loron ha’u haree Amá oin-seluk loos no kontente loos”
“Ó, haree tok Ania ba hola matabixu ona ka lae.”
Hatán ho lian badak de’it “nia ba tiha ona.”
“Ohin Ania nia tinan no ohin mós ó-nia Papa livre ona husi komarka. Tanba ne’e mak Mamá hakarak halo supreza ida ba Ania.”
“Se hanesan ne’e ita na’in-rua mak ba hasoru Papa.”

Bainhira Ania mai, ami hanesan buat ida la kona ho hamnasa Ania dehan “ohin ha’u-nia tinan ne’e mak imi badinas loos ne’e karik.” Mamá doko ulun de’it no hakuak nia. “orasida ó ho ó-nia maun lalika ba eskola, Mamá ho Ason sai lai haree lalika badiu.”

Ko’alia nune’e no bá hein karreta iha lurón sorin;
“Amá nu’usá ita la bá ho taxi de’it”
“Bá ho bemo de’it fila mak ho taxi”

Ami hein besik oras rua Papa foin sai husi portaun boot komarka nian ho hamnasa Papa halai hasoru ami na’in-rua no hakuak ha’u. Bainhira fila oin ba lurón ha’u haree Ania tun daudaun husi bemo ho oin kontente.
Ho oin hakfodak Mamá dehan “sé mak fó hatene ba nia kona-ba ida-ne’e.”
“Ha’u la dehan, karik Ania lee ha’u-nia mensagen ne’ebé  ha’u manda ba grupu Maun Alin Metin, ha’u husu ajuda ba sira atu bá foti dosi ne’ebé Mamá hemeno horisehik ne’e. Ohin mai ha’u haluha tiha ha’u-nia telefone iha meza leten.”

Ania halai hasoru Papa ho oin-kontente no la haree ba karreta ne’ebé halai iha lurón, husik dook karreta ambulánsia halai ho velosidade aas bainhira hakfodak Ania iha latan ona iha rai no nakonu ho raan. Papa halai lailais hakuak nia ho matan-been.

Kondutór ne’e tun husi karreta laran hodi dehan “tula lailais nia ba karreta laran” bainhira loke odamatan ha’u haree inan isin-rua ida latan iha kama besi liman iha kabun no hakilar ho lian maka’as. Papa hakuak metin Ania no tula nia iha karreta laran.

Iha dalan ba ospitál Ania nein book an. Papa nafatin kaer nia liman hodi dehan “Ania hadeer ona ga, Papa saudades loos ó ne’e. Loke ó-nia matan haree netik Papa ba.”  Bainhira to’o iha ospitál Papa lori lailais ba sala emerjénsia no halatan nia iha kama leten.

Doutór sira mós halai lailais mai no koko Ania maibé ho lian neineik dehan;
“Deskulpa, ami tenke dehan ida-ne’e ita-nia oan iis laiha ona, nia fuan mós la funsiona.”

Mamá tanis nia hakuak nia hodi dehan “hadeer ona, ó toba iha ne’e halo saida, haree ó-nia aman iha ne’e ona, ohin ó-nia tinan ne’e oan.” Ha’u hamriik laiha lian só matan-been de’it mak turuk no fó sala ba an sé karik ohin ha’u la haluha telefone iha meza leten ida-ne’e sei la akontese.

Tansá tenke iha loron ne’e ó la’o husik hela ami, iha loron ne’ebé ó halo-tinan no iha loron ne’ebé Papa fila mai hamutuk ho ita, ó la’o husik hela ami. Buat ne’ebé ha’u hakarak ó hatene katak ha’u hadomi ó ha’u-nia feton mesak. Se karik ha’u la haluha telefone ida-ne’e sé la akontese, ema ne’ebé mak merese simu kulpa ba loron ne’e mak ha’u.

NB: istória ne’e hanesan istória fiksaun no la didika ba ema ida. Ba maluk sira-ne’ebé mak hakarak hato’o kritika no sujestaun bele manda Ita-Boot sira-nia komentáriu mai email este.amaral8@gmail.com

Díli, loron-14 fulan-Outubru tinan-2017

KORUPTÓR "Parte I"

Loron hira ona Papa no Mamá diskute malu hela de’it. Ha’u rona beibeik Mamá nia liafuan “Osan sira ne’e, ó nunka lori mai uma ne’e ikus problema mak ami foin hatene, osan ne’e ó lori ba ne’ebé?” lia hirak-ne’e mak sai beibeik husi Mamá nia ibun.

Ha’u no Ania tuur nonook hodi rona de’it diskute malu ne’e. Papa nia hahalok mós hahú muda  an, dalaruma ami toba hotu tiha ona mak Papa foin fila. Mamá mós la esplika tansá sira hirus malu beibeik.

Iha loron ida bainhira ha’u sai eskola Ana nia Mamá husu ona mai ha’u;

“Ason, nu’usá mak ó-nia Amá ho Apá hirus malu beibeik.”  Husu ho oin sériu.
“Amá la dehan ba ami tansá mak sira hirus malu, maibé Mamá sempre dehan beibeik osan sira ne’e ó lori ba ne’ebé, ikus problema mak ami foin hatene.”
“Afinál saida mak ema konta ne’e loos” ko’alia nune’e no la’o daudaun.

Ha’u la komprende saida mak Ana nia Mamá dehan no lakohi buka tuir sah problema mak Mamá no Papa taka ba ami. Husi loron ba loron, Papa nia prezensa hahú mihis. Bainhira kalan to’o Papa laiha ona tempu han hamutuk ho ami, laiha tempu mós konta istória no husu tuir atividade saida mak ohin loron ami halo.

Iha kalan ida bainhira han-kalan, Ania tanis ba Mamá hodi dehan;

“Amá, Apá ba ne’ebé mak nunka han hamutuk ho ita ne’e?” husu ho matan-been no lian nakdedar.
“Nu’usá husu kona-ba ó-nia aman?” hatán nune’e no tidin bikan maka’as ba meza leten.
“Ó-nia aman de’it la’o hanesan ema fuik, kalan mak mai toba no hadeer mai bá ona.”
“Apá, mai Amá buka hirus malu hela de’it ho Apá. Dalaruma ida-ne’e mak halo Apá hirus no lakohi mai ne’e karik.” Hatán ba Mamá no lima suru daudaun etu hatama ba ibun.
“Imi nia aman iha problema iha servisu fatin, kuandu imi boot ona imi foin komprende. Haree han halo hotu, fase liman ain no ba estuda ona.” Mamá hatán mai ho lian baruk.

Han hotu tiha ha’u ho Ania halo tuir saida mak Mamá haruka. Fulan rua liu daudaun situasaun harmonia iha uma-laran hahú mihis, loron ba loron hirus malu beibeik. Dalaruma ha’u ho Ania fila husi eskola viziñu sira sempre bisbisu ba malu, ha’u la hatene saida mak sira dehan.

Iha loron ida bainhira ha’u halimar ho ha’u-nia kolega sira iha jardín ne’ebé besik uma sorin, ha’u halo aat kolega ida nia brinkeru nia Mamá ho oin hirus hodi dehan “ó-nia aman koruptór nu’usá la haruka hola ó nian.” Ko’alia nune’e no hahú bandu ha’u-nia kolega sira seluk labele halimar ho ha’u.

Iha dalan ha’u-nia belun sira hahú goza “koruptór…. koruptór… koruptór….” Liafuan ne’e ha’u rona beibeik maibé ha’u la hatene saida mak ne’e. Biar sira bele goza ha’u maibé ha’u nafatin halimar ho sira, loron ba loron liafuan ne’e hetok maka’as liután.

Ha’u-nia belun di’ak sira mós lakohi la’o hamutuk ona ho ha’u, bainhira ha’u hola dosi no karmelu fahe ba sira, sira hotu lakohi han no só dehan de’it “ha’u-nia Amá bandu labele simu sasán ruma husi ó.” loron ida iha oras rekreiu Ania halai mai ha’u-nia turma hodi tanis dehan;

“Ha’u-nia kolega sira goza ha’u dehan ó-nia Apá na’ok-teen”
“Sé mak dehan hanesan ne’e.” hatán ho lian hirus.

Husi kotuk ha’u-nia kolega sira hakilar dehan “koruptór nia oan komesa hirus” ha’u nonook tanba la komprende liafuan koruptór ne’e dehan saida. Mestra Berta husi dook hakilar ho lian maka’as hodi dehan “imi dehan saida mak ne’e.” hotu-hotu nonook.

Nia hakat mai hamaus Ania no bolu ami na’in-rua ba sala profesores. Mestra Berta husu ba Ania tansá nia tanis, Ania hatán ho tanis;

“Sira dehan ha’u-nia Apá na’ok-teen.”
“Mestra liafuan koruptór ne’e dehan saida, kolega sira goza beibeik ha’u ho liafuan ne’e.” ko’alia nune’e no hamanus daudaun Ania ne’ebé tanis.
“Bainhira ema ida servisu iha fatin ida, nia foti osan husi fatin ne’e liuhusi dalan ne’e laloos ne’e mak ema dehan koruptór”
“Mais tanba saida mak sira dehan ha’u koruptór.”
“Fila bá husu didi’ak tok ba ó-nia inan-aman karik sira iha resposta ne’ebé di’ak liu, maibé ida-ne’e problema ema boot nian, imi nafatin hatudu resposabilidade nu’udar estudante nafatin mai eskola no nafatin respeitu inan-aman. Fila ba ida-idak nia turma oras rekreiu hotu ona.”

Ha’u kaer Ania nia liman lori nia ba turma. Bainhira ha’u husik nia iha turma ne’e ha’u rona nia kolega sira hakilar “koruptór…. Koruptór…” lakleur mestra Berta tama tuirbá Ania nia turma hodi si’ak nia kolega sira atu para goza “komesa agora ba oin, ha’u lakohi ema ida entre imi mak goza tan Ania, imi rona ka lae?”

Rona tiha ida ne’e ha’u-nia fuan mós hakmatek husik Ania mesak iha ne’ebá. Ha’u tama fali iha ha’u-nia sala, ha’u-nia kolega sira la goza ona ha’u maibé situasaun iha ne’e hahú muda an sira la liga ona ha’u no husik ha’u tuur mesak de’it.

Sinu mós lian daudaun, ami ida-idak arruma kadernu tau iha pasta laran, ha’u-nia belun sira la goza ona ha’u maibé sira hadook an husi ha’u. Ha’u la’o ba sala sorin bolu Ania atu ami na’in-rua bele fila hamutuk, tan ha’u hatene Ania mós sei hasoru situasaun hanesan ho ha’u.

Iha dalan ami na’in-rua nonook de’it no la ko’alia ba malu. Husi dook ha’u haree ema iha lurón barak tebes no karreta polísia nia para iha ami-nia uma oin. Ha’u no Ania halai lailais ba, ha’u haree polisi kaer Papa nia liman no hatama ba karreta laran, Mamá tuur iha varanda ho matan-been.

Bainhira haree ha’u Papa só dehan de’it “Ason haree ó-nia Amá no ó-nia alin.” Polísia sira tula Papa ba karreta laran no karreta mós halai daudaun, ha’u halai tuir karreta ne’e ho matan-been husi karreta nia vidru kotuk ha’u haree Papa hi’it liman mai ha’u.

Lian bisbisu barak tebes husi ema sira-ne’ebé hamriik iha lurón ne’e, Ania no Mamá tanis hakuak balu. Ha’u nafatin hamriik iha lurón hodi haree karreta ne’e to’o lakon husi ha’u-nia haree. Liafuan oinoin halo ha’u-nia tilun sente manas.

Ha’u hakat ba varanda no bolu Ania no Mamá tama tiha uma-laran. Ha’u hatene Ania no Mamá sei tanis no triste liután bainhira rona bisbisu husi viziñu sira-ne’ebé ko’alia aat kona-ba Papa. Ha’u bolu sira tama uma-laran, taka odamatan no janela karik ida-ne’e sei ajuda sira na’in-rua bele hakmatek oituan.

Buat ne’ebé halo ha’u la komprende tansá ema kaer Papa no tansá família no viziñu sira haree ami na’in-rua Ania ho matan sorin. Ha’u hein loron ida Papa sei esplika mai ha’u tansá polísia sira kaer nia no tansá ha’u ho Ania mak tenke lori moe ba sala ne’ebé mak Papa halo.

Díli, loron-10 fulan-Outubru tinan-2017 

IDA-IDAK HO NIA FOLIN NO VALÓR ISTÓRIA RASIK

Moris mak ne'e. Bainhira ó kari fini no kuidadu ho di'ak, rega ho hadomi hanesan an rasik ho tempu ó sei hetan rezultadu ne'ebé di'ak mós.

Husi kadeira mean ne'e, ema matan foun ida sei dehan soe tiha de'it kadeira aat ona rai halo saida.

Maibé ema ne'ebé mak hatene kona-ba kadeira ne'e nia istória nia sei dehan, folin laek bainhira ita la akompaña nia prosesu.

Loos nia laiha folin maibé memória mak sei sai sasin ba nia funsaun no letratu mak sei julga nia prezensa. Biar nia hanesan kadeira masa aat ida, nia aat tan nia kontribui ona iha tempu naruk.

Biar nia hanesan sasán laek ida, maibé nia iha uluk iha tempu ne'ebé defisil, tempu ema sei haree ho matan sorin. Nia iha uluk hodi fó forsa no kompleta no hakores netik matan bainhira haree no tama mós iha lista ida, katak ha'u nia soin mak ne'e.

Labele nega iha istória katak hahú husi nia,  bele hamosu fali sasán sira seluk, husi nia bele lori metin liu tan iha ohin loron. Loron ida nia sei fila an hanesan lixu maibé nia metin nafatin iha memoria no lixu ne'ebé nakonu ho istória.

No sai sasin bisu ba LABEH nia istória no ejitensia.

Díli, loron-04 fulan-Outubru tinan-2017

DILI NIA FURAK MIHIS IHA MATAN

Anin tasi baku neineik hasé isin, loro-matan hahú namlaek. Kór osan-mean hahú hafutar kalohan azúl. Tuur hodi haree natureza halo nia servisu. Mota Comoro ain-fatin ne’ebé fatin furak iha tempu loro-matan monu, ema barak halibur an iha fatin ne’e  ho nia família, ho namorado/a, balu halo ezersísiu.

Bainhira ema barak ona, fila sei la husik fo’er. Triste bainhira haree situasaun ne’e rasik tan ita laiha konxiénsia kuidadu ita-nia ambiente buat simples de’it lori fila fo’er ba nia fatin, susar atu halo oinsá ho buat boot no komplikadu.

Iha Domingo liubá la’o halimar husi Ai-mutin bá Kristu Rei, liuhusi Farol, ema wain tebes halibur iha tasi-ibun ho anin tasi ne’ebe neineik no laloran ho ritmu hakmatek. Taka matan hodi sente nia furak biar iha segundu balu de’it.

Bainhira liuhusi jardín Motael nia oin, ema wain tuur iha kadeira sementu ne’ebé forma tuituir malu no oin see ba tasi-ibun, jardín furak ne’ebé hale'u ho ai-funan ho kór oioin husi tempu ba tempu hahú lakon nia furak, du’ut sira hahú maran, ai-tahan balu hahú namlaek karik tanba bailoron naruk.

Matan ikun nafatin baku hetan masa mamuk husi bee ho marka oioin no plástiku lekar iha du’ut leten, ema liman-sanak mak soe ou anin mak huu lori ba fatin ne’e. Buat hotu iha dúvida nia laran ou karik matan mak katarak kona oan no labele haree lixu fatin ne’ebé mak governu prepara ona.

Jardín nu’udar parte ida hafurak sidade, iha Palasiu Governu nia oin ai-riin eletrisidade ne’ebé hafutar jardín ne’e hahú aat, du’ut sira-ne’ebé nani hahú naran, ai-funan sira iha vazu hahú lakon nia furak.

Hakat bá sorin tama ona ba Largo Licedere, fatin furak ne’ebé harame sidade iha tempu kalan ho lampu no kores oioin. Fatin furak ba joven sira halibur hamutuk iha tempu kalan, fatin furak fahe domin ba malu, fatin furak ba diskusaun entre grupu ki’ik sira.

Governu iha hanoin no inisiativu ne’ebé di’ak kria jardín kompletu ho nia fasilidade hotu inklui mós lixu fatin, maibé tansá lixu kontinua lekar iha jardín laran. Iha dadalia ho tiu hamoos na’in ne’ebé governu selu hodi hamoos dalan protokolu hateten;

“Noy, ha’u la hatene loron ida ka rua de’it mak ami la saa no raut fo’er sira iha lurón ninin ne’e. ha’u la hatene sidade sei sai oinsá. Ema laiha konxiénsia soe fo’er iha fatin, ohin ó hamoos aban mai fo’er sira ne’e butuk fali ona. Aat liu mak lixu fatin iha ona maibé ema la soe ba laran hetok soe arbiru de’it iha lurón ninin, depois mak gosta halo protesta katak ami halo servisu mak laloos.”

Prekupasaun ne’e sai atensaun ema hotu nian, lalika la’o dook iha Parlamentu Nasionál nia sorin de’it ema sei kontinua lekar fo’er la tuir nia fatin, mezmu hatene momoos katak fatin ne’e hanesan sidade nia fuan.

Kristu Rei hanesan ikon fatin turizmu, rikusoin Timor-Leste ne’ebé dada atensaun turista hodi mai vizita Timor-Leste no iha aspeitu selu bele hasaii mós rendimentu iha sector turizmu nia maibé realidade hatudu momoos iha matan laran, iha loron domingu bainhira ó la’o halimar ba fatin ne’e husi kantu ba kantu nakonu ho lixu.

Fasilidade balu  governu prepara mós hahú aat, ezemplu hanesan lixu fatin ne’ebé halo husi bidón. Joven barak mak halibur an iha fatin ne’e, ho rai-henek mutin nia furak dada ema nia atensaun atu pasa loron férias iha fatin ne’e.  Labele estraga furak hirak-ne’e ho fo’er ne’ebé tuir lolos ita bele foti no rai iha nia fatin.

Ha’u sei hanoin ho Diáriu Clayton Manuel DF nia istória badak balu ne’ebé nia hakerek kona-ba Fo’er iha Kristu Rei, iha parágrafu ida nia dehan “sira halo tasi fo’er, sira hakanek ambiente no halo tanis ambiente.”

Labarik ki’ik ho idade 8 anos hahú prekupa ho ambiente prekupa ho  ambiente tansá ita seluk la bele. Grupu joventude balu halibur an hodi halo limpreza ba área tasi-ibun ho intensaun ne’ebé di’ak, hakarak kria ambiente ne’ebé mós no saudavel maibé asaun ne’e mós ladún hetan atensaun maksimu husi komunidade.

Tempu udan mós besik mai daudaun, bee-dalan no mota nakonu ho fo’er sei ita la hamoos no husi hela de’it nune’e iha tempu udan bele hamosu inundasaun no bee sei lori fo’er iha ne’ebé tun ba tasi ho tempu fo’er hirak-ne’e sei entraga ahu-ruin no animál ki’ik sira.

Problema lixu la bele rezolve ho di’ak tan ema laiha konxiénsia soe fo’er iha fatin no laiha konxiénsia kuidadu ambiente, dalan ida ne’ebé ita presiza halo mak oinsá hamoris no hametin konxiénsia, dalan seluk mak hahú halo edukasaun ambientál ba labarik ki’ik atu kuidadu ambiente ho di’ak nune’e sidade nia furak labele mihis iha matan.

Díli, 01 fulan-Outubru tinan-2017 

Ó-NIA HAMNASA DOKO HA'U-NIA FUAN

Mahon-been turuk habokon kafé tahan, manu-fuik hananu iha Ai-Kakeu tutun, hakmatek iha fuan. Bainhira loro-matan baku kona ai-tahan hamaran mahon-been. Tuur iha varanda hateke ba lurón, fuan tuku-tuku la hatene sah sinál mak fuan haktuir.

Sigarru lolon ida no kafé manas kopu ida hamaluk ha’u iha dadeer ne’e. Horuk neineik hodi sente kafé nia gostu no morin. Sigarru lolon ida duni malirin iha dadeer ne’e. Tekiteki ha’u haree feto-klosan lubun liu ho motór, entre sira ha’u haree ha’u-nia tia, nia hamnasa bainhira ha’u bolu nia naran.

Laiha razaun tansá ha’u bolu nia, ida-ne’e akontese espontáneu. Mamá no alin sira hahú prepara an, husi uma-laran Mamá hakilar ho lian maka’as;

“Anato oras hanesan ne’e ó sei tuur, bá misa ka lae?”

Dadeer ne’e hariis-fatin hadau malu de’it, sé mak lais nia mak uluk. Loron ne’e sei marka istória foun liuhusi misa agradesementu no inagurasaun Igreja Nossa Senhora de Graça Gleno. Sidade ne’ebé hakmatek nakfila ba barullu iha minutu balu nia laran.

Ema wain tebes, nu’udar sarani ne’ebé di’ak ha’u mós sei hola parte iha serimónia ne’e. Ha’u-ho primu sira hahú organiza malu oinsá bela partisipa iha eventu importante ne’e.

Hamoris daudaun motór, husi kotuk Alex mai hodi hasé;
“Anato, ó atu bá misa ho motór ga?”
“Lae, ha’u hanoin la’o ain karik furak liu” ko’alia ne’e no hateke daudaun ba lurón sarani sira hahú book an hakbesik ba igreja.

Ami mós book an lailais nune’e labele tarde. Bainhira to’o iha igreja sarani wain mak iha ne’ebá ona. Buka fatin hodi tuur maibé fuan ne’e tuku-tuku hela de’it, sentimentu ne’ebé ha’u nunka sente antes ne’e. Hanoin hahú lahakmatek lahó razaun.

Bainhira misa remata haksees an husi igreja, la’o halimar karik bele hasoru malu ho kolega ou família ruma. Tekiteki ha’u haree ha’u-nia tia ho nia belun sira iha igreja oin, ha’u hakat hodi hakbesik no komprimenta sira.

Iha grupu ki’ik ne’e, hamnasa dahuluk mai husi nia. Laran ne’e monu kedas ba nia iha minute ne’e kedas, hamnasa ne’ebé nakonu ho energia no esperansa. Nia isin ladún boot, nia fuuk been ladún aas, metan morena, bluzu kór-rosa halo nia bonita nia liután. Karik ida-ne’e mak ema dehan jatuh cinta pada pandangan pertama mak ida-ne’e.

Hafoin hasoru malu ne’e ami mós fahe malu, laiha biban atu husu nia naran maibé nia lalatak mosu beibeik iha hanoin, lia makhusu mosu iha kakutak tansá ohin la husu nia naran, hela iha ne’ebé, ou nia númeru telefone.

Sinál ne’ebé fuan hato’o ohin dadeer mak ida-ne’e, sinál domin iha hasoru malu dahuluk. Bainhira to’o iha uma ha’u koko hanoin-hikas hamnasa ne’e hetok fuan ne’e fekit maka’as liután, ohin ha’u rona husi nia belun balu katak sira sei fila bá Dili iha meiudia ne’e.

Meiudia ne’e ha’u sei fila mós bá Dili. Karik nia mak Maromak deside ona mai hau, iha loron ne’e ha’u sei hasoru tan nia ba daruak. Ha’u, Alex no Acau deside fila iha meiudia ne’e, bainhira to’o iha monumentu selamat datang ami para motór no hasai fotografia.

Hasoru malu ba daruak ho tia Ana no nia belun sira, ha’u hamnasa bainhira bainhira haree heran hamnasa ne’e. Sinál ne’ebé ha’u kaer toman husi nia hamnasa ne’e nia ema ne’ebé di’ak no fasil atu hatoman an ho ambiente foun.

Monumentu ne’e sai sasin ami-nia amizade, Anata ne’e mak nia naran. Bainhira ami hasa’e fotografia hotu ami mós fahe malu. Ha’u husu beibeik ba tia Ana kona-ba Anata, liutiha semana ida komesa kontaktu malu liuhusi Facebook, fahe istória ba malu.

Fuan sente hakmatek bainhira tuur no dadalia ho nia, nia hanesan belun ne’ebé di’ak atu fahe sentimentu. Konta mós kona ha’u-nia sentimentu ne’ebé durante ne’e rai ba feto seluk. Ha’u labele bosok ho ha’u-nia an liuhusi dadalia no konsellu ne’ebé nia fó, halo ha’u laran monu ba nia.

Ami deside hasoru malu iha loron-30 fulan-Agustu, loron konsulta populár, loron istóriku ba povu Timor-Leste. Iha loron hanesan marka mós istória foun ba ami-nia domin ho aten brani  kasu lia-domin ba nia.

Anin tasi ne’ebé huu neineik no hakmatek tuur iha baki leten oin hateke ba tasi, haree bero ne’ebé namlele iha tasi laran ho fuan taridu ha’u hato’o lia-domin ba Anata;

“Tempu barakliu ita liuhusi Facebook, husi ó-nia liafuan sira ha’u hatene katak ó feto ne’ebé di’ak, ida-ne’e halo ha’u-nia laran monu ba ó.”

Anata nafatin nonook no la hatán, ha’u tuur iha nia sorin ho hamnasa mihis maibé fuan ne’e tauk hela sé nia la simu ha’u-nia domin karik oinsá? Nia foti-ulun hateke mai ha’u hodi dehan;

”Ha’u hakarak”

Lahatene domin ne’e hahú husi ne’ebé maibé buat ne’ebé mak ha’u hatene katak ha’u sei fó tempu no atensaun ba nia. Anin huu neineik no laloran ne’ebé hakmatek tuur iha baki leten hamaluk ho nuu laloir fuan rua habeen fuan ne’ebé taridu ne’e.

Loro-matan hahú mout, kór osan-mean hahú halakon kalohan azúl , fitun hahú tabele iha lalehan, sorumutu ne’e sei la kompletu bainhira la taka ho han-kalan. Ha’u mós lori Anata bá han iha Timor Plaza, ha’u hakarak kria situasaun ne’ebé romántiku iha loron espesiál ne’e.

Anata mós simu ha’u-nia domin ho oin kontente, ida-ne’e fó sinál di’ak, ba oin relasaun domin ne’e sei metin no dura. Domin ne’ebé ha’u iha ba Anata oin-seluk tebes, nia la’ós de’it ha’u-nia namorada maibé ha’u-nia feton no kolega.

Sentimentu hotu fahe ba nia, iha tempu ne’ebé defisil mós nia iha no hamriik iha ha’u-nia sorin fó apoiu, situasaun hotu ne’ebé liu hamutuk hetok hametin liután relasaun domin ne’e. Komesa deskobre ida-idak nia jeitu no buka atu tulun malu iha situasaun defisil hotu.

La sente tama ona ba tinan ida ami-nian hamutuk, iha loron ne’e ha’u hanoin ona saida mak ha’u sei halo, lori Anata ba tuur iha tasi-ibun, hateke ba loro-matan ne’ebé hahú mout no kaer nia liman hodi dehan;

“Buat ne’ebé ha’u hakarak ó hatene katak ha’u hadomi ó”
“Huuumm…” Anata hatán badak de’it.
“Problema hotu ne’ebé ita liu ne’e hanesan dalan ida atu sukat ita-nia domin ne’e to’o iha ne’ebé.”
“Sei ha’u la hadomi ó, ha’u sei lahein to’o tinan ida, semana ida de’it mós ha’u husu para ona husi ó, maibé tanba ha’u hadomi ó ohin loron ha’u se iha ba ó”

Ha’u tuur no kaer metin Anata nia liman, ha’u hatene domin sei la sukat ho tempu ne’ebé ami liu hamutuk, ho problema oioin ne’ebé ami hasoru halo relasaun domin ne’e metin liután biar laloran moris ne’ebé ami hasoru boot tebes.

Ha’u mós hatudu ha’u-nia domin ba nia liuhusi re’i iha nia reen-toos. Nia hateke ha’u ho hamnasa mihis no moe. Ha’u hatene ha’u la’ós mane ne’ebé romántiku maibé liuhusi hahalok simples e’e ha’u hakarak hato’o ba nia katak labele dúvida ho ha’u-nia domin.

Dili, 22 fulan-Setembru tinan-2017

LOKO AN FOLIN LAEK

Obrigada Jornál Independente públika ona istória badak
ne'e edisaun, 23 fulan-Setembru tinan-2017

“Sei laiha atu akontese transformasaun kmanek ne’ebé pozitivu iha ema nia destinu, bainhira laiha mudansa iha estrutura hanoin nian ida-ne’ebé báziku.-Stuart Mill”

Bainhira harii iha pontu ne’ebé aas, buat hotu moos iha matan, haree husi leten no la kle’an. Ita sei fó komentáriu tuir saida mak mosu iha matan, matan mós dala wain bele hatudu buat ne’ebé laloos no dook husi realidade.

Iha liafuan murak ida dehan “tak kenal maka tak sayang” analojia ne’e atu hatudu katak ita persiza koñese didi’ak no hatene kle’an antes julga. Oportunidade no desizaun hanesan komponente ne’ebé importante hatudu lia-loos.

Oportunidade lori ita haree realidade ne’ebé malahuk iha matan. Oportunidade lori ita bá ambiente foun no harii relasaun foun. Foufoun nakonu ho dúvida “ha’u bele ka lae.?” Lia makhusu ne’e mosu iha segundu ba minutu. 

Iha munutu balu koko halakon tiha lia-makhusu ne’e “loos, ha’u bele” bele katak prontu ho risku ba desizaun ne’ebé foti. Iha situasaun sira hanesan ne’e depende ambiente sé tama iha ambiente ne’ebé nakloke no fó oportunidade atu apar, opsaun sei la rua maibé uniku.

Ko’alia kona-ba ambiente filafali ida-idak oinsá atu apar ho situasaun ne’e. Ambiente ho forma situasaun oinoin, se tama iha ambiente ne’ebé taka an, presiza tempu atu apar no deskobre kona-ba situasaun. 

Kuidadu ho ida ne’ebé taka an, nia bele tani bee ne’ebé moos ou bele mós merak. Bainhira merak lalika koko atu fahe fali ba ema seluk tan ne’e se la ajuda hetok hafoer no estraga mós ida ne’ebé turuk neineik buka wee ain. Di’ak liu sai hanesan ema li’ur ne’ebé tuur iha kadeira ai tuan hodi haree ba kopu mutin moos ne’ebé enxe ho bee. 

Hatuur iha meza leten husik ho tempu merak ne’e mós sei mout iha kopu kidun. Kuandu nakdoko mak kór orijinál mós sei hatudu an. Iha situasaun sira hanesan ne’e dixiplina no vontade sai sasukat ba pasiénsia. 

Ema ida-idak ho nia karakter rasik tan ne’e pesiza tebes hatudu profesionalizmu, haketak problema privadu no servisu nian labele husik ódiu domina an. Ida ne’e sei hakanek an no mós ema seluk.

Laiha ema ida mak perfeitu liu. Bainhira nia koko atu hadi’a an, hatudu dalan ba nia la’ós julga  ho liafuan “beik-teen” husi liafuan de’it hamate espíritu no vontade. Moris ne’e hanesan laloron bele hakmatek bele mós ho ritmu si’ak maibé nafatin hatudu nia furak iha tempu loro-matan tun. 

Aat liután mak iha situasaun sira ne’e, lakon simpatia ba malu. La fó valór ba ema seluk nia servisu. Haree ho matan sorin no tau an iha pontu ne’ebé aas liu. Ida ne’e sei hamosu distánsia biar hamahon an iha kakuluk ida nu’udar família boot.

Bainhira deside husik ambiente tuan ba ambiente foun presiza tempu atu apar ho situasaun. Iha situasaun hanesan ne’e sei hasoru krize personalidade, persiza tempu atu apar ho área servisu no karakter sira. 

Prezensa ema foun bele sai mós ameasa, kuandu tama iha ambiente ne’ebé nakloke ema se simu ho intensaun ne’ebé di’ak, orienta tuir knaar no regulamentu ne’ebé vigora. Se haree nu’udar ameasa mak sei la fó fatin no oportunidade aprende hamutuk. 

Karakter ne’e se hamate no halakon oportunidade. Filafali ba ema ida-idak nia konxiénsia atu haree tuir nia prespetiva rasik. Prontu ka lae hasoru situasaun ne’e?  lia makhusu mosu dala wain no halo tilun sente resik, koko nafatin hamnasa biar hatán ho oin-buis.

Ida-idak ho nia dalan moris, kbiit rasik hodi haree no rezolve problema tuir kapasidade. Lalika julga sedu demais bainhira seidauk fó oportunidade atu hatudu nia kapasidade. 

Lalika haree nu’udar ameasa maibé haree oinsá nu’udar belun ho objektivu ida. 

Diferensia idea ne’e normál, labele uza fali tempu sai sasukat hodi hanehan. 

Oportunidade mak lori hamahan an iha kakuluk ida no desizaun mak sei deside. Prontu foti fisku ba desizaun hotu. Halo tuir de’it saida mak fuan hateten importante mak desizaun ne’e la kontra konxiénsia. 

Labele lakon esperansa ba moris, oportunidade ne’e buat laek ida.  Labele husik hanoin aat  domina isin-lolon, nafatin hamnasa biar fuan ne’e tanis. Oportunidade ne’e kestaun tempu, agradese ba oportunidade nu’udar mestre.

Dala wain ibun-tutun mamar hasa’e liafuan “beik-teen” maibé la halo refleksaun ba an rasik. Taka an ba kritika no kaer metin kestaun tempu “ha’u mak uluk no ó ikus.” Durasaun tempu la’ós sai sasukat, rezultadu servisu maka sei julga. Lalika uza matan-been hodi taka falta no manán simpatia. 

La furak liu bainhira tuur hamutuk soe lia (piadas) ba ema seluk hodi hakanek ema nia fuan. Ida-idak ho nia formasaun rasik ne’ebé lahanesan, lalika koko hada’et hahalok aat ba ema seluk natoon ho an. 

Iha evanjellu hateten momoos labale koko hasai ai-tarak iha ema seluk nia matan maibé hasai uluk ai-tarak iha ó-nia matan. Kestaun mak ne’e prontu ka lae simu ema foun iha ita leet, prontu ka lae bainhira laiha fatin ema seluk halo ó-nia servisu. 

Lalika hatudu oin-buis no nonook ba malu ba buat laek ida, lalika loko-an ho kestaun tempu. Problema mak ne’e “ó aprende uluk no ha’u foin mak atu aprende” lalika ta’uk bainhira nia aprende lais no hadau ó-nia fatin, buat hotu presiza tempu no prosesu. 

Kuandu prosesu la’o namanas hela lalika buka jeitu atu hamate. Se la gosta dehan la gosta, ko’alia aberta tan ne’e sei ajuda atu hadi’a di’ak liután. Lalika bisbisu subar-subar hanesan susuk. Lalika hatán ema nia kritika ho lia nervozu, iha razaun tansá hato’o kritika.

Uza kritika nu’udar matadalan hodi hadi’a no sai sasukat atu aprende liután. 

La presiza intrepreta kritika nu’udar atake ba an no revolta ho emosaun. Ikus buka tuir ema nia pasadu hodi halo kritika ba ema nia pessoal.

Lalika hanesan ular ne’ebé troka kulit, bainhira subar ulun maibé ikun hatudu an hela. Metan dehan metan no mutin dehan mutin. Haraik an la siknifika katak atan ba ema seluk. Nonook la siknifika katak la hatene maibé nonook hodi aprende no observa. 

Ne’e mak moris sempre kompleta malu no ida-idak ho nia fuan rasik, loko-an sei hadook ita husi ema seluk, loko-an bele hakotu mós relasaun ne’ebé kria ona, loko-an husik hela kanek ba an no mós ema seluk. La presiza atu sai perfeitu liu maibé koko atu adapta no harii relasaun ho fuan.

“Ksolok ba sira-ne’ebé laran-luak, basá sira sei hetan laran-luak. Mat 5:7”

Díli, loron-21 fulan-Setembru tinan-2017 

02/09/2011-02/09/2017

Loron la’o lailais la sente tama ona ba tinan neen. Ha’u hatene domin sei la sukat husi tempu ne’ebé ita liu ona. Ha’u fiar iha minutu ne’ebé ó hato’o lia-domin mai katak ha’u mak feto ne’ebé di’ak liubá ó.

karik ha’u bele muda fali tempu ba kotuk ha’u hakarak repete hikas minutu ne’e.

Tuur iha tasi-ibun haree fitun, rona laloran tasi ne’ebé hakmatek, iha estátua Kristu Rei okos, bazaar kalan produtu lokál. Husi ó-nia jeitu ha’u hatene ikus ó sei dehan “fila ha’u mak tula Este”  Bainhira ita halibur hamutuk ho kolega sira iha Farol.

Ha’u  hatene ha’u-nia belun di’ak sira Maun Sala, Apoly, Oky, Olan no Asaky sei prontu tula ha’u fila. Maibé ho razaun badak ida de’it ó halo sira konkorda ho ó-nia ideia “Kalan ona, ha’u atu fila sé Este atu fila entaun ha’u tula dala ida”

Iha dalan lian bisbisu ida mai husi oin “Este, ita bá haree tiha bazaar tradisionál” ha’u hanoin ne’e ideia di’ak ida tan iha kalan ne’e sei iha mós konsentru husi banda Timor oan. Triste  boot ida bainhira to’o iha fatin ne’e konsentru mós remata ona.

Ami la’o halimar hale'u fatin ne’e, kalan ne’e rame tebetebes karreta no motór halai bá-mai harame kalan ne’e. Liu tiha minutu balu hau deside fila;

 “Ita fila ona, ó sei tula ha’u bá Ai-mutin depois ó tenke mai fali Kolmera, ó la’o bobar rai loos ne’e.”
“Di’ak hela” hatán badak de’it.
Bainhira la’ó hakbesik ba motór para-fatin, besik kadeira sementu ne’ebé forma tuituir malu iha lurón ninin.
“Este, ohin ha’u hola hahán balu ne’ebé ema fa’an iha bazaar ne’e. Ita han tiha lae mak fila.”
“Di’ak”
“Ha’u atu dehan buat ida ba ó katak ha’u gosta ó no hakarak namora ho ó”

Laiha razaun dehan ha’u lakohi, ha’u nonook no doko ulun hodi fó sinál katak hakarak. La sente ohin tama ona ba tinan neen, iha loron hanesan ho nia tinan moris nian. Ha’u la hatene tansá ó hili loron ne’e hodi hato’o lia-domin. Ha’u mós la hatene tansá ha’u doko ulun hodi fó sinál katak ha’u hakarak.

Buat ne’ebé ha’u hatene ó kompleta ona ha’u-nia loron sira. Tinan ne’e ha’u hasoru laloran moris ne’ebé todan tebes. Lakon esperansa atu hakat ba oin maibé ó iha hodi akompaña ha’u fó forsa mai ha’u iha minutu sira-ne’ebé ha’u laiha forsa atu hamriik mesak no hakat ho ha’u-nia ain rasik.

Ha’u hatene ha’u la’ós feto ne’ebé perfeitu liubá ó maibé ó nafatin simu kuran hira ne’e, obrigada ba domin no fiar tomak. Buat ne'ebé ha'u hakarak ó hatene katak domin ne'e bá ó sei la kuran minutu ida.

Díli, loron-2 fulan-Setembru tinan-2017

SEE TILUN IHA MINUTU BALU

Hamate ahi kuartu, toka hikas dadalia balu ho inan luta na'in lubun ida, see tilun ho hakmatek no lakohi lakon minutu ida ho matan-been nakonu. Saida loos mak ha'u sei halo ho lian hirak ne'e...

Koko atu deskobre situasaun tomak ne'ebé sira liu ona, iha nakukun koko lori hanoin no imajina ba minutu sira ne'ebé sira liu.

Minutu ne'ebé só rona de'it kilat musan nia lian, minutu ne'ebé ema halerik ba tulun, minutu ne'ebé ema halerik ba hamrook no hamlaha, minutu ne'ebé ema tanis tan lakon menbrus família ida.

Díli, loron-16 fulan-Setembru tinan-2017

LIAN HAKSUBAR IHA AHI-SUAR

“Anata karreta tama ona, halai lailais mai.”

Ha’u tuur iha laletek, ai-daak nia hun hateke ba rai-tetuk ne’ebé butuk ho fo’er hanesan foho oan. Abia kontinua hakilar bainhira haree trek lixu nia tama mai. Ami falun an metin hanesan musulmanu iha rai-Arábia.

Kosar metan sulin halolon isin, ahi-suar hanesan abu-abu iha foho Kablaki ha’u nafatin  firme iha fatin ne’e. Habai an iha meiudia boot, manas hanesan iha fornu laran. Ida-ne’e la hamate ha’u-nia vontade luta ba moris di’ak no edukasaun ne’ebé di’ak liubá ha’u-nia oan sira.

Fatin ne’e husi tempu ba tempu ema iha hela de’it. Ne’e mak moris laiha buat ida mak gratuitu, didikasaun no esforsu ne’e importante atu lori ha’u hamriik iha liña ida hanesan ema seluk biar ema haree ha’u hanesan lalar.

Ha’u tuur iha ai-daak hun hodi imajina ha’u-nia moris aban-bainrua nian no hemu netik bee malirin ruma hodi habokon kakorok antes bá habai an iha loro-laran. Husi dook Abia nafatin bolu. Hakilar ne’e hafanu ha’u husi mehi naruk ne’ebé dook husi realidade moris.

“Anata, ó tuur hela de’it ba. Lata aat no besi aat barak loos”  ko’alia nune’e liman sorin kaer hela karón no sorin kee hela fo’er ne’ebé karreta hatún daudaun.

Ha’u hakat neineik hakbesik ba nia hodi dada sees fo’er sira-ne’ebé helik hela lata no besi aat sira, ami la’ós mai buka lata mamuk de’it maibé aproveita mós buka fahi nia hahán.

Laiha razaun atu dehan ha’u lakohi mai, nesesidade obriga ha’u tenke mai tamun an iha loro-manas, rai-rahun, dois nia laran. Ami hanesan tiha lalar ne’ebé hadau malu hahán restu ne’ebé hahú siin.

Biar nune’e ha’u nafatin hamnasa tan laiha dalan seluk atu hetan netik du'it oan ruma, di’ak liu halo servisu ne’e hetan osan ho kosar-been rasik duké tuur patarata maibé goza ema seluk nia osan.

Ami hotu iha fatin ne’e modelu hanesan ninja matan mak lakan, hafalun an husi loro-manas, ahi-suar no rai-rahun hela matan de’it mak lakan hodi haree lata aat no fahi nian. Tekiteki ha’u-nia matan sente manas loos, karik kosar-been mak tama ba.

Manas ne’e halo ha’u haree rai mós la hetan, Abia nafatin kee fo’er. Ha’u hamriik ho matan nakukun, barullu karreta no ema nia hakilar mós lakon iha ha’u-nia tilun ho lian ta’uk ha’u hakilar.

“Abia, ó halibur lai ba, ha’u-nia matan laran-manas loos”
Ho oin ta’uk Abia mai kaer ha’u-nia liman lori bá tuur iha ai-mahon iha laletek hodi dehan;
“Anata, ó-nia matan laran mean loos, ó fila uluk ho labarik sira."
“Ha’u di’ak hela, anin kona orasida di’ak ona. Ó bá ona orasida ema foti hotu lata aat ona, ha’u tuur oituan sente di’ak ha’u ba ajuda fali ó.”
“Haree fase tiha ó-nia matan, rai-rahun mak tama karik?” ko’alia nune’e la’o daudaun.

Liutiha oras ida mós nia nafatin manas ha’u foti bee malirin hodi fase hetok nia aumenta manas liután. Ha’u tuur hein Abia to’o lokraik ha’u labele halo buat ida hodi ajuda nia só sadere iha ai-hun taka matan ho anin ne’ebé huu neineik. Karik ida-ne’e sei ajuda hodi hamenus tiha manas ne’e.

Lokraik mós mai daudaun Abia hakbesik mai hi’it ho karón ne’ebé nakonu ho fahi etun hodi dehan;

Obrigada Jornál Independente
públika ona istória badak ne'e

“Anata, ita fila ona. Ó-nia matan mean loos.”
“Ha’u la komprende tansá ema sunu hela de’it fo’er sira ne’e, loro-manas tan ahi-suar tamun tan matan laran ne’e sente manas hotu.” Ko’alia nune’e no liman kaer daudaun ba ha’u-nia matan.
“Ó, sente di’ak ona ga lae.?”
“Di’ak ona oituan, lata ohin loron barak ka lae?”
“Ema barak loos, ita hadau malu de’it ne’e, sah tan ohin ha’u mesak de’it oinsá mak bele hetan barak. Ita fila ona fahi nian ohin loron barak loos bele rai to’o loron rua nian,”

Bainhira to’o iha uma ha’u nono bee hodi hariis, solor tiha rai-rahun no kosar iha loron tomak. Kalan mós mai daudaun ha’u haruka labarik sira ba hola Amoxilin no Paracetamol hodi hemu ho hanoin ida bainhira toba hadeer mai buat hotu sei di’ak.

Bainhira ha’u taka matan ha’u hanoin hela de’it sei ha’u moras oinsá ho ha’u-nia oan sira nia future. Kuandu ha’u moras, sé mak sei ajuda ha’u-nia kaben. Osan ne’ebé nia hetan nu’udar badain uma la to’o ba persiza lorloron nian. Sah tan servisu nu’udar badain ne’e la’ós permanente.

Liutiha semana ida matan ne’e nafatin mean no akompaña ho bubu, matan laran hetok mean liután. Aziu ha’u-nia kaben-mane nia mós ha’u bandu ha’u lalika ba tan lixu fatin. Bainhira haree ba ha’u-nia kondisaun hosi loron ba loron hetok aumenta aat liután. Ami mós hakbesik bá sentru saúde hodi halo tratamentu.

Iha ospitál novidades ne’ebé mak Doutór sira hato’o mai halo fuan ne’e sente lahakmatek Doutór sira deside se halo operasaun ba ha’u-nia matan kuandu la opera  ba futuru matan ne’e la funsiona ho di’ak. Laiha dalan seluk ha’u mós konkorda, sei ha’u-nia matan la funsiona oinsá ho ha’u-nia oan sira nia futuru.

Iha loron ne’ebé Doutór sira halo operasaun, ha’u hatene sira sei dehan durante Ita-Boot nia matan seidauk di’ak labele besik ahi-suar ou rai-rahun. Ne’e karik di’ak ba saúde maibé ladi'ak ba ha’u nu’udar inan.

Iha lixu fatin mak ha’u bele hetan osan, iha lixu fatin mak ha’u-nia oan sira nia futuru haksubar ba, biar dala barak ema mai ho roupa rápidu mai hasé beibeik ami atu labele ba hili fo’er iha ne’ebá, sé ami la ba ne’e di’ak ona maibé oinsá ho ami-nia presiza rasik.

Biar ha’u la bá ona lixu fatin maibé ha’u nafatin esforsu atu sira labele lakon sira-nia futuru. Moris sei di’ak bainhira labarik sira iha edukasaun ne’ebé di’ak. Edukasaun mak bele garantia moris di’ak iha futuru, beik natoon iha ha’u no labele hada’et  to’o ha’u-nia oan sira.

Díli, loron-8 fulan Setembru tinan-2017

LABELE HAREE HO MATAN SORIN

Manu-aman hananu iha ai-leten, maho-been mós sei belit iha ai-tahan. Ha’u la’o tuir foho-lolon. “karreta iha ka lae?”. Loron hira ona ha’u bá servisu tarde hela de’it. Dalaruma ha’u la’o ain husi uma bá servisu fatin. Lurón mamuk tebes karreta ida ka rua mak halai bá-mai ho velosidade aas. Asu sira hatenu iha moru laran, ha’u nafatin hakat bá-oin.

Kosar metan sulin iha dadeer, ema balu sei hafalun an ho mehi. Ha’u ho pasta ne’ebé enxe ho bukai haklilin tuir lurón. Bainhira to’o iha portaun boot ha’u rona karreta ambulánsia nia lian maka’as tebes.

“Jesus, sé tan mak moras. Fatin ne’e husi loron ba loron ema barak hela de’it.”

Bainhira liu iha korredór emerjénsia. Ha’u haree inan isin-rua balu liman iha knotak, tun husi karreta ho oin-naburut. Ha’u hakat lailais bá ha’u-nia fatin, rai pasta. Liman lolo kedas ba hena hamoos rai. Iha kuartu sorin ha’u rona inan isin-rua balu hakilar ho lian maka’as.

Ha’u nonook no see tilun de’it, parede sai sasin ba halerik hotu. Biar nia halerik dalan ne’ebé ha’u iha hodi tulun pasiente sira mak kria ambiente ne’ebé moos. Ida ne’e sei ajuda hakmaan tiha todan ne’ebé sira lori. Bainhira ha’u dasa rai namanas hela ha’u haree labarik joven ida tuur iha kama ain liman buti hela telefone. Hakbesik ba nia hodi dehan: 

“Ano, ajuda hasa’e tiha fo’er sira iha kama ain ne’e tau iha fo’er-fatin”

“Tia, dasa mak soe dala ida bá.” Hatán mai ho oin-buis.

“Sin, ha’u-nia servisu mak ne’e maibé ita tulun malu. Soe fo’er ne’e buat simples ida, la’ós hein de’it ami mak tenke halo servisu ne’e.” hatán nune’e raut daudaun fo’er ne’e.

Hi’it fo’er ne’e ho hamnasa, situasaun ne’e kuaze akontese loroloron. Ha’u nonook tan ha’u-nia servisu mak ne’e. Biar fuan ne’e kontra maka’as, tansá ema labele tulun malu no respeita ema seluk nia servisu.

Loron ba loron fatin ne’e nunka mamuk, loron ba loron mós servisu hahú todan ho idade ne’ebé aumenta ba beibeik. Isin-lolon mós ta’uk fihir an iha lalenok, fuuk ne’e hahú mutin no oin hahú namkuru. Buat ne’ebé halo ha’u forsa kuandu haree ema iha ha’u-nia sorin haksolok ho ha’u-nia servisu.

Ha’u tuur iha uma nia tatiis hanoin hela loron aban. Sé tinan ba tinan mak ha’u-nia moris hanesan ne’e hela de’it oinsá ho Sonia no Alex nia eskola, sira mós hahú boot lakleur tan remata ona sekundária.

Husik dook Agida ha’u belun di’ak ida ne’ebé nia idade hanesan mós ho ha’u, habesik mai ho oin-buis.

“Ema nia inan iha sala sorin ne’e beik liu.”

“Nu’usá ne’e?” hatán ho lian baruk.

“Tama bá sintina halo fo’er tiha lahatene fu’i bee halo barbarak ba.” Agida hatán ho oin-naburut.

Ha’u nonook, sadere an ba parede no lolo ain ba oin. Agida kontinua ibun-ibun maibé tilun ne’e hanesan ema sulan hela ho kabas, hanoin ne’e ba hela de’it Sonia no Alex nia futuru.

Osan ne’ebé mak ha’u simu la to’o ba presiza loroloron nian. Dala wain mós tenke sakrifíka an la’o ain hodi rai netik centavus ruma ba sira na’in rua. Ha’u nunka halerik ba moris tan moris mak ne’e duni ona.

Bainhira hakat ne’e hahú sidi ha’u hanoin-hetan João Paulo II nia liafuan “La’ós buka-hatene ó-nia ta’uk maibé ó-nia esperansa sira. Lalika hanoin ba ó-nia frustrasaun sira, maibé ó-nia kbiit sira-ne’ebé la uza  ho buat ida ne’ebé mak ó sei bele atu halo.”  Ida ne’e hanesan fó energia foun no hakmaan tiha naha iha kabaas.

Haree ha’u nonook no la hatán ba nia liafuan Agida hamriik husi ha’u-nia sorin ho hamnasa mihis dehan;

“Mana Aida, ha’u kontinua bá hamoos fali rai.” Agida ko’alia nune’e no hamriik daudaun.”

“Hein lai, ha’u mós atu lori fo’er bá soe.”

Iha korredór ha’u haree inan isin-rua liman iha knotak ho oin triste la’o mesak. ha’u hakat hakbesik ba kaer nia liman no akompaña nia la’o bá nia toba-fatin ho lian neineik nia bisbisu mai;

“Obrigada tia ajuda ona ha’u.”

“Noi, só ida-ne’e mak ha’u bele halo ba ita.”

“Rai-manas loos tan ne’e ha’u la’o halimar tiha mai li’ur.” Ko’alia nune’e no liman iha knotak.

“Haree book an, la’o bá-mai ida-ne’e sei ajuda ita baihira partus, keta haluha reza.”

Lori nia bá tuur iha kama leten.  Depois oras vizita Doutór nian, pasiente lubuk ida mak fila bá uma. Hena iha kama leten runguranga, ha’u hakat hakbesik troka hena kama no lori ba fase.

Ha’u hatene ha’u la’ós Doutór maibé iha Uma Moras buat ne’ebé ha’u halo hodi tulun pasiente sira mak kria ambiente ne’ebé moos, nune’e sira-nia hanoin mós bele hakmatek, ida-ne’e sei tulun sira atu rekopera lailais.

Iha loron ida ha’u servisu oras walu, ha’u iha belun sira-ne’ebé ajuda tulun servisu sira ne’e bele la’o ho di’ak. Biar dala barak ema haree ami-nia servisu ne’e ho matan sorin maibé nia ne’e mak ha’u bele halo hodi tulun ema seluk tuir ha’u-nia kbiit.

relasiona ho istória badak iha leten, ikus sei taka ho poezia “LABELE HAREE HO MATAN SORIN”

Ha’u la husu ó atu respeitu ha’u.

Ha’u la husu ó atu halo ha’u-nia servisu.

Ha’u husu de’it ó atu komprende ha’u.

Buat ne’ebé ha’u halo laiha valór iha ó matan.

Maibé ida-ne’e kontente ida mai ha’u.

Ha’u hamnasa, biar fuan ne’e tanis.

Ha’u nonook, tan ha’u fiar ó mós sente buat ne’ebé ha’u halo.

Ha’u nonook , sé karik ó iha ha’u-nia fatin, ó sei hasoru ida-ne’e.

Ha’u nonook, hodi komprende ó-nia hanoin.

Ha’u nonook, hodi fó tempu ba ó hodi refleta an.

           Ha’u nonook, tan ha’u hatene ema seluk presiza hela tulun ne’e

 

Dili, 28 fulan-Agostu tinan-2017