PAPA; SAUDADE O NIA HAKUAK (parte II)

“Tinan-sanulu liu daudaun, mane altura ne’e nia lalatak sei mosu iha ha’u nia hanoin. Ha’u bele promete ba Mamá no Avó-Pai hodi haluha nia maibé ha’u labele bosok ha’u nia an. Ha’u saudades hela nia. Biar nia oin hahú malahuk iha ha’u nia hanoin.”

Lokraik mai daudaun. Manu-fuik sira haksubar iha ai-tahan sira nia leet. Fitun hahú mosu iha haksubar an iha kalohan, fulan ho nia roman haroman mundu.

“Ana, kalan ona nu’usá mak la tama uma, ó fila ona modo ga seidauk?”  Mamá, hakilar husi odamatan dapur.

“Ha’u hanoin ohin kalan Mamá mak te’in.” tuur iha ai-katapa hun hodi hateke ba fitun iha lalehan.

“Keta haluha, ohin kalan ó mak te’in no Mamá nia aban.”

“Di’ak mak ha’u te’in.” ko’alia nune’e no halai daudaun bá dapur laran.

Tinan barak ha’u hamriik iha ahi-matan hanesan hodi fila modo. Tinan barak mós dúvida hotu nafatin metin iha fuan, tansá Mamá ho Avó-Pai bandu ha’u labele hasoru tan mane altura ne’e. sah sala mak nia halo ona ba Mamá no Avó-Pai. Buat hotu hanesan mistériu mai ha’u.

Tinan ida-ne’e ha’u akaba ona sekundária no sei kontinua ba universidade, ha’u la hatene mehi kontinua eskola ba universidade ne’e bele to’o ka lae?.

“Mamá loron kalan fa’an de’it mak hudi sona no fase ema nia roupa fo’er hodi hetan netik du'it ruma hodi selu ha’u nia eskola. Sei ha’u kontinua ba universidade kustu ne’e sei maka’as liután.” Ha’u hanoin iha laran no hanoin mós ha’u nia moris aban-bainrua nian.

Modo mós tasak daudaun hamate ahi no tuur iha ahi-matan nia sorin, kankun nia gostu mós lakon iha ha’u nia nanál, ahi-klaak mós la sente manas iha ha’u nia kulit. Lakleur ha’u rona tarutu husi kotuk.

“Ana, nu’usá ó tuur murón loos ne’e” Avó-Pai husu ho oin hamansa

“Laiha ida Papá” Papá naran ne’ebé ha’u uza hodi bolu Avó-Pai.

“Feto klosan ona ne’e labele tuur demais iha ahi-matan, orasida ó iis ahi-suar ona.” Hatán mai ho hamnasa no hakat daudaun ba li’ur.

Papá, mane ida ne’ebé forte tebes iha hahú nia matan. Biar nia fuuk sira ne’e mutin ona. Oin hahú namkurut maibé nia la baruk buka osan ba ha’u  nia presiza.

Nia sempre dehan;

 “Ó, tenke eskola só ho eskola mak bele muda ó nia moris. Bainhira Papá sei moris ó lalika ta’uk duni ó nia mehi.”

Biar Avó-Pai hala’o-nia knaar nu’udar aman hodi troka ha’u nia aman rasik maibé fuan ne’e nafatin saudades mane altura ne’e. Bainhira loro-matan sai husi lorosa’e no mout iha loro-monu nia lalatak sempre mosu iha ha’u nia haree.

Ha’u la komprende tansá mak hanesan ne’e maibé sentimentu ne’e halo ha’u hirus no lakohi atu koñese tan nia. Iha sorin seluk fuan ne’e saudades hela nia, hakarak sente mós domin husi aman ida biar minutu balu de’it.

“Ana, halo saida mak ó tuur murón loos ne’e.” Mamá nia lian mai husi kotuk halo ha’u hakfodak

“Huuumm…. Amá ho Papá mai han ona, modo tasak ona.”

“Ó, mós haree han ona no hadeer sedu ajuda Amá sona hudi.”

“Di’ak”  hatán ho lian neineik no hakat ba foti bikan tau iha meza leten.

Kalan liu daudaun maibé ha’u hanesan niki. Lahanesan baibain Mamá la fanun ha’u tuur ona iha uma nia tatiis hamoos hudi kulit.

“Ana, ohin dadeer ó hadeer sedu loos ne’e” Mamá ko’alia ho goza tan baibain nia mak sempre fanun no dalaruma hirus tan foin mak ha’u hadeer.

“Amá, tinan ne’e ha’u akaba ona sekundária, ha’u hakarak tebes atu kontinua ba universidade. Agora ita-nia moris hanesan ne’e, Amá nia saláriu husi fase roupa mós ki’ik, ita fa’an hudi sona mós dalaruma folin, dalaruma mós lai. Sei ha’u kontinua ba universidade oinsá ho ita-nia moris.” Hatán ba Mamá ho matan-been.

“Se ó remata mak ita laiha osan, ó bele halimar lai tinan ida, ajuda Amá buka osan pois mak ó kontinua fali.” Hatán ho lian sériu no kahur daudaun terigu.

“Karik ha’u nia Apá iha, nia sei la hatán hanesan ne’e.”

“Ana, ó foin ko’alia saida mak ne’e.” Mamá hatán ho lian hirus no lakohi ko’alia tan ho ha’u.

Saida mak sala ho ha’u nia liafuan, sala kah sei ha’u saudades aman ida nia prezensa hodi hakmaan tiha todan ne’e. Ha’u tau ahi hatuur tasu iha ahi-matan no sana daudaun hudi, Mamá nafatin hatudu oin-bius. Bainhira Avó-Pai hakat hakbesik mai Mamá ho lian hirus dehan;

“Katuas, ko’alia ho ó nia oan ba. Nia boot ona nia komesa ko’alia kona-ba nia aman. Uluk nia ki’ik ne’e sé mak tau matan hela ba nia.”

“Ana, ami la’ós bandu ó atu buka tuir ó nia aman, maibé nia prontu ka lae simu ó, sah tan agora nia mós iha ona  família rasik, sira moris hakmatek ona.”

“Papá, ha’u iha direitu atu hatene no besik ho ha’u nia aman” Hatán ho matan-been.

Ho lian hirus Mamá hatán;

 “Ha’u la’ós hakarak hadook ó husi ó nia aman, maibé nia rasik mak lakohi simu ó, tinan sanulu liubá hainhira ó hasoru nia iha loja China fatin uluk ha’u servisu ba. Ha’u buka tuir nia hela-fatin hodi ko’alia lian loos kona-ba ó maibé nia fatin nega no lakohi hatene buat saida de’it kona-ba ó, la fiar katak ó ne’e nia oan. Agora ó boot ona iha direitu atu hatene lia-loos.”

Ha’u tuur  nonook ho matan-been, tansá laiha ema ida mak bele komprende ha’u nia hakarak, ha’u bele forsa hasoru realidade maibé fuan ne’e hanesan namlele hela. Ba sé loos mak ha’u sei laran-metin. Se aman ida ne’ebé ha’u hein tinan naruk mós la simu ha’u nia prezensa. Inan ne’ebé sempre nakonu ho hirus bainhira ha’u husu kona-ba Papá.

Ha’u hein loron ida Papá nia matan bele nakloke no simu ha’u nu’udar nia oan, no inan ida sei hamriik iha ha’u nia sorin hodi dehan “Agus, ó nia oan mak ne’e.” sala kan se ha’u hakarak sente domin husi aman ida, sala kah se ha’u saudades nia.

Dili,  loron-18 fulan-Abríl tinan-2017