FOHO-LOLON TATOLI (PARTE I)

“Mantolun-da’an, mantolun-da’annnn…..”

Ha’u hamriik iha ema barak nia leet, ho ha’u nia raga ne’ebé nakonu ho mantolun da’an husi lurón ba lurón ha’u hakat ho kosar metan sulin habokon isin. Aspal nia manas mós mahar oan iha ain, ha’u hanoin hela avó-feto nia liafuan “ó fila tenke lori osan, ita-nia foos mós laiha ona.”

“Ambere, orasida ba terminál ka lae?” Acau hakilar husi dook.

“Ha’u sei bá?”

“Ó, nia mantolun sei tomak loos ne’e?”

“Ha’u la’o dezde ohin laiha ema ida mak bolu, iha ne’ebá ha’u fiar ema sei hola no sei hasoru ha’u-nia Apá.” Ko’alia nune’e hakat daudaun ba lurón sorin.

Ha’u no Acau la’o tuituir malu, iha lurón klaran ami hasoru labarik ki’ik seluk ne’ebé otas hanesan ami, hatais fanda eskola, tara pasta no hatais sapatu mesak foun no mesak jeitu de’it. Acau komesa konta ona nia mehi kona-ba eskola no hakarak sai ema riku nia oan. Acau boot liu tinan ida, nia hela kedas iha ami-nia uma sorin, nia iha alin na’in-haat no nia inan-aman nu’udar to’os-na’in.

Bainhira to’o iha terminál Ha’u no Acau komesa halai hasoru bis sira ne’ebá para iha lurón ninin hodi hakilar “mantolun-da’an… mantolun-da’an.” Ha’u hafuhu tuituir karreta ne’ebé tama sai, labarik barak loos mak fa’an mantolun-da’an iha fatin ne’e. Ha’u tenke isin-moris hadau sosa-na’in nia laran.

Dala barak kondutór sira si’ak no ko’alia liafuan kro’at tan tabele karreta nia janela. Entre ami mós komesa haree malu matan la moos bainhira ida nia folin liu fali ida seluk. Acau sempre ajuda ha’u, fa’an lesuk ha’u-nia bainhira ninian ema hola hotu ona.

Dili nia manas ha’u labele sukat, bainhira lalatak hasubar an iha ain-fatin, ha’u no Acau komesa duni malu iha foho-lolon Fatuahi. Hanoin ne’e hahú lahakmatek foos te’in meiudia nian sei iha ka lae, avó-feto mós loron hira ne’e moras no toba de’it iha kama.

Husi dook Ana halai hasoru hodi dehan

“Amaun hola foos ka lae, ami hamlaha loos?”

“Ha’u hola, maibé lata lima de’it osan la to’o atu hola barak.”

“Sei hanesan ne’e ita te’in sasoro de’it par foos ne’e mós bele to’o loron tolu to’o maun hetan fali osan, ha’u hatene osan husi mantolun nia folin maun gasta ona hodi hola foos.

“Haree ba halo ona sasoro, ó lalika hanoin kona-ba osan. Ó halo sasoro tau ho marungi.” Ko’alia nune’e la’o daudaun bá uma-laran.

Iha uma simples didin ho bebak ne’ebé hahú dodok no bainhira udan monu rai bee turuk iha fatin-fatin. Ha’u hamriik iha odamatan ne’ebé taka ho kurtina tuan, nia kór mós hahú lakon, Avó-Feto, Abia no Anato toba-dukur di’ak loos, bainhira kadeira lian avó foti matan hodi dehan;

“Ó, mai ona ga?”

“Avo di’ak ona ga lae?”

“Ohin Acau nia Amá fó ona ai-moruk balu ha’u hemu no sente di’ak oituan.”

“Sira na’in-rua toba-dukur loos.”

“dezde ohin kedas sira na’in-rua tanis hamlaha to’o na’in mesak nonook no dukur tiha.” Hatán mai nune’e no liman fanun daudaun Abia no Anato.

“Hadeer bá haree took Ana te’in ona ka lae?”

Bainhira haree hetan ha’u sira hamnasa ho haksolok tan sira fiar ha’u sei lori foos.  Anato no Abia halai bá dapur ajuda Ana te’in. Ha’u nonook no hakat hakbesik ba avó no tuur iha hadak leten ne’ebé nahe de’it ho biti tuan, ha’u toba iha avó nia hiti ho matan-been nakonu.

“Karik Amá sei moris, ita sei la menus hahán”

“Ohin ó hasoru nia aman ka lae?”

“Lae, ha’u lahatene loos atu buka tan nia iha ne’ebé.”

“Karik ha’u sei forsa no la moras, ha’u sei lahusik imi na’in-haat moris terus hanesan ne’e.” avó ko’alia ho lian nakdedar no matan-been nakonu

Lakleur Ana hakbesik mai hodi dehan “sasoro tasak ona, suru avó nia mai ga, ita han hamutuk iha meza.” Avó hamriik kaer ha’u-nia liman hodi dehan “atu han barak ka oituan, ha’u kontente bainhira ita han hamutuk.”.Ami na’in-lima tuur iha biti leten hale'u basia ne’ebé enxe ho sasoro, marungi tahan hakores netik basia ne’ebé nalihun ho bee. Anato ho oin-naburut dehan;

“Loron-kalan han hela de’it sasoro la baruk ka?”

Ho oin-mean avó hatán “haree han de’it ona, biar han de’it sasoro mós ita tenke agradese, ohin ita han sasoro aban karik ita sei han fali etu ou bele mós ita sei kesi kabun to’o kalan.”

Ha’u nonook no laiha lian, ha’u bele komprende tansá Anato ko’alia hanesan, nia sei ki’ik liu atu komprende kona-ba situasaun ne’ebé ami hasoru. Foin mak atu han Acau halai husi uma sorin hodi halo ami hotu hakfodak ho nia raga ne’ebé nakonu ho mantolun-da’an. Anato hetok oin-buis liután bainhira haree mantolun-da’an.

Ho lian maña nia dehan “ha’u hakarak han mantolun-da’an.”

Bainhira haree Anato, Acau foti mantolun fuan ida fó ba hodi dehan “ó, labele hatudu tan ó-nia oin-buis ne’e iha hahán nia oin, orasida ó nia bikan tanis ona.”

Hotu-hotu hamnasa bainhira rona Acau nia liafuan, Acau nia prezensa hanesan habeen tiha situasaun sériu ne’e. Nia hakat mai tuur iha ha’u-nia sorin hodi bisbisu mai “ó bá ga lae?” ha’u nonook no nafatin kontinua han, mantolun ne’ebé Ana da’an oras ne’e malirin ona maibé la barak ona hanesan baibain.

Iha dalan ha’u komesa hanoin ona kona-ba foos ne’ebé só bele aguenta ba loron rua, osan inan husi mantolun-da’an mós hahú kuak. Husi ne’ebé mak ha’u bele hetan osan hodi hola tan foos, lokraik ne’e henesan sorte-aat ba ami bis no mikrolete hotu sai ona, triminál mamuk só kios na’in mak la’o bá-mai.

“Ema laiha ona, ita atu halo oinsá?” Acau ko’alia mai ho oin-naburut.

“Ema sei hola, se iha oras haat.” Hatán ho fiar an.

“Sei hanesan ne’e ita la’ó fahe manu no sé  nia mak hotu uluk mai hein malu iha fatin ne’e.”

Husi lurón ba lurón ha’u hakilar ho fiar an. Lokraik ne'e loro-matan mós habelun loos ho isin-lolon. Kalohan azúl nakfila an ba nakukun, "orsida udan sei monu rai karik" ha'u hanoin iha laran no nafatin hakat. Tia isin-lotuk la'o iha ha'u nia oin ho plástiku rebo-rebo, foin liu pasu ida nia karteira mós monu.

Ha'u hili karteira ne'e ho oin-kontente hanoin ne'e komesa halai bá-mai, entrega fali ba na'in ou lae. Iha lian bisbisu ida dehan:

"Fó fali ba ema na'in"

ida fali dehan "lalika ó presiza osan, ó la hanoin ó-nia alin sira ga, ó-nia moris de'it susar tiha ona. Ida ne'e dalan di'ak ida atu rezolve ó nia problema."

Lian bisbisu seluk haktuir tan "ó tenke entrega fali ema nia sasán, ó hakarak ema dehan ó na'ok-teen."

Ha'u nonook iha minutu balu, liman kaer metin hela karteira metan ho nakdedar, teki-teki Mamá nia oin mosu iha ha'u-nia hanoin no fó hanoin mai ha'u "buat ne'ebé ó-nian, ó -nian. Buat ne'ebé la'ós ó-nia tenke entrega fali ba nia na'in."

Ha'u halai tuir tia ne'e iha lurón sorin ho oin-ta'uk, ha'u dehan:

"Tia, nia karteira monu." Liman lolo daudaun karteira ne'e ba tia ne'e.

"Hein lai No"

Lakleur nia loke karteira, foti osan tahan tau mai ha'u-nia liman. Ha'u la hatene osan hira mak ne'e bainhira fila kotuk ha'u loke liman haree loos dollar 20, ha'u hateke osan ne'e ho matan-been.

Ha'u foti osan tau iha ha'u nia bolsu ho oin-kontente ha'u komesa hanoin ona osan ne'e ha'u sei gasta hola saida, buat ne'ebé mosu dahuluk iha ha'u nia hanoin mak foos.

Teki-teki Acau hakilar husik kotuk "Ambere, ó-nia hotu ona ka lae.?".Ha'u fila kotuk hamnasa mihis. Tia laran-di’ak ne’e la’ós fó de’it osan maibé hola mós ha’u-nia mantolun-daan. Ha’u fila uma ho oin-kontente liu kedas tiu Carlos nia kios hola foos karón ida no osan restus hola mós ayam potong. Bainhira to’o iha uma Avó-Feto haree ha’u ho oin-hakfodak, ha’u konta tuir saida mak ha’u hasoru iha lokraik ne’e. Ho hamnasa nia hatán “ne’e grasa Maromak nian.”

Kalan ne’e ami han ho kontente biar ho hahán ne’ebé simples, bainhira Avo-Feto, Ana, Anato no Abia kontente halo fuan ne’e hakmatek maibé hanoin ne’e nafatin la hakmatek Mamá laiha ona, tansá Papa la’o husik hela ami, ida ne’e hanesan lia-makhusu no fuan metin atu buka tuir tansá ida ne’e akontese.

Dili, loron-20 fulan-Juñu tinan-2017

TANSÁ... TANSÁ NO TANSÁ

Kakutak ne'e metin.
Fuan taridu.
Hanoin hotu lakon.
Só iha lia-mak husu.
Tansá.... tansá.... no tansá...
Moris hanesan ai-hun. 

Ho runtus barak maibé iha runtus balu la ho tahan tan ema liman sanak silu daudaun no taa kanek nia lolon no husik hela fitar no kanek. 

Koko forte nafatin hanesan ai-abut ne'ebé firme hodi fó forsa ba hun no buka dalan hodi hamoris fali sanak no tubun foun.

Dala wain la fasil. Atu sai hanesan ai-abut hodi fó matak malirin. Bainhira ema oho hahú husi abut
Koko atu taka tilun, taka neon atu la hanoin hetan lia-mak husu tansá... tansá... no tansá...
Tan la forsa atu rona lia-loos no haree realidade. Katak runtus no tahan sira hahú naklaek tan ema liman sanak sira hahú hakanek husi abut.

Sei abut la fó ona esperansa ba moris. Oinsá runtus no ai-tahan sira hadau moris. Sira mós sei namlaek no maran semo bainhira anin huu.

Memória midar no moruk hotu sei mout ho tempu, ho esperansa ida se iha tubun foun no abut ida ne'ebé di'ak liu hodi fó runtus foun no tahan matak hodí fó matak malirin ba ida ne'ebé hamrook ba domin no moris di'ak ho abut foun no tubun foun.

Ai-mutin, 14 fulan-Juñu tinan-2017.

PAPA: SAUDADES Ó NIA HAKUAK (Parte III-remata)

Anin malirin baku ho neineik, loro-matan haksubar iha kalohan metan nia leet. Udan monu rai ha’u hamahan an iha halihun hun. Matan ikun hateke bá-mai. “mikrolete ne’e dezde ohin nein ida mak mosu mai.” 

Karreta no motór halai ho velosidade aas. Karreta azúl halai neineik hakbesik mai, ami lubuk ida mak hamriik hamahon an iha fatin ne’e. Ema ne’ebé lori karreta ne’e mós hatún nia vidru neineik hodi bolu “Sonia, mai ona.” 

Lian ne’e la foun mai ha’u tilun, ha’u foti matan hateke hetan loos mane morena ne’ebé nia oin hahú malahuk iha ha’u nia hanoin.

“Boa tarde, ha’u hein Apá kleur loos ona.”
“Sa’e lailais orsida ó bokon ona” 

Ha’u nafatin hamriik ho dúvida no matan la husik husi karreta azúl ne’e to’o lakon husi ha’u nia haree. Mane morena ne’e nia oin mosu beibeik iha ha’u nia hanoin. Hasoru malu ikus iha loja China, tansá nia labele hanoin-hetan ha’u labarik ne’ebé nia hola pisang goreng tinan sanulu liubá.

Nia oin no hamnasa kura ha’u nia saudades ne’ebé rai tinan naruk. Biar nia la hamnasa hasoru ha’u maibé haree nia hamnasa, haksolok ona fuan ne’e. Ha’u fila uma ho hirus, iha sorin seluk ha’u kontente bele haree hetan fali mane morena ne’e biar iha minutu balu de’it.

Tinan ida liu ona ha’u halimar iha uma no halibur du'it rahun hodi prepara ha’u nia estudu ba universidade. La baruk atu hisik koras husi lurón ba lurón ho mehi tenke tama universidade tan ha’u hatene liuhusi edukasaun mak sei muda ha’u nia moris ba moris ne’ebé di’ak liu.

Ha’u nafatin nonook no la dehan ba sira, ohin ha’u hasoru mane morena ne’e. Bainhira to’o iha uma udan hahú boot liután, Avó-Pai tuur hamaluk ho nia kafé iha varanda. 

“Ó bá ne’ebé mak bokon loos ne’e?”
“Ha’u bá hasoru ha’u nia kolega sira, Amá ohin la tunu sate ga.?”
“Udan ne’e ó la haree ga, haree ba hariis ona troka tiha ó nia roupa bokon ne’e, ó nia Amá mós bá merkadu seidauk mai.” Hatán mai nune’e no liman book daudaun ba kopu ne’ebé hatuur iha meza leten.

Kalan mós mai daudaun Mamá seidauk mosu mai, hatuur etu iha ahi leten, hanoin ne’e komesa halai bá-mai, “Amá ne’e bá ne’ebé mak seidauk mai de’it ne’e, rai mós ha’u nakaras ba daudaun.” Avó-Pai hakat tama mai hodi halo ha’u hakfodak;

“Ó, hanoin saida.?”
“Amá, seidauk mai de’it ne’e, oras tan nia mai ona sah, ohin ó bá hasoru ó nia kolega sira dehan oinsá.”
“Avo-Pai, ha’u hanoin tinan ne’e ha’u tenke kontinua fali ha’u nia eskola ba universidade”
“Ne’e loos, ó mós iha direitu bá eskola hanesan ó nia kolega sira seluk maibé ó mós tenke hanoin ami na’in-rua nia kbiit.”
“Avó-Pai, ha’u bele buka dalan hodi ajuda imi na’in-rua, dadeer ha’u bele hadeer sedu sona dosi. Meiudia no lokraik ha’u bele fila sedu tunu sate, osan-funan husi fa’an dosi no sate ha’u bele rai hodi selu ha’u nia eskola, fulan neen foin selu dala ida la’ós hanesan iha sekundária fulan-fulan tenke selu.” Ha’u nafatin fó hanoin ba Avó-Pai kona-ba ha’u nia mehi.
“Di’ak, ha’u beik ona, ó nia inan mós la konsege tama to’o universidade I ha’u lakoi taka dalan ba ó se ne’e mak ó nia hakarak ami halo tuir de’it.”

Iha ha’u nia fuan sei hakarak hasoru mane morena ne’e. Loron hirak liubá Acau dehan informasaun kona-ba avizu ba estudante foun sira sei fó sai iha rádiu. Tuur iha varada akompaña ho barullu husi rádiu hodi hein Mamá, lakleur Mamá mós to’o.

“Amá, bá ne’ebé mak kalan loos ona foin mai”
“Udan ne’e ó la haree ga, mikorelet sira mós la halai, ha’u la’o ain de’it husi merkadu hodi mai to’o iha ne’e.” “Amá bá hariis no troka tiha roupa bokon ne’e bee manas hatuur hela iha ahi leten.”

Avizu kona-ba estudante foun mós fó sai daudaun, presiza mós dokumentus balu hanesan sertidaun RDTL. Ha’u nonook no laiha lian nafatin see tilun ba rádiu maibé laran nakonu ho dúvida, “sertidaun RDTL ha’u atu halo oinsá”. Acau dehan bainhira trata sertidaun RDTL tenke lori inan-aman nia sertidaun no mós sertidaun kazamentu inan-aman nian. 

“Amá, avizu kona-ba estudante foun nia fó sai ona. Hanesan ita promete ona tinan kotuk ha’u halimar ona tinan ida iha uma no tinan ne’e hakarak ka lakohi ha’u tenke kontinua.” Ko’alia ho lian sériu.
Ho dada iis maka’as Mamá dehan “ó tenke esforsu an tama universidade públiku se ba universidade privadu sira, ita atu ba lamas osan iha ne’ebé, osan ba han de’it mós araska ona.”

Hanoin ne’e hahú lahakmatek ba universidade públiku mak ha’u la liu oinsá. Mamá mós la fó resposta ne’ebé di’ak. Ba sé loos mak ha’u laran-metin. Loron tau naran mós besik remata bainhira ha’u husu kona-ba sertidaun no oinsá halo sertidaun RDTL. Mamá nafatin nonook ha’u lahatene sinál husi nonook ne’e hatán ha’u ba eskola ka lae. Maibé ha’u nafatin husu tan ne’e ha’u nia direitu.
Iha lokraik ida bainhira tuur halimar iha varanda karreta azúl ida para iha uma oin, ha’u haree Mamá ko’alia ho hirus ba ema ne’ebé mak iha karreta laran maibé ha’u la hatene sé mak iha karreta laran ne’e. 

Loron tuirmai karreta azúl ne’e mai para iha uma oin bainhira haree Avó-Pai hamriik iha varanda nia mós tun husi nia karreta. Ha’u hakfodak bainhira haree mane morena ne’e. Nia hakat mai ho oin mean hodi husi.

“Tiu, Lena iha kah.” Ko’alia nune’e hakat mai besik daudaun Avo-Pai.
“Ó, halo nia terus tinan barak ona. Ó mai buka tan nia halo saida?” avó-pai hatán ho lian hirus.
“Tiu, ha’u mai atu ko’alia didi’ak de’it ho tiu no Lena, la’ós atu mai hirus malu. Lena bá buka ha’u iha uma atu resposabiliza nia oan, ha’u lahatene oan ida ne’ebé tuir ha’u hatene ha’u laiha oan ho nia.” 

Ha’u hakat sai husi kuartu barak bainhira rona mane morena nia liafuan “oan ida ne’ebé.?” Ida ne’e hanesan xoke ida ba ha’u, aman ida ne’ebé ha’u hein tempu naruk la simu ha’u-nia prezensa. Ho matan-been ha’u hakat sai ba varanda hodi hakotu tiha diskute malu entra Avó-Pai no mane morena ne’e hodi dehan;

“Ha’u mak ne’e labarik ida imi nega, labarik ida ne’ebé moris iha moe nia laran tan laiha aman. Ha’u tenke simu goza husi ha’u nia kolega sira. imi la sente saida mak ha’u sente. Tinan sanulu resin walu ha’u hein la’ós resposta ida-ne’e mak ha’u hakarak, oan ida ne’ebé, ha’u la husu ita atu sai ha’u nia aman maibé ha’u só husu de’it ha’u nia direitu ba sertidaun RDTL, ha’u mós hakarak eskola hanesan ema nia oan sira seluk, ha’u la presiza aman ida ne’ebé mai atu dehan oan ida ne’ebé.”

Avó-Pai hakat mai hakuak ha’u ho matan-been hodi dehan “to’o ona, ne’e problema ema boot nia ó haree tama tiha ba uma-laran.” Ha’u halo tuir Avó-Pai nia hakarak maibé fuan ne’e moras bainhira rona mane morena ne’e liafuan.

Lakleur Mamá mós mai no hakilar husi dook “ó mai halo saida iha ne’e. Ó, mai atu halo ha’u nia oan tanis di’ak liu ó lalika mai.” Mamá mai hamutuk fo tia ida ha’u la hatene tia ne’e sé maibé nia idade hanesan mós ho Mamá. Mane morena ne’e hakfodak bainhira tia ne’e no tia ne’e mós hakfodak haree ha’u nia oin, liafuan primeiru ne’ebé sai husi nia ibun mak;

“Nia, oin-hanesan Sonia. Agus, ó haree ga lae. Nia oin hola tuir loos Sonia ne’e.” 

Tia ne’e hakat mai hakuak ha’u no hamoos ha’u nia matan-been. Mane morena ne’e nafatin hamriik iha varanda. Mamá nafatin ko’alia ho lian-hirus. Avó-Pai hakat daudaun bá uma-laran ho oin-buis. Tia ne’e nafatin hakuak ha’u hodi dehan;

“Agus, ó bele nonook ka lae?, Ana, ó nia Mamá konta buat barak ona kona-ba ó, tia husu deskulpa tan durante ne’e la buka tuir, la’ós lakohi buka maibé la hatene duni kona-ba ó.”
“Tia, ha’u mós hakarak eskola hanesan ema seluk. Ha’u lahusu imi atu selu ha’u nia eskola maibé rekoñese netik ha’u nu’udar imi nia oan nu’udar lei haruka.”
“Ba oin ó sei hetan duni ó nia direitu, tan raan nunka nega malu. Ó nia alin nain-tolu mós hei hela ó.” Tia ne’e ko’alia ho matan-been.
“Di’ak liu imi fila ona, bainhira ho ulun malirin mak ita bele rezolve problema ho di’ak.”

Liu tiha loron balu mane morena ne’e rekoñese ha’u nu’udar nia oan no hakarak ha’u atu hela hamutuk ho nia biar oinsá mós ha’u nia oan. Ha’u deside atu la tuir nia no hela nafatin ho Mamá no Avó-Pai. Agradese tan nia rekoñese ona ha’u nu’udar nia oan, tau matan ba ha’u nia eskola maibé ha’u deside atu la hela hamutuk ho nia. 

Ha’u iha alin na’in-tolu ne’ebé simu ha’u ho di’ak maibé ha’u iha moris rasik no sira mós iha sira nia moris rasik. Obrigada Mamá akompaña ona ha’u no hamutuk ho ha’u iha tempu ne’ebé defisil ema haree ha’u matan sorin Mamá no Avó-Pai nafatin iha ba ha’u. 

Obrigada Mamá, ha’u hatene dalan ne’ebé Mamá liu la fasil, hakiak ha’u to’o ha’u boot biar ema seluk halo Mamá laran-moras ho lian mak husu “Ana nia Apá mak ida ne’ebé” no dalaruma dehan Mamá ho liafuan sira-ne’ebé la merese maibé Mamá nafatin pasiénsia tan domin ne’ebé Mamá iha ha’u boot tebes. Buat ida ne’ebé ha’u hakarak Mamá hatene katak ha’u hadomi Mamá laiha rohan. (***)

Dili, loron 11 fulan-Juñu tinan-2017

AHI-SUAR IHA FULAN-SETEMBRU

Anin malirin hasee ha’u nia isin. Fatin ne’e hahú hakmatek lahanesan ho loron hirak liubá. Iha uma laran ha’u haree Mamá hahú arruma daudaun sasán tau iha pasta no karón. Inan sira halai bá-mai buka sira nia oan iha lurón. Haklalak labarik ki’ik sira iha uma oin hahú mamuk. Dadeer ne’e Mamá la hatán ami atu la’o dook husi uma.

 

Iha loron ne’e, ema sira ne’ebé baibain leba-modo la’o bá-mai mós la liu ona iha uma oin. Ida-idak tuur hakmatek iha nia uma laran hodi hafuhu ba li’ur. Teki-teki karreta no motór halai bá-mai ho velosidade aas.

Mane forte sira iha karreta leten hatais kamiza metan no iha nia kotuk hakerek AHI (Aileu Hametin Integrasi), kesi bandeira Merah Putih iha reen-toos. Mane forte sira ne’e balu kaer katana, dima no kilat ne’ebé ema halo husi besi ho modelu hanesan pistola ema hanaran rakitan maibé nia lian la furak hanesan pistola iha filme Coboy.

Grupu ida liu tiha, lakleur grupu seluk liu filafali, maibé grupu ida ne’e haklalak ho kontente merdeka… merdeka…. merdeka…. Viva CNRT… viva CNRT, liu de’it minutu balu kilat lia husik dook.

Teki-teki viziñu ida halai mai uma hodi dehan;

“Haree arruma daudaun sasán ona, ita atu funu ona mak ne’e.”

Lokraik mai daudaun loro-matan mós hahú lakon iha ha’u nia haree. Aileu sidade ne’ebé hafalun ho abu-abu nakfila hanesan inferno ahi lakan iha fatin-fatin.  Ema lori masa ne’ebé enxe ho gazolina halai bá-mai, ema boot sira haklalak lori dima, rama, katana no rakitan duni malu iha lurón.

Mamá halibur ami iha oratóriu oin, orasaun sai forsa ba ami maibé fuan ne’e nafatin ta’uk. Ema haklalak iha nakukun kilat lian hanesan batar sona iha fatin-fatin. Labarik sira halerik ba ta’uk. maibé ha’u nia hanoin nafatin iha nakukun laran, tansá Timor oan sira oho malu no estraga ema seluk nia uma.

Liafuan “viva CNRT, Viva Timor-Leste” hahú forte iha ha’u nia tilun, balu hakilar dehan;

“Outomista sira keta halai, ami manán ona”.

Hanoin ne’e se iha nakukun laran. Manán ida oinsá, manán tan sunu ema seluk nia uma ou manán tan halo ema seluk tanis no ta’uk. Koko atu komprende situasaun ne’e hotu maibé fuan ne’e nafatin la simu. Laiha razaun ema obriga ami sai husi uma ne’ebé mak durante tinan barak ami hela ba.

Uma sira iha lurón sorin hahú suar, mane-klosan ida halai lailais mai hodi dehan;

“Tia, sira tenke sai lailais husi fatin ne’e, ema sunu uma besik mai to’o iha ne’e ona, lori alin sira muda bá fatin ne’ebé segurru.”

Papa ho maun boot iha lokraik ne’e laiha uma tan ai-leba sira la lori ona modo mai fa’an, Papá deside hodi ba kaer bibi ne’ebé ami hakiak hodi halo modo kalan. Rai nakaras daudaun ona maibé sira la mosu mai.

Mamá nafatin halibur ami iha nia sorin, lakleur karreta trek ida mai para iha uma oin hodi dehan;

“Mana ho alin sira tenke sai husi fatin ne’e, kalan ita la hatene sé mak mai ne’e. Ita-nia ema ou ema nian.”

Laiha ona naroman eletrisidade, sidade sai nakukun. Ahi lakan no suar iha fatin-fatin. Situasaun ne’e hata’uk labarik sira iha fatin refujiadu, sah tan toba iha rai luan laiha kama no kulsaun hodi hanahe an. Ema hahú deskonfia malu, didin-lolon no ai-tahan hanesan tau matan hela no lalatak mós sai inimigu ba ita-nia an rasik.

Loron-4 fulan-Setembru tinan-1999, marka istória foun ba Timor-Leste nia independénsia maibé  tansá ran sulin no tanis sei halerik iha fatin-fatin. Tanis tan kontente ou tanis tan lakon família, buat hotu iha dúvida nia laran, matan ne’e sei malahuk hodi haree lia-loos.

Buat hotu la’o tuir nia tempu ho prezensa Forsa Paz lori duni hakmatek ba Timor oan, moris hanesan labarik ida ne’ebé sei delek ba istória, karik ha’u se ki’ik atu apar ho situasaun tan buat hotu hafalun an iha rede klandestina.

Liu tiha tinan sanulu resin ida matan ne’e foin moos didi’ak bainhira involve-an iha komisaun Peskiza Elaborasaun Istória Feto Timor ne’ebé harii husi OPMT.

Hanesan labarik ne’ebé nakonu ho dúvida iha pasadu, iha komisaun ne’e lori ha’u komprende netik sah situasaun mak Timor-Leste hasoru iha 1975. Partidu hotu ne’ebé eziste iha ukun koloniál ne’e iha hanoin di’ak luta hasoru opresaun tuir ida-idak nia vizaun no misaun. Balu hakarak ukun-an imediatamente, balu hakarak hamutuk lai ho Portugál hafoin deside nia  independénsia no balu hakarak adere ba Indonézia.

Hanesan feto ha’u nia orgullu boot ba Maria do Ceu Pereira (Bi-Lear) unika feto ne’ebé sai mós hanesan fundadora ba partidu ASDT hamutuk ho mane malu sira.

Iha Komisaun Peskiza, ha’u hasoru Maria Fátima Kalçona. Nia feto ne’ebé ativu no oferese nia vida labarik involve iha polítika ho idade 14, komesa komprede kona-ba konseitu polítika no emasipasaun feto se kompara ho labarik husi ha’u nia jerasaun ho idade ida hanesan ne’e nein komprende kona-ba polítika I laiha interese aprende kona-ba polítika só hatene de’it kuandu partidu polítiku sira halo kampaña mosu iha ne’ebá hodi hetan netik nasi kotak.

Bainhira ko’alia kona-ba emasipasaun feto, liga mós ho igualidade generu. Antes mai iha komisaun hanoin sei moos hanesan surat mutin no iha ne’e hahú pinta ho kór oioin, sé kompara movimentu libertasaun partisipasaun feto boot teb-tebes, mane sira mós fó biban ba feto atu involve iha polítika, loke créche hodi tau matan ba labarik sira no fó oportunidade ba inan involve iha atividade sosiál no polítika.Tansá Créche mós mout ho tempu.

“Ami iha ai-laran durante tinan tolu iha situasaun normál la hasoru menus ai-han, tan ami iha toos komunál, toos individuál, rezultadu husi hahán sira ne’e ba tau hamutuk iha sileiru hodi atende ba nesesidade urjente”.

Tansá ohin loron ita iha ekipamentus modernu maibé nesesidade báziku balu sei nafatin importa husi rai-li’ur, tansá la organiza fali toos komunál no harii servisu koletivu, hamoris fali koperativa populár no hamenus ai-han importasaun.

Bainhira se ki’ik ha’u rona beibeik liafuan FALINTIL. Forsa luta na’in ba ukun rasik-an kuandu ko’alia kona-ba forsa ha’u nia hanoin ne’e sempre halai ba mane. Mais lae, iha mós inan feto sira balu mak iha ne’ebá la’o hamutuk ho sira iha faze gerilha.

Inan feto sira ne’e mós fó sira nia kontribusaun hanesan halo produsaun, alfabetizasaun, esklaresementu polítika, halo ligasaun klandestina, partisipa mós iha asaltu, inan sira ne’e mós ho aten barani haruka sira nia oan mai iha villa hodi kontinua ejiste iha ai-laran tan ho prinsípiu ida mate ka moris ukun rasik-an.

Sorte di’ak ba sira ne’ebé mak depois ukun-an sei hasoru fali sira oan maibé triste mós ba sira ne’ebé mak to’o oras ne’e seidauk hasoru malu ho nia oan, tansá hafoin ukun-an la rekoñese sira nu’udar FALINTIL.

Iha dada-lia ne’ebé ha’u halo ho inan feto lubuk ida sira sempre dehan;

“Doutrina FRETILIN kontra tebetebes buat ida polegamia no monogamia tan ami iha dixiplina ida forte hanesan kritika no auto kritika, Bainhira mane ida gosta feto ida lori aprezenta ba responsavel aldeia ou suku tuur hamutuk ho inan aman se sira hotu hatán bele halo ona rejistu sivíl.”

Balu dehan iha ai-laran kontra liafuan barlake mais tansá ohin loron barlake kontinua metin no pior liután balu nia folin to’o $20.000. Se hanesan ne’e, nu’usá la fó osan ba feto no mane ne’e hadi’a sira nia moris. La’ós  kontra maibé kultura mak ita-nian indentidade, ita mós labele nonook se kultura rasik halo diskriminasaun ba feto.

Dala barak ema dehan funu ne’e mane sira mak hamriik metin iha oin, mais keta haluha bainhira imi hamriik metin tan iha feto forte iha imi nia kotuk, feto sakrifika nia-an moris hamutuk ho militár Indonézia hodi na’ok informasaun no kaben ho militár Indonézia hodi salva vida.

Inan feto sira ne’e ho aten brani na’ok kilat musan no farda militár hodi haruka ba ai-laran la ta’uk biar sira nia moris iha hela perigu nia laran. Feto mós sai hanesan alvu satisfeitu seksuál  militár sira nian mais ida ne’e la hamate sira nia espíritu apoiu ba ukun rasik-an, biar ema seluk haree sira hanesan militár nia nona.

Iha komisaun ha’u hasoru inan barak ho ida-ida nia istória rasik. Buat ida ne’ebé ha’u aprende husi sira mak biar ami la hatene lee no hakerek maibé ami fiar buat ida ukun-an ne’e mak di’ak  liu.

“Ami halo funu tanba ami nia hakarak la’ós tanba ema ida mak mai obriga ami, sé militár sira kaer toman. Ami prontu simu kastigu no ibun taka metin segredu hotu, ami luta tanba konxiénsia. Sira oferese duni an ba luta no nunka rekere ami mak lutadora. Ukun-an ona ami só rekere de’it ba dezenvolvimentu no povu nia moris di’ak.”

Involve iha komisaun ne’e hanesan privilégiu ida ba ha’u, aprende hamutuk ho luta na’in hira ne’e no aprende oinsá sakfirika-an ho espíritu nasionalizmu. Luta ba ukun an ida ne’e la’ós ema ida de’it maibé ema hotu-hotu nian.

Tan ne’e ukun an ne’e tenke reprezenta ba ema hotu la’ós lori benefísiu ba ema balu de’it ho grupu balu de’it. Ha’u nia hakruuk hodi fó ondra ba sira ne’e la hamutuk ho ita no sira ne’ebé luta maibé ema haluhan.

Dili, loron-22 fulan-Abríl tinan-2017.

PRONTU

“Abel, loke ó nia envelope ona ga.?”Ambere hakilar husi dook.

Faru mutin nakfila makerek hanesan toke ho kores oioin, feto mane hakilar ho kontente. Esforsu hotu iha tinan-tolu nia laran selu duni ho envelope mutin. Ihas urat-tahan mutin ne’ebé pinta ho letra metan ne’ehakerek Aprovado.

Hamnasa kontente bainhira lee hetan liafuan ne’e, Ambere halai husi dook rega kedas tinta mai ha’u isin-lolon hodi hakór kamizola mutin ne’e.

"Orsida ita la'o halimar tiha, foin mak simu rezultadu ne'e ita pasiar ho kolega sira lai." Ko'alia mai ho hamnasa liman iha ha'u nia kabaas.

"Lae, ha'u se bá hasoru ema ida lai."

"Bá hasoru doben karik."

Hotu-hotu hamnasa bainhira rona ambere nia liafuan. Ha'u sees daudaun husi sira nia sorin tan ha'u hatene sira se la baruk atu goza.

Aida feto ne'ebé ha'u hadomi hein hela iha lurón sorin. Ami tuir malu tinan ida ona. Biar ha'u hatene nia tinan boot liu ha'u tinan-lima, maibé domin ne'ebé ha'u iha boot liu tan domin la haree ba idade.

"Parabéns doben" kaer ha'u nia liman no hamnasa mihis.

Nia, feto ne'ebé bonita iha ha'u-nia matan. Biar iha ema seluk nia haree nia la pár ho ha'u. Loron ne'e ami kontente la'o bá tuur iha tasi-ibun, ha'u jura ba nia se hadomi nia ho fuan tomak.

Ami tuur hamnasa kontente to'o lokraik, bainhira fila bá uma Mamá ho oin-buis hodi dehan;

"Ó, bá ne'ebé mak foin mai ne'e.?"

"La'o halimar ho ha'u nia kolega sira.?" Hatán ho lian ta'uk

"Fó to'ok ó-nia envelope mai, ha'u se la loke agora hein ó-nia Apá mai mak loke."  Hatán mai ho hamnasa mihis.

Ha'u hakat tama kuarta-laran, Ania, Abui no Anita halai tuir ha'u ho kontente hodi dehan;

"Parabéns maun" Anita ko'alia nune'e no haksoit daudaun mai tabele iha ha'u nia kotuk.

"Maun, tinan-3 mai tan ha'u mós se pinta ha'u nia kamizola hanesan maun-nian.

"Heisa, loos ona ó bá foti maun nia tolla lai, ha'u hariis tiha mak ita konta istória". Hatán nune'e no taka daudaun odamatan.

Kalan mós mai daudaun, hanesan mane boot no mesak iha uma-laran, buat hotu Mamá no Papá halo tuir, ha'u-nia feton na'in-tolu mós estima tebes ha'u. Kalan ne'e Mamá tein modo mesak di'ak hodi selebra ha'u nia aprovadu ne'e.

Kalan ne’e ami hotu han ho kontente. Papá tuur iha meza uluk. Envelope ne’ebé ohin meiudia ha’u simu latan hela iha meza leten. Bainhira han hotu, ami hotu halibur an iha sala-vizita hodi akompaña Telejornál Tetun iha kanál RTTL (Rádiu Televizaun Timor-Leste).

Papa foti envelope ne’e hodi dehan;

“Abel, Papá hanoin ne’e kleur ona. Ami se haruka ó bá eskola iha rai-li’ur.”

“Papá, fó tempu mai ha’u hodi hanoin, ha’u hakarak halimar lai tinan ida pois mak kontinua fali ha’u nia estudu.”

“Ami tuir de’it ó nia hakarak maibé ó tenke hanoin iha tinan ida-ne’e nia laran ó atu halo saida.?” Papa hatán mai ho oin-buis.

Mamá husi kotuk hatán “di’ak liu ó tuir kursu lai, ó iha uma de’it mós atu halo saida.”

Ha’u lakohi la’o dook tan fuan ne’e seidauk prontu husik Aida mesak. Domin ne’e halo ha’u ta’uk atu lakon nia no lakohi dook husi nia sorin, Mamá no Papa halo tuir ha’u nia hakarak. Ha’u tuir duni kursu lian inglés no kursu komputadór.

Fulan-sanulu liu daudaun formasaun komputadór no lian inglés mós besik remata, Mamá no Papa mós deside ona katak bainhira kursu ne’e remata tenke kontinua hikas ha’u nia estudu ba universidade.

Relasaun domin entre ha’u no Aida husi tempu ba tempu hahú metin liután, hala’o mós ami-nia relasaun domin ne’e hanesan faen ho la’en. Semana ida ona ha’u la hasoru Aida nia sempre haruka mensajen badak ida mai hodi dehan;

”Doben, ha’u moras, besik semana ona, ha’u nia oin-halai, muta, ulun moras no vontade han laiha, aban ó iha tempu ita bá konsulta lai.”

Dadeer ne’e ha’u bá sedu Aida nia uma, nia família simu ha’u ho di’ak. Aida nia oin-kamutis loos. Bainhira to’o iha ospitál Aida tuur ho oin-murón, lakleur enfermeira ne’ebé hamriik iha odamatan bolu nia naran. Ha’u kaer Aida nia liman no hakat tama bá sala konsulta. Aida hahú esplika kona-ba nia moras.

Ho hamnasa mihis Doutór dehan;

“Parabéns, ita-nia ferik oan isin-rua.”

Ha’u nonook no laiha lian, la hetene loos ne’e novidades di’ak ka aat. Hanoin ne’e komesa buradu tan seidauk prontu sai aman. Seidauk prontu hasoru Aida nia família no mós ha’u nia família. Aida kontente ho novidades ne’e maibé ba ha’u ne’e hanesan azár boot ida.

Fulan ida liliu daudaun, ho fuan boot no aten brani hasoru Aida nia família hodi hato’o lia-loos, ho aten brani  mós ko’alia ho Mamá kona-ba Aida nia kondisaun, ha’u hatene Mamá sei hirus maibé ha’u fiar Mamá sé la husik ha’u mesak hasoru problema ne’e.

“Buat hotu akontese ona, ó tenke ko’alia ho ó nia aman. Nia atu hirus mós ó pasiénsia de’it ona, sé uluk ó rona Mamá ho Papa nia liafuan karik ida-ne’e sei la akontese. Ó tenke simu realidade no resposabiliza ba ó nia hahalok.”

Kalan mós mai daudaun, ha’u tuur iha varanda hodi hein Papa. Ania, Abui no Anita ho oin-ta’uk hodi dehan “Amaun ohin, Mamá telefone ona ba Papa, nia hirus loos.” Baibain oras hanesan ne’e Papa fila ona maibé tansá to’o kalan ona Papa la mosu mai.

Sentimentu ta’uk ne’e forte liután, sah liafuan loos mak ha’u atu ko’alia ba Papa, Mamá karik nia bele komprende maibé oinsá ho Papa.  Ania hahú prepara hahán iha meza leten. Lakleur rona motór lian para iha uma oin, Abui halai hasoru hodi dehan;

“Papa nu’usá mak kalan tiha mak ne’e?”

“Ó-nia maun mai ona ka seidauk?” Papa husu ho lian sériu.

“Nia, iha sala-vizita” Abui hatán ho lian ta’uk.

Bainhira Papa hakat tama uma-laran ho ta’uk ha’u hamriik hodi komprementa Papa, nia rai pasta iha kadeira leten hakbesik mai no basa ha’u nia hasan dala ida. Ha’u nonook no laiha lian ba sala ne’ebé ha’u halo ona.

“Ha’u, haruka eskola, la’ós atu halo ema nia oan-feto isin-rua, ó mane boot iha família nia laran tuir loos ó tenke fó ezemplu di’ak ba ó nia alin sira. Ba ó mak ami laran-metin hodi tau matan ba ó nia alin sira. Laiha ema ida mak bandu ó atu hola feto maibé ó nia idade sei ki’ik, ó nia dalan ne’e mós se naruk. Ó mós tenke hanoin ó nia future. Agora hanesan ne’e ona ita tenke bá hasoru Aida nia família.” Papa ko’alia mai ho lian hirus.

Ha’u iha sorte ne’ebé di’ak tan hanesan oan mane mesak, Papa bele hirus to'o iha ne'ebé maibé nia nafatin ho fuan boot simu ha'u nia kuran. Família rua tuur hamutuk no simu malu ho di'ak, ami na'in-rua tan seidauk iha uma no servisu se nafatin resposabilidade inan-aman nian.

Hanoin ne'e nafatin la hakmatek, ha'u labele sai nafatin naha ba Papa no Mamá, edukasaun hanesan xave ba moris di'ak iha futuru. Ha'u hanoin tuir saida mak Papa no Mamá promete ona katak sei haruka ha'u bá eskola iha Indonézia.

Aida nafatin fó korajen mai ha'u atu kontinua ha'u nia estudu. Bainhira ha'u bá nia ho kondisaun isin-rua todan. Papa no Mamá mós halo tuir sira nia promesas haruka duni bá Indonézia.

Liutiha fulan-rua Aida mós partus bebé mane oan ida. Hahú husi ne'e Papá komesa haruka osan tarde. Ha'u bele komprende sah situasaun mak Papá hasoru, nia la'ós tau matan de'it ona mai ha'u maibé ba Aida no Ason mós, seidauk tan alin na'in-tolu ne'ebé hahú boot no balu tama mós iha universidade.

Papa hanesan funsionáriu públiku ho nivel-quartu, sah tan ho vida moris iha Dili, sasán hotu-hotu ho folin karun. Iha ema-nia rai mak ha'u foin sente oinsá moris mesak dook husi inan-aman no foin sente oinsá falta ba osan no hahán. Atu tanis mós matan-been la sulin.

Tinan ida liu daudaun, Ason mós hahú boot. Aida halerik beibeik falta osan ba Ason nia susu-been, ha'u labele ejiji beibeik Papa atu tau matan ba Aida no Ason buat hotu akontese tan ha'u nia hakarak.

Bainhira ferias to'o ha'u husu ba Papa atu fila mai Timór tan hakarak haree Ason, Papa mós hatán no haruka osan mai ha'u hodi hola bilete aviaun nian.

Ason mós tinan-ida fulan-neen ona. Ania mós agora eskola ona iha universidade, Abui no Anita iha tinan ne'e nia laran se akaba mós sekundária no kontinua ba universidade. Ha'u mós iha feen no oan, ha'u labele depende hela de'it ba inan-aman.

Bainhira ferias remata ha'u hili atu nafatin iha Timor. Papa hirus ho ha'u nia desizaun ne'e;

"Se, ó lakohi bá nu'usá desde uluk kedas ó lalika bá par ita lalika gasta osan no lalika deve tun-sai to'o iha klaran ó lakohi ona."

"Papa, ha'u iha razaun bainhira deside lakohi bá, ha'u iha ona feen no oan, lakleur tan alin na'in-rua se tama iha universidade ha'u lakohi sai beibeik naha ba papa. Ha'u mós agora iha família rasik. Ha'u tenke sai mane ida forte hanesan papa." Hatán ho matan-been nakonu.

"Saida mak ó se halo iha Timór." Papa hatán mai no dada iss maka'as.

"Ha'u se buka servisu."

"Konforme ó, ami halo tuir de'it ó nia hakarak no hili dalan ne'ebé di'ak liubá ó-nia an."

Husi lurón ba lurón ha’u hakat ho fiar an ho matenek natoon ne’ebé iha no resposabilidade ne’ebé ha’u hasaan iha kabaas ho tulun Maromak nia ha’u se hetan servisu. Fulan ida liu daudaun laiha rezultadu hanoin ne’e hanesan metin iha fatin no laiha leet atu deskansa.

Iha ne’e ha’u foin mak sente rasik oinsá aman ida hatudu nia resposabilidade ba nia família. Prontu ou la prontu ha’u tenke prontu duni hasoru realidade buat hotu akontese tan ha’u nia hakarak. Arrepende mós buat hotu akontese ona no ha’u tenke resposabiliza ba ha’u nia hahalok rasik.

Dili, loron-26 fulan-Maiu tinan-2017

SIDADE HADELEK MATAN “VERSU DALIMA” FORE-RAI HALUHA KULIT (parte II)

Udan subiska habokon ha’u iha angguna nia leten, kalohan hafalun rai. Sidade nia furak mós hahú lakon iha ha’u nia haree, hanoin ne’e nafatin ba Ansa. Foin fulan neen de’it husik nia la’o dook husi ha’u nia sorin, nia hatudu ona hahalok hanesan ne’e mai ha’u.

Ha’u tuur nonook iha ema barak nia leet. Aida, Ansa nia belun di’ak iha sekundária ne’ebé la kontinua nia estudu ba universidade mós sai hamutuk iha karreta ne’e. bainhira haree ha’u tuur no nonook nia hakbesik mai hodi dehan;

“Tiu, ha’u rona Ansa agora eskola iha Dili.”

“Sim” hatán ho dada iis maka’as.

“Ha’u mós hakarak eskola hanesan Ansa maibé ferik ho katuas laiha kbiit haruka ha’u bá eskola, agora ha’u ajuda sira halo toos no lori modo mai fa’an iha merkadu.” Koalia mai nune’e no haloot didi’ak karón ba bote laran.

Ha’u nafatin nonook no hirus iha ha’u nia laran. Bainhira to’o iha uma rai komesa nakaras  Anato halai hasoru hodi dehan;

“Apá, Abin husu ha’u ka lae, nu’usá nia la mai ho Apá.”

“Haree took, bin Abia te’in saida, Apá hamlaha ohin iha sidade udan-boot Apá seidauk han to’o agora.” Koko ko’alia buat seluk no lakohi hanoin saida mak ohin loron akontese iha Ansa nia eskola.

Bainhira hakat tama bá dapur ha’u haree Abia fila namas hela mostada metan iha tasu laran, tuur iha ahi-matan hodi haneruk ahi.

“Apá mai ona, Apá nu’usá bokon loos ne’e. Ha’u  nono bee manas Apá hariis lai, orsida Apá moras ona.” Ho oin paniku Abia hasai tasu husi ahi leten foti sanan nono daudaun bee.

“ Ohin imi bá eskola ka lae.?” Ko’alia nune’e lima se daudaun ba ahi ne’ebé lakan iha sanan okos.

“Ami na’in-rua Anato bá, Apá ba hasoru duni Abin ka lae?”

“Ha’u hetan duni nia maibé nia halo finje la koñese ha’u iha ema barak nia oin.” Hatán ba Abia ho oin-sériu.

Abia nein hatán ha’u nia liafuan nia hakat mai hakuak ho matan-been.

“Abin nu’usá halo loos ida-ne’e bá Apá. Nia telefone mai mak ha’u ko’alia ho nia, Apá iha ne’e servisu mate an loos tanba nia, nia foin ba de’it sidade seidauk to’o tinan nia hahú la koñese ona Apá.”

Bee iha ahi leten mós nakali daudaun, Abia foti masa fakar bee manas no lori ba hariis-fatin. Anato nafatin halimar ho karreta masa ne’ebé ha’u sosa iha China uma. Abia hirus tebes ho Ansa nia hahalok, nia tuur lahakmatek liman iha hela de’it telefone. Nia koko telefone Ansa maibé Ansa la hatán.

Bainhira han-kalan to’o hotu-hotu nonook no laiha lian. Abia nafatin hatudu nia hirus. Udan no anin iha kalan ne’e boot tebes hafalun tiha laran triste ne’e. Semana rua liu daudaun Ansa hanesan la halo sala, nia nein telefone tuir husu ha’u hirus nia ka lae.

Finado mós besik ona, Abia no Anato mós husu beibeik “Bin mai pasa finado hamatuk ho ita ka lae.?” Ha’u nonook no la hatán ba lian mak husu ne’e. Hanesan aman ha’u nafatin ho fuan boot perdua oan sira san tan nia inan husik hela sira bainhira sei ki’ik. Ha’u lakohi tan de’it Ansa nia hahalok halo sira na’in-tolu hirus malu.

Manu-fuik sira hananu iha ai-leten hodi simu loron foun, fitun hahú lakon ida husi ha’u-nia haree. Hulan ha’u nia karón ne’ebé nakonu ho modo-tahan. La’o neineik iha lurón ninin, balu tutur bote no balu ho karosa ami la’o forma tuituir malu hanesan nehek.  

Atoy husi dook apita ho lian maka’as karik entre ami iha balu mak hakarak bá fa’an modo iha sidade. Bainhira hetan ha’u ho oin-hamnasa nia hakbesik mai hodi dehan;

“Tiu, horisehik ha’u hasoru Ansa. Nia husu tiu hirus nia karik.?”

“Nu’usá nia la telefone ha’u, tansá nia husu tuirfali ó.” ha’u hatán ho lian-hirus no lakohi Atoy hatene sah hahalok mak Ansa halo ona mai ha’u.

“Ansa, hameno de’it karik tiu iha osan ruma haruka bá nia lai.”

“Karik hetan nia haruka nia mai lai. Ha’u la hirus finado mós besik ona, mai hamoos nia Mamá nia rate.”

Iha ema barak nia leet hanoin ne’e nafatin ba hela de’it Ansa, karik nia arrepende ona ho saida mak nia halo, maibé tansá nia la simu Abia nia telefone no la telefone hikas fali mai. Ohin osan oituan iha ne’e nu’usá ha’u la haruka ba karik nia presiza loos mak nia hameno mai ne’e.

Ha’u la’o hale'u merkadu hodi buka tuir Atoy karik nia seidauk ba sidade ha’u bele fó tuir osan ruma bá Ansa. Husi lurón ba lurón angguna sira-ne’ebé para iha lurón ninin ha’u la haree hetan Atoy nia karreta. Ha’u rona husi kondutór seluk katak Atoy bá tiha ona.

Fila uma ho laran-taridu. Abia nafatin hatudu hirus bainhira ko’alia kona-ba Ansa. Kalan hira tuituir malu ha’u mehi hela de’it Ana, labarik sira nia inan. Iha ha’u nia mehi Ana hatudu oin buis mai ha’u no hakuak metin Ansa. Ha’u la hatene loos sah sinál mak ne’e. Karik nia lakohi ha’u atu hirus beibeik Ansa.

Aban ka bairua nia la telefone mai. Ha’u rasik mak se bá buka nia iha sidade. Hanesan aman ha’u labele husik oan-feto ida la’o dook husi ha’u nia sorin. Dadeer ha’u rona Abia ko’alia ho lian boot. Ha’u hafodak bainhira haree Ansa iha uma oin, nia nein hatán Abia nia liafuan karik nia arrepende ona saida mak nia halo.

Bainhira haree hetan ha’u nia halai mai hakuak hodi husu deskulpa. Abia nafatin hatudu hirus. Hakuak nia hodi dehan;

“Ha’u lahirus, maibé tansá mak ó bele husik ha’u hamriik iha udan laran hodi hein ó”

“Deskulpa Apá. Ha’u moe ho ha’u-nia kolega sira tan Apá mai ha’u nia eskola lori karón. Ida ne’e mak halo ha’u moe atu bá hasoru Apá.” Hatán mai ho matan-been.

“Moe laiha, Apá mak haruka tiha ó ba eskola, fó han ó, halo finje la haree biar Apá hamriik hela iha udan laran.”  Abia ho lian maka’as hirus nia bin.

“Apá la hirus, bainhira ó mai ona Apá kontente ona haree ó. sah tan finado mós besik ona.”

Abia nafatin la simu saida mak Ansa halo. Hanesan aman ha’u lakohi tan de’it buat laek ida halo oan sira hirus malu. “imi nia inan laiha ona, imi na’in tolu mak ha’u nia rikusoin. Ha’u lakohi tan de’it buat laek ida imi hirus malu. Saida mak Ansa halo ona ne’e hanesan ezemplu ida ba imi na’in-rua Anato labele banati tuir. Buat ida ne’ebé mak ha’u hakarak imi hatene katak ha’u hadomi tebes imi na’in-tolu.”

Bainhira rona ko’alia hanesan ne’e Ansa, Abia no Anato hakuak ha’u ho matan-been. Ansa mós promete se la halo tan sala ne’ebé mak nia halo. Lokraik ne’e ami hotu ba Ana nia rate hamoos nia rate hodi prepara han-kalan no hasai orasaun ba Aman Maromak no matebian sira.

Ha’u kontente bainhira sira haree hadomi malu no simu ida-idak nia kuran hodi kompleta malu. Iha ha’u nia nonook saudades hela Ana. Karik nia  sei iha haksolok ne’e kompletu liután.

“Apá hanoin Amá karik.”  Hamriik iha kotuk ko’alia mai hodi halo ha’u hakfodak.

Ansa, Abia no Anato hamnasa bainhira haree ha’u hakfodak. Anato ho hamnasa dehan “Apá ha’u hakarak  hasai orasaun ba Amá.” Antes han-kalan. Ansa halakan lilin iha ortoriu oin, Anato mak dirije orasaun.

“Obrigada, Jezús ita halo ami hamutuk fali iha kalan ne’e, Apá no bin Bia mós lahirus ona bin Ansa, Jezús hakraik nafatin saúde di’ak ba Apá hodi tau matan fatin ami na’in-tolu, labele halo ami hirus malu. Amin.”

                                                                                                Dili, loron-31 fulan-Maiu tinan-2017